கடந்த மே 12ம் திகதி கொமர்ஷல் வங்கியின் கணனி வலையமைப்பின் மீது ஹெக்கர்களால் (Hackers) மேற்கொள்ளப்பட்ட தாக்குதலால் எவ்வித பாதிப்பும் ஏற்படவில்லை என இலங்கை கொமர்ஷல் வங்கி தெரிவித்துள்ளது.

கடந்த வாரம் மேற்கொள்ளப்பட்ட குறித்த ஹெக்கர் தாக்குதல், துருக்கியை மையமாக வைத்து இயங்கும், பொஸ்கர்ட்லா (Bozkurtla) எனும் குழுவினால் மேற்கொள்ளப்பட்டிருந்தமை குறிப்பிடத்தக்கது.

இதேவேளை, கடந்த மே 10ம் திகதி, ஐந்து தெற்காசிய வங்கிகளிலும், ஐக்கிய இராச்சியத்தை மையமாகக் கொண்டு இயங்கும் வங்கி ஒன்றை கடந்த மே 07ம் திகதியன்றும் ஹெக் செய்து, தகவல்களை திருட முயற்சி செய்திருந்தமை குறிப்பிடத்தக்கது.

இதற்கு முன்னரும், இவ்வாறான பல்வேறு ஹெக்கர் தாக்குதல்களை அக்குழுவினரால் மேற்கொள்ளப்பட்டிருந்தமை குறிப்பிடத்தக்கது. ஆயினும், தாம் உடனடியாக செயற்பட்டதாக தெரிவித்த கொமர்ஷல் வங்கி, இதன் காரணமாக வாடிக்கையாளர்களின் எவ்வித தகவல்களோ, பெறுமதிமிக்க கடவுச்சொற்களோ (Passwords) திருடப்படவில்லை என உறுதிப்படுத்தியுள்ளது.

இது தவிர நேபாளத்தின் சனிமா வங்கி, பங்களாதேஷை மையமாகக் கொண்ட டச் பங்களா வங்கி, கத்தார் தேசிய வங்கி போன்றவற்றையும் ஹெக்கர்கள் ஊடுருவியிருந்தமை குறிப்பிடத்தக்கது.

சீரற்ற காலநிலையினால் நாட்டில் மரக்கறி வகைகளுக்கு தட்டுப்பாடு ஏற்படக்கூடிய அபாயம் காணப்படுவதாகத் தெரிவிக்கப்படுகிறது.

அதிக மழை காரணமாக தம்புள்ள பொருளாதார மத்திய நிலையத்திற்கு கொண்டு வரப்படும் மரக்கறி வகைகளின் தொகை சடுதியாக வீழ்ச்சியடைந்துள்ளதாக பொருளாதார மத்திய நிலையத்தின் வர்த்தகர் சங்க முன்னாள் தலைவர் யூ.பி. ஏக்கநாயக்க குறிப்பிட்டுள்ளார்.

இது குறித்து சிங்கள ஊடகமொன்றுக்கு தகவல் வெளியிட்டார். அவர் மேலும் கூறுகையில், பொருளாதார மத்திய நிலையத்திற்கு கொண்டு வரப்படும் மரக்கறி வகைகளின் தொகை 90 வீதத்தினால் வீழ்ச்சியடைந்துள்ளது.

மத்திய மலைநாட்டுப் பிரதேசங்களிலிருந்து வழமையாக காலையில் வரும் மரக்கறி லொறிகள் மாலை வரையில் வரவில்லை. சீரற்ற காலநிலையினால் அறுவடை செய்ய முடியாமை உள்ளிட்ட பல்வேறு காரணிகளினால் மரக்கறி வகைகளுக்கு தட்டுப்பாடு ஏற்பட்டுள்ளதாகத் தெரிவித்துள்ளார்.

இதேவேளை, சீரற்ற காலநிலையினால் மரக்கறி வகைகளின் விலைகள் உயர்வடையக் கூடுமென எதிர்பார்க்கப்படுகிறது. மரக்கறி வகைகளுக்கு காணப்படும் தட்டுப்பாடு காரணமாக விலை உயர்வடையும் என எதிர்பார்க்கப்படுகிறது.

 
நாட்டில் ஏற்பட்டுள்ள சீரற்ற காலநிலை காரணமாக கிளிநொச்சி மாவட்டத்தில் 2159 குடும்பங்களை சேர்ந்த 7249 பேர் பாதிக்கப்பட்டுள்ளதாக தெரிவிக்கப்பட்டுள்ளது.

அத்துடன், 274 குடும்பங்களை சேர்ந்த 934 பேர் நண்பர்கள் மற்றும் உறவினர்களின் வீடுகளில் தஞ்சமடைந்துள்ளதாகவும் தெரிவிக்கப்பட்டுள்ளது.

மேலும் 75 குடும்பங்களை சேர்ந்த 242 பேர் இடம்பெயர்ந்த நிலையில் அவர்கள் ஐந்து தற்காலிக தங்குமிடங்களில் தங்கவைக்கப்பட்டுள்ளனர்.

கடந்த இரு தினங்களாக கிளிநொச்சியில் பெய்து வரும் கன மழை காரணமாக ஏற்பட்டுள்ள பாதிப்புகள் குறித்து இன்று மாலை கிளிநொச்சி மாவட்ட அனர்த்த முகாமைத்துவ பிரிவு வெளியிட்டுள்ள புள்ளி விபரங்களிலே இந்த விபரங்கள் தெரிவிக்கப்பட்டுள்ளன.

இடம்பெயர்ந்து தற்காலிக தங்குமிடங்களில் தங்க வைக்கப்பட்டிருப்பவர்கள் கரைச்சி, மற்றும் கண்டாவளையை சேர்ந்தவர்கள் எனவும் கரைச்சியை சேர்ந்த 49 குடும்பங்களை சேர்ந்த 152 பேர் மருதநகர் பொதுநோக்கு மண்டபம் மற்றும் தாரணி குடியிருப்பு முன்பள்ளி ஆகியவற்றில் தங்க வைக்கப்பட்டுள்ளதாக குறிப்பிடப்பட்டுள்ளது.

மேலும், கண்டாவளையை சேர்ந்த 26 குடும்பங்களை சேர்ந்த 90 பேர் சிவபுரம் முன்பள்ளி, புன்னைநீராவி பொது மண்டபம் மற்றும் நாதன் குடியிருப்பு முன்பள்ளி ஆகியவற்றில் தங்கி இருப்பதாகவும் தெரிவிக்கப்படுகிறது

நான்கு பிரதேச செயலர் பிரிவுகளில் இந்த பாதிப்பு இடம்பெற்றுள்ளது. இதில் ஒரு வீடு முழுமையாக பாதிக்கப்பட்டுள்ளதுடன், 106 வீடுகள் பகுதியளவில் சேதமடைந்துள்ளன

இதேவேளை, மழை தொடர்ந்தும் பெய்து கொண்டிருப்பதனால் இடம் பெயர்பவர்களின் எண்ணிக்கை அதிகரிப்பதற்கான சாத்தியக்கூறுகள் இருப்பதாகவும் தெரிவிக்கப்படுகின்றது.

வடக்கு புகையிரத மார்க்கத்தில் தலாவ மற்றும் தம்புத்தேகமவிற்கும் இடைப்பட்ட பகுதி நீரில் அடிப்பட்டு சென்றுள்ளதால் வடக்குப் பகுதிக்கான ரயில் சேவைகளில் பாதிப்பு ஏற்பட்டுள்ளது.

இதன் காரணமாக கொழும்பில் இருந்து செல்லும் புகையிரதங்கள் தம்புத்தேகம வரை மட்டுப்படுத்தப்பட்டிருப்பதாகவும், வடக்கில் இருந்து புறப்படும் ரயில்கள் தலாவ வரை மட்டுப்படுத்தப்பட்டிருப்பதாகவும் புகையிரத திணைக்களம் கூறியுள்ளது.

நேற்றிரவு புறப்பட்ட இரண்டு தபால் ரயில்கள் இடைநடுவில் நிறுத்தப்பட்டுள்ளதாக தெரிவிக்கப்பட்டுள்ளது.

கடந்த வருடம் மாத்திரம் ஆஸ்துமா நோயால் 2953 பேர் பலியாகியுள்ளதாக சுகாதார கல்வி பணியகம் தெரிவித்துள்ளது.

குறித்த ஆஸ்துமா நோயாளர்கள் வைத்தியசாலைகளில் எந்தவொரு சிகிச்சைகளும் பெறாத நிலையில் உயிரிழந்துள்ளதாக சுகாதார பணிப்பாளர் நாயகம் பாலித மஹிபால தெரிவித்துள்ளார்.

நேற்று “உலக ஆஸ்துமா தினம்”அனுஸ்டிக்கப்பட்ட நிலையில் அதில் கலந்துக் கொண்டபோதே சுகாதார பணிப்பாளர் இந்தத் தகவலை தெரிவித்துள்ளார்.

மேலும் முறையான சிகிச்சைகளைப் பெற்றுக் கொள்வதன் மூலம் ஆஸ்துமா நோயிலிருந்து சுகமடையலாம் என்றும் பணிப்பாளர் தெரிவித்துள்ளமை குறிப்பிடத்தக்கது.