கரைக்கு 200 மீற்றர் தொலைவில் இருந்தபோது கடலில் சிக்கிய தந்தை பரிதாபமாக பலியானார். இதனால், அவரது ஒரே மகள் அனாதரவாகியுள்ளார்.

நாற்பத்தைந்து வயது நிரம்பிய இந்த நபருக்கு மூன்று பெண் பிள்ளைகள். மனைவியையும் மூத்த இரண்டு மகள்களையும் 2004 சுனாமிக்கு பலிகொடுத்த இவர், கடைசிப் பெண்பிள்ளையை பல்வேறு சிரமங்களுக்கு மத்தியில் கண்ணும் கருத்துமாக வளர்த்து வந்தார்.

தங்காலை, மாவெல்ல-கல்பொக்க பகுதியைச் சேர்ந்த மீனவரான இவர், நேற்று முன்தினம் (12.12) சக மீனவர்கள் நால்வருடன் கடலுக்கு மீன்பிடிக்கச் சென்றிருந்தார்.

வழியில் திசைகாட்டி சரியாக வேலை செய்யாததால் கரைக்குத் திரும்ப முடிவெடுத்த இவர்கள், கரைக்கு சுமார் 200 மீற்றரே தொலைவில் படகை நங்கூரமிட்டனர்.

பின்னர் மகளைப் பார்த்துவிட்டு வரலாம் என்று எண்ணி, பிராணவாயுக் குழாய் சகிதம் கடலுக்குள் குதித்து கரையை நோக்கி நீந்தத் தொடங்கினார் இந்தத் தந்தை. இது அவரது அன்றாட நிகழ்வுதான். ஆனால், அன்று மற்றைய நாட்களைப் போல அமையவில்லை.

கரையை நோக்கி நீந்தியபடி இருந்த இவர் திடீரெனக் கடலில் மூழ்கினார். நீச்சலில் வல்லவரான இவர் கடலில் மூழ்குவார் என்று கொஞ்சமும் எண்ணியிராத சக மீனவர்கள் அவரைக் கண்காணிக்கத் தவறினர்.

கூப்பிடு தூரத்தில் கரை இருக்க, மகளின் நினைவுடனேயே கடலில் மூழ்கி உயிரிழந்தார் இந்தத் தந்தை.

தற்போது, மொத்தக் குடும்பத்தையும் கடலுக்கே தாரை வார்த்துவிட்ட சாமிக்கா என்ற அந்தப் பதினைந்து வயதுச் சிறுமி, யாருமற்ற நிலையில் கரையில் அனாதரவாக விடப்பட்டிருக்கிறார்.

இன்று காலை முதல் ரயில் ஊழியர்கள் சிலர் வேலை நிறுத்தத்தை ஆரம்பித்துள்ளனர். ரயில்வே தொழிநுட்ப முகாமைத்துவ உதவி அதிகாரிகளே இந்த நடவடிக்கையை முன்னெடுத்துள்ளனர்.

இதேவேளை கடந்த வாரம் ரயில்வே தொழிற்சங்கங்கள் இணைந்து மேற்கொண்ட வேலை நிறுத்தத்தில் இவர்கள் பங்குபற்றி இருக்கவில்லை என்பது குறிப்பிடத்தக்கது.

முன்னதாக, கடந்த 6ம் திகதி நள்ளிரவு முதல் ரயில்வே தொழிற்சங்கங்கள் சில ஒன்றிணைந்து பணிப் பகிஷ்கரிப்பை முன்னெடுத்தனர்.

இதனால், ரயில் போக்குவரத்துக்கள் பாரியளவில் பாதிக்கப்பட்டதோடு, இந்த விடயம் குறித்து, போக்குவரத்து அமைச்சின் அதிகாரிகளுடன் பல கட்டப் பேச்சுவார்த்தைகள் நடைபெற்றும் அது பலனளிக்காது போராட்டம் தொடர்ந்தது.

இந்தநிலையில், இந்த விடயம் குறித்து ஆராய ஜனாதிபதி மைத்திரிபால சிறிசேன அமைச்சர் சரத் அமுணுகம தலைமையில் குழுவொன்றை நியமித்தார்.

குறித்த நால்வர் அடங்கிய குழுவுடன் நேற்று இடம்பெற்ற பேச்சுவார்த்தையை தொடர்ந்து, ரயில்வே தொழிற்சங்கங்கள் தமது போராட்டத்தை கைவிட்டு பணிக்கு திரும்ப முடிவு செய்தன.

எனினும், குறித்த கலந்துரையாடலில் மேற்கொள்ளப்பட்ட இணக்கப்பாட்டினால் தமக்கு அநீதி இழைக்கப்பட்டுள்ளதாக கூறி, இன்று காலை முதல், தாம் ஆர்ப்பாட்டத்தில் குதித்துள்ளதாக, ரயில்வே தொழிநுட்ப முகாமைத்துவ உதவி அதிகாரிகள் சங்கத்தின் செயலாளர் கமல் பீரிஸ் சுட்டிக்காட்டியுள்ளார்.

இதுஇவ்வாறு இருக்க, ரயில் போக்குவரத்து அத்தியவசிய சேவையாக பிரகடனப்படுத்தப்பட்டுள்ள நிலையில், தொடர்ந்தும் வேலை நிறுத்தம் முன்னெடுக்கப்படுமாயின் அவர்களுக்கு எதிராக கடும் நடவடிக்கை எடுக்கப்படும் என, போக்குவரத்து பிரதியமைச்சர் அஷோக அபேசிங்க தெரிவித்துள்ளார்.

லிந்துலை பொலிஸ் பிரிவுக்குட்பட்ட பேரம் எகமுத்துகம பிரதேசத்தில் மூன்று பிள்ளைகளின் தாய் ஒருவர் மின்சாரம் தாக்கி பரிதாபமாக உயிரிழந்த சம்பவம் ஒன்று இன்று அதிகாலை 4.00 மணியளவில் இடம்பெற்றுள்ளதாக பிரதேசவாசிகள் தெரிவித்தனர்.

இவ்வாறு உயிரிழந்தவர் வெங்கடாசலம் சகுந்தலா வயது 52 என அடையாளம் காணப்பட்டுள்ளார்.

தனது வீட்டின் நீர் இறைக்கும் மோட்டாருக்கு அருகாமையில் மின் கம்பியை பிடித்தவாறு விழுந்து கிடந்ததாகவும், வைத்தியசாலையில் அனுமதிக்கப்பட்ட போது அவர் 2 மணித்தியாலத்துக்கு முன்னதாகவே உயிரிழந்துள்ளதாகவும் அவரின் பிள்ளைகள் தெரிவித்தனர்.

குறித்த பெண் நித்திரை கொள்வதற்காக வேறொரு வீட்டிற்கு செல்வது வழக்கமாக கொண்டிருந்துள்ளார். அதன்படி நேற்று இரவு குறித்த பெண்மனி நித்திரை கொள்ள வராததையடுத்து அவரை தேடிய போதே இன்று அதிகாலை உயிரிழந்திருந்ததாக அவர்கள் மேலும் தெரிவித்தனர்.

இறந்தவரின் சடலம் பிரேத பிரிசோதனைக்காக நுவரெலியா வைத்தியசாலைக்கு அனுப்பப்பட்டுள்ளது.

சம்பவம் தொடர்பான மேலதிக விசாரணைகளை லிந்துலை பொலிஸார் மேற்கொண்டு வருகின்றனர்.

கட்டுநாயக்க சர்வதேச விமான நிலையத்திற்காக 4 மற்றும் 2 நட்சத்திர ஹோட்டல்கள் இரண்டு நிர்மாணிக்க அரசாங்கம் நடவடிக்கை எடுத்துள்ளது.

விமான நிலையம் மற்றும் விமான சேவை நிறுவனத்திற்கு சொந்தமான காணியில் நட்சத்திர ஹோட்டல் நிர்மாணிப்பது தொடர்பில் கவனம் செலுத்தப்பட்டுள்ளது.

விமான பயணிகள் மற்றும் சுற்றுலா பயணிகளுக்கு சிறந்த சேவை ஒன்றை வழங்கும் நோக்கில் இந்த நடவடிக்கை மேற்கொள்ளப்படவுள்ளது.

ஹோட்டல் நிர்மாணிப்பு தொடர்பில் இரு முதலீட்டாளர்களுக்கு வாய்ப்பு கொடுக்கப்பட்டுள்ளது. எனினும் அதற்கான ஆலோசனை வழங்க அவர்கள் தவறியுள்ளனர்.

இந்நிலையில் வேறு முதலீட்டாளர்களிடம் அதற்கான ஆலோசனையை பெற்றுக்கொள்ள அரசாங்கம் தீர்மானித்துள்ளது.

அதற்கமைய ஒரு பகுதியில் 4 நட்சத்திர ஹோட்டலும், மற்றைய பகுதியில் 2 நட்சத்திர ஹோட்டலும் நிர்மாணிப்பதற்கு தகுதியான முதலீட்டாளர்கள் தெரிவு செய்யும் நடவடிக்கை ஆரம்பிக்கப்பட்டுள்ளது.

இலங்கையில் சமாதான சூழ்நிலை நிலவி வரும் நிலையில், சுற்றுலா பயணிகளின் வருகை பல மடங்காக அதிகரித்துள்ளது.

மேலும் பல வெளிநாட்டவர்களை கவரும் வகையில் கட்டுநாயக்க விமான நிலையில் பல்வேறு வகையில் அபிவிருத்தி செய்யப்பட்டு வருகின்றமை குறிப்பிடத்தக்கது.