இந்தியா – விசாகப்பட்டடினம் விமான நிலையத்தில் வைத்து கைது செய்யப்பட்ட இலங்கையரின் வயிற்றில் இருந்து 14 தங்க பிஸ்கட்டுகள் மீட்கப்பட்டுள்ளன.

குறித்த தங்க பிஸ்கட்டுகள் ஒவ்வொன்றினதும் நிறை 100 முதல் 150 கிராம் எடை கொண்டது என இந்திய ஊடகங்கள் செய்தி வெளியிட்டுள்ளன.

இலங்கையில், இருந்து சென்ற குறித்த நபர் விசாகபட்டினம் விமான நிலையத்தை சென்றடைந்த போது, அவரின் நடத்தையில் அந்நாட்டு சுங்க பிரிவினர் சந்தேகம் கொண்டனர்.

இதனையடுத்து, அவரிடம் சோதனைகள் மேற்கொள்ளப்பட்டது. முதலில், குறித்த நபர் கொக்கெய்ன் போதைப்பொருள் கடத்தி வந்ததாகவே சந்தேகம் வெளியிடப்பட்டது.

எனினும், பின்னர் மேற்கொண்ட விசாரணைகளின் போது குறித்த நபர் நூதனமான முறையில் வயிற்றில் மறைத்து வைத்து தங்கம் கடத்தி வந்தமை கண்டுபிடிக்கப்பட்டது.

குறித்த நபர் பொலிதீன் பையில் பாதுகாப்பாக வைக்கப்பட்ட தங்க பிஸ்கட்டுகளை விழுங்கியுள்ளமையை ஒப்புக்கொண்டிருந்தார். இதனையடுத்து King George வைத்தியசாலையில் குறித்த நபர் பரிசோதிக்கப்பட்டார்.

இதன் போது அவரின் வயிற்றின் குடல் பகுதியில் 14 தங்க பிஸ்கட்டுகள் இருப்பது கண்டுபிடிக்கப்பட்டது. இந்நிலையில், அறுவை சிகிச்சை இன்றி தங்க பிஸ்கட்டுகளை வெளியேற்றியுள்ளதாக வைத்தியர்கள் தெரிவித்துள்ளனர்.

54 வயதான சந்தேகநபர் தற்போது ஆரோக்கியமாக இருப்பதாக வைத்தியர்கள் கூறியுள்ளனர். இதனையடுத்து சந்தேகநபர் மேலதிக விசாரணைகளுக்காக அந்நாட்டு சுங்க பிரிவினரிடம் ஒப்படைக்கப்படவுள்ளார்.

எவ்வாறாயினும், 1 கிலோ கிராமுக்கும் மேற்பட்ட தங்க பிஸ்கட்டுகள் நபரின் வயிற்றில் இருந்தமை வைத்தியர்களின் மத்தியில் ஆச்சரியத்தை ஏற்படுத்தியுள்ளதாக இந்திய ஊடகங்கள் செய்தி வெளியிட்டுள்ளன.

மதுபானம் என நினைத்து கிருமி நாசினியை பருகிய நபர் ஒருவர் உயிரிழந்துள்ளார். கம்பஹா பிரதேசத்தில் இந்த சம்பவம் இடம்பெற்றுள்ளது.

வீட்டில் மதுபான போத்தலில் வைக்கப்பட்டிருந்த கிருமி நாசினியை, குறித்த நபர் மதுபானம் எனக் கருதி அருந்தியுள்ளார்.

கம்பஹா, வதுரகம, படேபொல என்னும் முகவரியைச் சேர்ந்த 48 வயதான மூன்று பிள்ளைகளின் தந்தையே சம்பவத்தில் உயிரிழந்துள்ளார்.

சம்பவத்தில் பாதிக்கப்பட்ட நபர் கம்பஹா வைத்தியசாலையில் அனுமதிக்கப்பட்ட போதிலும் சிகிச்சை பலனின்றி அவர் உயிரிழந்துள்ளார்.  சம்பவம் தொடர்பில் பொலிஸார் விசாரணைகளை ஆரம்பித்துள்ளனர்.

பேருந்தில் பயணித்த பயணிகளின் உயிரை காப்பாற்ற சாரதி ஒருவர் உயிர் துறந்த இரண்டாவது சந்தர்ப்பம் இலங்கையில் நேற்று பதிவாகியுள்ளது.

தான் ஓட்டிய பேருந்து பாதையை விட்டு விலகியமையினால் அதில் பயணித்த பயணிகளை காப்பாற்றுவதற்காக சாரதி ஒருவர் தனது உயிரை தியாகம் செய்துள்ளார்.

பண்டாரவளை போக்குவரத்து சபையில் சேவை செய்த எச்.எம்.கீர்த்தி பண்டார என்பவரே இந்த தியாகத்தை செய்துள்ளார்.

ஊவா கொஸ்கம பிரதேசத்தை சேர்ந்த அவர் 2009ஆம் ஆண்டும் பண்டாரவளை போக்குவரத்து சபையில் சேவையில் இணைந்துள்ளார்.

விபத்துக்குள்ளான பண்டாரவளை போக்குவரத்து சபைக்கு சொந்தமான 63-0581 என்ற பேருந்து நேற்று மாலை 4.15 மணியளவில் பண்டாரவளையில் இருந்து சென்றுள்ளது.

இந்நிலையில் இந்த பேருந்து ஹப்புத்தளை – பெரகல பிரதேசத்தின் விஹாரகல வீதியில் வைத்து வீதியை விட்டு விலகியுள்ளது. அந்த சந்தர்ப்பத்தில் குறித்த பேருந்தில் சுமார் 35 – 40 பயணிகள் பயணித்துள்ளனர்.
பேருந்தின் பிரேக் செயற்படாமையினால் பாரிய பள்ளம் ஒன்றில் பேருந்து விழும் நிலைக்கு சென்றுள்ளது. இதன்போது உடனடியாக செயற்பட்ட சாரதி பேருந்து பள்ளத்தில் விழாமல் இருப்பதற்காக அடுத்த பக்கத்தில் இருந்து கல்லின் மீது திருப்பியுள்ளார்.

கல்லில் மோதினால் தனது உயிருக்கு ஆபத்து ஏற்படும் என அறிந்தே அவர் செய்த இந்த செயலினால் 10,000 அடி பள்ளத்தில் விழும் நிலையில் இருந்த பேருந்து விழாமல் தவிர்க்கப்பட்டதுடன், பயணிகளின் உயிர்கள் காப்பற்றப்பட்டுள்ளதாக பயணி ஒருவர் தெரிவித்துள்ளார்.

இந்த விபத்தில் சாரதி உயிரிழந்துள்ள நிலையில் மேலும் இருவர் உயிரிழந்துள்ளனர். ஒருவர் போக்குவரத்து சபையின் பரிசோதகராக செயற்படுகின்ற நிலையில் மறைய நபர் பொலிஸ் கான்ஸ்டபிள் என அடையாளம் காணப்பட்டுள்ளனர்.

உயிரிழந்த சாரதி இரண்டு பிள்ளைகளின் தந்தை ஆவார். அவரது ஒரு மகன் 11ஆம் தரத்திலும் மகள் இரண்டாம் தரத்திலும் கல்வி கற்பதாக தெரிவிக்கப்படுகின்றது.

சில மாதங்களுக்கு முன்னர் கொழும்பு பகுதிக்குட்பட்ட பிரதேசம் ஒன்றில், பயணிகளை உயிரை காப்பாற்ற சாரதி ஒருவர் தன் உயிரை தியாகம் செய்திருந்தார் என்பது குறிப்பிடத்தக்கது.

வெளிநாடொன்றில் இலங்கையை சேர்ந்த இளைஞன் மேற்கொண்ட அசிட் தாக்குதல் காரணமாக இலங்கையை சேர்ந்த மற்றுமொரு பெண் உயிரிழந்துள்ளார்.

சார்ஜாவில் பணியாற்றிய தனது மனைவி மீது இலங்கையை சேர்ந்த கணவன், அசிட் தாக்குதல் மேற்கொண்டுள்ளமையால் உயிரிழப்பு ஏற்பட்டுள்ளதாக மத்திய கிழக்கு ஊடகங்கள் தெரிவித்துள்ளன.

கடந்த ஒரு வார காலமாக வைத்தியசாலையில் சிகிச்சை பெற்று வந்த இலங்கையை சேர்ந்த பெண், சிகிச்சை பலனின்றி நேற்று உயிரிழந்துள்ளார்.

மனைவியின் முறையற்ற உறவு முறை காரணமாக இந்த அனர்த்தம் ஏற்பட்டுள்ளதாக சுட்டிக்காட்டப்பட்டுள்ளது.

அறையொன்றில் பிறிதொரு ஆணுடன் மனவைி இருந்த வேளையில், ஆத்திரமடைந்த கணவன், இருவர் மீதும் அசிட் தாக்குதல் மேற்கொண்டுள்ளார்.

எனினும் மனைவி உயிரிழந்துள்ள நிலையில், அவரது காதலன் ஆபத்தான நிலையில் உள்ளதாக அந்நாட்டு வைத்தியசாலைத் தகவல்கள் தெரிவிக்கின்றன.

ஐக்கிய அரபு எமிரேட்ஸ் நாட்டில் இலங்கையர் ஒருவர் பெண் ஒருவரை காதலித்து திருமணம் செய்துள்ளார். அவர் இலங்கை சென்ற நேரத்தில் அவரது மனைவி வேறு ஒருவருடன் தொடர்பில் இருந்துள்ளார்.

இதனை அறிந்து கொண்ட கணவர், மனைவிக்கு தெரிவிக்காமல் ஷார்ஜாவில் உள்ள விடுதி ஒன்றில் அவர் தங்கியுள்ளார். அங்கிருந்து தனது மனைவி அவரது காதலருடன் Nasiriyah பகுதியில் உள்ள வீட்டிற்கு செல்லும் வரை அவதானித்துள்ளார்.

பின்னர் அவர்களை பின் தொடர்ந்து சென்றுள்ளார். வீட்டிற்குள் இரகசியமாக நுழைந்த கணவர், இருவர் மீதும் அசிட் தாக்குதல் மேற்கொண்டுள்ளார். அதன் பின்னர் அவர்களை உள்ளேயே வைத்து கதவை மூடி விட்டு ஷார்ஜா விமான நிலையத்திற்கு சென்றுள்ளார்.

சம்பவத்தில் படுகாயமடைந்த நிலையில் சிகிச்சை பெற்று வந்த 25 வயதுடைய மனைவி நேற்றைய தினம் உயிரிழந்துள்ளதாக தெரிவிக்கப்படுகின்றது.

23 வயதான அவரது காதலன் படுகாயமடைந்த நிலையில் தொடர்ந்து தீவிர சிகிச்சை பிரிவில் சிகிச்சை பெற்று வருவதாக தெரிவிக்கப்படுகின்றது.

இந்த தாக்குதலை மேற்கொண்ட 30 வயதுடைய இலங்கையரான பிரிஷ்னி என்பவர் அங்கிருந்து இலங்கைக்கு தப்பி செல்ல முயற்சித்த வேளை விமான நிலையத்தில் வைத்து கைது செய்யப்பட்டமை குறிப்பிடத்தக்கது.

கட்டுநாயக்க விமான நிலைய வளாகத்தில் இலவசமாக தங்கியிருந்த 60 பேர் கைது செய்யப்பட்டுள்ளனர்.

விமான நிலைய பொலிஸ் அதிகாரிகளினால் மேற்கொள்ளப்பட்ட தேடுதலில் சந்தேகத்திற்கிடமாக, விமான நிலையத்தில் இலவசமாக தங்கியிருந்த 60 பேர் கைது செய்யப்பட்டுள்ளனர்.

இவ்வாறு கைது செய்யப்பட்ட 60 பேரையும் இன்று மினுவாங்கொட நீதவான் நீதிமன்றில் முன்னிலைப்படுத்திய போது அவர்களுக்கு தலா 1,500 வீதம் மொத்தம் 90,000 ரூபா அபராதம் விதிக்கப்பட்டுள்ளதாக சிங்கள ஊடகம் ஒன்று செய்தி வெளியிட்டுள்ளது.

இந்த ஆண்டின் முதல் ஒன்பது மாத காலப் பகுதியில் ரயில் விபத்துக்களினால் 380 பேர் வரையில் உயிரிழந்துள்ளதாக தெரிவிக்கப்பட்டுள்ளது.

ரயில் பாதுகாப்பு அதிகாரி அனுர பிரேமரட்ன, கொழும்பு ஊடகமொன்றுக்கு இந்த தகவலை வெளியிட்டுள்ளார்.

ரயிலில் மோதுதல், தண்டவாளத்தில் தலை வைத்து தற்கொலை செய்து கொள்ளல், பாதுகாப்பற்ற ரயில் கடவைகளில் பயணித்தல், ரயில் பாதையில் செல்பீ புகைப்படம் எடுத்தல் போன்ற காரணிகளினால் அதிகளவு மரணங்கள் பதிவாகியுள்ளன.

கடந்த ஒரு வார காலப்பகுதியில் கரையோர ரயில் பாதையில் ரயிலில் மோதுண்டு எட்டு பேர் வரையில் உயிரிழந்துள்ளனர் என அவர் மேலும் தெரிவித்துள்ளார்.

கம்பஹா வைத்தியசாலைக்கு அருகில் நிறுத்தி வைக்கப்பட்டிருந்த ஹைபிரிட் காரிலிருந்து டீ 56 ரக துப்பாக்கிகள் மீட்கப்பட்ட சம்பவத்துடன் தொடர்புடைய சந்தேகநபர்களை அடையாளம் காண்பதற்கான நடவடிக்கைகளை பொலிஸார் முன்னெடுத்துள்ளனர். இந்நிலையில், குறித்த விடயம் தொடர்பில் பொதுமக்களின் உதவியை பொலிஸார் நாடியுள்ளனர்.

சமிதிபுர – மட்டக்குளிய பகுதியை சேர்ந்த அசங்க சம்பத் குமார என்ற முதலாம் சந்தேகநபரினதும், உடஹமுல்ல, அமரதுங்க மாவத்தையை சேர்ந்த தாரக உயங்க என்ற இரண்டாம் சந்தேகநபரினதும் புகைப்படங்களை பொலிஸார் வெளியிட்டுள்ளனர்.

இவர்கள் தொடர்பில் தகவல் தெரிந்தவர்கள், கம்பஹா பிரதான பொலிஸ் பரிசோதகர் 0178591611, கம்பஹா பொலிஸ் நிலையம் 033-2222226 ஆகிய இலக்கங்களுக்கு தொடர்புகொண்டு அறியத்தருமாறும் கோரிக்கை விடுத்துள்ளனர்.

சம்பவத்துடன் தொடர்புடையவர்கள் என்று சந்தேகிக்கப்படும் இருவர், மேற்படி காரை பன்னிப்பிட்டியவிலிருந்து வாடகைக்கு எடுத்துச் சென்றுள்ளதாக, ஆரம்பக்கட்ட விசாரணைகளில் தெரியவந்துள்ளது.

வரையறையின்றி அத்தியாவசிய உணவுப் பொருட்களை இறக்குமதி செய்து மக்களுக்கு வழங்குவதற்கு வாழ்க்கைச் செலவு குழு தீர்மானித்துள்ளது.

நேற்று (03.10) நடைபெற்ற கூட்டத்தில் இந்த விடயம் குறித்து தீர்மானம் எட்டப்பட்டுள்ளது. இதன்பிரகாரம் அரிசி, பருப்பு, சீனி, கிழங்கு, வெங்காயம், டின்மீன், ஆகியவற்றை இறக்குமதி செய்யவுள்ளதாக வாழ்க்கை செலவு குழுவின் உறுப்பினர் அமைச்சர் மஹிந்த அமரவீர தெரிவித்துள்ளார்.

இறக்குமதி செய்யப்படும் குறித்த பொருட்களை குறைந்த விலையில் சதோச ஊடாக விநியோகிப்பதற்கு தீர்மானிக்கப்பட்டுள்ளது.

இதேவேளை 8 அரிசி வகைகள் மற்றும் நெத்தலி மீனின் விலைகள் கடந்த 28 ஆம் திகதி நள்ளிரவு முதல் குறைவடைந்தன.