யாழ் பல்கலைக்கழகத்தின் பாதுகாப்பு முழுமையாக உறுதி செய்யப்பட்டுள்ள நிலையில் அச்சமின்றி சுதந்திரமாக கல்வி நடவடிக்கைகளை தொடருமாறு மாணவர்களுக்கு ஜனாதிபதி மைத்திரிபால சிறிசேன வேண்டுகோள் விடுத்துள்ளார்.

யாழ் பலகலைக்கழகம் தொடர்பாக பல்கலைக்கழகத்தின் உபவேந்தர், விரிவுரையாளர்கள் மற்றும் பெற்றோர்கள் உடன் ஜனாதிபதி செயலகத்தில் இடம்பெற்ற கூட்டமொன்றில் உரையாற்றிய போதே ஜனாதிபதி இதனை தெரிவித்ததாக ஜனாதிபதி ஊடகப் பிரிவு செய்தி வௌியிட்டுள்ளது.

அண்மையில் யாழ் பல்கலைக்கழகத்தில் இடம்பெற்ற மோதல் சம்பவம் மற்றும் மாணவர்களின் பாதுகாப்புக்காக எடுக்கப்பட்டுள்ள நடவடிக்கைகள் தொடர்பாக இங்கு விரிவாக கலந்துரையாடப்பட்டதாக ஜனாதிபதி ஊடகப் பிரிவு கூறியுள்ளது.

மேலும் உரையாற்றிய ஜனாதிபதி, யாழ் பல்கலைக்கழக மாணவர்களின் பாதுகாப்பு தற்போது உறுதி செய்யப்பட்டுள்ளதாகத் தெரிவித்தார்.

சில குழுக்கள் யாழ் பல்கலைக்கழக மாணவர்கள் மத்தியில் மோதல்களை ஏற்படுத்த முயற்சித்து வருவதாக குற்றம் சாட்டிய ஜனாதிபதி, பல்கலைக்கழகத்தினுள் மாணவர்களின் பாதுகாப்புக்காக மாணவர்கள் மற்றும் விரிவுரையாளர்களின் பங்களிப்புடன் விசேட குழுவொன்று அமைக்கப்படவுள்ளதாகத் தெரிவித்தார்.

எனவே, யாழ் பல்கலைகழகத்தின் கல்வி தடையின்றி முன்னெடுப்பது அவசியமென்று கூறிய ஜனாதிபதி சிறிசேன வதந்திகளை நம்புவதைத் தவிர்த்து கல்வி நடவடிக்கைகளில் ஈடுபடுமாறு மானவர்களிடம் வேண்டுகோள் விடுப்பதாகத் தெரிவித்தார்.

இரு கால்களும் செயலிழந்த நிலையில், பல்கலைக்கழகத்துக்கு தெரிவான மாணவர் ஒருவர் அங்கு தனது பட்டப்படிப்பை முடித்துக் கொண்டு முகாமைத்துவ, வர்த்தகத்துறை பட்டதாரியாகியுள்ளார்.

மாத்தறை தெலிஜ்ஜவில என்ற இடத்தைச் சேர்ந்த கசும் சாமர என்ற இந்த இளைஞர் தனது பட்டப்படிப்பை ஸ்ரீஜெயவர்தனபுர பல்கலைக் கழகத்திலேயே தொடர வேண்டிய நிலை ஏற்பட்டது.

கால்கள் செயலிழந்த நிலையில், அவரது தாய் பல்கலைக்கழக கல்வி நடவடிக்கைகள் நடைபெறும் அனைத்து நாட்களிலும் அங்கு அவரை அழைத்துச் சென்றுள்ளார்.

நேற்று முன்தினம் பண்டாரநாயக்க ஞாபகார்த்த மண்டபத்தில் நடைபெற்ற ஸ்ரீஜெயவர்தனபுர பல்கலைக்கழக பட்டமளிப்பு விழாவில் அவர் கலந்து கொண்டு பல்கலைக்கழக வேந்தர் கலாநிதி வெல்லன்வில விமலரத்ன தேதரரிடமிருந்து தனது பட்டத்தை பெற்றுக் கொண்டார்.

எதிர்வரும் 17ம் திகதி முதல் 21ம் திகதி வரையான காலத்தில் தரம் 05 புலமைப் பரிசில் பரீட்சைக்குத் தோற்றும் மாணவர்களுக்கான பிரத்தியேக வகுப்புக்கள், கருத்தரங்குகள் நடத்துவதற்கு தடை செய்யப்பட்டுள்ளது.

எதிர்வரும் 21ம் திகதி புலமைப் பரிசில் பரீட்சை நடைபெற இருப்பதால் குறித்த தடை விதிக்கப்பட்டுள்ளதாக பரீட்சைகள் திணைக்களம் தெரிவித்துள்ளது.

அதன்படி மாதிரி வினாத்தாள்களை அச்சிடல், அவற்றை விநியோகித்தல் உள்ளிட்ட செயற்பாடுகளுக்கும் தடை விதிக்கப்பட்டுள்ளது.

அத்துடன், மாதிரி வினாத்தாள்களை வழங்குவதாக பதாகைகள் ஒட்டுவது, துண்டுப் பிசுரங்களை விநியோகித்தல் மற்றும் குறித்த காலப்பகுதியில் அச்சு அல்லது இலத்திரனியல் ஊடகங்கள் ஊடாக பிரச்சாரங்கள் மேற்கொள்வதும் தடை செய்யப்பட்டுள்ளது.

ஏறாவூர் பொலிஸ் பிரிவுக்குட்பட்ட சந்திவெளி பிரதேசத்தைச் சேர்ந்த குடும்பஸ்தர் ஒருவர் தனது பிள்ளைகளுக்கான பிள்ளைச் செலவுகளைக் கட்டமுடியாமல் தற்கொலை செய்து கொண்டுள்ளதாக பொலிஸார் தெரிவித்தனர்.

இவரின் சடலம் சந்திவெளி பொது மயானத்திற்கருகில் இருந்து மீட்கப்பட்டுள்ளதாகவும் பொலிஸார் தெரிவித்தனர்.

சந்திவெளி பிரதான வீதியைச் சேர்ந்த சின்னையா குணரத்தினம் (55 வயது) என இவர் அடையாளம் காணப்பட்டுள்ளார். பொதுமக்களினால் வழங்கப்பட்ட தகவலையடுத்து இச்சடலம் மீட்கப்பட்டதாக பொலிஸார் கூறினர்.

இரண்டு பிள்ளைகளின் தந்தையான இவர், பல வருடங்களாக குடும்பத்தைப் பிரிந்து வாழ்ந்துவந்துள்ளார். இதனையடுத்து இவரின் மனைவி இவருக்கெதிராக வழக்குத் தாக்கல் செய்த போதிலும் தனது பிள்ளைகளுக்கு செலவுக்கான பணத்தினை செலுத்த முடியாத நிலையில் மறியலில் இருந்து விட்டு வந்தபோது மீண்டும் இவருக்கான வழக்கு தொடரப்பட்டதையடுத்து இவர் நஞ்சருந்தி தற்கொலை செய்த கொண்டதாக பொலிஸார் மேற்கொண்ட விசாரணைகள் மூலம் தெரியவந்துள்ளது.

இச்சடலத்திற்கருகில் போத்தல் ஒன்றும் கிளாஸ் ஒன்றும் காணப்பட்டுள்ளது. சடலம் காணப்பட்ட இடத்தைப் பார்வையிட்ட ஏறாவூர் திடீர் மரணவிசாரணை அதிகாரி எம்.எஸ்.எம். நஸிர் விசாரணைகளை ஆரம்பித்ததுடன் சடலத்தில் எவ்வித காயங்களும் காணப்படவில்லை என்றும் கூறினார்.

பொலிஸ் குற்றப் புலனாய்வுப் பிரிவினர் சம்பவ இடத்திற்குவருகைதந்து தடயங்களை பரிசோதனை செய்தனர். சடலம் பிரேத பரிசோதனைக்காக செங்கலடி கிராமிய வைத்தியசாலையில் ஒப்படைக்கப்பட்டிருந்தது.

இதன் பிரகாரம் நேற்று வியாழக்கிழமை முற்பகல் இவரின் மரணம் தொடர்பான விசாரணைகள் நடத்தப்பட்டு சடலம் குடம்பத்தாரிடம் ஒப்படைக்கப்பட்டது.

மேலதிக விசாரணைகளை ஏறாவூர்ப் பொலிஸார் மேற்கொண்டுவருகின்றனர்.

நுவரெலியா மேல் நீதிமன்றம் ஒரே குடும்பத்தை சேர்ந்த 7 பேருக்கு மரண தண்டனை விதித்துள்ளது.

2000 ஆம் ஆண்டு ஜூன் மாதம் 4 ஆம் திகதி இடம்பெற்ற கொலைச் சம்பவம் தொடர்பில் இடம்பெற்ற நீண்ட நாள் வழக்கு விசாரணையை அடுத்து இந்த உத்தரவு பிறக்கப்பிட்டுள்ளது.

நுவரெலியா வென்ச்சர் தோட்டத்தை சேர்ந்த பெரியசாமி சண்முகநாதன் எனும் நபரை தாக்கி கொலை செய்த சம்பவம் தொடர்பில் குறித்த 7 நபர்களுக்கு எதிராக மூன்று குற்றபத்திரிகைகள் தாக்கல் செய்யப்பட்டிருந்தன.

முதலாவது குற்றசாட்டிற்காக இந்த 7 பேருக்கும் தலா 3,000 ரூபா அபராதமும், 6 மாத சிறைத்தண்டனையை விதித்த மேல் நீதிமன்ற நீதிபதி லலித் ஏக்கநாயக்க, மூன்றாவது குற்றச்சாட்டிற்காக இவர்களுக்கு மரண தண்டனையை விதித்துள்ளார்

பிரசவத்திற்கு வைத்தியசாலைக்கு அழைத்துச் செல்லப்பட்டுக் கொண்டிருந்த தாய் பஸ் ஒன்றுக்கு மோதி உயிரிழந்த நிலையில் குழந்தை பாதுகாப்பாக பெற்றெடுக்கப்பட்ட சோக சம்பவம் ஒன்று இடம்பெற்றுள்ளது.

ஒரு பிள்ளையின் தாய் என்று கூறப்படும் குறித்த கார்ப்பிணித் தாய் இரண்டாவது குழந்தையின் பிரசவத்திற்காக தனது கணவருடன், முச்சக்கர வண்டியில் காலி, மஹமோதரை வைத்தியசாலைக்கு செல்லும் போது இந்த விபத்து இடம்பெற்றுள்ளது.

நேற்றிரவு 8.45 மணியளவில் காலி சுமுது மாவத்தையில் இந்த விபத்து இடம்பெற்றுள்ளது. விபத்து இடம்பெற்றவுடன் பஸ் நிறுத்தாமல் தப்பிச் சென்றுள்ளதுடன், கர்ப்பிணித் தாயை முச்சக்கரவண்டியின் சாரதி உடனடியாக வைத்தியசாலைக்கு எடுத்துச் சென்றுள்ளார்.

இதன்போது சீஸர் முறைப்படி குழந்தையின் உயிரைக் காப்பாற்றிய வைத்தியர்களால் தாயின் உயிரைக் காப்பாற்ற முடியவில்லை.

ஊருகஸ்மன்ஹந்திய, வடக்கு மாகல பிரதேசத்தைல் வசிக்கும் 25 வயதுடைய தாயே இவ்வாறு உயிரிழந்துள்ளதுடன், குறித்த தம்பதியினர் வெலிகம பிரதேசத்தில் கறுவா தொழில் செய்து குடும்பம் நடத்தி வந்ததாக கூறப்படுகிறது.