ஒன்றரை கிலோ தங்கத்துடன் 3 இலங்கையர்கள் இந்தியாவின் திருவனந்தபுரம் விமானநிலையத்தில் வைத்து கைது செய்யப்பட்டுள்ளனர்.இந்திய ரூபாவின் படி இதன் பெறுமதி 46 இலட்சம் என்று தெரிவிக்கப்பட்டுள்ளது.

இலங்கையிலிருந்து யு.எல்.161 என்ற விமானம் மூலம் நேற்று காலை 8.45 மணியளவில் இவர்கள் இந்தியா சென்றுள்ளதாகவும், யோகேஸ்வரி செல்லத்தம்பி, சுசிகலா யோகேஸ்வரன், ராமக்கல் ராமசாமி ஆகிய சந்தேகநபர்களே இவ்வாறு கைது செய்யப்பட்டுள்ளதாகவும் குறிப்பிடப்பட்டுள்ளது.

இதேவேளை, இவர்களிடம் இருந்து 8 தங்க வளையல்கள், 4 தங்கச் சங்கிலிகள், பென்டன்கள் பத்து உள்ளிட்ட பல தங்க ஆபரணங்கள் மீட்கப்பட்டுள்ளதாகவும் இந்திய விமானநிலைய தகவல்கள் தெரிவித்துள்ளமை குறிப்பிடத்தக்கது.

நல்லூர் கந்தன் ஆலயத்தில் பக்தர்களின் பாதுகாப்பு கருதி இம்முறை ஆலய சூழல் கண்காணிப்பு கமராக்கள் பொருத்தப்படவுள்ளதாக யாழ்.மாநகர சபையின் ஆணையாளர் பொ.வாகீசன் தெரிவித்துள்ளார். நல்லூர் கந்தசுவாமி ஆலய நல்லூர் கந்தசுவாமி ஆலய வருடாந்த மஹோற்சவத் திருவிழா எதிர்வரும் 8ம் திகதி கொடியேற்றத்துடன், ஆரம்பமாகி தொடர்ந்து 25 நாட்கள் நடைபெறவுள்ள நிலையில், திருவிழாவுக்கான மாநகர சபையின் ஏற்பாடுகளை ஊடகவியலாளர்களுக்கு தெளிவுபடுத்தும் ஊடகவியலாளர் சந்திப்பு மாநகர சபை மண்டபத்தில் நேற்று செவ்வாய்க்கிழமை நடைபெற்றது.

இதன்போதே அவர் மேற்கண்டவாறு கூறினார். தொடர்ந்து அவர் கூறுகையில்,நல்லூர் மஹோற்சவ காலத்தில் ‘பிளாஸ்ரிக் அர்ச்சனைத் தட்டுக்களுக்கு பதிலாக பனையோலையில் தயாரிக்கப்பட்ட அர்ச்சனைத்தட்டுக்கள் விற்பனை செய்ய வேண்டும். அவற்றை மாவட்ட மகளிர் அமைப்புக் கள் ஊடாகவும், பனைசார் உற்பத்தியாளர்களிடமிருந்தும், குறைந்த விலைகளில் கடைக்காரர் கள் பெற்றுக் கொள்வதற்கான நடவடிக்கைகள் மேற்கொள்ளப்பட்டுள்ளது. இதனைவிட, 20 மைக்றோவுக்கு குறைவான பொலித்தீன் பாவனை மற்றும் உக்கலடையாத பொரு ட்களின் பாவனை என்பனவும் முற்றாகத் தடைசெய்யப்பட்டுள்ளது.

ஆலயத்துக்கு வருகை தரும் பக்தர்களும், கடமையில் ஈடுபடுபவர்களுக்கு கலாசார உடைகளை அணிய வேண்டும். ஆலய வெளி வீதியில் அங்கப் பிரதட்சனை செய்வதற்காக கொட்டப்பட்டுள்ள மணலை அசிங்கம் செய்யாமல், சுகாதாரம் பேணவேண்டும். ஆலய சூழலில் திருட்டு சம்பவங்களை தடுப்பதற்காக ஆங்காங்கே கண்காணிப்பு கமராக்கள் பொருத்தவும் நடவடிக்கை எடுக்கப்படவுள்ளது. ஆலயத் சுற்றாடலையொட்டி அமைக்கப்படும் வாகனப் பாதுகாப்பு நிலையங்களில் சைக்கிள்களுக்கு 5 ரூபாயும், மோட்டார் சைக்கிள்களுக்கு 10 ரூபாயும் மாத்திரம் அறிவிட ப்படவேண்டும்.

மீறுபவர்களுக்கு எதிராக நடவடிக்கை எடுக்கப்படும்.ஆலயத்தின் முக்கிய திருவிழாக் காலங்களில் ஆலயத்துக்குள் நுழையும் காவடிகள், வடக்கு வீதிப்பக்கமாக நுழைந்து, குபேர வாசலில் தங்கள் நேர்த்திக் கடனை முடித்த பின்னர், கோவில் வீதி வழியாக தெற்கு பக்கமாக வெளியேற வேண்டும். ஆலயத்தை சூழ அமைக்கப்படும் வீதித்தடைகள் எதிர்வரும் 7 ஆம் திகதி பிற்பகல் 2 மணியுடன் அமுலுக்கு வருகின்றது. ஆலயச் சூழலில் கடைகள் அமைத்தவர்கள் தங்கள் பொருட்களை இடமாற்றுவதற்காக மாத்திரம் மதியம் 12 மணி முதல் 2 மணிவரையில் பாதை திறக்கப்படும். மேலும், அப்பகுதியில் குடியிருப்பவர்கள், கடைகள் வைத்திருப்பவர்கள், அலுவலகங்களில் பணியாற்றுபவர்களுக்கு, சென்று வருவதற்கு விசேடமான அடையாள அட்டை வழங்கப்படும் என்றார்.

மோட்டார் சைக்கிளொன்று புகையிரதத்துடன் மோதியதில் மூவர் பலியாகியுள்ளதாக தெரிவிக்கப்பட்டுள்ளது. குருநாகல்-கனேவத்த பாதுகாப்பற்ற புகையிரத கடவையிலேயே இந்த சம்பவம் இன்று இடம்பெற்றுள்ளது. குறித்த மூவரும் ஒரே மோட்டார் சைக்கிளில் பயணித்தவர்கள் என்றும், அவர்களது சடலம் கனேவத்த புகையிரத நிலையத்தில் வைக்கப்பட்டுள்ளதாகவும் வெல்லவ பொலிஸார் குறிப்பிட்டுள்ளனர்.

இதேவேளை பல கோரிக்கைளை முன்வைத்து பாதுகாப்பற்ற புகையிரத கடவை காவலர்கள் கடந்த ஞாயிற்றுக்கிழமை முதல் பணி நிறுத்தப்போராட்டத்தில் ஈடுபட்டு வருகின்றமை குறிப்பிடத்தக்கது.

 
சற்றுமுன் மதவாச்சி புகையிரத நிலையத்தை முற்றுகையிட்டு தண்டவாளங்களின் குறுக்கே நின்று புகையிரதக் காப்பாளர்கள் திடீரென மாபெரும் ஆர்ப்பாட்டத்தில் ஈடுபட்டனர். இதனால் அங்கு பதற்றமான சூழ்நிலை காணப்படுகின்றது.

வடமாகாண புகையிரதக் காப்பாளர் சங்கத் தலைவர், செயளாளர் மற்றும் காப்பாளர்களுடன் தென்மாகாண புகையிரதக் காப்பாளர் சங்கத் தலைவர், செயளாளர் மற்றும் காப்பாளர்களும் இணைந்து இவ் ஆர்ப்பாட்டத்தை மேற்கொண்டு வருகின்றனர்

நிரந்தர நியமனம் கோரியும் ஜனாதிபதி மற்றும் பிரதமர் வாக்குறுதி அளித்த சம்பள உயர்வு இன்னமும் அதிகரிக்கவில்லை என்றும் மேலதிக பணியாளர்களை பணிக்கு அமர்த்தும் போது அந்தந்தக் கிராமங்களிலேயே பணியாளர்களை அமர்த்துமாறும் கோரி ஆர்ப்பாட்டம் மேற்கொள்ளப்படுகின்றது.

கொலை குற்றச்சாட்டடில் குற்றவாளியாக அடையாளம் காணப்பட்ட ஒருவருக்கு பாணந்துரை நீதிமன்றம் நேற்று மரண தண்டனை விதித்து தீர்பளித்துள்ளது.

மொரட்டுவ பிரதேசத்தினை சேர்ந்த ஒருவருக்கே இவ்வாறு மரணத்தண்டனை விதித்து நீதிபதி விக்ரம களுஹாராச்சி இந்த தீர்ப்பை வழங்கியுள்ளார்.

கடந்த 2007ஆம் ஆண்டு மே மாதம் மொரடுவை – கடொலான பிரதேசத்தில் இடம்பெற்ற கொலை சம்பவம் தொடர்பில் இந்த மரண தண்டனை வழங்கப்பட்டுள்ளது.

இதேவேளை, குறித்த கொலை வழக்கில் குற்றம் சுமத்தப்பட்ட மற்றுமொரு சந்தேகநபர் வழக்கு விசாரணைகள் இடம்பெற்றிருந்த இடைநடுவில் உயிரிழந்தமை குறிப்பிடத்தக்கது.

ஆறாம் தரத்திற்கு புதிதாக சேர்ந்த மாணவியொருவரை அந்த வகுப்பிலிருந்த பழைய மாணவிகள் பகிடிவதைக்கு உட்படுத்திய சம்பவமொன்று இடம்பெற்றுள்ளது.

இந்த சம்பவம் தெவனகல, கன்துன பிரதேசத்திலுள்ள பாடசாலையொன்றில் இடம்பெற்றுள்ளதாக தெரிவிக்கப்படுகின்றது.

ஐந்தாம் தர புலமைப்பரிசில் பரீட்சையில் சித்திபெற்ற மாணவியொருவர் குறித்த பாடசாலையில் சேர்ந்திருக்கிறார்.

அவரைப் பகிடிவதை செய்யும் நோக்கில் பழைய மாணவிகளில் ஒருசிலர் அவரது பாடசாலை சீருடையை கிழித்து வகுப்பறை மண்டபத்தைச் சுற்றிவரச் செய்துள்ளனர்.

குறித்த விடயம் தொடர்பில் ஆசிரியைகள் வினவியபோது, பல்கலைக்கழகங்களில் நடக்கின்ற பகிடிவதைகளுக்கு இப்போதே ஒத்திகை பார்த்ததாக குறித்த மாணவிகள் தெரிவித்ததாக அறியமுடிகின்றது.

இந்த வகுப்பிலுள்ள மாணவியொருவரின் சகோதரன் பல்கலைக்கழகத்தில் சேர்ந்திருப்பதாகவும், அவர் விடுமுறையில் வரும்போது அங்கு நடக்கும் பகிடிவதைகள் பற்றி கதை கதையாகக் கூறுவதாகவும் தெரியவந்துள்ளது.

இந்நிலையில், இந்த விடயத்தினை சக மாணவிகளிடம் பகிர்ந்துகொண்டபோது அவர்களுக்கும் இந்தப் பகிடிவதை ஆசை வந்ததாக அறியமுடிகின்றது.

பகிடிவதையால் பயந்துபோய் புதிய மாணவி பாடசாலைக்குப் போக மறுப்பு தெரிவித்ததை அடுத்து பெற்றோர்கள் பாடசாலை அதிபரிடம் முறைப்பாடு செய்துள்ளனர்.

அதனைத் தொடர்ந்து அனைத்து மாணவிகளின் பெற்றோர்களையும் பாடசாலைக்கு வரவழைத்த அதிபர் இவ்வாறான செயல்கள் மீண்டும் நடக்காமல் இருக்க எச்சரிக்கை விடுத்துள்ளார்.

இதேவேளை, புதிய மாணவி தற்போது மீண்டும் குறித்த பாடசாலைக்கு செல்வதாகக் தெரிவிக்கப்படுகின்றது.

அவுஸ்திரேலிய குடியேற்ற மற்றும் எல்லைப் பாதுகாப்புத் துறையின் புதிய தகவலின் அடிப்படையில் அவுஸ்திரேலியாவில் தஞ்சம் கோரியுள்ள சுமார் 1500க்கும் மேற்பட்டோர் தடுப்பு முகாம்களில் இருப்பதாக தெரிவிக்கப்படுகின்றது.

இவர்களில் இலங்கையைச் சேர்ந்த 94 பேரும், இந்தியாவைச் சேர்ந்த 65 பேரும் அகதிகளாக இருப்பதாக தெரிவிக்கப்பட்டுள்ளது. மேலும், நியூசிலாந்தை சேர்ந்த 199 பேரும், ஈரானை சேர்ந்த 175 பேரும், வியட்நாமை சேர்ந்த 142 பேரும் அகதிகளாக இருப்பதாக தெரிவிக்கப்படுகின்றது.

இலங்கை புகலிட கோரிக்கையாளர்கள் பெரும்பாலானோர் சில ஆண்டுகளுக்கு முன் கடல் வழியாக அவுஸ்திரேலியாவை வந்தடைந்தவர்கள்.

மூன்று அல்லது ஐந்து ஆண்டுகள் தடுப்பிற்கு பின்னர் அவுஸ்திரேலியாவில் வாழ அந்நாட்டு அரசு அனுமதி வழங்குகின்றது என்ற நம்பிக்கையிலேயே இலங்கையைச் சேர்ந்த புகலிட கோரிக்கையாளர்கள் அவுஸ்திரேலியாவை நோக்கி வருகின்றனர்.

எனினும், சமீப காலமாக கடல் வழியாக வரும் புகலிட கோரிக்கையார்களை அவுஸ்திரேலியா தொடர்ந்து திருப்பி அனுப்பி வருகின்றது.

யுத்தம் முடிவுக்கு கொண்டு வரப்பட்டதை காரணம் காட்டி, இலங்கை அகதிகளை பொருளாதார அகதிகளாகவும் அடையாளப்படுத்துகிறது.

இதனால் தமிழ் அகதிகள் அவுஸ்திரேலியாவில் தஞ்சக்கோரிக்கை பெற்றுக்கொள்வதில் பெரும் சிக்கலை எதிர்நோக்கியுள்ளனர்.