சவுதி அரேபியாவில் சிறு நிறுவனத்தின் முதலாளிக்கு ஓட்டுநராக இந்தியாவைச் சேர்ந்த ஒருவர் வேலை பார்த்து வந்துள்ளார். முதலாளியின் மகளை கவர்ந்து காதலில் விழ வைத்துள்ளார்.

கடந்த பிப்ரவரி மாதம் இந்தியாவிற்கு திரும்பிய இளைஞனை நினைத்து வருந்தியுள்ளார் அந்த அரேபிய பெண். காதலால் தவித்து வந்த பெண் காதலனை தேடும் பணியில் ஈடுபட்டார். என்ன செய்வது என்று திணறிய அப்பெண் பெற்றோருக்கு தெரியாமல் நேபாளம் வழியாக இந்தியாவிற்குள் சட்டவிரோதமாக வந்துள்ளார்.

பின் காதலனை தேடி கண்டுபிடித்து பதிவு திருமணம் செய்து வாழ்ந்து வந்துள்ளனர். தன் மகள் இந்தியாவில் இருப்பதை அறிந்த அவரது தந்தை, ”என் மகள் காதலனால் கடத்தி வரப்பட்டுள்ளார்” என பொலிசாரிடம் புகார் அளித்துள்ளார்.

இதை தொடர்ந்து அப்பெண்ணை விசாரித்த பொலிசார், ’நான் என் விருப்பத்துடன் தான் காதலனுடன் வந்து திருமணம் செய்துள்ளேன்’ என்று கூறினார். எங்கள் இருவரை சேர்த்து இந்தியாவில் குடியுரிமை வழங்கி வாழவிடுங்கள் என்று அரசிடம் கேட்டுள்ளார்.

தனக்கு வேறொருவருடன் திருமணம் ஆகிய நிலையிலும் முன்னாள் காதலன் பாலியல் தொந்தரவு கொடுத்ததால், இளம்பெண் ஒருவர் நபரின் நாக்கை வெட்டிய சம்பவம் நடந்துள்ளது.

உத்தரபிரதேச இளைஞன் ஒருவன் திருமணமான தனது முன்னாள் காதலிக்கு தொடர்ந்து பாலியல் தொல்லை கொடுத்து வந்துள்ளார்.

பைசாபாத் இனாயத் நகரில் வசித்து வரும் பெண்ணின் வீட்டிற்கு சென்று சண்டை போட்டுள்ளார்.

அதுமட்டுமின்றி பாலியல் பலாத்காரம் செய்யவும் முயற்சிக்க ஆத்திரமடைந்த பெண் அந்நபரை தண்டிக்க முடிவு செய்துள்ளார்.

இந்நிலையில் சம்பவதினத்தன்று அப்பெண்ணின் கணவர் இல்லாத நேரத்தில் மீண்டும் குறித்த இளைஞன் வீட்டிற்கு வந்து பாலியல் தொல்லை கொடுக்க முயற்சிக்க பொறுமையிழந்த பெண் அருகிலிருந்த கத்தியை கொண்டு நாக்கை அறுத்திருக்கிறார்.
நாக்கு துண்டாகி தரையில் விழ, நபர் தப்பி ஓடி விட்டாராம்,

இதற்கிடையே குறித்த நபரின் தாயார் வந்து சண்டையிட்டு அறுபட்ட நாக்கை எடுத்துக் கொண்டு பொலிஸ் நிலையம் சென்று குறித்த பெண் மீது புகார் அளித்திருக்கிரார்.

அந்தப் பெண்ணும் காவல் நிலையத்தில் தன்னைக் காத்துக் கொள்ளவே அவ்வாறு செய்ததாக கூறியிருக்கிறார்.

விருது நகரில் பட்டப்பகலில் முதலாளி மகனைக் கடத்தி வரத் தொழிலாளியின் ஒன்றரை வயது மகளை பிணைக்கைதியாக்கிய கொடூரம் நடந்தேறியிருக்கிறது.

விருதுநகர் ஆத்து மேடு பகுதியை சேர்ந்த ராஜ்திலக், தனது முதலாளி சண்முகக்கனியின் பருப்பு ஆலையில் கூலி வேலை பார்த்து வருகிறார்.

சண்முகக்கனியிடம் பணம் பறிக்க நினைத்த மூன்று பேர் கொண்ட குழு ஒன்று ராஜ்திலக்கை பயன்படுத்திக் கொள்ள நினைத்தது.

அதன்படி ராஜ்திலக் வீட்டிற்கே சென்று கத்திமுனையில் ராஜ்திலக்கை இருசக்கர வாகனத்தில் கடத்தி புதிய பேருந்து நிலையத்திற்கு அருகில் உள்ள காட்டில் வைத்து மிரட்டியிருக்கிறது அந்த குழு.

சண்முகக்கனியின் 5 வயது மகனை ராஜ்திலக் அழைத்து வர வேண்டும் என்றும் அது வரை ராஜ்திலக்கின் ஒன்றரை வயது மகளை பிணையமாக தங்களிடம் விட்டு செல்ல வேண்டும் என்று அக்கும்பல் கூறியுள்ளது.

அதன்படியே தன் மனைவியிடம் தொலைபேசி மூலம் மகளை இரு சக்கர வாகனத்தில் வரும் இருவரிடம் கொடுத்தனுப்புமாறு கூறியிருக்கிறார் ராஜ்திலக்.

மனைவியும் அவ்வாறே குழந்தையை கொடுத்து விட்டிருக்கிறார். சண்முகக்கனியின் மகனை கூட்டி வந்தபின் ராஜ்திலக்கையும் அவரது குழந்தையையும் விடுவிப்பதாக கூறியிருக்கின்றனர் கடத்தல்காரர்கள்.

தனது ஒன்றரை வயது குழந்தையை கத்திமுனையில் விட்டு விட்டு அங்கிருந்த கிளம்பிய ராஜ்திலக் நீண்ட யோசனைக்குப்பின் விருது நகர் கிழக்கு காவல் நிலையத்தில் சென்று புகார் அளித்திருக்கிறார்.

உடனடியாக சம்பவ இடத்திற்கு விரைந்த காவல்துறையினர் ராஜ் திலக் குழந்தையோடு ஒருவர் மட்டும் இருந்ததை பார்த்துள்ளனர்.

அவரைக் கைது செய்து குழந்தையை மீட்டு ராஜ்திலக்கிடம் கொடுத்த காவல்துறையினர் அவரின் துணிச்சலை பாராட்டினர்.

கடத்தல் குழுவினரில் மாட்டியவர் பெயர் வெங்கடேஷ் என்றும் மற்றவர்கள் பெயர்கள் பிரபு மற்றும் அசோக் என்றும் அவர்கள் சென்னையை சேர்ந்தவர்கள் என்றும் தெரியவந்துள்ளது.

தப்பியோடிய இருவரைத் தனிப்படை அமைத்து காவல்துறையினர் தேடி வருகின்றனர்.

திருப்பூரில் கட்டாய இலவச கல்வி சட்டத்தின் கீழ் தனியார் பள்ளியில் சேர்க்கப்பட்ட மாணவர் பள்ளியை விட்டு வெளியேற்றப்பட்ட சம்பவம் நடைபெற்றிருக்கிறது.

திருப்பூரை அடுத்த அங்கீரிபாளையத்தி சேர்ந்த பழனிகுமார் தனது மகன் காந்திஜியை ஏழை மாணவர்களுக்கென தனியார் பள்ளியில் அரசு ஒதுக்கியுள்ள இலவச கல்வி சட்டத்தின் கீழ் சேர்த்திருக்கிறார்.

வழக்கம்போல கோடை விடுமுறைக்கு பின் பள்ளிகள் தொடங்கியதும் ஒன்றாம் வகுப்பில் சேர்ந்து படிக்க காந்திஜி ஆசையாக பள்ளிக்குள் வந்திருக்கிறான்.

கடந்த ஒன்றாம் தேதி பள்ளி தொடங்கியது முதல் காந்திஜியிடம் 20000 பணம் கேட்டு வாங்கி வர சொல்லி பள்ளி நிர்வாகம் கூறி வந்துள்ளது. இந்நிலையில் இன்று காலை பள்ளிக்கு வந்த மாணவன் காந்திஜியை நிர்வாகம் உள்ளே அனுமதிக்கவில்லை.

மாணவர் நடந்த விவரங்களை தந்தையிடம் கூறிய பின் தந்தை பள்ளிக்கு வந்து நியாயம் கேட்டிருக்கிறார். கட்டாய இலவச கல்வியின் கீழ் படிப்பதால் கட்டணம் கட்ட வேண்டியதில்லை என்கிற காரணத்தையும் கூறியிருக்கிறார்.

மாணவரை உள்ளே சேர்க்காத பள்ளி நிர்வாகம் நியாயம் கேட்டு வந்த பழனிகுமாரின் வண்டி சாவியையும் பிடுங்கி விட்டு வெளியே அனுப்பியிருக்கிறது.

செய்வதறியாமல் திகைத்த பழனிக்குமார் மகனுடன் பள்ளி வாசலில் நின்று நியாயம் கேட்டு போராடினர். அந்த வழியாக வந்தவர்களும் நியாயம் உணர்ந்து பழனிகுமாரோடு இணைந்து போராட்டத்தில் ஈடுபட்டனர்.

போராட்டத்தின் ஒருபகுதியாக தனது சிலேட்டில் பள்ளிக்கு உள்ளே விடுங்க என்று எழுதிய ஒன்றாம் வகுப்பு மாணவர் காந்திஜி அதனைக் கையில் பிடித்தபடி நின்றிருந்தது அனைவரையும் நெகிழ செய்தது.

இது குறித்து மாவட்ட கல்வி அதிகாரி சாந்தியிடம் கேட்டபோது கல்விக்கட்டணம் மட்டும்தான் அரசு செலுத்தும் எனவும் தனியார் பள்ளியின் விதிமுறைகளின் படி பெற்றோர் நடந்து கொள்ள வேண்டும் என்றது பேரதிர்ச்சியாகத்தான் இருந்தது.