வவுனியா கள்ளிக்குளம் மகாவித்தியாலயத்தில் க.பொ.த சாதாரணதரத்தில் கல்வி கற்றுவரும் கஸ்டப்பிரதேச பாடசாலை மாணவிகள் க.பொ.த. சாதாரணதரப்பரீட்சை மாதிரி வினாத்தாள்கள் வழங்குமாறு கேட்டுக்கொண்டதற்கு இணங்க வன்னிப்பிராந்திய பிரதிப் பொலிஸ்மா அதிபர் தேசபந்து தென்னக்கோனினால் பரீட்சை மாதிரி வினாப்புத்தகம் வழங்கிவைக்கப்பட்டுள்ளது.

மாமடு பொலிஸ் பிரிவிற்குட்பட்ட பகுதியிலுள்ள ஒரே ஒரு தமிழ்பாடசாலையான கள்ளிக்குளம் மகாவித்தியாலயத்திற்கு வன்னிப்பிராந்திய பிரதிப் பொலிஸ்மா அதிபர் அலுவலகத்தில் பாடசாலை மாணவிகளிடம் நேற்று வவுனியா வர்த்தகர் சங்கத்தின் நிதி அனுசரணையில் வழங்கிவைக்கப்பட்டது.

இந்நிகழ்வில் வர்த்தகர் சங்கத்தலைவர் எஸ்.சுஜன், மற்றும் செயலாளர், பொருளாலர் ஆகியோரும் கலந்துகொண்டனர்.

வவுனியா நகரசபைத் தவிசாளர் பதவிக்கு வந்து நான்கு மாதங்கள் கடந்த நிலையிலும் வவுனியா பழைய பேருந்து நிலையப்பகுதியிலுள்ள கால்வாய்களில் துப்பரவுப்பணிகள் மேற்கொள்வதற்கு ஆக்கபூர்வமாக நடவடிக்கை எவையும் இடம்பெறவில்லை என மக்கள் தெரிவிக்கின்றனர்.

இப் பிரதேசம் துர்நாற்றம் வீசும் பகுதியாகவே தற்போதும் காணப்படுகின்றது. இதனால் இப்பகுதியில் மாணவர்கள், பொதுமக்கள் நடமாடமுடியாத நிலை காணப்படுகின்றது.

கடந்த காலங்களில் நகரசபை செயலாளரினால் மேற்கொள்ளப்பட்டு வந்த வேலைத்திட்டங்கள் பல தற்போது நடைமுறைப்படுத்தப்படவில்லை என பொதுமக்கள் தெரிவித்துள்ளனர். இது குறித்து மேலும் தெரிவிக்கும்போது,

வவுனியா பழைய பேருந்து நிலையப்பகுதியிலுள்ள கழிவுநீர் வடிந்தோடும் கால்வாய்கள் பராமரிப்பு இன்றி நீண்டகாலமாக காணப்படுகின்றது. இதனால் இப்பகுதியில் துர்நாற்றம் வீசுகின்றது.
இப்பகுதியைச் சுத்தப்படுத்தும் நடவடிக்கை எவையும் இடம்பெறவில்லை.

வவுனியா நகரசபைத் தவிசாளர் பதவிக்கு வந்து நான்கு மாதங்கள் கடந்த நிலையிலும் கழிவு நீர் வடிந்து செல்வதற்கும் துர்நாற்றம் வீசுகின்ற நிலையிலும் தவிசாளர் உரிய நடவடிக்கை எடுக்கவில்லை.

பொதுமக்களின் குற்றச்சாட்டு தொடர்பாக பேருந்து நிலைய வர்த்தகர்கள் சிலரிடம் கேட்டபோது, கால்வாய்கள் துர்நாற்றம் வீசுகின்றது. இது தொடர்பாக பல முறைப்பாடுகள் நேரடியாக நகரசபைக்கு வழங்கப்பட்டபோதும் இன்று வரையில் நடவடிக்கை மேற்கொள்ளப்படவில்லை என்று தெரிவித்துள்ளனர்.

பழைய பேருந்து நிலையப்பகுதிக்கு பேருந்துகள் இன்றி பொதுமக்களின் வரவு குறைந்த நிலையில் காணப்படுகின்றபோதிலும் துர்நாற்றம் வீசும் காரணத்தினால் மேலும் இப்பகுதிக்கு பொதுமக்கள் வருவது குறைந்து காணப்படுகின்றது என்றும் தெரிவித்துள்ளனர்.

பழைய பேருந்து நிலையப்பகுதிகள் பலவற்றில் இவ்வாறு துர்நாற்றம் வீசும் நிலை காணப்படுகின்றது. நகரசபையின் பூரண பொறுப்பிலுள்ள பேருந்து நிலையப்பகுதியை கண்காணித்து மேற்பார்வை செய்யவேண்டிய பொறுப்பிலிருந்து நகரசபை விலகிச் சென்றுள்ளதை அவதானிக்க முடிகின்றது என்பது குறிப்பிடத்தக்கது.

வவுனியா செட்டிக்குளம் – சண்முகபுரத்தில் இன்று (26.07) அதிகாலை காட்டு யானை தாக்கியதில் படுகாயமடைந்த நபரொருவர் வவுனியா மாவட்ட பொது வைத்தியசாலையில் அனுமதிக்கப்பட்டுள்ளார்.

இன்று அதிகாலை 3 மணியளவில் சுப்பையா பொன்னையா (வயது 70) என்பவர் தனது வீட்டு காணிக்குள் எதோ சத்தம் கேட்பதை உணர்ந்து வீட்டிற்கு வெளியே சென்ற சமயத்தில் காட்டு யானையின் தாக்குலுக்கு உள்ளாகியுள்ளார்.

அவரின் அலறல் சத்தம் கேட்ட அயலவர்கள் அவரை மீட்டெடுத்து வவுனியா மாவட்ட பொது வைத்தியசாலையில் அனுமதித்துள்ளனர்.

வவுனியா செட்டிக்குளம், ஓமந்தை, நெடுங்கேணி, ஒட்டிசுட்டான் போன்ற பகுதிகளின் காட்டு யானைகள் மக்களின் குடியிருப்புகளுக்கு சென்று விவசாய நிலங்களை சேதப்படுத்துவதுடன் குடியிருப்புக்களையும் சேதமாக்குகின்றன.

வவுனியா வடக்கு பிரதேச சபைக்குட்பட்ட உள்ளக வீதிகள் புனரமைக்கும் பணிகள் வவுனியா வடக்கு பிரதேச சபையால் ஆரம்பித்து வைக்கப்பட்டுள்ளன.

வடக்கு மாகாண சபை உறுப்பினர் மருத்துவர் ப.சத்தியலிங்கம் அவர்களின் வேண்டுகோளிற்கமைவாக வடக்குமாகாண சபையால் ஒதுக்கப்பட்ட மாகாண குறித்தொதுக்கப்பட்ட அபிவிருத்தி கொடைநிதியில் முதற்கட்டமாக மூன்று வீதிகள் புனரமைக்கப்படவுள்ளன.

மருதோடை உஞ்சல்கட்டி வீதி, கிரிசுட்டான் வீதி, பனைநின்றான் வீதி என்பனவே திருத்தப்படவுள்ளன. 10 மில்லியன்ரூபா ஒதுக்கீடு செய்யப்பட்டள்ளமை குறிப்பிடத்தக்கது

நேற்று முன்தினம் மருதோடையில் நடைபெற்ற வீதிதிருத்த ஆரம்ப நிகழ்வில் வ.மா.ச உறுப்பினர் மருத்துவர் ப.சத்தியலிங்கம், மா.ச.உறுப்பினர் ஜி.ரி.லிங்கநாதன், வடக்கு பிரதேச சபையின் தவிசாளர் ச.தணிகாசலம் மற்றும் பிரதேச சபை உறுப்பினர்களும் கலந்துகொண்டனர்.

வவுனியா இரணை இலுப்பைக்குளம் பகுதியிலிருந்து வவுனியாவிற்கு சட்டவிரோதமாக எடுத்துச் செல்லப்பட்ட 20 மாடுகளையும் 7ஆடுகளையும் இன்று(25.07) கிடாச்சூரியில் கைப்பற்றியுள்ளதாக ஈச்சங்குளம் பொலிசார் தெரிவித்துள்ளனர். இச்சம்பவம் குறித்து மேலும் தெரியவருகையில்,

இன்று விஷேட அதிரடிப்படையினரால் இரணை இலுப்பைக்குளம் பகுதியிலிருந்து வவுனியாவிற்கு சட்டவிரோதமான முறையில் கடத்திச் செல்லப்பட்ட 20 மாடுகளை வாகனத்துடன் சாரதி உதவியாளர் இருவருடன் கைது செய்துள்ளதாகவும் கைது செய்யப்ட்டவர்களுடன் வாகனம், 20 மாடுகள் ஈச்சங்குளம் பொலிசாரிடம் மேலதிக விசாரணைகளுக்காக ஒப்படைக்கப்பட்டுள்ளது.

விசாரணைகளின் பின்னர் நாளை கைப்பற்றப்பட்ட 20 மாடுகளையும் வாகனம், சாரதி உதவியாளர் ஆகியோரை நீதவான் நீதிமன்றில் முற்படுத்த நடவடிக்கை மேற்கொள்ளப்பட்டுள்ளது.

இதேவேளை இன்று சட்டவிரோதமான முறையில் வாகனம் ஒன்றில் கொண்டு செல்லப்பட்ட 7 ஆடுகளையும் சந்தேக நபர் ஒருவருடன் கைது செய்யப்பட்டுள்ளதாகவும் இரணைஇலுப்பைக்குளம் பகுதியிலிருந்து வவுனியாவிற்கு எடுத்துச் செல்லப்பட்டுள்ளபோதே ஈச்சங்குளம் பொலிசார் கைப்பற்றியுள்ளனர்.

தற்போது ஈச்சங்குளம் பொலிஸ் நிலையத்தில் தடுத்து வைக்கப்பட்டு விசாரணைகளை மேற்கொள்ளப்பட்டு வருகின்றன மேலதிக விசாரணைகளின் பின்னர் நீதிமன்றத்தில் முற்படுத்த நடவடிக்கை மேற்கொள்ளப்பட்டு வருவதாகவும் பொலிசார் மேலும் தெரிவித்துள்ளனர்.

வவுனியா மாவட்ட செயலகத்தில் வடிகால் அமைப்பு சீரின்மை காரணமாக கடந்த காலங்களில் பெய்த கடும் மழை காரணமாக பல அலுவலகங்கள் மழை வெள்ளத்தில் மூழ்கியிருந்தன.

இந்நிலையில் வடிகால்களை சீராக்குமாறு அலுவலகத்தினர் கோரியதையடுத்து மாவட்ட செலயகத்தினால் தற்போது சீரமைக்கும் பணிகள் இடம்பெற்று வருகின்றன.

இந்நிலையில் தற்போது மாவட்ட செயலகத்தில் வடிகால்கள் அமைக்கும் பணிகள் தீவிரமாக இடம்பெற்று வருகின்றதைக்காணக்கூடியதாக உள்ளது.

சகல திணைக்களங்களுக்கும் முன்பாக வடிகால்கள் அகலமாக்கப்படுவதுடன் மழை வெள்ளம் வடிந்தோடுவதற்கான அமைப்புக்களை ஏற்படுத்தப்பட்டு வருகின்றன. இதையடுத்து பருவமழைக்கு முன்னர் சகல வடிகால் சீராக்கும் அமைக்கும் பணிகள் நிறைவுக்கு வரவுள்ளமை குறிப்பிடத்தக்கது.