சுண்ணாகம் சிவன் கோவிலில் மின் பழுதுபார்த்தல் வேலையில் ஈடுபட்டிருந்த இளைஞர் ஒருவர் மின்சாரம் தாக்கி உயிரிழந்துள்ளார். இந்த சம்பவம் இன்று காலை இடம்பெற்றுள்ளது.சம்பவம் தொடர்பில் மேலும் தெரிய வருவதாவது,

சுண்ணாகம் சிவன் கோவிலின் திருவிழா இன்று காலை ஆரம்பாகியுள்ள நிலையில், கோவிலில் மின்சார வேலையில் ஈடுபட்டிருந்த 07 இளைஞர்களை மின்சாரம் தாக்கியுள்ளதுடன், அதில் ஒருவர் ஸ்தலத்திலேயே உயிரிழந்துள்ளார். காயமடைந்த ஏனைய அறுவரும் தெல்லிப்பளை வைத்தியசாலையில் அனுமதிக்கப்பட்டுள்ளதாக எமது செய்தியாளர் குறிப்பிட்டார்.

நானுஓயா பொலிஸ் பிரிவிற்குட்பட்ட நுவரெலியா – ஹற்றன் பிரதான வீதியில் நுவரெலியா பகுதியிலிருந்து தலவாக்கலை பகுதியை நோக்கி சென்ற வாகனம் ஒன்று வீதியை விட்டு விலகி நானுஓயா எடின்புரோ பகுதியில் 20 அடி பள்ளத்தில் பாய்ந்து விபத்துக்குள்ளாகியுள்ளது.நேற்று புதன்கிழமை இரவு 10.30 மணியளவில் இவ்விபத்து இடம்பெற்றுள்ளதாக நானுஓயா பொலிஸார் தெரிவிக்கின்றனர்.

இயந்திர கோளாறு காரணமாகவே இவ்விபத்து நேர்ந்துள்ளதாக பொலிஸார் மேலும் தெரிவித்தனர்.வாகனத்தில் சாரதியும் மற்றொருவரும் பயணித்துள்ளதாகவும், சாரதி பாய்ந்து உயிர் தப்பியுள்ளதாகவும் மற்றொருவர் படுங்காயங்களுக்குள்ளாகி நுவரெலியா வைத்தியசாலையில் சேர்க்கப்பட்டுள்ளதாகவும் தெரிவிக்கப்படுகின்றது.இவ்விபத்து தொடர்பான மேலதிக விசாரணைகளை நானுஓயா பொலிஸார் மேற்கொண்டு வருகின்றனர்.

நாட்டில் அதிக வெப்பம் காணப்பட்டாலும் பாடசாலை நேரத்தில் மாற்றமில்லை என கல்வி அமைச்சு அறிவித்துள்ளது.இதற்காக பல்வேறு பரிந்துரைகள் கிடைக்கப் பெற்றுள்ளதாகத் தெரிவிக்கப்படுகிறது.கல்வி அமைச்சர் அகில விராஜ் காரியவசத்தின் ஆலோசனைக்கு அமைய வளிமண்டலவியல் திணைக்களம், சுகாதார அமைச்சு மற்றும் இடர் முகாமைத்துவ மத்திய நிலையம் உள்ளிட்ட பல நிறுவனங்களிடம் இந்த நிலைமை குறித்து ஆலோசனைகளையும் பரிந்துரைகளும் பெற்றுக் கொள்ளப்பட்டுள்ளதாக கல்வி அமைச்சு தெரிவித்துள்ளது.

முற்பகல் 11.30 முதல் பிற்பகல் 1.30 மணி வரையில் வெப்ப நிலைமை அதிகளவில் காணப்படும், இந்தக் காலப்பகுதியில் மாணவர்களை பாடசாலையை விட்டு வெளியேற்றக் கூடாது என பரிந்துரை செய்யப்பட்டுள்ளது.

இந்த நேரங்களில் பாடாசாலை மாணவர்கள் வெளிக்கள செயற்பாடுகளில் ஈடுபடுவதனை தவிர்த்தல், போதிளவு நீரைப் பருகச் செய்தல், பாடசாலை வகுப்பறைகளுக்கு போதியளவு காற்றோட்ட வசதியை ஏற்படுத்தும் வகையில் யன்னல் கதவுகளை திறந்து வைத்தல், பாடசாலையில் போதியளவு நீர் வசதி இல்லாவிட்டால் அதற்கான மாற்று வழிகளை பின்பற்றுதல் உள்ளிட்ட பல்வேறு பரிந்துரைகள் செய்யப்பட்டுள்ளன.இதற்கு மேலதிகமாக மாணவர்கள் தனிப்பட்ட ரீதியில் பின்பற்ற வேண்டிய சில விடயங்கள் பற்றியும் அறிவுறுத்தல்கள் வழங்கப்பட்டுள்ளன.

அதிகளவு இனிப்பூட்டப்பட்ட பானங்களை அருந்துவதனை தவிர்த்தல், தொப்பி அல்லது குடைகளை பயன்படுத்தல், குடிநீர் போத்தலை எடுத்துச் செல்லல் உள்ளிட்ட சில பரிந்துரைகள் செய்யப்பட்டுள்ளதாக கல்வி அமைச்சு அறிவித்துள்ளது.எனினும் மாகாணசபைகள் சிலவற்றினால் முன்கூட்டியே பாடசாலைகளை விடுவதற்கு தீர்மானிக்கப்பட்டுள்ளது.வடமத்திய மற்றும் கிழக்கு மாகாண பாடசாலைகள் அதிக வெப்ப நிலை காரணமாக 12.00 மணிக்கு மூடப்படும் என அறிவிக்கப்பட்டிருந்தமை குறிப்பிடத்தக்கது.

எதிர்வரும் ஆறு மாதங்களில் வாகன இறக்குமதியை தற்காலிக அடிப்படையில் நிறுத்திக் கொள்ள தீர்மானித்துள்ளதாக லங்கா வாகன இறக்குமதியாளர் சங்கத்தின் தலைவர் இந்திக சம்பத் மெரஞ்சிகே தெரிவித்துள்ளார்.கொழும்பு தேசிய வணிக சபையில் நேற்று நடைபெற்ற செய்தியாளர் சந்திப்பில் அவர் இதனைத் தெரிவித்துள்ளார்.அவர் தொடர்ந்தும் கூறுகையில்,

நாளுக்கு நாள் ரூபாவின் பெறுமதி பாரியளவில் வீழ்ச்சியடைந்து செல்கின்றது.இந்த நிலைமை வாகன இறக்குமதியை பெரிதும் பாதிக்கின்றது.இதனால் வாகன இறக்குமதியை நிறுத்திக்கொள்ளத் தீர்மானித்துள்ளோம்.தற்போது அமெரிக்க டொலர் மற்றும் ஸ்ரெலிங் பவுண்ட் போன்றவற்றின் இலங்கைப் பெறுமதி உயர்வடைந்துள்ளது.இதனால் வாகன இறக்குமதிக்காக பெருந்தொகையை செலவிட நேரிட்டுள்ளது.

இதன் அடிப்படையில் வாகனங்களின் விலைகளும் ஒப்பீட்டளவில் உயர்வடையும்.எதிர்காலத்தில் இந்திய வாகனங்களின் விலைகள் மூன்று முதல் நான்கு லட்சத்தினால் உயர்வடையும்,இதனால் இந்த வாகனங்களுக்கான கேள்வி குறைவடையும்.வெற் வரி வாகன விலைகளில் மாற்றத்தை ஏற்படுத்தவில்லை.ஜப்பானிய யென் பெறுமதி அதிகரித்துள்ளதனால் ஜப்பான் வாகனங்களை இறக்குமதி செய்வதிலும் சிக்கல் நிலைமை ஏற்பட்டுள்ளது என இந்திக்க சம்பத் தெரிவித்துள்ளார்.