நீதிமன்றம் வழங்கிய உத்தரவின் பேரில் சிறுவர் நன்னடத்தை முகாமில் தடுத்து வைக்கப்பட்டிருந்த வெலிஓய காவல் நிலையத்தினுள் துஸ்பிரயோகத்திற்கு உள்ளானதாக கூறப்படும் 15 வயது சிறுமி குறித்த முகாமில் இருந்து தப்பிச் சென்றுள்ளதாக தெரிவிக்கப்படுகிறது.

சிறுமி தடுத்து வைக்கப்பட்டிருந்த அனுராதபுரம் – அசோக குழந்தைகள் பராமரிப்பு நிலையத்தில் இருந்து குறித்த முறைப்பாடு கிடைக்கப்பெற்றுள்ளதாக காவற்துறை தெரிவித்தது.

இது தொடர்பில் அனைத்து காவல் நிலையங்களுக்கும் அறிவிக்கப்பட்டுள்ளதாக அனுராதபுரம் காவற்துறையின் பேச்சாளர் ஒருவர் தெரிவித்தார்.

குறித்த சிறுமியை துஸ்பிரயோகத்திற்கு உட்படுத்திய சம்பவம் தொடர்பிலான வழக்கு இன்று கெபிதிகொல்லேவ நீதவான் நீதிமன்றில் விசாரணைக்கு எடுத்துக் கொள்ளப்பட்ட நிலையில் , சம்பவம் தொடர்பில கைது செய்யப்பட்டுள்ள காவற்துறை கான்டபிலை எதிர்வரும் 13ம் திகதி வரை மீண்டும் விளக்கமறியலில் வைக்குமாறு நீதவான் உத்தரவிட்டுள்ளார்.

கம்பஹா அத்தனகல்ல – அலவல பிரதேசத்தில் மரம் ஒன்று சரிந்து விழுந்தில் 14 வயது மாணவன் உயிரிழந்துள்ளார். அலவல மகாவித்தியாலத்தில் 9 வகுப்பில் பயிலும் துலான் செனிது என்ற மாணவனே இவ்வாறு பலியாகியுள்ளார்.

இந்த மாணவன், பாடசாலையில் நேற்று நடத்தப்பட்ட பகுதி நேர வகுப்பில் கலந்து கொண்ட தனது சகோதரனை வீட்டுக்கு அழைத்து வர பாடசாலை அருகில் சென்று காத்திருந்த போது அங்கிருந்த தென்னை மரம் ஒன்று சரிந்து மாணவன் மீது விழுந்துள்ளது.

சம்பவத்தில் படுகாயமடைந்த மாணவனை அருகில் இருந்தவர்கள் வைத்தியசாலையில் சேர்த்துள்ளனர். எனினும் வைத்தியசாலைக்கு செல்லும் வழியிலேயே மாணவன் உயிரிழந்துள்ளார்.

இந்த சம்பவம் குறித்து நிட்டம்புவ பொலிஸார் விசாரணைகளை மேற்கொண்டு வருகின்றனர்.

மனைவியை கொலை செய்த கணவர் தானும் தற்கொலை செய்துள்ளார் என ஜா-எல பொலிஸார் தெரிவித்துள்ளனர்.

நேற்று மாலை கணவனுக்கும், மனைவிக்கும் இடையில் ஏற்பட்ட கருத்து வேறுபாடு காரணமாக மனைவியை தாக்கி கொலை செய்துள்ளார். பின்னர், கணவரும் தற்கொலை செய்து கொண்டதாக ஆரம்பகட்ட விசாரணைகளில் இருந்து தெரியவந்துள்ளது.

இது தொடர்பாக பொலிஸாருக்கு கிடைத்த தகவலையடுத்து விசாரணைகளை மேற்கொண்டு வருவதாக அவர்கள் தெரிவித்துள்ளனர்.

இதேவேளை, இருவரினதும் சடலம் மருத்துவ பரிசோதனைக்காக மருத்துவமனையில் ஒப்படைக்கப்பட்டுள்ளதாகவும், மேலதிக விசாரணைகள் மேற்கொள்ளப்பட்டு வருவதாகவும் பொலிஸார் தெரிவித்துள்ளனர்.

நாவலப்பிட்டி – கண்டி பிரதான வீதியில் பேருந்துடன், மோட்டார் சைக்கிளொன்று மோதி விபத்திற்கு உள்ளானதில் ஒருவர் ஸ்தலத்திலேயே பலியாகியுள்ளார்.

இந்த விபத்து இன்று காலை இடம்பெற்றுள்ள நிலையில், நாலப்பிட்டி – பல்லேகல பகுதியை சேர்ந்த 24 வயதுடைய ஜயசேகர முதியன்சலாகே அமில என்ற இளைஞனே பலியாகியுள்ளதாக பொலிஸார் தெரிவித்துள்ளனர்.

முந்திச் செல்ல பெருத்தமற்ற இடத்தில் மோட்டார் சைக்கிள் லொறியொன்றை முந்திச் செல்ல முற்பட்டுள்ளது.

இதன்போதே மோட்டார் சைக்கிள் வழுக்கிச் சென்று எதிரே வந்த பேருந்தில் மோதியுள்ளதாக நாவலப்பிட்டி பொலிஸார் குறிப்பிட்டுள்ளனர்.

இதேவேளை சடலம் நாவலப்பிட்டி வைத்தியசாலையில் வைக்கப்பட்டுள்ளதுடன், விபத்து தொடர்பில் மேலதிக விசரணைகள் மேற்கொள்ளப்பட்டு வருகின்றன.

இலங்கையில் பிறந்து வெளிநாட்டில் வளர்த்த இளம் பெண்ணினால் விசேட வேலைத்திட்டம் ஒன்று கொழும்பில் முன்னெடுக்கப்பட்டுள்ளது.

வறுமை காரணமாக வெளிநாட்டவர்களுக்கு பிள்ளைகளை தத்துக் கொடுத்த தாய்மார்கள் தங்கள் பிள்ளைகளை தேடி கொள்வதற்காக இந்த வேலைத்திட்டம் முன்னெடுக்கப்பட்டுள்ளது.

ருவன்வெல்ல தாய்க்கு பிறந்து நெதர்லாந்தில் வளர்ந்த சந்தமாலி அல்லது பன் ரோசன் என அழைக்கப்படும் பெண்ணினால் இந்த வேலைத்திட்டம் ஆரம்பிக்கப்பட்டுள்ளது.

நெதர்லாந்து உட்பட ஐரோப்பிய நாடுகளிலுள்ளவர்களுக்கு தத்துக் கொடுக்கப்பட்ட பிள்ளைகளின் பெற்றோரை கண்டுபிடிப்பதற்காக இலங்கை வருகின்றனர். தங்கள் தாய்மார்களை கண்டுபிடிப்பதில் அவர்கள் பெரும் சிமரங்களை சந்திக்கின்றனர்.

சொந்த பெற்றோர்களை கண்டுபிடிப்பதுடன், தங்கள் பிள்ளைகளை கண்டுபிடிப்பதற்கு தாய்மார்கள் முயன்று வருகின்றனர். இந்நிலையில் இலகுவில் கண்டுபிடிக்கும் வகையில் நெதர்லாந்து உட்பட ஐரோப்பிய நாடுகளுக்கு அறிவித்து அவர்களின் உதவியுடன் டிஎன்ஏ வங்கி ஒன்றை ஸ்தாபிப்பதே வேலைத்திட்டத்தின் நோக்கமாகும்.

கடந்த 3ஆம் திகதி ஞாயிற்று கிழமை விஹார மகா தேவி பூங்காவில் சந்திப்பு ஒன்றை நடத்தியுள்ளார். தங்கள் பிள்ளைகளை வெளிநாடுகளுக்கு வழங்கிய தாய்மார்கள் இருப்பின் தனக்கு தகவல் வழங்குமாறு கையேடு ஒன்றை அவர் பகிர்ந்துள்ளார்.

“நாங்கள் பிள்ளைகளை வழங்கிய தாய்மார்களின் தகவல்களை சேகரித்து நெதர்லாந்து அரசாங்கத்திற்கு வழங்குவோம். நெதர்லாந்து அரசாங்கம் எங்களுக்கு உதவும் என நாங்கள் நம்புகின்றோம் என சந்தமாலி நம்பிக்கை வெளியிட்டுள்ளார்.

மஸ்கெலியாவில் சுமார் நான்கு வயதான சிறுவனொருவன் சொக்கலெட் (chocolate) என நினைத்து மாத்திரைகளை சாப்பிட்டு உயிரிழந்த சம்பவம் அப்பகுதியை சோகத்தில் ஆழ்த்தியுள்ளது.

இந்த சம்பவம் நேற்று இரவு 10 மணியளவில் இடம்பெற்றுள்ளதாக மஸ்கெலியா பொலிஸார் தெரிவித்துள்ளனர்.

குறித்த சிறுவன், தந்தை கொண்டு வந்த பையினுள் சொக்லெட்டுக்களை தேடும் பொழுது சிறுவனது கையில் மாத்திரை கிடைத்துள்ளது. அதனை சொக்லெட் என நினைத்து சிறுவன் உட்கொண்டுள்ளதாக ஆரம்பகட்ட விசாரணைகளில் இருந்து தெரியவந்துள்ளது.

இதனையடுத்து பெற்றோர் சிறுவனை மஸ்கெலியா வைத்தியசாலைக்கு கொண்டு சென்ற நிலையில் அங்கிருந்து கிளங்கன் வைத்தியசாலைக்கு மாற்றப்பட்டுள்ளார்.

பின்பு அங்கிருந்து சிறுவன் கண்டி மாவட்ட வைத்தியசாலைக்கு மாற்றப்பட்ட போது உயிரிழந்துள்ளதாக தெரிவிக்கப்படுகிறது.

சடலம் கண்டி மாவட்ட வைத்தியசாலையின் பிரேத அறையில் வைக்கபட்டுள்ளதுடன், பிரேத பரிசோதனையின் பின்னர் உறவினர்களிடம் ஒப்படைக்கப்பட உள்ளதாக பொலிஸார் தெரிவித்துள்ளனர்.

சம்பவத்தில் ஸ்ரீ மனோகரன் மர்வின் என்ற சிறுவனே உயிரிழந்துள்ளதுடன், சம்பவம் தொடர்பில் மஸ்கெலியா பொலிஸார் மேலதிக விசாரணைகளை மேற்கொண்டு வருகின்றனர்.

சிலாபம் பகுதியில் கடலில் குதித்து தற்கொலை செய்ய முயன்ற பெண் ஒருவரை பிரதேசவாசிகள் மீட்டுள்ளனர். குறித்த சம்பவம் நேற்று பிற்பகல் இடம்பெற்றுள்ளதாக தெரியவந்துள்ளது.

பிரதேசவாசிகளால் மீட்கப்பட்ட இந்த பெண் சிலாபம் வைத்தியசாலையில் சிகிச்சைக்காக அனுமதிக்கப்பட்டுள்ளார்.

அத்துடன், வைத்தியசாலையில் அனுமதிக்கப்பட்டுள்ள பெண் யார் என்பதை அடையாளம் காணமுடியாது உள்ளதாகவும் அவரின் நிலைமை கவலைக்கிடமாக உள்ளதாகவும் தெரிவிக்கப்படுகின்றது.

மேலும், 38 வயதான இந்த பெண் ஏன் கடலில் குதித்து தற்கொலை செய்து கொள்ள முயற்சி செய்துள்ளார் என்பது தொடர்பில் சிலாபம் பொலிஸார் விசாரணைகளை முன்னெடுத்துள்ளனர்.

யாழ்ப்பாணம் வடமராட்சி பகுதியில், மின்சார இணைப்புக் கம்பங்களில் பொருத்தப்பட்டிருந்த தொலைக்காட்சி கேபிள்கள் அகற்றப்பட்டுள்ளன.

குறித்த கேபிள்கள் நேற்று இலங்கை மின்சார சபையினரால் அகற்றப்பட்டுள்ளதாக தெரிவிக்கப்படுகின்றது.

இதனால் பகுதியில் தொலைக்காட்சி அலைவரிசைகளை கண்டுகளிக்க முடியாத நிலையை மக்கள் எதிர்நோக்கியுள்ளனர்.

எவ்வாறாயினும் தொலைக்காட்சி கேபிளூடாக மின் கடத்தப்பட்டமையால் யாழில் ஏழு உயிர்கள் காவு கொள்ளப்பட்டுள்ளன.

மேலும், எதுவித அனுமதியும் பெறப்படாது மின் கம்பங்களினூடாக கேபிள் இணைப்புக்கள் பொருத்தப்பட்டுள்ளதாக மின்சக்தி அமைச்சு சுட்டிக்காட்டியிருந்ததாக குறிப்பிடப்படுகின்றது.