இலங்கையில் இருந்து ஆயிரம் கிலோமீற்றர்களுக்கு கீழ், புதிய நிலத்தகடு ஒன்று உருவாகி வருவதாக தெரிவிக்கப்பட்டுள்ளது. இதனை பேராதனை பல்கலைக்கழகத்தின் பேராசிரியர் கலாநிதி அதுல சேனாரத்ன கூறியுள்ளார்.

இந்த பூமி அதிர்வு காரணமாக இலங்கைக்கும் நில அதிர்வுகள் ஏற்படுவதற்கான அபாயங்கள் அதிகரித்திருப்பதாக அவர் குறிப்பிட்டுள்ளார்.

மேலும் இதன் விளைவாக எதிர்காலத்தில் இலங்கையில் அதிக நிலச்சரிவுகள் ஏற்படலாம் என்றும் அவர் எச்சரித்துள்ளார். இதனால், மக்களை எச்சரிக்கையுடன் இருக்குமாறு குறிப்பிட்டுள்ளார்.

தாய் மற்றும் பாட்டியுடன் நெல் வயலுக்குச் சென்ற மூன்று வயது சிறுவன், கல்கமுவ-மிகல்வெவா பிரதேசத்தில் உள்ள பாதுகாப்பற்ற கிணற்றில் விழுந்து நேற்றைய தினம் உயிரிழந்துள்ளதாக பொலிஸார் தெரிவித்துள்ளனர்.

மிகல்வெவா பிரதேசத்தை சேர்ந்த சதிஸா இசுறு விஹான்ஸ என்ற குழந்தையே இவ்வாறு உயிரிழந்துள்ளதாக பொலிஸார் கூறியுள்ளனர்.

தாய் மற்றும் பாட்டி குழந்தையை அவனது சித்தியின் பாதுகாப்பில் முச்சக்கரவண்டியில் நிறுத்தி விட்டு வயல் வேலைகள் முடிந்தவுடன் தன் குழந்தை அழைத்துச் செல்வார்கள் என குழந்தையின் சித்தி தெரிவித்துள்ளார்.

குழந்தையின் சித்தி கண்ணயர்ந்த நேரத்தில் 20 அடி ஆழமான கிணற்றில் விழுந்து குழந்தை உயிரிழந்துள்ளதாக தெரிவிக்கப்பட்டுள்ளது.

வேலைகளை முடித்து விட்டு வந்ந குழந்தையின் பாட்டி மற்றும் தாய் குழந்தையை காணவில்லை என சத்தமிட்டுள்ளனர்.

சத்தத்தை கேட்ட விவசாயி விரைந்து வந்து குழந்தையை கிணற்றில் கண்டு கிணற்றில் காப்பாற்ற குதித்த போது குழந்தை உயிரிழந்துள்ளதாக விவசாயி தெரிவித்துள்ளார்.

குழந்தையின் சடலம் பிரேத பரிசோதனைகளுக்காக மிகல்வெவா வைத்தியசாலைக்கு அனுப்பி வைக்கப்பட்டுள்ளதாக பொலிஸார் குறிப்பிட்டுள்ளனர்.

யாழ் மாவட்டத்திற்கான சிரேஷ்ட பொலிஸ் அத்தியட்சகராக தமிழர் ஒருவர் நியமிக்கப்பட்டுள்ளார். மட்டக்களப்பைச் சேர்ந்த கஸ்ரன் ஸ்ரனிஸ்லஸ் என்பவரே புதிதாக நியமனம் பெற்றவராவார்.

இன்றைய தினம் சனிக்கிழமை காலை சிரேஷ்ட பொலிஸ் அத்தியட்சகர் காரியாலயத்தில் சர்வமத ஆசிர்வாதத்துடன் தனது கடமையை பொறுப்பேற்றார்.

இலங்கை முழுமைக்குமான ஒழுக்கம் நன்னடத்தைப் பிரிவின் பணிப்பாளராக கடமையாற்றிய இவர் 34 வருடங்களிற்கு முன்னர், யாழ்ப்பாணத்தில் கடந்த 1982ம் ஆண்டு காலப்பகுதியில் யாழ்ப்பாணம், சாவகச்சேரி, கொடிகாமம் பொலிஸ் நிலையங்களில் உதவிப் பொலிஸ் பரிசோதகராகப் பணியாற்றியிருந்தார்.

சுமார் 30 ஆண்டுகளுக்குப் பின் யாழ்ப்பாண மாவட்டத்தின் சிரேஷ்ட பொலிஸ் அத்தியட்சகராக தமிழர் ஒருவர் நியமிக்கப்பட்டுள்ளார்.

1984ம் ஆண்டு யாழ்ப்பாணத்தின் முதலாவது சிரேஷ்ட பொலிஸ் அத்தியட்சகராக கடமையாற்றிய ஐ.ரி.கனகரட்னத்தின் மருமகனே ஸ்ரனிஸ்லஸ் ஆவார்.

இவர் பொலிஸ் சேவையில் 38 ஆண்டுகளை நிறைவு செய்துள்ளவர் என்பது குறிப்பிடத்தக்கது.

மட்டக்களப்பு காத்தான்குடி பொலிஸ் பிரிவில் உள்ள காத்தான்குடி நகரில் 10 வயது மாணவன் பிரத்தியேக வகுப்பு நடத்திய ஆசிரியையினால் தாக்கப்பட்டதாக காத்தான்குடி பொலிஸ் நிலையத்தில் முறைப்பாடு செய்யப்பட்டுள்ளது.

தாக்குதலுக்குள்ளானதாகக் கூறப்படும் காத்தான்குடி-03, மெத்தைப் பள்ளி வித்தியாலயத்தில் தரம் ஐந்தில் கல்வி பயிலும் ஷாக்கிர் ரஹ்மான் எனும் மாணவன் காத்தான்குடி ஆதார வைத்தியசாலையில் அனுமதிக்கப்பட்டுள்ளதாக தெரியவந்துள்ளது. இந்த தாக்குதல் சம்பவம் இன்று காலை (11.06) இடம்பெற்றுள்ளது.

குறித்த சம்பவம் தொடர்பில் காத்தான்குடி பொலிஸ் நிலையத்தில் முறைப்பாடு பதிவு செய்துள்ளதாக பாதிக்கப்பட்ட மாணவனின் உறவினர் ஒருவர் தெரிவித்துள்ளார்.

இது தொடர்பான மேலதிக விசாரணைகளை காத்தான்குடி பொலிஸார் மேற்கொண்டு வருகின்றனர்.

திருகோணமலை கந்தளாய் பிரதேசத்தில் உள்ள குளத்தில் மீன்பிடிக்கச் சென்றவர் யானையின் தாக்குதலுக்குள்ளாகி உயிரிழந்துள்ளார். இந்தச் சம்பவம் இன்று (11.06) அதிகாலை இடம்பெற்றுள்ளது.

கந்தளாய் அக்போபுர பகுதியைச் சேர்ந்த 42 வயதுடைய எதிரிசிங்ஹ முதியன்சலாகே சிசிற என்பவரே யானைத் தாக்குதலுக்கு உள்ளாகி உயிரிழந்துள்ளார்.

மேலும் உயிரிழந்தவரின் சடலம் கந்தளாய் தள வைத்தியசாலையில் பிரேத அறையில் வைக்கப்பட்டுள்ளதாக பொலிஸார் தெரிவித்துள்ளனர்.

நாட்டில் முப்பது வருடகாலமாக நடந்து வந்த போரை முப்பதே நாட்களில் நிறுத்த முடியாது. இந்த அரசாங்கம் பதவியேற்று ஒன்றரை வருடங்கள் தான் ஆகின்றது. இன்று நடைபெறுகின்ற சம்பவங்களை படிப்படியாகத் தான் இடைநிறுத்த முடியுமென சிறுவர் விவகார இராஜாங்க அமைச்சர் விஜயகலா மகேஸ்வரன் தெரிவித்துள்ளார்.

நாடாளுமன்றத்தில் இன்று வடக்கு கிழக்கு பிரச்சினைகள் தொடர்பான ஒத்திவைப்பு விவாதத்தில் கலந்து கொண்டு உரையாற்றும் போதே அவர் மேற்கண்டவாறு தெரிவித்துள்ளார்.

யுத்தத்தினால் பாதிக்கப்பட்டு, அங்கவீனராக்கப்பட்டவர்களுக்குமான உதவிகளை அரசாங்கம் விசேட மருத்துவர்களைக் கொண்டு பராமரிக்கும் என்று பிரதமர் ரணில் விக்ரமசிங்க அறிவித்துள்ளமையை வரவேற்கின்றேன் என ஈழ மக்கள் ஜனநாயக கட்சியின் செயலாளர் நாயகமும், நாடாளுமன்ற உறுப்பினருமான டக்ளஸ் தேவானந்தா தெரிவித்துள்ளார்.

நாடாளுமன்றத்தில் இன்று வடக்கு கிழக்கு பிரச்சினைகள் தொடர்பான ஒத்திவைப்பு விவாதத்தில் கலந்து கொண்டு உரையாற்றும் போதே அவர் மேற்கண்டவாறு தெரிவித்துள்ளார்.

 
பொகவந்தலாவை, கொட்டியாகலை மத்திய பிரிவில் வாழ்ந்து வரும் தயாபரன் எனும் இளைஞன் 10 நாட்கள் தொடர்ந்து நடனம் ஆடி உலக சாதனை படைப்பதற்கான நடவடிக்கையில் ஈடுபட்டுவருகின்றார்.

இதன் முன்னோடியாக 24 மணித்தியாலம் தொடர்ச்சியாக நடனம் ஆடியுள்ளார். கடந்த சனிக்கிழமை காலை 11 மணிக்கு பொகவந்தலாவை ஸ்ரீ தண்டாயுதபாணி சுவாமி தேவஸ்தான மண்டபத்தில் நடனத்தை ஆரம்பித்த இளைஞன், மறுநாள் ஞாயிற்றுக்கிழமை 11 மணி வரை தொடர்ந்து நடனமாடி வெற்றிகரமாக முடிவுக்கு கொண்டு வந்தார்.

இம் முறை தொடர்ந்து 10 நாட்கள் நடனம் ஆடுவதற்கான முன்னோடியாகவே இந்த 24 மணித்தியால தொடர் நடன நிகழ்வை இவர் ஏற்பாடு செய்திருந்தார்.

இந்த நடன நிகழ்வு பொகவந்தலாவை பொலிஸ் மற்றும் முக்கிய அரச பிரமுகர்களின் மேற்பார்வையில் நடைபெற்றது.

குறித்த இளைஞன் ஏற்கனவே இலங்கையில் ஐந்து நாள் தொடர்ந்து நடனமாடி சாதனை படைத்துள்ளமை குறிப்பிடத்தக்கது.

கொழும்பு கோட்டையில் அமைந்துள்ள ஜனாதிபதி மாளிகை மக்களின் பார்வைக்காக திறந்து வைக்கப்பட்டுள்ளது.

பல்வேறு காலங்களுக்குரிய கட்டடங்கள் கொழும்பு கோட்டையில் அமையப்பெற்றிருந்தாலும் ஜனாதிபதி மாளிகை முக்கியத்துவம் வாய்ந்தது.

இந்த மாளிகை இலங்கை ஜனநாயக சோசலிசக் குடியரசின் ஜனாதிபதியின் உத்தியோகப்பூர்வ வாசஸ்தலமாகும்.

போர்த்துக்கேயர் மற்றும் ஒல்லாந்தர் காலங்களில் தேவாலயங்களாக இந்தக் கட்டடம் பயன்படுத்தப்பட்டிருந்தது.

18 ஆம் நூற்றாண்டில் வரையப்பட்ட கொழும்பு வரைபடத்திலும் இந்த கட்டடத் தொகுதியைக் காணக்கூடியதாகவுள்ளது.

ஒல்லாந்தர் ஆட்சியில் இருந்த ஆளுனர் ஜெராட் வென் அன்கல்பீக் புதிய கட்டடமொன்றை நிர்மாணித்ததுடன், அந்தக் கட்டடம் ஆளுனர் மாளிகையாகப் பெயரிடப்பட்டது.

பிரித்தானிய ஆட்சியில் இந்த மாளிகை பிரித்தானிய ஆளுனரின் உத்தியோகப்பூர்வ வாசஸ்தலமாக அமைந்ததால், 1972 ஆம் ஆண்டு வரை கோட்டை ஜனாதிபதி மாளிகை, குயின்ஸ் ஹவுஸ் அல்லது ராணியாரின் இல்லம் என அழைக்கப்பட்டது.

ஆரம்பம் முதல் 32 ஆளுனர்களுக்கும் 7 ஜனாதிபதிகளுக்கும் வாசஸ்தலமாக அமைந்த இந்த மாளிகையை அவர்கள் அனைவரும் ஏதோவொரு வகையில் புனரமைப்பு செய்துள்ளனர்.

இந்த மாளிகையை முதற்தடவையாகப் பயன்படுத்திய இலங்கை ஆட்சியாளராக ஆளுனர் வில்லியம் கொபல்லாவ வரலாற்றில் இடம்பெற்றுள்ளார்.

அவர் இலங்கையின் முதலாவது ஜனாதிபதியாகப் பதவியேற்றதை அடுத்து ராணியின் மாளிகை ஜனாதிபதி மாளிகையாக பெயர் மாற்றம் செய்யப்பட்டது.

மாளிகை வளாகத்தில் இருக்கும் ஆல மரமும் நீண்ட வரலாற்றுக்கு உரித்துடையதாகும்.

விக்டோரியா மகாராணியார் பதவியேற்று 25 வருடங்கள் பூர்த்தியானபோது இலங்கையின் ஆளுனராக இருந்த சேர். ஜோசப் வெஸ்ட் ரிச்வேயின் சீமாட்டி இந்த மரத்தை நாட்டினார்.

நாட்டின் பல்வேறு பகுதிகளைச் சேர்ந்தவர்கள் இன்றும் ஜனாதிபதி மாளிகையைப் பார்வையிடுவதற்கு வருகை தந்திருந்தனர்.

இங்குள்ள படிக்கட்டுகளைப் பயன்படுத்தும் போது வழமையாக ஜனாதிபதி வலது புறமாக பயணிக்கின்றார்.

வெளிநாட்டில் இருந்து வருகைதரும் அரச தலைவர்களும் வலது புறமாக இங்குள்ள படிக்கட்டுக்களைப் பயன்படுத்துவதுடன் ஏனைய அனைவரும் இடப்புறத்தைப் பயன்படுத்துகின்றனர்.

ஜனாதிபதி மாளிகையிலுள்ள பௌத்த வழிபாட்டுத் தலத்தில் புராதன ஓவியங்கள் பலவற்றைக் காணக்கூடியதாகவுள்ளது.

பிரித்தானிய ஆட்சியின் கீழ் இந்த மாளிகை நிர்மாணிக்கப்பட்ட போது, மின் விசிறிகள் பொருத்தப்பட்டுள்ளதுடன் அங்கு காணப்படுகின்ற மர வேலைப்பாடுகளும் இலங்கையின் தனித்துவத்தைப் பிரதிபலிக்கின்றன.

மண்டபத்தில் இருக்கும் விருந்துபசார பொருட்களும் பிரித்தானிய ஆட்சிக்குரியவை.

அக்காலத்தில் ஆளுனர் உணவு மேசைக்கு வருகை தந்து விருந்தை உண்ண ஆரம்பித்ததும் இங்கு மணியோசை எழுப்பப்பட்டது.

சில காலத்திற்கு முன்னர் மக்களின் பயன்பாட்டிற்காக மாளிகைக்கு பின்புறத்தில் திறந்து வைக்கப்பட்ட கோடன் பூங்காவும் ஜனாதிபதி மாளிகையின் ஒரு பகுதியாகத் திகழ்கிறது.

ஜனாதிபதி மாளிகையுடன் அண்மையில் சேர்க்கப்பட்ட பகுதியாக நிலத்தடி மாளிகை விளங்குகிறது.

பல்வேறு சிறப்பம்சங்களைக் கொண்ட ஜனாதிபதி மாளிகையை எதிர்வரும் செவ்வாய்க்கிழமை வரை, இரவு 7 மணி வரை மக்கள் பார்வையிட முடியும்.