வவுனியா வர்த்தக சங்கத்தின் புதிய நிர்வாகம் பல்வேறு சர்ச்சைகளுக்கு மத்தியில் இன்று இடம்பெற்றுள்ளதுடன் இளம் சமூகத்தினர் தெரிவு செய்யப்பட்டு பதவிகளும் பொறுப்பேற்கப்பட்டுள்ளன.

கேந்திர முக்கியத்துவம் வாய்ந்த நகரான வவுனியா மாவட்டத்தை மேலும் சிறப்பான வாடிக்கையாளர் சேவை நகராக மாற்றும் திட்டத்துடன் இன்று (01.07.2018) காலை 10 மணியளவில் வவுனியா நகரசபை வீதியில் அமைந்துள்ள வாடி வீடு மண்டபத்தில் ஆரம்பமாகிய பொதுகூட்டம் பல்வேறு எதிர்பார்ப்புகளுக்கு மத்தியில் இப் புதிய நிர்வாகம் தெரிவு செய்யப்பட்டுள்ளது.

இதன்படி சங்கத்தினுடைய புதிய நிர்வாகத்தின் (தலைவர்) சுஜன் சண்முகராஜா, (செயலாளர்) ஆறுமுகம் அம்பிகைபாலன், (பொருளாளர்) நடராசா சுந்தரதாசன் ஆகியோர் இந் நிர்வாக சபையில் தெரிவு செய்யப்பட்டுள்ளனர்.

எதிர்பார்த்தாவாறே இளம் தலைமுறையினரையும் புதிய நிர்வாகத்திற்குள் உள்வாங்கி வர்த்தகர் சங்கத்தின் நம்பகரமான செயற்பாட்டினை மேற்கொள்வதற்கு அத்திவாரம் இட்டுள்ளதாக பொதுக்கூட்டத்தில் கலந்து கொண்ட வர்த்தக பிரமுகர்கள் சிலர் கருத்துக்களை வெளியிட்டனர்.

இக் கூட்டத்தில் முன்னாள் வட மாகாண சபை உறுப்பினர் செ.மயூரன், வவுனியா பிரதேச செயலாளர், வவுனியா நகரசபை தலைவர், உப தலைவர், உறுப்பினர்கள், வவுனியா மாவட்ட பொலிஸ் நிலைய பொறுப்பதிகாரி, வவுனியா தெற்கு தமிழ் பிரதேச சபை தலைவர், வவுனியா மாவட்ட முச்சக்கரவண்டி உரிமையாளர் சங்கத்தின் தலைவர், வவுனியா தனியார் பேரூந்து சங்க தலைவர், வர்த்தகர்கள் என பலரும் கலந்து கொண்டிருந்தமை குறிப்பிடத்தக்கது.

வவுனியா ஹொரவப்பொத்தானை வீதி இலுப்பையடி சந்திக்கு அருகே நேற்று (30.06.2018) நிதி நிறுவன ஊழியரொருவர் கர்ப்பிணிப் பெண் மீது தாக்குதல் மேற்கொண்டுள்ளார். இதனையடுத்து கர்ப்பிணிப்பெண் வவுனியா மாவட்ட பொது வைத்தியசாலையில் அனுமதிக்கப்பட்டுள்ளார். இச் சம்பவம் தொடர்பாக மேலும் தெரியவருகையில்,

வவுனியா மில் வீதியில் அமைந்துள்ள நிதி நிறுவனத்தில் நபரொருவர் வாகனத்திற்கு லீசிங் பெற்றுள்ளார். கடந்த மூன்று மாதங்களாக மாதாந்த லீசிங் பணத்தினை செலுத்தவில்லை. அதனையடுத்து வாகனத்தினை பறிமுதல் செய்வதற்கு அனுமதியினை பெற்று பறிமுதல் செய்வதற்கு நான்கு நபர்கள் சென்றுள்ளனர்.

குறித்த வாகனத்தின் உரிமையாளர் நேற்றையதினம் மாலை வவுனியா ஹொரவப்பொத்தானை வீதி இலுப்பையடி சந்திக்கு அருகே வீதியில் வாகனத்தினை தரித்து விட்டு வர்த்தக நிலையத்திற்கு பொருட்களை கொள்வனவு செய்ய சென்றுள்ளார். இதன் போது வாகனத்தினுள் அவரது மனைவியும் (7 மாத கர்ப்பிணி) , அவரது உறவினர்களும் (பெண்கள்) இருந்துள்ளனர்.

இதன் போது திடீரென நிதி நிறுவனத்தின் வாகனத்தினை பறிமுதல் செய்யும் ஊழியர் வாகனத்தில் சாரதியின் ஆசனத்தில் ஏறி அமர்ந்துள்ளார். திடீரென நபரோருவர் வாகனத்தில் ஏறியதினால் பதட்டமடைந்த வாகனத்தின் முன்பக்கத்தில் சாரதி ஆசனத்திற்கு அருகேயிருந்த வாகன உரிமையாரின் மனைவி (7 மாத கர்ப்பிணி) இனந்தெரியாத நபர்களின் அத்துமீறலால் வாகனத்தின் திறப்பினை எடுப்பதற்கு முயன்றுள்ளார்.

இதன் போது கர்ப்பிணிப்பெண் மீது நிதி நிறுவனத்தில் ஊழியர் தாக்குதல் மேற்கொண்டுள்ளார். தாக்குதலுக்கு உள்ளாகிய கர்ப்பிணி பெண் சிகிச்சைக்காக வவுனியா மாவட்ட பொது வைத்தியசாலையில் அனுமதிக்கப்பட்டுள்ளார்.

இச் சம்பவம் தொடர்பாக வவுனியா பொலிஸ் நிலையத்தில் மேற்கொள்ளப்பட்ட முறைப்பாட்டின் பிரகாரம் வவுனியா மாவட்ட பொலிஸ் நிலைய பொறுப்பதிகாரி மகிந்த வில்வ ஆராட்சி பணிப்பின் பேரில் குறித்த நிதி நிறுவனத்தில் வாகனத்தினை பறிமுதல் செய்யும் ஊழியர் கைது செய்யப்பட்டு விளக்கமறியலில் வைக்கப்பட்டுள்ளார்.

இவ் விடயம் தொடர்பாக வாகனத்தின் உரிமையாளர் கருத்து தெரிவிக்கையில், நான் வாகனத்தின் லீசிங்க்கு உரிய பணத்தினை காசோலையாக வழங்கினேன். பின்னர் காசோலையில் காசு என கூறிப்பிடப்பட்டுள்ளதாகவும் அவ்விடத்தில் அவர்களது அலுவலகத்தின் பெயர் குறிப்பிட வேண்டுமேன குறிப்பிட்டதோடு குறித்த காசோலையை ஏற்றுக்கொள்ள காலம் கடந்துவிட்டது என தெரிவித்தே எனது வாகனத்தினை பறிமுதல் செய்துள்ளனர். இருப்பினும் காசோலை மாற்றம செய்யப்பட்டு நிதி நிறுவனத்தில் கையளிக்கப்பட்டுள்ளது.

காசோலை மற்றும் பணம் ஆகியவற்றை செலுத்தியதோடு வாகனத்தை நிதி நிறுவனத்தில் ஒப்படைத்துவிட்டு மீதமுள்ள பணத்தை செலுத்தி விட்டு வாகனத்தை மீளபபெறுவதாகவும் கூறியுள்ளார்.

அதற்கு நிதி நிறுவன முகாமையாளர் வாகனத்துக்கு எந்த சேதமும் வராது என உறுதி அளித்ததாகவும் தெரிவித்தார்.

இவ்விடயத்தினை விட எனது மனைவி 7மாத கர்ப்பிணி அவர் மீது நிதி நிறுவன ஊழியர் தாக்குதல் மேற்கொண்டுள்ளார். எனது மனைவிக்கு எதேனும் நடந்தால் யார் பொறுப்பு கூறுவார். எனவே இவ் விடயத்தில் எனது மனைவி மீது தாக்குதல் மேற்கொண்டமை தொடர்பாக பொலிஸார் நீதியான நடவடிக்கையினை மேற்கொள்ள வேண்டுமேன தெரிவித்தார்.

மில் வீதியில் அமைந்துள்ள குறித்த நிதி நிறுவனத்தின் ஊழியர் மீது இவ்வாறான பல முறைப்பாடுகள் பொலிஸ் நிலையத்தில் உள்ளமை குறிப்பிடத்தக்கது.

வவுனியா ஹொரவப்பொத்தானை வீதியில் அமைந்துள்ள வர்த்தக நிலையம் இன்று (01.07.2018) காலை 10 மணியளவில் திடீரென தீப்பற்றியுள்ளது.

வர்த்தக நிலையத்தில் உள்ள குளிர்சாதனப்பெட்டியில் ஏற்பட்ட மின்சார ஒழுக்கு காரணமாக தீப்பற்றியுள்ளது. அதனையடுத்து வவுனியா நகரசபையின் தீயணைப்பு படையினருக்கு வர்த்தக நிலையத்தின் உரிமையாளர்கள் தொலைபேசி மூலம் தெரியப்படுத்தியுள்ளனர்.

சிறிதாக பரவிய தீயிணை அயலவர்கள் கட்டுப்பாட்டுக்குள் கொண்டு வந்துள்ளனர். சம்பவ இடத்திற்கு அதிவிரைவாக தீயணைப்பு படையினர் விரைந்த போதிலும் அதற்கு முன்னரே தீ கட்டுப்பாட்டுக்குள் கொண்டு வரப்பட்டுள்ளது.

குளிர்சாதப்பெட்டியின் வயரில் ஏற்பட்ட மின் ஒழுக்கே இத் தீ விபத்துக்கு காரணமெனவும் எனினும் வர்த்தக நிலையத்திற்கு எவ்வித சேதங்களும் ஏற்படவில்லை என வர்த்தக நிலையத்தின் உரிமையாளர் தெரிவித்தார்.

வவுனியா புளியங்குளம் பகுதியில் இன்று(30.06) பிற்பகல் இடம்பெற்ற விபத்து ஒன்றில் வயோதிபர் ஒருவர் படுகாயமடைந்த நிலையில் வவனியா பொது வைத்தியசாலையின் அனுமதிக்கப்பட்டுள்ளதாக பொலிசார் தெரிவித்துள்ளனர். இச்சம்பவம் குறித்து மேலும் தெரியவருகையில்,

இன்று பிற்பகல் 12 மணியளவில் புளியங்குளம் சுகாதார வைத்திய அதிகாரி பணிமனைக்கு முன்பாக மோட்டார் சைக்கில் ஒன்றில் கடைக்குச் சென்ற வயோதிபர் ஒருவரை பின்னால் வந்த கார் மோதியுள்ளது.

இதில் படுகாயமடைந்த வயோதிபர் உடனடியாக வவுனியா பொது வைத்தியசாலையில் விபத்துப்பிரிவில் அனுமதிக்கப்பட்டுள்ளார்.
புளியங்குளம் பகுதியைச் சேர்ந்த மைக்கல் டேவிட் என்ற 68 வயது வயோதிபரே இவ்வாறு அனுமதிக்கப்பட்டுள்ளார்.

இவரது இரு கால்களுக்கும் சேதம் ஏற்பட்டுள்ளதுடன் சிகிச்சை பெற்று வருகின்றார். மேலதிக விசாரணைகளை புளியங்குளம் பொலிசார் மேற்கொண்டு வருகின்றனர்.

வவுனியா ஓமந்தை பொலிஸ் பிரிவில் நேற்று (29.06) சட்டவிரோத கசிப்பு 5 போத்தல்களை தனது உடமையில் வைத்திருந்த குடும்பஸ்தர் ஒருவரை வன்னிப்பிராந்திய பிரதிப் பொலிஸ்மா அதிபரின் தலைமையின் கீழ் செயற்படும் போதை ஒழிப்பு பிரிவினர் கைது செய்துள்ளதாகத் தெரிவித்துள்ளனர்.

இச்சம்பவம் குறித்து மேலும் தெரியவருகையில், நேற்று பிற்பகல் ஓமந்தை பொலிஸ் பிரிவின் பாலமோட்டை, குஞ்சுக்குளம் பகுதியில் சட்விரோதமான கசிப்பு நடவடிக்கை இடம்பெற்று வருவதாக வன்னிப்பிராந்திய பிரதிப் பொலிஸ்மா அதிபரின் தலைமையில் கீழ் செயற்படும் போதை ஒழிப்புப்பிரிவினருக்கு கிடைத்த தகவல் அடிப்படையில்,

அங்கு சென்று சோதனை நடவடிக்கை மேற்கொண்டபோது அப்பகுதியைச் சேர்ந்த 3 பிள்ளைகளின் தந்தையான 38வயதுடைய நபர் ஒருவர் தனது உடமையில் 5 போத்தல் சட்டவிரோத கசிப்பு வைத்திருந்த குற்றச்சாட்டில் கைது செய்யப்பட்ட நபரை மேலதிக விசாரணைகளுக்காக ஓமந்தை பொலிசாரிடம் ஒப்படைக்கப்பட்டுள்ளார்.

மேலதிக விசாரணைகளின் பின்னர் இன்று நீதவான் நீதிமன்றில் முற்படுத்த நடவடிக்கை மேற்கொள்ளப்பட்டு வருவதாகவும் பொலிசார் மேலும் தெரிவித்துள்ளார்.