மேடைகளிலும் பாதைகளிலும் விதவிதமாக பேசிச் சென்றாலும், கடந்த அரசாங்கத்தினால் நாட்டிற்குள் இழுத்துப் போடப்பட்ட பொருளாதார நெருக்கடியின் சுமையை தற்போது பொதுமக்கள் தாங்க வேண்டி இருப்பதாக ஜனாதிபதி மைத்திரிபால சிறிசேன கூறுகின்றார்.

இலங்கை தற்போது 9000 மில்லியன் ரூபா கடனை தாங்கி நிற்பதால், அரசியல்வாதிகள், அரச அதிகாரிகள் மற்றும் பொது மக்கள் அனைத்து தரப்பினரும் பொருளாதார நெருக்கடி நிலமையை புரிந்து செயற்பட வேண்டும் என்று அவர் கேட்டுக் கொண்டுள்ளார்.

எவ்வாறாயினும் இதுபோன்ற நெருக்கடியில் இருந்தாலும் மக்களுக்கு வழங்கப்படும் நிவாரணங்களில் குறைகள் ஏற்படாது என்று அவர் கூறுகின்றார்.

நாட்டின் அபிவிருத்திக்காக அரச மற்றும் தனியார் துறையினர் ஒன்றிணைந்து புதிய பயணத்தை ஆரம்பிக்க வேண்டும் என்றும் ஜனாதிபதி மைத்திரிபால சிறிசேன கூறினார்.

கொழும்பில் இடம்பெற்ற பொருளாதார மாநாட்டின் ஆரம்ப நிகழ்வில் உரையாற்றும் போதே ஜனாதிபதி இவ்வாறு கூறியுள்ளார்.

பொரலஸ்கமுவ, கட்டுவாவ விகாரைக்கு அருகில் நேற்று இரவு இடம்பெற்ற துப்பாக்கிச் சூட்டு சம்பவத்தில் ஒருவர் உயிரிழந்துள்ளார்.

குறித்த நபர் மோட்டார் சைக்கிளில் சென்று கொண்டிருந்தபோது கார் ஒன்றில் வந்தவர்கள் துப்பாக்கிச் சூட்டை மேற்கொண்டுள்ளதாக பொலிஸார் தெரிவித்தனர். 30 வயதுடைய ஒருவரே துப்பாக்கிச் சூட்டில் உயிரிழந்துள்ளார்.

துப்பாக்கிச் சூட்டுக்கான காரணம் இதுவரை தெரியவில்லை என்பதுடன், பொலிஸார் மேலதிக விசாரணைகளை ஆரம்பித்துள்ளனர்.

கொழும்பில் இருந்து மட்டக்களப்பு நோக்கி சென்ற புகையிரதத்தில் மோதுண்டு 22 வயது மதிக்கத்தக்க இளைஞர் ஒருவர் பலியாகியுள்ளார் .
இந்த விபத்து மட்டக்களப்பில் இன்று அதிகாலை 4 மணியளவில் நடந்துள்ளதாக பொலிஸார் குறிப்பிட்டுள்ளனர்.

மட்டக்களப்பு – புன்ன சோலையை சேர்ந்த இளைஞனே குறித்த விபத்தில் உயிரிழந்துள்ளதாக பொலிஸார் மேலும் தெரிவித்துள்ளார் .

உயிரிழந்தவரின் சடலம் பிரேதபரிசோதனைக்காக மட்டக்களப்பு வைத்தியசாலையில் வைக்கப்பட்டுள்ளதுடன் மேலதிக விசாரணைகளை மட்டக்களப்பு பொலிஸார் மேற்கொண்டு வருகின்றனர்.

சம்மாந்துறை பொலிஸ் பிரிவுக்குட்பட்ட நிந்தவூர் அல்லிமுல்லை வயல் பகுதி வாய்க்கால் ஒன்றில் இருந்து நபர் ஒருவர் சடலமாக மீட்கப்பட்டுள்ளார்.

நிந்தவூர் முதலாம் பிரிவை சேர்ந்த எல்.அஷ்ரப் (வயது- 42) என்பவரே இன்று சடலமாக மீட்கப்பட்டுள்ளார்.

உயிரிழந்தவருக்கு அருகில் அவர் பயணித்த சென்ற VBI-2070 எனும் இலக்கமுடைய மோட்டார் சைக்கிள் ஒன்றும் கைத்தொலைபேசி ஒன்றும் மீட்கப்பட்டுள்ளன.

மிகவும் வேகமாக பயணித்த நிலையில் கட்டுப்பாட்டை இழந்து விபத்துக்குள்ளாக்கியதன் காரணமாகவே இவர் உயிரிழந்திருக்கலாம் என சந்தேகிக்கப்படுவதாக பொலிஸார் தெரிவித்தனர்.

மேலதிக விசாரணைகள் முன்னெடுக்கப்படுவதாகவும் பொலிஸார் குறிப்பிட்டனர்.

பதுளை – மடுல்சீமை – ரோபேரிவத்தை பகுதியில் உடலுக்கு தீ வைத்துக் கொண்டதாக கூறப்படும் இரு உறவுக்கார சிறுமிகள் உயிரிழந்துள்ளனர்.
நேற்று இடம்பெற்ற இந்த சம்பவத்தில் 17 வயதான இரு சிறுமிகளே பலியாகியுள்ளனர்.

இவர்களில் ஒருவர் இளைஞர் ஒருவருடன் காதல் தொடர்பை பேணியுள்ளார். இந்த விடயம் அவரது தந்தைக்கு தெரியவர, அவர் பொலிஸில் முறைப்பாடு செய்துள்ளார்.

இதுவே, இவர்கள் தீக்குளிக்கக் காரணம் என தெரியவந்துள்ளதோடு, இதன்போது கடுமையான தீக்காயங்களுக்குள்ளான சிறுமி நேற்றே உயிரிழந்துள்ளார். மற்றையவர் இன்று காலை மரணமடைந்ததாக தெரியவந்துள்ளது.

இதேவேளை, இவர்களது சடலங்களின் பாகங்கள் பரிசோதனைக்காக கொழும்புக்கு அனுப்பப்பட்டுள்ளன. அத்துடன் மடுல்சீமை பொலிஸார் சம்பவம் குறித்து விஷேட விசாரணைகளை ஆரம்பித்துள்ளனர்.