“இலங்கையின் புதிய வரைபடம் சுமார் 18 வருடங்களின் பின்னர் இலங்கை நில அளவைத் திணைக்களத்தால் தயாரிக்கப்பட்டுவருகின்றது” என்று நில அளவையாளர் அதிகாரி உதயகாந்த தெரிவித்துள்ளார்.

புதிய வரைபடத்தில் இலங்கையின் துறைமுக நகரமும் உள்ளடக்கப்படும்.

இலங்கையின் கிழக்கு மற்றும் தெற்கு கடற்கரைப் பரப்புகள் அதிகரித்துள்ளதுடன், சிலாபம் கடற்கரைப் பரப்பு குறைவடைந்துள்ளதாகவும் அவர் சுட்டிக்காட்டியுள்ளார்.

இலங்கையின் புதிய வரைபடம் செய்மதி உதவியுடன் தயாரிக்கப்படும். இதன் பணிகள் நிறைவடைந்ததும் திணைக்களத்தின் உத்தியோகபூர்வ இணையதளத்தில் வெளியிடப்படும் என்றும் அவர் தெரிவித்துள்ளார்.

இறைவனுக்கு காது நல்ல கூர்மை. அதனால் சத்தமாக வழிபட வேண்டிய தேவை இல்லை என யாழ்.மேல் நீதிமன்ற நீதிபதி மா. இளஞ்செழியன் தெரிவித்தார்.

நாயன்மார்கட்டு பகுதியில் அமைந்துள்ள மதவழிபாட்டு தலத்தில் வழிபாட்டில் ஈடுபடுபவர்கள் அதிக சத்தம் எழுப்பி வழிபாட்டில் ஈடுபடுவதனால் தாம் பல இன்னல்களை எதிர்நோக்குவதாக நபர் ஒருவர் மனு தாக்கல் செய்திருந்தார்.

குறித்த மனு யாழ்.மேல் நீதிமன்றில் இன்றைய தினம் விசாரணைக்கு எடுத்துக்கொள்ளப்பட்டது.

இதன் போது மனுதாரர், அதிகாலை வேளைகளில் மற்றும் ஞாயிற்றுக்கிழமைகளில் குறித்த மதவழிபாட்டு இடத்தில் கூடுவோர்கள் அதிக சத்தம் எழுப்பி வழிபாட்டில் ஈடுபடுகின்றனர்.

இதன் காரணமாக இருதய நோய் உள்ள தான் பாதிக்கப்படுவதாகவும், தனது சிறு பிள்ளைகளும் பாதிக்கப்படுவதாகவும் மன்றில் தெரிவித்தார்.

இதனையடுத்து நீதிபதி மா. இளஞ்செழியன் தெரிவிக்கையில், “இறைவன் நல்ல காது கூர்மை உடையவர். அவரை அமைதியான முறையில் வழிபடலாம். எங்கள் உரிமை மத வழிபாட்டு உரிமை என்பது மற்றவர்களுக்கு இடையூறு விளைவிக்கக் கூடாது.

தற்போது ஆலயங்களில் ஒலிபெருக்கி பாவனைகள் கணிசமான அளவு குறைக்கப்பட்டுள்ளன. கடவுளை அமைதியாக மற்றவர்களுக்கும், மற்ற மதத்தினருக்கும் இடையூறு விளைவிக்காத வகையில் வணங்குங்கள்” என தெரிவித்தார்.

கொட்டகலை, யதன்சைட் பகுதியில் நபரொருவரை மண்வெட்டியால் தாக்கி கொலை செய்த சந்தேகநபர் மண்வெட்டியுடன் பொலிஸில் சரணடைந்துள்ளார்.

இந்த கொலைச் சம்பவம் நேற்று இரவு 8 மணியளவில் இடம்பெற்றுள்ளதாக தெரிவிக்கப்படுகிறது.

சம்பவத்தில் ரகு எனப்படும் 4 பிள்ளைகளின் தந்தையே உயிரிழந்துள்ள நிலையில், சம்பவத்துடன் தொடர்புடையதாக சந்தேகிக்கப்படும் பெண்ணொருவரையும் பொலிஸார் கைது செய்துள்ளனர்.

இறந்தவரின் சடலம் வைத்திய பரிசோதனைக்காக கொட்டகலை பிரதேச வைத்தியசாலையில் வைக்கப்பட்டுள்ளதுடன் சம்பவம் தொடர்பாக மேலதிக விசாரணைகளை பத்தனை பொலிஸார் மேற்கொண்டு வருகின்றனர்.

பொலிஸில் சரணடைந்தவர் கொழும்பில் கூலி வேலை செய்யும் கொட்டகலை யதன்சைட் தோட்டத்தை சேர்ந்த குடும்பஸ்தராவார்.

மட்டக்களப்பு – பேத்தாளை பகுதியில் நேற்று காணாமல் போன வயோதிப பெண் கருங்காலிச்சோலை ஆற்றில் இருந்து இன்று சடலமாக மீட்கப்பட்டுள்ளதாக கல்குடா பொலிஸார் தெரிவித்தனர்.

பேத்தாளை விபுலானந்தா பாடசாலை வீதியைச் சேர்ந்த சின்னத்தம்பி நாகமுத்து (85) என்பவர் நேற்று காலை 09.00 மணியளவில் வீட்டில் இருந்து வெளியே சென்ற நிலையில் காணாமல் போயிருந்தார்.

இவரை குடும்ப உறவினர்கள் தேடிவந்த நிலையில் இன்று மதியம் கருங்காலிச்சோலை ஆற்றில் சடலமாக மீட்கப்பட்டுள்ளார்.

இந்த சம்பவம் தொடர்பாக கல்குடா பொலிஸார் விசாரணைகளை மேற்கொண்டு வருகின்றனர்.

நாவலப்பிட்டி – தலவாக்கலை பிரதான வீதியில் இன்று மாலை பயணித்துக் கொண்டிருந்த முச்சக்கரவண்டியொன்று திடீரென தீப்பிடித்து எரிந்துள்ளது.

குறித்த சம்பவம் கெட்டபுலா சந்தியில் வைத்து இடம்பெற்றுள்ளதாக நாவலப்பிட்டி பொலிஸார் தெரிவித்துள்ளனர்.

முச்சக்கரவண்டி தீடீரென தீ பற்றிய போது ஓட்டுனரும், வண்டியில் பயணித்த மற்றொரு நபரும் கீழே பாய்ந்த நிலையில் எவ்வித தீக்காயங்களுமின்றி இருவரும் உயிர்தப்பியுள்ளனர்.

இதனையடுத்து பிரதேசவாசிகள் இணைந்து தீயை அணைக்க முயற்சித்தும் சுமார் 7 இலட்சம் ரூபா பெறுமதியான முச்சக்கரவண்டி முற்றாக எரிந்து நாசமாகியுள்ளது.

இந்த நிலையில், சம்பவம் தொடர்பான மேலதிக விசாரணைகளை மேற்கொண்டு வருவதாக நாவலப்பிட்டி பொலிஸார் தெரிவிக்கின்றனர்.

பிரித்தானியாவில் வாழும் இலங்கையர் ஒருவர் உயிர்கொல்லி நோயினால் தீவிரமாக பாதிக்கப்பட்டுள்ளதாக அந்நாட்டு ஊடகம் ஒன்று தகவல் வெளியிட்டுள்ளது.

இலங்கையில் பிறந்து பிரித்தானியா பிபிசி செய்தியாளராக பணியாற்றும் ஜோர்ஜ் அழகையா இரண்டாவது தடவையாகவும் புற்று நோயினால் பாதிக்கப்பட்டுள்ளார்.

தன்னை பாதித்துள்ள நோயின் தாக்கம் குறித்து மிகவும் தாமதமாக கண்டுபிடித்துள்ளதாக ஜோர்ஜ் அழகையா தெரிவித்துள்ளார்.

ஸ்கொட்லாந்தில் இதேபோன்ற பரிசோதனை நடைமுறைகள் இருந்திருந்தால் இதனை முன்பு கண்டறிந்திருக்கலாம் என அவர் குறிப்பிட்டுள்ளார்.

லண்டனில் வசிக்கும் 62 வயதான ஜோர்ஜ் அழகையா குடல் புற்றுநோயினால் பாதிக்கப்பட்டிருக்கும் விடயம் கடந்த கிறிஸ்துமஸ் தினத்திற்கு முன்னர் கண்டுபிடிக்கப்பட்டுள்ளது.

ஸ்கொட்லாந்தில் ஆண்கள் மற்றும் பெண்கள் தானாக 50 வயதிலிருந்து ஒவ்வொரு இரண்டு வருடங்களுக்கு ஒரு முறை குடல் புற்றுநோயை பரிசோதிக்கின்றார்கள். இந்த நடைமுறை கீழ் பிரித்தானியாவில் 60 வயதிலேயே பரிசோதனை மேற்கொள்ளப்படுகின்றது.

குடல் புற்றுநோயினால் பாதிக்கப்பட்டவர்கள் ஐந்தாண்டுகளுக்கு மேல் வாழ்வதற்கான சந்ர்ப்பம் வெறும் பத்து வீதமே உள்ளதாக குறிப்பிடப்படுகிறது.

நான் 58 வயதாக இருந்த போது குறைந்தபட்சம் மூன்று தடவை பரிசோதித்தேன். எனினும் நான்காவது முறையே கண்டறியப்பட்டதாக ஜோர்ஜ் தெரிவித்துள்ளார்.

நாம் ஆரம்பத்தில் குடல் புற்றுநோயால் பாதிக்கப்பட்டால் உயிர்வாழும் விகிதங்கள் மிகப்பெரியவை என்று நமக்குத் தெரியும் என அவர் குறிப்பிட்டுள்ளார்.

ஜோர்ஜ் அழகையா தனது சிகிச்சை நிலை தொடர்பில் டுவிட்டரில் பதிவொன்றை வெளியிட்டுள்ளார். அதில் “என் புற்றுநோய் மிகவும் தாமதமாக கண்டறியப்பட்டுள்ளது. அதற்கு ஆரம்ப பரிசோதனைகள் முக்கியமானதாகும்” என அவர் குறிப்பிட்டுள்ளார்.

கொழும்பில் பிறந்து தற்போது லண்டனில் வாழும் ஜோர்ஜ் அழகையா இரண்டாவது முறையாக குடல் புற்றுநோயினால் பாதிக்கப்பட்டுள்ளமை குறிப்பிடத்தக்கது.

யாழ். வடமராட்சி கிழக்கு, அம்பன் கிராமத்தில் வீட்டில் தனித்திருந்த தாயும், மகளும் இன்று அதிகாலை இனந்தெரியாத நபர்களினால் தாக்கப்பட்ட நிலையில் அடிகாயங்களுடன் மீட்கப்பட்டுள்ளனர்.

இதில் பலத்த தாக்குதலுக்கு இலக்காகி இரத்த வெள்ளத்தில் மீட்கப்பட்ட மகள் உயிரிழந்துள்ளார். மேலும், உயிரிழந்தவரின் தாயாரான நல்லதம்பி – இராசம்மா (வயது 75) பலத்த காயங்களுடன் பருத்தித்துறை வைத்தியசாலையில் சிகிச்சைக்காக சேர்க்கப்பட்டுள்ளார்.

உயிரிழந்தவர் நல்லதம்பி – ரேவதி (57 வயது) எனவும் திருமணம் செய்யாதவர் எனவும் கூறப்படுகிறது. இந்த சம்பவத்துக்கான காரணம் இதுவரை வெளியாகவில்லை.

மேலும், சம்பவ இடத்தில் பொலிஸார் குவிக்கப்பட்டுள்ளதுடன், மேலதிக விசாரணைகளை பருத்தித்துறை பொலிஸார் மேற்கொண்டு வருகின்றனர்.