கொக்கட்டிச்சோலை – மாவடி முன்மாரி விடுதிக் கல் பகுதியில் வீட்டிற்குள் இருந்து அடி காயங்களுடன் குடும்பஸ்தர் ஒருவரின் சடலம் கண்டெடுக்கப்பட்டுள்ளது.

இந்த சம்பவம் தொடர்பில் கொலை செய்யப்பட்ட நபரின் பிள்ளைகள் மேல் சந்தேகம் எழுவதாக பொலிஸார் தெரிவிதுள்ளனர்.

சுமார் 40 வயது மதிக்கத்தக்க 3 பிள்ளைகளின் தந்தையான குழந்தைவேல் குருசாந்த ராஜா என்பவரே இவ்வாறு கொலை செய்யப்பட்ட நிலையில் சடலமாக மீட்கப்பட்டுள்ளார்.

குறித்த வீட்டில் உயிரிழந்தவரின் மனைவியின் முதல் கணவரின் பிள்ளைகளுடன் நேற்று மாலை வாய்த்தர்க்கம் ஏற்பட்டதாகவும் அதன் போதே இச் சம்பவம் இடம்பெற்றிருக்கலாமெனவும் பொலிஸார் மேலும் தெரிவித்துள்ளனர்.

உயிரிழந்தவருடைய மனைவி அனுராதபுரத்தில் உள்ள தனது பெண் பிள்ளையை பார்க்கச் சென்றிருந்த நிலையில், குறித்த நபரும் அவரது மூன்று பிள்ளைகளும், மற்றும் மனைவியின் மூத்த கணவரின் இரண்டு ஆண் பிள்ளைகளும் இருந்து வந்ததாக அயலவர்கள் தெரிவித்தனர்.

இந்த நிலையில் நேற்று மாலை உயிரிழந்த நபர் மதுபோதையில் பிள்ளைகளுடன் சண்டையிட்ட நிலையில் மாலை அங்கிருந்து ஐந்து பிள்ளைகளும் அனுராதபுரத்திற்கு சென்றுள்ளனர்.

இது தொடர்பில் உயிரிழந்தவரின் மனைவியினால் உறவினர்களுக்கு தெரிவிக்கப்பட்ட தகவலின் அடிப்படையில் இன்று வெள்ளிக்கிழமை காலை வீட்டுக்கு சென்றுபார்த்தபோது குறித்த நபர் அடிகாயங்களுடன் சடலமாக காணப்பட்டார்.

இந் நிலையில், மட்டக்களப்பு மாவட்ட குற்றத்தடவியல் பிரிவு பொறுப்பதிகாரி கே.ரவிச்சந்திரன் தலைமையிலான குழுவினரும் குற்றத்தடயங்கள் குறித்த விசாரணைகளை மேற்கொண்டனர்.

சம்பவ இடத்திற்கு வருகைதந்த மட்டக்களப்பு நீதிவான் நீதிமன்ற நீதிபதி எம்.கணேசராஜா இது தொடர்பான விசாரணைகளை மேற்கொண்துடன் சடலத்தினை பிரேத பரிசோதனைகளுக்கான மட்டக்களப்பு போதனா வைத்தியசாலைக்கு கொண்டுசெல்லுமாறும் பணிப்புரை விடுத்தார்.

இந்த சம்பவம் தொடர்பில் குறித்த நபரின் மனைவியின் முதல் கணவனின் பிள்ளைகள் இருவர் மீது சந்தேகம் நிலவுவதன் காரணமாக அனுராதபுரத்தில் உள்ள அவர்களை கைது செய்யும் நடவடிக்கைகள் முன்னெடுக்கப்பட்டுள்ளதாக கொக்கட்டிச்சோலை பொலிஸார் தெரிவித்தனர்.

முல்லைத்தீவு – செல்வபுரம் பகுதியில் இளைஞர் ஒருவரை கொலை செய்த சம்பவத்தில் சந்தேகத்தின் பேரில் நபர் ஒருவர் நேற்று கைது செய்யப்பட்டுள்ளார்.

முல்லைத்தீவு – செல்வபுரம், கள்ளுத்தவறணை பகுதியில் உள்ள பனங்கூடலுக்குள் இருந்து கழுத்தில் வெட்டப்பட்ட நிலையில் கடந்த 23 ஆம் திகதி இளைஞன் ஒருவரின் சடலம் மீட்கப்பட்டது.

குறித்த இளைஞரின் சடலம் பிரேத பரிசோதனைக்காக வைத்தியசாலைக்கு அனுப்பப்பட்டபோது சடலத்தில் வெட்டுகாயங்களுடன் கடித்த அடையாளங்களும் இருப்பது கண்டுபிடிக்கப்பட்டது.

இதனைத் தொடர்ந்து கடித்து துன்புறுத்திய சம்பவம் தொடர்பில் ஏதேனும் முறைப்பாடுகள் இருக்கின்றதா? என குற்றவியல் தடுப்பு பிரிவு பொலிஸார் பொலிஸ் நிலையத்தில் தேடியுள்ளனர்.

இதன்போது கஞ்சா போதைப்பொருள் பாவித்துவிட்டு தனது கணவர் தன்னை கடித்து துன்புறுத்துவதாக பெண் ஒருவர் செய்திருந்த முறைப்பாடு குற்றவியல் தடுப்பு பிரிவு பொலிஸாருக்கு கிடைத்துள்ளது.

மேலும், குறித்த பெண்ணின் கணவரும், சடலமாக மீட்கப்பட்ட இளைஞனும் நண்பர்கள் என பொலிஸாரின் விசாரணையில் இருந்து தெரியவந்துள்ளது

இதனைத் தொடர்ந்து இந்த சம்பவத்தில் கொலையாளி என சந்தேகிக்கப்படும் குறித்த நபரை நேற்று கைது செய்துள்ளதாக முல்லைத்தீவு பொலிஸார் தெரிவித்துள்ளனர்.

திருகோணமலை – சாம்பல்தீவு பகுதியை சேர்ந்த 10 வயது சிறுமியை தடுத்து வைத்து அச்சுறுத்திய 20 மற்றும் 23 வயதுடைய இருவரையும் 14ஆம் திகதி வரை விளக்கமறியலில் வைக்குமாறு உத்தரவிடப்பட்டுள்ளது.

அத்துடன், சம்பவத்துடன் தொடர்புடைய மற்றுமொரு 15 வயது சிறுவனை ஒரு இலட்சம் ரூபாய் சரீர பிணையில் செல்லுமாறு அனுமதி வழங்கப்பட்டுள்ளது.

சம்பவம் தொடர்பான வழக்கு இன்று திருகோணமலை நீதவான் எம்.எச்.எம்.ஹம்ஸா முன்னிலையில் விசாரணைக்கு எடுத்துக் கொள்ளப்பட்ட போதே இந்த உத்தரவு பிறப்பிக்கப்பட்டுள்ளது.

ஐந்தாம் தரத்தில் கல்வி பயிலும் குறித்த மாணவி பிரத்தியேக வகுப்பிற்கு சென்று வரும் போது பச்சை நிற முச்சக்கர வண்டியில் வந்த மூவர் தடுத்து வைத்து அச்சுறுத்தியதாக உப்புவெளி பொலிஸ் நிலையத்தில் முறைப்பாடு செய்யப்பட்டுள்ளது.

முறைப்பாட்டையடுத்து விசாரணைகளை மேற்கொண்ட பொலிஸார் சந்தேகநபர்கள் மூன்று பேரையும் கைது செய்து நீதிமன்றத்தில் ஆஜர்படுத்திய போதே இந்த உத்தரவு பிறப்பிக்கப்பட்டுள்ளது.

சம்பவம் தொடர்பில் சாம்பல்தீவு, ஆத்திமேடு பகுதியை சேர்ந்த ஜெ.ஜெராட் (20 வயது) மற்றும் அதே இடத்தை சேர்ந்த கோவிந்தா ஜதூர் (23 வயது) ஆகியோர் விளக்கமறியலில் வைக்கப்பட்டுள்ளதுடன், நாகராஜா ஜெயராஜா (15 வயது) எனும் சிறுவன் பிணையில் விடுவிக்கப்பட்டுள்ளார்.

யாழ். நல்லூர் யமுனா ஏரியில் ஆண் ஒருவரின் சடலம் மீட்கப்பட்டுள்ளதாக பொலிஸார் தெரிவித்துள்ளனர். குறித்த சடலம் இன்று அதிகாலை யமுனா ஏரியில் மிதந்து வந்த நிலையில் பொதுமக்களால் அவதானிக்கப்பட்டு பொலிஸாருக்கு அறிவிக்கப்பட்டுள்ளது.

சடலமாக மீட்கப்பட்டவர் நல்லூர் கோவில் வீதியைச்சேர்ந்த 27 வயதுடை மாரிமுத்து கோவிந்தன் என அடையாளம் காணப்பட்டுள்ளது.

குறித்த இளைஞர் மனநலம் பாதிக்கப்பட்டவர் எனவும், கடந்த மூன்று நாட்களிற்கு முன்னர் இவர் காணாமல் போயிருந்ததாகவும் அவரது உறவினர்கள் கூறியுள்ளனர்.

மேலும், குறித்த சம்பவம் தொடர்பில் கோப்பாய் பொலிஸார் மேலதிக விசாரணைகளை தீவிரமாக மேற்கொண்டு வருகின்றனர்.

இதேவேளை, அண்மையில் தவில் வித்துவான் ஒருவர் யமுனா ஏரியில் இருந்து சடலமாக மீட்கப்பட்டார். அந்தச் சம்பவம் நடந்து ஓரிரு வாரங்களில் மீண்டும் யமுனா ஏரியில் சடலம் கண்டுபிடிக்கப்பட்டமை அந்தப் பிரதேசத்தில் பெரும் பரபரப்பை ஏற்படுத்தியுள்ளது.

15 வயதான சிறுமியை பாலியல் தொழிலில் ஈடுபடுத்திய முச்சக்கரவண்டி சாரதி ஒருவரை வென்னப்புவ பொலிஸார் கைது செய்துள்ளனர். குருணாகல் – நாரம்மலை பிரதேசத்தை சேர்ந்த 50 வயதான முச்சக்கரவண்டி சாரதியே இவ்வாறு கைது செய்யப்பட்டுள்ளார்.

தனது உறவு முறை மகள் ஒருவரை முச்சக்கரவண்டியில் ஏற்றிக்கொண்டு ஹோட்டல் ஒன்றுக்கு செல்வதாக சிறுமியின் உறவினர் செய்த முறைப்பாட்டுக்கு அமைய மேற்கொள்ளப்பட்ட விசாரணைகளை அடுத்தே சந்தேகநபரை பொலிஸார் கைது செய்துள்ளனர்.

முச்சக்கரவண்டி சாரதியின் முறையற்ற மனைவி எனக் கூறப்படும் பெண்ணுக்கும் இந்த சம்பவத்துடன் தொடர்பு இருப்பதாக தகவல் கிடைத்துள்ளதுடன், பெண்ணை கைது செய்ய பொலிஸார் விசாரணைகளை மேற்கொண்டு வருகின்றனர்.

கடந்த வருடம் செப்டம்பர் மாதம் 1ஆம் திகதி, முதல் முறையாக சிறுமியை அயல் வீட்டில் வசிக்கும் சந்தேகநபரும் அவரது முறையற்ற மனைவியும் இணைந்து கொஸ்வத்தை பகுதியில் உள்ள விடுதி ஒன்றுக்கு அழைத்துச் சென்றுள்ளனர்.

அங்கு பல நபர்களுடன் சிறுமியை பாலியல் நடவடிக்கைகளில் ஈடுபடுத்தியுள்ளதுடன், அவரை வீட்டுக்கு அழைத்து வந்து விட்டுள்ளதுடன் 4 ஆயிரம் ரூபா பணத்தையும் கொடுத்துள்ளதாக பொலிஸார் கூறியுள்ளனர்.

பணத்தை கொடுத்து சிறுமியை பாலியல் வல்லுறவுக்கு உட்படுத்திய நபர்களை கைது செய்ய பொலிஸார் விசாரணைகளை மேற்கொண்டுள்ளனர்.