புதிய கூட்டணி ஆட்சிக்கோ அல்லது சுதந்திர கட்சி உறுப்பினர்கள் அமைச்சு பதவிகளை பெற்றுக்கொள்ளவோ அனுமதிக்காதிருக்க ஜனாதிபதி மைத்திரிபால சிறிசேன தீர்மானித்துள்ளதாக தகவல்கள் வெளியாகியுள்ளன.

நாடாளுமன்றம் கலைக்கப்பட்டு பொது தேர்தலுக்கு அழைப்பு விடுத்திருந்த ஜனாதிபதியின் தீர்மானம் சட்டத்திற்கு முரணானது என உச்சநீதிமன்றம் நேற்று மாலை அறிவித்திருந்தது.

இந்நிலையில், புதிய அரசாங்கத்தை அமைப்பதற்கான நடவடிக்கைகள் மேற்கொள்ளப்பட்டுள்ள நிலையில், பெரும்பாலும் இன்றய தினம் புதிய அரசாங்கம் அமைக்கப்பட கூடிய சாத்தியம் காணப்படுவதாக அரச தகவல்கள் தெரிவிக்கின்றன.

நீதிமன்றின் தீர்ப்பு வெளியானதும் அடுத்த கட்ட அரசியல் நடவடிக்கைகள் குறித்து ஜனாதிபதி மைத்திரிபால சிறிசேன ஐக்கிய மக்கள் சுதந்திர முன்னணியுடன் பேச்சுவார்த்தைகளையும் மேற்கொண்டிருந்தார்.

இந்நிலையிலேயே, புதிய கூட்டணி ஆட்சிக்கோ அல்லது சுதந்திர கட்சி உறுப்பினர்கள் அமைச்சு பதவிகளை பெற்றுக்கொள்ளவோ அனுமதிக்காதிருக்க ஜனாதிபதி மைத்திரிபால சிறிசேன தீர்மானித்துள்ளதாக தெரிவிக்கப்படுகின்றது.

இதேவேளை, பிரதமர் மற்றும் அமைச்சரவை நியமன இடைநிறுத்தத்துக்கு எதிராக மகிந்த தரப்பு செய்துள்ள மேன்முறையீடு இன்று உயர்நீதிமன்றத்தினால் நிராகரிக்கப்பட்டால் புதிய அரசாங்கத்தை அமைக்க ஜனாதிபதி மைத்திரிபால சிறிசேன அழைப்பு விடுப்பார் எனவும் தகவல்கள் வெளியாகியுள்ளன.

இலங்கையில் அரசியல் பதற்ற நிலை ஏற்பட்டுள்ள சூழ்நிலையில் மைத்திரி – மஹிந்த மந்திராலோசனையில் ஈடுபட்டுள்ளனர்.

நாடாளுமன்றம் கலைக்கப்பட்டமை சட்டவிரோதமானது என உச்ச நீதிமன்றம் இன்று தீர்ப்பு வழங்கியுள்ள நிலையில், பல அதிரடி மாற்றங்கள் ஏற்பட்டுள்ளன.

இந்நிலையில் சமகால நெருக்கடி நிலைமை குறித்து ஜனாதிபதி மைத்திரிபால சிறிசேன மற்றும் நாடாளுமன்ற உறுப்பினர் மஹிந்த ராஜபக்ஷ அவசர சந்திப்பில் ஈடுபட்டுள்ளனர்.

இதன்போது நீதிமன்ற தீர்ப்புக்கு மேற்கொள்ள வேண்டிய அரசியல் நடவடிக்கை தொடர்பில் தீவிரமாக ஆலோசிக்கப்பட்டு வருகிறது.

சந்திப்பில் ஐக்கிய மக்கள் சுதந்திர முன்னணி மற்றும் ஸ்ரீலங்கா பொதுஜன பெரமுன உறுப்பினர்களும் கலந்து கொண்டுள்ளனர்.

இந்த சந்திப்பின் போது சட்டவிரோதமாக நியமிக்கப்பட்ட பிரதமர் பதவியில் இருந்து விலகுவதற்கான அறிவிப்பை மஹிந்த வெளியிடுவார் என எதிர்பார்க்கப்படுகிறது

உச்ச நீதிமன்றத் தீரப்பின் பிரகாரம் நாடாளுமன்றம் தொடர்ந்தும் சட்ட ரீதியாக இயங்கும் நிலைக்கு வந்திருக்கிறது.

தற்போது இயங்கிக் கொண்டிருக்கும் நாடாளுமன்றம் சட்ட ரீதியற்றது என்று மகிந்த ராஜபக்ச அணியினர் குற்றம்சாட்டி வந்தனர். எனினும், இன்றைய தினம் உச்ச நீதிமன்றமானது தீர்க்கமான தீர்ப்பினை வழங்கியிருக்கிறது.

ஜனாதிபதி மைத்திரிபால சிறிசேன நாடாளுமன்றத்தை கலைத்தமையானது சட்ட ரீதியானது அல்ல என்றும், அது அரசியல் அமைப்புக்கு முரணானது என்றும் குறிப்பிட்டு தீர்ப்பு வழங்கியுள்ளது.

முன்னதாக, நாடாளுமன்றத்தில் நேற்றைய தினம் தன்னுடைய பெரும்பான்மையை ரணில் விக்ரமசிங்க நியமித்துள்ளார். ஆக, பெரும்பான்மை உறுப்பினர்களின் ஆதரவினை தற்போது ரணில் விக்ரமசிங்க கொண்டிருக்கிறார்.

தமிழ் தேசிய கூட்டமைப்பினரின் ஆதரவுடன், ரணில் விக்ரமசிங்க 117 என்ற பெரும்பான்மைய நாடாளுமன்றத்தில் காட்டியிருக்கிறார். இந்நிலையில் இன்றைய தினம் நீதிமன்றத் தீர்ப்பு வெளியாகியிருக்கிறது.

யார் பெரும்பான்மையை கொண்டிருக்கிறாரோ அவரை பிரதமராக நியமிக்க வேண்டும் என்று அரசியலமைப்பில் குறிப்பிடப்பட்டுள்ளது.

இந்நிலையில், நாடாளுமன்ற உறுப்பினர் ரணில் விக்ரமசிங்கவை பிரதமராக மைத்திரிபால சிறிசேன நியமிக்க வேண்டும். அவ்வாறு மீண்டும் பிரதமர் பதவியை ரணில் விக்ரமசிங்க ஏற்றுக் கொண்டால் ஐந்தாவது தடவையும் பிரதமர் என்னும் பதவியை ரணில் பெறுகிறார்.

குறிப்பாக, 1993–1994 ஆம் ஆண்டு காலத்திலும், 2001–2004 ஆண்டு சந்திரிகா அம்மையார் காலத்திலும் பிரதமராக செயற்பட்ட ரணில் விக்ரமசிங்க, 2015ம் ஆண்டு நிகழ்ந்த பொதுத் தேர்தலின் போது, மைத்திரிபால சிறிசேன வெற்றி பெற்றதையடுத்து நூறு நாள் வேலைத் திட்டத்தின் கீழ் ரணிலை பிரதமராக்கினார்.

பின்னர் நடந்த பொதுத் தேர்தலில் கூட்டாட்சி அமைந்த போதும் ரணில் பிரதமராக பதவியை தக்க வைத்துக் கொண்டார் நான்காவது முறையாக.

இப்போது நீதிமன்றம் வழங்கியிருக்கும் தீர்ப்பின்படியும், நாடாளுமன்றத்தில் தமிழ் தேசிய கூட்டமைப்பு வழங்கிய ஆதரவின்படியும், ரணிலுக்கு பிரதமராகும் வாய்ப்பு அதிகமாகியிருக்கிறது. அதாவது ஐந்தாவது தடவையாகவும் பிரதமராகும் வாய்ப்பு ஏற்பட்டிருக்கிறது.

ஆனால், ரணிலை பிரதமர் பதவியில் அமர்த்தமாட்டேன் என்று ஜனாதிபதி மைத்திரிபால சிறிசேன அறிவித்திருப்பதாக செய்திகள் வெளியாகியிருக்கின்றமை குறிப்பிடத்தக்கது.

உயர் நீதிமன்ற தீர்ப்புக்கு அமைய ஜனாதிபதி மைத்திரிபால சிறிசேன, புதிய அரசாங்கத்தை நியமிக்கும் செயற்பாடுகளை முன்னெடுப்பார் என ஐக்கிய மக்கள் சுதந்திர முன்னணியின் நாடாளுமன்ற உறுப்பினர் தயாசிறி ஜயசேகர தெரிவித்துள்ளார்.

உயர் நீதிமன்றம் வழங்கிய தீர்ப்பு தொடர்பாக ஊடகங்களிடம் கருத்து வெளியிடும் போதே அவர் இதனை கூறியுள்ளார்.

உயர் நீதிமன்றம் வழங்கிய தீர்ப்பை நாங்கள் ஏற்றுக்கொள்கிறோம். அந்த தீர்ப்புக்கு அமைய நடவடிக்கைகளை முன்னெடுக்க வேண்டி வரும்.

நீதிமன்றத்தின் தீர்ப்பு காரணமாக தேர்தல் நடத்தப்படாது. மற்றுமொரு தீர்ப்பு நாளை நீதிமன்றம் வழங்க உள்ளது. இதன் பின்னர் தேவையான தீர்மானங்கள் எடுக்கப்படலாம் எனவும் தயாசிறி ஜயசேகர குறிப்பிட்டுள்ளார்.

ஜனாதிபதி மைத்திரிபால சிறிசேன நீதிமன்றத்தை கலைத்ததாக வெளியிட்ட வர்த்தமானி அறிவித்தலானது செல்லுபடியற்றது என்றும், நாடாளுமன்றம் கலைக்கப்பட்டது சட்டத்துக்கு முரணானது என்றும் நீதிமன்றம் தீர்ப்பு வழங்கியிருக்கிறது.

வரலாற்றுச் சிறப்பு வாய்ந்த உச்ச நீதிமன்றத்தின் இந்த அதிரடி தீர்ப்பிற்குப் பின்னர் ஐக்கிய தேசிய கட்சியினர் கொண்டாட்டத்தி்ல் ஈடுபட்டுவருகின்றனர்.

வரலாற்றில் முதன்முறையாக ஜனாதிபதி ஒருவர் எடுத்த முடிவானது தவறானது என்று நீதிமன்றம் தீர்ப்பளித்திருக்கிறது என்று நாடாளுமன்ற உறுப்பினர் சுமந்திரன் மகிழ்ச்சி வெளியிட்டுள்ளார்.

ஜனநாயகத்திற்கும், அரசியலமைப்புக்கும் மதிப்பளித்து ஜனாதிபதி செயற்பட வேண்டும் என்று ரணில் விக்ரமசிங்க கேட்டுக் கொண்டுள்ளார். இனியாவது மைத்திரிபால சிறிசேன சரியான முடிவுகளை எடுக்க வேண்டும் என்றும், தவறானவர்களின் கருத்துக்களை அவர் கேட்க வேண்டாம் என்றும் சஜித் பிரேமதாஸ கேட்டுக் கொண்டுள்ளார்.

இந்நிலையில் இன்று உச்ச நீதிமன்றம் வழங்கியுள்ள தீர்ப்பின் விபரத்தினை சற்று நோக்கலாம், நான்கரை வருடங்களுக்கு முன்னர் ஜனாதிபதியினால் நாடாளுமன்றத்தைக் கலைக்க முடியாது என்று வழங்கப்பட்ட தீர்ப்பில் குறிப்பிடப்பட்டுள்ளது.

பிரமத நீதியரசர் நளின் பெரேரா உட்பட எழுவர் அடங்கிய நீதிபதிகள் குழுவினால் ஏகமனதாக இந்த மனுக்கள் மீதான தீர்ப்பு வழங்கப்பட்டுள்ளது.

குறித்த மனுக்கள் தொடர்பான விசாரணை டிசம்பர் 4 ஆம் திகதி முதல் 7 ஆம் திகதி வரையில் இடம்பெற்றது.

இம்மனுக்கள் பிரதம நீதியரசர் நளின் பெரேரா உள்ளிட்ட பிரியந்த ஜயவர்த்தன, பிரசன்ன ஜயவர்தன, சிசிர டி ஆப்ரு, விஜித் மாலல்கொட, புவனேக அலுவிஹாரே மற்றும் முர்து பெர்னாண்டோ ஆகிய ஏழு நீதியரசர்கள் குழாம் முன்னிலையில் விசாரணைக்கு எடுத்துக் கொள்ளப்பட்டன.

இதன்போது ஜனாதிபதியின் தீர்மானம் அரசியலமைப்பு முரணானது என தீர்ப்பு வழங்கப்பட்டுள்ளது.

ஐக்கிய தேசிய கட்சி, மக்கள் விடுதலை முன்னணி, ஸ்ரீலங்கா முஸ்லிம் காங்கிரஸ், தமிழ்த் தேசியக் கூட்டமைப்பு ஆகிய அரசியல் கட்சிகள் உட்பட பதின்மூன்று தரப்பினர்களினால் குறித்த மனுக்கள் தாக்கல் செய்யப்பட்டிருந்தமை குறிப்பிடத்தக்கது.

உச்ச நீதிமன்றத்தின் தீர்ப்பின் பிரகாரம், ஜனாதிபதி அரசியலமைப்புக்கு முரணாகச் செயற்பட்டுள்ளார். நாட்டில் அரசியல் அமைப்புக்கு முரணாக ஜனாதிபதி செயற்பட்டால் அவருக்கு எதிராக குற்றப் பிரேரணை ஒன்று கொண்டுவரப்பட்டு அவரை பதவியில் இருந்து நீக்க முடியும்.

இது தொடர்பான தகவல்கள் அண்மையில் வெளியாகியிருந்தன. இன்றைய நீதிமன்றத் தீரப்பும் தெளிவாக சொல்லப்பட்டிருக்கிறது, ஜனாதிபதியாக இருக்கும் ஒருவர் நான்கரை ஆண்டுகளுக்கு முன்னர் தன்னிச்சையாக கலைக்க முடியாது என்று.

ஆக. ஜனாதிபதி அரசியல் அமைப்பை அவமதித்து, அதனை மீறியிருக்கிறார். இதனால் அவருக்கு எதிராக எதிர் கட்சிகள் குற்றப்பிரேணை கொண்டுவர வேண்டும் என்று சிலர் கோரிக்கை விடுத்துள்ளனர்.

எதுவாயினும், மீண்டும் பிரதமராக ரணில் விக்ரமசிங்க பதவியேற்றால் தான் ஜனாதிபதி பதவியிலிருந்து விலகுவேன் என்று மைத்திரிபால சிறிசேன அண்மையில் அறிவித்திருந்தார் என்பது குறிப்பிடத்தக்கது.

-தமிழ்வின்-

ஜனாதிபதி மைத்திரிபால சிறிசேன முன்னிலையில் பிரதமராக ரணில் விக்ரமசிங்க பதிவிப்பிரமானம் செய்து கொள்வார் என நாடாளுமன்ற உறுப்பினர் ரவுப் ஹக்கீம் தெரிவித்துள்ளார்.

நீதிமன்றத் தீர்ப்பு வெளிவந்துள்ள நிலையில், இது தொடர்பாக செய்தியாளர்களிடம் பேசும் போதே அவர் இவ்வாறு குறிப்பிட்டுள்ளார்.

வரலாற்று முக்கியத்துவம் வாய்ந்த நீதிமன்றத் தீர்ப்பை எதிர்ப்பார்த்து ஒட்டு மொத்த இலங்கையர்கள் மட்டுமல்ல, சர்வதேச நாடுகளும், உள்நாட்டு ஊடகங்கள் மற்றும் சர்வதேச ஊடகங்கள் காத்திருந்தன.

இந்நிலையில், ஜனாதிபதி மைத்திரிபால சிறிசேனவினால் நாடாளுமன்றம் கலைக்கப்பட்டமைக்கு எதிரான மனுக்கள் மீதான இறுதித் தீர்ப்பு இன்று வெளியிட்டு இருக்கிறது.

இன்று மாலை 4 மணிக்கு இறுதி தீர்ப்பு அறிவிக்கப்படும் என நீதிமன்றம் அறிவித்திருந்தாலும், நீதிமன்றத் தீர்ப்புக்கள் வெளியாவதில் தாமதம் ஏற்பட்டிருந்தன.

நீதிமன்றத்தில் சட்டத்தரணிகள், அரசியல் பிரமுகர்கள், பொதுமக்கள், கட்சி ஆதரவாளர்கள், உள்நாட்டு மற்றும் சர்வதேச ஊடகவியலாளர்கள் என்று பலர் குவிந்திருந்த நிலையில் சிறிசேன, நாடாளுமன்றத்தை நான்கரை ஆண்டுகளுக்கு கலைக்க முடியாது என்று தீர்ப்பு வழங்கப்பட்டிருக்கிறது.

இந்நிலையில் இது தொடர்பாக கருத்துரைத்துள்ள அவர், இன்று இரவு மைத்திரிபால சிறிசேன முன்னிலையில் ரணில் விக்ரமசிங்க பிரதமராக பதவிப்பிரமானம் செய்வார் என்று குறிப்பிட்டுள்ளார்.

இதேவேளை ஜனாதிபதி மைத்திரி தலைமையில் இன்றிரவு கூட்டம் ஒன்று நடைபெறவுள்ளதாக செய்திகள் வெளியாகியுள்ளமை குறிப்பிடத்தக்கது.

நீதிமன்றத்தின் தீர்ப்பை நான் மதிக்க கடப்பட்டுள்ளேன். ஆனால் ரணிலை மீண்டும் பிரதமராக நியமிக்க மாட்டேன் என ஜனாதிபதி மைத்திரிபால சிறிசேன தெரிவித்துள்ளார்.

ஜனாதிபதி செயலகத்தில் நடந்த – ஐக்கிய மக்கள் சுதந்திர முன்னணியின் நாடாளுமன்ற குழுக் கூட்டத்தில் சற்று முன்னர் அவர் இதனைத் தெரிவித்துள்ளார்.

ரணிலை பிரதமராக நியமிக்க மாட்டேன், அதில் எந்த மாற்றமும் இல்லை. நாட்டை பாதுகாக்க நான் எடுத்த முடிவில் மாற்றம் செய்ய மாட்டேன் என அவர் குறிப்பிட்டுள்ளார்.

நாளை உயர்நீதிமன்றத்தில் நடைபெறும் மகிந்த தரப்பின் மேன்முறையீட்டு மனு மீதான விசாரணை முடிந்த பின்னரே அடுத்த கட்ட நடவடிக்கை எடுப்பதென்றும் இந்தக் கூட்டத்தில் தீர்மானம் எடுக்கப்பட்டுள்ளதாக தகவல்கள் வெளியாகியுள்ளன.