அம்பாறை – பாணமை பொலிஸ் பிரிவில் முதலை குன்று பிரதேசத்தில் முதலை தாக்கி மரணமடைந்ததாக கூறப்பட்ட பிரித்தானியா ஊடகவிலாளரான போல் மெக்கலம், நீரில் மூழ்கியதால் உயிரிழந்துள்ளதாக தெரியவந்துள்ளது.

அம்பாறை வைத்தியசாலையில் நடைபெற்ற பிரேதப் பரிசோதனையில் இந்த விடயம் தெரியவந்துள்ளது.

கடந்த 14 ஆம் திகதி அலையில் வழுக்கிச் செல்லும் விளையாட்டின் பின்னர், போல் மெக்கலம் கடோலான பிரதேசத்தின் களப்பு பகுதிக்கு சென்ற போது முதலை இழுத்துச் சென்றதாக கூறப்பட்டது.

இதனையடுத்து நேற்று முன்தினம் பொலிஸாரும், கடற்படை சுழியோடிகளும் இணைந்து சடலத்தை மீட்டனர். நீதவான் விசாரணைகளின் பின்னர் பிரேதப் பரிசோதனைக்காக சடலம் அம்பாறை வைத்தியசாலைக்கு அனுப்பி வைக்கப்பட்டது.

அம்பாறை வைத்தியசாலையில் சட்டவைத்திய அதிகாரியான விசேட மருத்துவ நிபுணர் ஏ. இளங்கோவன் நேற்று பிரேதப் பரிசோதனைகளை நடத்தினார்.

போல் மெக்கலமின் வலதுகாலில் காயம் இருந்த போதிலும் நீரில் மூழ்கியதே மரணத்திற்கு காரணம் என பிரேதப் பரிசோதனையில் தெரியவந்துள்ளது.

பிரித்தானிய ஊடகவியலாளரின் இடதுகாலை கடித்தப்பின்னர் அவர் நீரில் மூழ்கி இறந்துவிட்டதாக பிரேதபரிசோதனையில் தெரியவந்துள்ளது.

24 வயதான போல் மெக்லின் கடந்த வாரம் அருகம்பேயில் முதலையினால் இழுத்துச்செல்லப்பட்டு நீரில் மூழ்கி மரணமானார். இதனையடுத்து ஒருநாளின் பின்னர் அவரின் சடலம் மீட்கப்பட்டது.

இந்தநிலையில் குறித்த ஊடகவியலாளரின் காலில் 6 பற்களின் அடையாளங்கள் காணப்பட்டன. எனினும் குறித்த ஊடகவியலாளரை முதலைதான் கடித்தது என்ற விடயத்தை பிரேத பரிசோதனையில் குறிப்பிடவில்லை. ஏனெனில் அவரின் காலை பல உயிரினங்கள் கடித்த காயங்களும் உள்ளன.

இலங்கையில் சராசரியாக 3 மணித்தியாலங்களுக்கு ஒருவர் என்ற வகையில் நாளொன்றுக்கு 8 பேர் தற்கொலை செய்துக்கொள்வதாக தெரிவிக்கப்படுகின்றது.

இந்நிலையில் தற்கொலை செய்துக் கொள்பவர்களில் ஆண்களே முன்னிலை வகிப்பதாகவும் குறிப்பிடப்பட்டுள்ளது.

இது குறித்து பொலிஸார் விடுத்துள்ள அறிக்கைக்கு அமைய இந்த வருடம் முதல் 6 மாத காலப்பகுதியில் 1,597 தற்கொலைச் சம்பவங்கள் பதிவாகியுள்ளன.

இந்த எண்ணிக்கையில் 1,275 பேர் ஆண்கள் என்றும், 322 பேர் பெண்கள் என்றும் தெரியவருகின்றது. 2015ஆம் ஆண்டு 2,389 ஆண்கள் உள்ளிட்ட 3, 058 தற்கொலைகள் பதிவாகியுள்ளன,

தொடர்ந்து 2016ஆம் ஆண்டு 2,339 ஆண்களும் 668 பெண்களும் தற்கொலை செய்து கொண்டுள்ளனர். 1995ஆம் ஆண்டு 8,500 பேர் என பதிவாகியிருந்த தற்கொலைகள் 2005 இல் அரைவாசிக்கும் மேலாகக் குறைந்து 2015ஆம் ஆண்டில் 3,025 என்ற எண்ணிக்கைக்கு கீழிறங்கியுள்ளது என சுகாதார அமைச்சின் தகவல்கள் சுட்டிக்காட்டுகின்றன.

தற்கொலை செய்து கொள்ளும் மனப்போக்கை மாற்றுவதற்கு இளைஞர்களை மையப்படுத்தி சுகாதார அமைச்சின் உளவள ஆற்றல் சேவைகள் பிரிவால் நாடளாவிய ரீதியில் அரச வைத்தியசாலைகளில் உளவள ஆற்றல் சேவைகள் மேற்கொள்ளப்பட்டு வருவதாக சுகாதார அமைச்சு சுட்டிக்காட்டியுள்ளது.

நேற்று முன்தினம் மட்டக்களப்பு ஏறாவூரில் மாலை மத்ரசாவுக்கு சென்று வீடுதிரும்பிய ஏழு வயதுடைய சிறுமி சாஜஹான் இர்ரீபா, தனது விரலில் போடப்பட்டிருந்த தங்க மோதிரத்தை தொலைத்துவிட்டு வீடுவந்திருப்பதை அறிந்த தாய், அச் சிறுமிக்கு கரண்டியை நெருப்பில் சூடாக்கி வயிற்றிலும், கால் பாதத்திலும், கைப்பட்டையிலும் சூடு வைத்ததால் சிறுமி படுகாயங்களுக்குள்ளாகியுள்ளார்.

சிறுமியின் மரண ஓலமான அழுகுரலை கேட்ட அப்பகுதி மக்கள் ஓன்று கூடி நடந்த விடயத்தை அறிந்து உடனடியாக ஏறாவூர் பொலிஸாருக்கு அறிவித்தன் பேரில், தாய் கைது செய்யப் பட்டதோடு குழந்தை , மேலதிக சிகிச்சைக்காக ஏறாவூர் வைத்தியசாலையில் அனுமதிக்கப்பட்டு , இரவு 10.30 மணியளவில் மட்டக்களப்பு போதனா வைத்தியசாலைக்கு அனுப்பி வைக்கப்பட்டுள்ளார்.

தனது தாய்தான் எனக்கு சூடு வைத்தார் எனக் கூறிய அக் குழந்தை,எனது தாயை ஜெயிலுக்கு அனுப்பவேண்டாம் என பொலிஸாரிடம் மன்றாடியது மனதை உருக்கியது.

பிறந்து ஏழு நாட்களே நிரம்பிய சிசுவொன்று, நாய்க்கு இரையாகி உயிரிழந்த பரிதாப சம்பவம் ஹபரன – நாமல்புர பிரதேசத்தில் நேற்று (17.09) பதிவானது.

ஏழு நாட்களுக்கு முன்னர் பிறந்த கவிஷ்க சந்தருவன் இந்தக் குடும்பத்தின் மூன்றாவது பிள்ளை. தமது ஜீவனோபாயத்திற்காக தினமும் கூலி வேலை செய்யும் சமன்குமார மற்றும் நிரோஷா குமாரி ஆகியோருக்கு பிறந்த கவிஷ்க குடும்பத்தின் ஒரேயொரு ஆண் பிள்ளை.

குழந்தை பிறந்த மகிழ்ச்சியில் ஆறு நாட்கள் வீட்டிலிருந்த குழந்தையின் தந்தை, தேன் எடுப்பதற்காக காட்டிற்கு சென்றுள்ளார்.

இதனிடையே வீட்டில் இருந்த மற்றைய இரண்டு பெண் பிள்ளைகளில் ஒரு பிள்ளை தனக்கு பசி என்று கூறி தாயிடம் உணவு கேட்ட போதிலும் அவளுக்கு கொடுக்க இந்த வீட்டில் எதுவும் இருக்கவில்லை.

இதனால் பாட்டியின் வீட்டுக்குச் சென்று ஒரு சுண்டு அரசி எடுத்துவருமாரு தாய் கூறிய பின்னர் இரண்டு பெண் பிள்ளைகளும் வீட்டை விட்டுப் புறப்பட்டுள்ளனர்.

ஏழு நாட்களேயான சிசுவை பாயில் வைத்துவிட்டு, அரசியை கழுவுவதற்கு நீரை எடுக்க 200 மீற்றர் தொலைவில் உள்ள கிணற்றுக்கு இந்த தாய் சென்றுள்ளார்.

கொண்டுவந்த அரிசியை பானையில் இட்டு சமைக்க ஆரம்பித்த போது சிசுவின் அழு குரல் கேட்டுள்ளது.

இதன்போது சிசு இருந்த இடத்திற்கு இந்த தாய் ஓடிய போது, தான் பெற்ற குழந்தையை நாய் ஒன்று கடித்துக் கொண்டிருக்கும் துயர் மிகு காட்சியை கண்டுள்ளார்.

நாயை விரட்டிய தாய் உடனே சிசுவை தூக்கி தம்புள்ளை வைத்தியசாலைக்கு கொண்டு சென்ற போதிலும் அவ்வேளையில் கவிஷ்கவின் உயிர் பிரிந்திருந்தது.

தனது குழந்தையின் இறுதிக் கிரியையைக் கூட நிறைவேற்றுவதற்கு போதிய வசதி இல்லாத இந்தப் பெற்றோருக்கு தம்புள்ளை பிரதேச வைத்தியசாலையின் ஊழியர்கள் ஒன்றிணைந்து நிதியுதவி செய்தனர்.

மலேசியாவில் சட்டவிரோதமான முறையில் தங்கியிருந்த 111 வெளிநாட்டவர்கள் கைது செய்யப்பட்டுள்ளதாக அந்நாட்டு ஊடகமொன்று தகவல் வெளியிட்டுள்ளது.

ஜோஹர் பஹ்ரு நகரில் உள்ள செனாய் தொழில்துறை பகுதியில் உள்ள தங்குமிட விடுதியொன்றில் நடத்தப்பட்ட திடீர் சோதனையில் அவர்கள் கைது செய்யப்பட்டுள்ளனர்.

செல்லுபடியாகக்கூடிய பயண ஆவணங்கள் இல்லாத நிலையில் அவர்கள் கைது செய்யப்பட்டதாக அந்நாட்டு குடிவரவு – குடியகல்வு கட்டுப்பாட்டுத் திணைக்கள பணிப்பாளர் டடுக் செரி முஷ்டபார் தெரிவித்துள்ளார்.

46 பேர் பங்களாதேஷ், 22 பேர் மியன்மார், 17 பேர் நேபாளம், 11 பேர் இந்தோனேஷியா, 4 பேர் வியட்னாம், 3 பேர் பிலிப்பைன்ஸ் முதலான நாடுகளைச் சேர்ந்தவர்கள் கைது செய்யப்பட்டுள்ளனர்.

இவர்களைத் தவிர ஏனையவர்கள், இலங்கை, இந்தியா, பாகிஸ்தான் மற்றும் சீனா முதலான நாடுகளைச் சேர்ந்தவர்கள் எனத் தெரிவிக்கப்பட்டுள்ளது.

மியன்மாரில் இருந்து இலங்கை வரும் சுற்றுலா பயணிகளுக்கான விசாக்களை இரத்துசெய்ய அரசாங்கம் தீர்மானித்துள்ளதாக வெளியான செய்தியை குடிவரவு-குடியகழ்வு திணைக்களம் மறுத்துள்ளது.

குறித்த செய்தியானது உள்நாட்டு அலுவல்கள் அமைச்சர் எஸ்.பி.நாவின்னவை மேற்கோள்காட்டி ஆங்கில ஊடகமொன்றில் வெளியிடப்பட்டிருந்தது.

சுற்றுலாப்பயணிகள் என்ற போர்வையில் ரோஹிங்கியா முஸ்லிம் அகதிகள் இலங்கைக்குள் வரலாம் என்ற எச்சரிக்கையின் அடிப்படையிலேயே இந்த தீர்மானம் எடுக்கப்பட்டதாக அந்தச் செய்தியில் தெரிவிக்கப்பட்டிருந்தது.