களுத்துறையில் 27 வயது யுவதியொருவர் தூக்கில் தொங்கிய நிலையில் சடலமாக மீட்கப்பட்டுள்ளார்.

குறித்த யுவதியின் சடலம் நேற்றைய தினம், அவரது வீட்டின் அறையிலிருந்தே மீட்கப்பட்டுள்ளது.

சாந்தனி மகேஷிக்கா என்பவரே சடலமாக மீட்கப்பட்டுள்ளதுடன், வீட்டில் யாரும் இல்லாத போது அவர் தூக்கிட்டு தற்கொலை செய்துக்கொண்டுள்ளதாக தெரிவிக்கப்படுகிறது.

எனினும், சடலமாக மீட்கப்பட்டவர் தற்கொலை செய்து கொண்டமைக்கான காரணம் கண்டறிப்படாத நிலையில் மேலதிக விசாரணைகள் முன்னெடுக்கப்பட்டு வருகிறது.

உயிரிழந்துள்ளதாக நம்பப்பட்ட நபர் ஒருவர் உயிருடன் இருப்பதாக அறிந்து அவரது குடும்பம் மிகவும் மகிழ்ச்சியாக உள்ளது.

கடலில் அடித்து செல்லப்பட்ட நபரின் சடலம் மீண்டும் கரைக்கு வரும் என 10 நாட்களாக காத்திருந்த உறவினர்களுக்கு மகிழ்ச்சியான தகவல் கிடைத்துள்ளது.

மன்னார் பேசாலை பிரதேசத்தில் கடலுக்கு சென்று காணாமல் போன மீனவர் ஒருவர், 10 நாட்களின் பின்னர் இந்திய மீனவர்களினால் காப்பாற்றப்பட்டு ராமேஸ்வரம் பொலிஸாரிடம் ஒப்படைக்கப்பட்டுள்ளார்.

அந்தோனி மரியதாஸ் என்ற 37 வயதுடைய இந்த மீனவர் கடந்த 7ஆம் திகதி மேலும் மூன்று மீனவர்களுடன் கடலுக்கு சென்ற சந்தர்ப்பத்தில் கடல் அலையில் சிக்கி காணாமல் போனார்.

மரியதாஸ் கடலில் மூழ்கியமை தொடர்பில் சக மீனவர்களால் அவரின் குடும்பத்தினருக்கு அறிவிக்கப்பட்டுள்ளது.
சம்பவம் அறிந்த நாளில் இருந்து மரியதாஸின் சடலம் கரை ஒதுங்கும் என குடும்பத்தினர் பேசாலை கடற்கரையில் காத்திருந்துள்ளனர்.

சூறாவளியில் சிக்கில் கடலில் விழுந்த மரியதாஸ் கடலில் மிதந்து தென் இந்தியாவுக்கு சென்ற சந்தர்ப்பத்தில் இந்திய மீனவர்கள் அவரை காப்பாற்றி டேலர் இயந்திரம் ஒன்றில் ஏற்றியுள்ளனர்.

அதன் பின்னர் அவர் உயிருடன் இருப்பதாக குடும்பத்தினரிடம் அறிவிக்கப்பட்டுள்ளது. அவரை இலங்கைக்கு அழைத்து வருவதற்கான நடவடிக்கைகள் மேற்கொள்ளப்படுவதாக தெரிவிக்கப்படுகின்றது.

மட்டக்களப்பு – புதூர் பகுதியைச் சேர்ந்த இரு சிறுவர்கள் காணாமல்போயுள்ள நிலையில் அவர்களை கண்டுபிடிப்பதற்கு உதவுமாறு பொது மக்களிடம் கோரப்பட்டுள்ளது.

இது தொடர்பில் மேலும் தெரியவருவதாவது, குறித்த சிறுவர்கள் இருவரையும் அவரது தந்தை அழைத்துச் சென்றுள்ளதாக கடந்த மாதம் 22ஆம் திகதி மட்டக்களப்பு சிறுவர், பெண்கள் பொலிஸ் பிரிவிற்கு முறைப்பாடு கிடைத்துள்ளது.

எனினும் இந்த முறைப்பாட்டின் அடிப்படையில் விசாரணை மற்றும் தேடுதல் நடவடிக்கைகளை மேற்கொண்ட போதும் தம்மால் சிறுவர்களை கண்டுபிடிக்க முடியாதுள்ளதாக மட்டக்களப்பு சிறுவர், பெண்கள் பொலிஸ் பிரிவு பொறுப்பதிகாரி சுசீலா தெரிவித்துள்ளார்.

இந்த நிலையில், சிறுவர்களை அவர்களது தந்தை யாழ்ப்பாணம், கண்டி உள்ளிட்ட பல இடங்களுக்கு மாற்றி மாற்றி கொண்டு செல்வதாக தகவல் கிடைத்துள்ளதாகவும் அவர் சுட்டிக்காட்டியுள்ளார்.

எனவே இந்த சிறுவர்களை மீட்பதற்கு பொதுமக்கள் உதவ வேண்டும் எனவும், பொலிஸாருக்கு ஒத்துழைப்பு வழங்க வேண்டும் எனவும் வேண்டுகோள் விடுக்கப்பட்டுள்ளது.

 
20 ஆவது சர்வதேச சித்திரப் போட்டியில் இவ்வாண்டு 5 வயது தொடக்கம் 7 வயதுப்பிரிவில் இலங்கைக்கு முதலிடம் கிடைத்துள்ளது.

ஜெனிவாவை தளமாகக் கொண்ட சர்வதேச சமாதான ஆதாரங்களுக்கான அமைப்பானது வருடாந்தம் உலகளாவிய ரீதியில் நடாத்தி வருகிறது.

இவ்வாண்டு ‘ பூமியில் சமாதானம் நிலவும்’ எனும் தலைப்பில் சித்திரப் போட்டி நடைபெற்றது. இதில் 5 வயது தொடக்கம் 7 வயதுப்பிரிவில் முதலாவது இடம் இலங்கைக்கு கிடைத்துள்ளது.

மட்டக்களப்பு கோட்டைமுனை கனிஷ்ட வித்தியாலயத்தில் கல்வி பயிலும் செல்வன் நகுலேஸ்வரன் கேமலக்ஷன் எனும் மாணவனே முதலிடத்தினைப் பெற்றுள்ளார்.

உலகளாவிய ரீதியில் பங்குபற்றிய பல்லாயிரக்கணக்கான சித்திரங்களுக்குள் இவரது சித்திரம் முதலாமிடத்தைப் பெற்றுள்ளமை இலங்கைக்கும் குறிப்பாக மட்டக்களப்புக்கும் பெருமையை தேடித் தந்துள்ளது.

மட்டக்களப்பு மாவட்டத்திலிருந்து பங்குபற்றிய செல்வி ந.சஞ்சனா- கோட்டைமுனை கனிஷ்ட வித்தியாலயம், செல்வி ச.தம்மிக்கா -கோட்டைமுனை கனிஷ்ட வித்தியாலயம், செல்வி ந. தருணிக்ஷ – புனித சிசிலியா பெண்கள் பாடசாலை, செல்வி சி.சஷ்ஷினி ஆகிய நான்கு மாணவியருக்கு பங்குபற்றுதலுக்கான சான்றிதழ்களும் கிடைத்திருக்கின்றமை குறிப்பிடத்தக்கது.

 
தம்புள்ளை பிரதேசத்தில் உள்ள ஆலயம் ஒன்றின் உண்டியலை உடைத்து பணத்தை எடுத்துக்கொண்டு தப்பிச் சென்ற ஒருவர், தம்புள்ளை -கண்டலம வீதியில் விபத்தில் சிக்கியுள்ளார்.

விபத்தில் காயமடைந்த நபர் வைத்தியசாலையில் அனுமதிக்கப்பட்டதாக தம்புள்ளை பொலிஸார் தெரிவித்துள்ளனர்.

தம்புள்ளை – கண்டலம வீதியில் கார் ஒன்றும் முச்சக்கர வண்டியும் மோதி விபத்து ஏற்பட்டுள்ளது. முச்சக்கர வண்டியில் பயணித்த நபரே காயமடைந்துள்ளார்.

தம்புள்ளை பொலிஸார் முச்சக்கர வண்டியை சோதனையிட்ட போது அதில் உரப் பை ஒன்றில் சில்லறை காசுகள் மற்றும் ரூபா நாணயத்தாள்கள் இருந்துள்ளன.

இது குறித்து பொலிஸாருக்கு சந்தேகம் ஏற்பட்டுள்ளது. இதனையடுத்து சந்தேக நபரிடம் பொலிஸார் விசாரணை நடத்திய போது வீட்டில் இருந்த உண்டியலை உடைத்து பணத்தை எடுத்து வந்ததாக முதலில் கூறியுள்ளார்.

இதனை உறுதிப்படுத்த பொலிஸார் சந்தேக நபரின் வீட்டுக்கு அதிகாரிகளை அனுப்பி விசாரித்துள்ளனர். அப்போது அது பொய் என தெரியவந்துள்ளது.

மறுபடியும் விசாரணை நடத்திய போது கலேவலை பிரதேசத்தில் தனது தந்தை ஆலயம் ஒன்றை நடத்தி வருவதாகவும் அங்கிருந்த பணத்தை தனக்கு கொடுத்ததாகவும் சந்தேக நபர் கூறியுள்ளார்.

தொடர்ந்தும் ஏற்பட்ட சந்தேகத்தை அடுத்து பொலிஸார் பிரதேசத்தில் உள்ள விகாரைகள் மற்றும் ஆலயங்களின் நிலைமைகள் தொடர்பாக தேடியுள்ளனர்.

அப்போது கண்டலம குளத்துக்கு அருகில் இருக்கும் ஆலயத்தின் உண்டியல் உடைக்கப்பட்டிருப்பது கண்டுபிடிக்கப்பட்டுள்ளது. இதன் பின்னர், சந்தேக நபர், பொலிஸாரிடம் உண்மையை கூறியுள்ளார்.

மட்டக்களப்பு – செங்கலடி மத்திய கல்லூரிக்கு அருகிலுள்ள வடிகானுக்குள் இருந்து இளம் குடும்பஸ்தர் ஒருவரின் சடலம் மீட்கப்பட்டுள்ளதாக ஏறாவூர் பொலிஸ் பொறுப்பதிகாரி ஷிந்தக பீரிஸ் தெரிவித்துள்ளார்.

பொதுமக்கள் இன்று காலை வழங்கிய தகவலின் அடிப்படையில் குறித்த இடத்துக்கு விரைந்த பொலிஸார் வடிகானில் கிடந்த சடலத்தை மீட்டுள்ளனர்.

இந்த நிலையில், சடலம் பிரேத பரிசோதனைக்காக செங்கலடி வைத்தியசாலையில் வைக்கப்படுள்ளதுடன், மேலதிக விசாரணைகளை ஏறாவூர் பொலிஸார் மேற்கொண்டு வருகின்றமை குறிப்பிடத்தக்கது.

வைத்தியசாலையின் பிணவறையில் வைக்கப்பட்டிருந்த சடலம் ஒன்றை மரநாய் கடித்து சாப்பிட்ட சம்பவம் இடம்பெற்றுள்ளது.

சிலாபம் வைத்தியசாலையின் பிணவறையில் வைக்கப்பட்டிருந்த சடலம் இவ்வாறு மரநாயினால் சேதப்படுத்தப்பட்டுள்ளது.

மதுரங்குளிய பிரதேசத்தை சேர்ந்த நபரின் சடலமே இவ்வாறு சேதப்படுத்தப்பட்டுள்ளது. சடலத்தின் முகம் உட்பட பல பகுதிகள் மரநாயினால் கடித்து சாப்பிடப்பட்டுள்ளதாக குறிப்பிடப்படுகின்றது.

இந்த சம்பவத்தினால் உயிரிழந்த நபரின் உறவினர்கள் கடும் சிரமத்திற்குள்ளாகியுள்ளனர். இது தொடர்பில் சிலாபம் வைத்தியசாலையின் வைத்தியர் சிராஜிடம் வினவிய போது, சடலத்தை பொறுப்பேற்கும் போது சடலத்தை பரிசோதித்தே பெற்றிருக்க வேண்டும் என அவர் குறிப்பிட்டுள்ளார்.

இது வைத்தியசாலையின் பிணவறையில் இடம்பெற்றிருந்தால், உறவினர்கள் அல்லது வேறு இடத்தில் இடம்பெற்றுள்ளதா என்பதில் சந்தேகம் உள்ளதாக அவர் கூறியுள்ளார்.

எப்படியிருப்பினும் இது தொடர்பில் மேலதிக விசாரணை மேற்கொள்வதாக வைத்தியர் சிராஜ் தெரிவித்துள்ளார்.