தற்போது பெய்துகொண்டிருக்கும் மழை காரணமாக கிளிநொச்சி கனகாம்பிகைக்குளம் ஓரடி வான் பாய்வதாக கிளிநொச்சி நீர்ப்பாசனப் திணைக்கள பிரதிப்பணிப்பாளர் சுதாகரன் தெரிவித்தார்.

மாவட்டத்தின் ஏனைய குளங்கள் நிரம்பி வழிவதற்கான சாத்தியங்கள் தற்போது இல்லையெனவும் ஆனால் குளங்களின் நீர்மட்டம் சுமார் இரண்டரை அடிக்கு மேலாக அதிகரித்து வருவதாகவும் தெரிவித்தார்.

வருடத்திற்கு சுமார் 1200- 1400 மில்லி மீற்றர் மழை வீழ்ச்சி பதிவாகின்ற நிலையில் 373 மில்லி மீற்றர் மழை வீழ்ச்சி பதிவாகி உள்ளது என்பது சாதாரண விடயமல்ல, இரணைமடுக் குள புனரமைப்பு பணிக்காக நீர் மட்டத்தினை குறைத்திருந்தோம்.

அதனால் எந்த பதிப்பும் இல்லை. இவ்வாறான மழைவீழ்ச்சி, குளங்களில் நீர்மட்டம் உயர்வாக உள்ள காலங்களில் பெய்திருந்தால் பாதிப்புக்கள் அதிகமாவதற்கான சாத்தியங்கள் இருப்பதாக அவர் தெரிவித்தார்.

சேருநுவர பிரதேசத்தில் நீண்டகாலமாக பெண்ணொருவரை காதலித்து பல தடவைகள் பாலியல் வல்லுறவுக்குட்படுத்தி அதன் வீடியோக்களை சமூக வலைத்தளங்களில் ஒன்றான பேஸ்புக்கில் தரவேற்றம் செய்த குற்றச்சாட்டின் பேரில் நபரை நேற்று மாலையில் கைது செய்துள்ளதாக பொலிஸார் தெரிவிக்கின்றனர்.

சேருநுவர பொலிஸ் பிரிவுக்கு உட்பட்ட பகுதியில் பெண்ணொருவரை இளைஞர் பாடசாலைக் காலத்திலிருந்தே காதலித்து வந்துள்ளார்.
குறித்த பெண்ணுடன் அதிக தடவைகள் பல இடங்களுக்கும் சென்று பாலியல் உறவு கொண்டுள்ளதுடன் அதை இரகசியமாக தொலைபேசியில் வீடியோ செய்துள்ளார் என பொலிஸார் தெரிவிக்கின்றனர்.

இரு வீட்டாருக்கும் இடையில் பிணக்குகள் ஏற்பட்டவுடன் குறித்த இளைஞன் பாலியல் நாடாவை முகநூலில் தரவேற்றம் செய்துள்ளார்.

இதனை அடுத்து குறித்த பெண் சேருநுவர பொலிஸ் நிலையத்தில் செய்த முறைப்பாட்டையடுத்து, குறித்த சந்தேக நபரை கைது செய்துள்ளதாகவும் விசாரணைகளை மேற்கொண்டு வருவதாகவும் பொலிஸார் தெரிவிக்கின்றனர்.

எம்பிலிப்பிட்டிய- காவன்திஸ்ஸபுர பிரதேசத்தில் மின்சாரம் தாக்கி இரு இளைஞர்கள் பலியாகியுள்ளனர். நேற்று மாலை இந்தச் சம்பவம் இடம்பெற்றுள்ளதாக எம்பிலிப்பிட்டிய பொலிஸார் தெரிவித்துள்ளனர்.

வாழைத் தோட்டத்தின் பாதுகாப்புக்காக அமைக்கப்பட்டிருந்த மின்சார வேலியை தொட முனைந்த போதே மின்சார தாக்குதலுக்கு இலக்காகி இவர்கள் பலியாகியிருப்பதாக குறிப்பிடப்பட்டுள்ளது.

17 மற்றும் 25 வயதான இளைஞர்கள் இருவரே இவ்வாறு பலியாகியுள்ளதாகவும் தெரிவிக்கப்பட்டுள்ளது.

திருகோணமலை – கிண்ணியா பிரதேசத்தில் பெண் ஒருவர் வாய், கைகள், கால்கள் கட்டப்பட்ட நிலையில் கொலை செய்யப்பட்டுள்ளதாக பொலிஸார் தெரிவித்துள்ளனர்.

அத்துடன், இவர் அணிந்திருந்த தங்க வளையல்களும், சங்கிலியும் வீட்டின் அலுமாரியில் வைக்கப்பட்டிருந்த பணமும் கொள்ளையிடப்பட்டுள்ளதாகவும் தெரியவந்துள்ளது.

இரண்டு பிள்ளைகளின் தாயான முகம்மது இஸ்மாயில் ஹாஜரா (வயது 65) என்பவரே இவ்வாறு கொலை செய்யப்பட்டுள்ளார்.

றஹ்மானியா வீதியில் அமைந்துள்ள தனது வீட்டில் தனிமையில் வசித்து வந்த இவர், வீட்டின் முன்பக்கத்தில் சிறிய பல சரக்குக் கடை ஒன்றை நடத்திவந்துள்ளார்.

வழமை போன்று ஞாயிற்றுக்கிழமை (15.05) இரவு ஒன்பது மணிக்கு தனது கடையை பூட்டிவிட்டு உறங்குவதற்குச் சென்ற இவர், இன்று திங்கட்கிழமை (16) காலை ஒன்பது மணியாகியும் கடையைத் திறக்கவில்லை.

இந்தநிலையில், பக்கத்து வீட்டிலிருந்த இவரது பேத்திகள் வீட்டுக்குச் சென்று பார்த்தபோது, அவர் வாய், கைகள், கால்கள் கட்டப்பட்ட நிலையில் சடலமாகக் கிடந்துள்ளதை கண்டு பொலிஸாருக்கு தகவல் வழங்கியுள்ளனர்.

கொள்ளையிடும் நோக்கில் இந்தக் கொலை இடம்பெற்றிருக்கலாம் எனச் சந்தேகம் வெளியிட்டுள்ள கிண்ணியா பொலிஸார், இதனுடன் தொடர்புடையவர்களை கைதுசெய்வதற்கான நடவடிக்கையை எடுத்துள்ளதாகவும் குறிப்பிட்டுள்ளனர்.

வீடொன்றுக்குள் மழை நீர் புகுந்ததில் எட்டு மாத கைக்குழந்தை ஒன்று பரிதாபமாக உயிரிழந்துள்ளது. இந்தச் சம்பவம் வத்தளைப் பகுதியில் இடம்பெற்றுள்ளது.

நேற்று பெய்த அடை மழை காரணமாக வீட்டிற்குள் மழை நீர் சென்றதில் உறங்கிக் கொண்டிருந்த பிறந்து எட்டு மாதங்களேயான குழந்தை உயிரிழந்துள்ளது.

சீரற்ற காலநிலையினால் நாட்டின் பல்வேறு பிரதேசங்களிலும் மக்கள் உயிரிழக்கும் வீதம் அதிகரிக்கிறது என்பது குறிப்பிடத்தக்கது.

இலங்கையில் திடீரென ஏற்பட்ட அசாதாரண காலநிலை காரணமாக ஆயிரக்கணக்கான மக்கள் பாதிக்கப்பட்டுள்ளனர்.

சீரற்ற காலநிலை காரணமாக 11மாவட்டங்களில் சுமார் 4186 மக்கள் பாதிக்கப்பட்டள்ளதாக அனர்த்த நிலைய மத்திய நிலையம் தெரிவித்துள்ளது.

கூடுதலான மழைவீழ்ச்சி காரணமாக கொழும்பு, களுத்துறை, இரத்தினபுரி, கேகாலை, நுவரெலியா, கண்டி, அனுராதபுரம், புத்தளம் மற்றும் குருணாகல் ஆகிய மாவட்டங்களில் இயல்பு வாழ்க்கை பாதிக்கப்பட்டள்ளது.

இந்தத் தகவலை அனர்த்த முகாமைத்துவ மத்திய நிலையத்தின் உதவிப் பணிப்பாளர் பிரதீப் கொடிப்பிலி வெளியிட்டுள்ளார்.

நோர்வே மோஸ் விமான நிலையத்தில் இருந்து புறப்பட்டு சென்ற பயணிகள் விமானத்திலிருந்து இலங்கையர் ஒருவரை அந்நாட்டு பொலிஸார் கைது செய்துள்ளனர்.

விமானத்தில் இலங்கையருக்கும் மற்றுமொரு வெளிநாட்டவருக்கும் இடையில் நடைபெற்ற சந்தேகத்திற்கிடமான சம்பாஷணையை அடுத்து, குறித்த இருவரும் கைது செய்யப்பட்டதாக நோர்வே ஊடகம் ஒன்று செய்தி வெளியிட்டுள்ளது.

இரு பயணிகளும் விமான கழிவறையில் வாதத்தில் ஈடுபட்டு வந்துள்ளனர். இதன் பின்னர் மன்சேஸ்டரில் விமானம் தரையிறங்கிய போது, குறித்த இருவரும் விமானத்தில் இருந்து வெளியேற்றப்பட்டுள்ளதாக தெரிவிக்கப்பட்டுள்ளது.

இருவருக்கும் இடையிலான உரையாடலில் குண்டு என்ற வார்த்தை பிரயோகம் வெளிப்பட்டதாக விமானத்திலிருந்த பயணிகள் கேட்டதாக விமானி தெரிவித்துள்ளார்.

இதனையடுத்து விமானத்தை பரிசோதனை செய்து, எந்தவித அச்சுறுத்தல்களும் இல்லையென வெடி குண்டு அகற்றும் குழுவினர் கூறியதை அடுத்து, குறித்த இருவரும் விடுதலை செய்யப்பட்டுள்ளனர்.

அதிக மழை மற்றும் காற்றின் காராணமாக நாட்டின் சில பகுதிகளில் மின்சார விநியோகம் தடைப்பட்டுள்ளதாக மின்சக்தி மற்றும் மீள்புதுப்பித்தலுக்கான சக்தி அமைச்சு குறிப்பிட்டுள்ளது.

மின்சார தடை ஏற்பட்டுள்ள பகுதிகள் மின்சார விநியோகத்தை வழமைக்கு கொண்டுவருவதற்கான நடவடிக்கைகள் முன்னெடுக்கப்பட்டுள்ளதாக அமைச்சின் ஊடகப் பேச்சாளர் சுலக்‌ஷன ஜயவர்தன தெரிவித்துள்ளார்.

இதேவேளை, எம்பிலிபிட்டியவில் மின்சாரம் தாக்கி இரண்டு பேர் உயிரிழந்துள்ளதாக பொலிஸார் குறிப்பிட்டுள்ளனர்.

நிலவும் சீரற்ற காலநிலை காரணமாக புத்தளம் – கொழும்பு ரயில் சேவைக்கு பாதிப்பு ஏற்பட்டுள்ளது. வென்னப்புவ ரயில் பாதையின் – சிறிகம்பல பகுதியில் மரமொன்று முறிந்து விழுந்துள்ளமையே இதற்குக் காரணம் என, தெரியவந்துள்ளது.

இதன்படி, கொழும்பு – புத்தளத்துக்கு இடையிலான ரயில் லுணுவில ரயில் நிலையம் வரையிலும் புத்தளத்தில் இருந்து கொழும்புக்கு வரும் ரயில் நாத்தண்டிய ரயில் நிலையம் வரையிலும் மட்டுப்படுத்தப்பட்டுள்ளது.

எதுஎவ்வாறு இருப்பினும், நிலைமையை வழமைக்குக் கொண்டுவரும் நடவடிக்கைகள் தற்போது மேற்கொள்ளப்பட்டு வருவதாக, ரயில்வே கட்டுப்பாட்டு மத்திய நிலையம் குறிப்பிட்டுள்ளது.

அதிக மழை காரணமாக மன்னார் மாவட்டத்திலுள்ள சில பாடசாலைக்கு இன்று (16.05) விசேட விடுமுறை வழங்கப்பட்டுள்ளது.

வலையக் கல்விப் பணிப்பாளர்களின் கோரிக்கைக்கு அமைய இந்த விடுமுறை வழங்கப்பட்டுள்ளதாக வட மாகாண கல்வி அமைச்சின் செயலாளர் ரவீந்திரன் குறிப்பிட்டுள்ளார்.

மன்னார் நகர் மற்றும் முசளி பகுதியில் வௌ்ளம் புகுந்துள்ள பாடசாலைகளுக்கே இன்று விடுமுறை வழங்கப்பட்டுள்ளதாகவும் அவர் கூறியுள்ளார்.

இதேவேளை கொழும்பு 7 இல் அமைந்துள்ள எஸ்.ரி பிரிட்ஜெட் கோன்வென்ட்டுக்கு இன்று விடுமுறை அளிக்கப்பட்டுள்ளது. சீரற்ற காலநிலையே இதற்குக் காரணம் என அந்தப் பாடசாலை அதிபர் தெரிவித்துள்ளார்.