எதிர்வரும் க.பொ.த சா/த பரீட்சையில் தோற்றவுள்ள மாணவர்களுக்கு தேசிய அடையாள அட்டை விநியோகிக்க விசேட நடவடிக்கை எடுக்கப்பட்டுள்ளதாக ஆட்பதிவுத் திணைக்களம் தெரிவித்துள்ளது.

நவம்பர் 22 மற்றும் 29ம் திகதிகள் விசேட தினமாக அறிவிக்கப்பட்டு அன்றைய தினம் தேசிய அடையாள அட்டை விநியோகிக்க நடவடிக்கை எடுக்கப்பட்டுள்ளதாக ஆட்பதிவுத் திணைக்கள ஆணையாளர் நாயகம் சரத்குமார தெரிவித்தார்.

தன்னுடைய பிள்ளை மழையில் நனைந்தமை தொடர்பில் கெக்கிராவ பகுதி பாடசாலை அதிபர் ஒருவரை தாக்கிய குற்றச்சாட்டில் கெக்கிராவ பிரதேச சபை உப தலைவர் அநுர பண்டார ​ஹேரத் பொலிஸாரினால் கைது செய்யப்பட்டுள்ளார்.

சமய வழிபாடு ஒன்றிற்காக மாணவர்களை, அதிபர் கெக்கிராவ நகருக்கு அனுப்பியுள்ளார். அதன்போது மழை பெய்ததால் உப தலைவரின் பிள்ளை உள்ளிட்ட மாணவர்கள் நனைந்துள்ளனர்.

இது குறித்து ஆராய உப தலைவர் அதிபர் அலுவலகத்திற்கு சென்று அங்கு ஏற்பட்ட வாக்குவாதம் முற்றி தாக்குதல் வரை சென்றுள்ளது.

அதிபர் செய்த முறைப்பாட்டின் அடிப்படையில் கெக்கிராவ பிரதேச சபை உப தலைவர் இன்று காலை கைது செய்யப்ப்டுள்ளார்.

கொழும்பு – கோட்டையில் இருந்து யாழ்ப்பாணத்திற்கு இன்றிரவு முதல் புதிய கடுகதி ரயில் சேவை முன்னெடுக்கப்படவுள்ளதாக ரயில்வே திணைக்களம் தெரிவித்துள்ளது.

கொழும்பு கோட்டையில் இருந்து இரவு 10 மணிக்கு புறப்படவுள்ள புதிய கடுகதி ரயில், மறுநாள் காலை 6.55 க்கு யாழ்ப்பாணத்தை சென்றடையவுள்ளதாக ரயில்வே போக்குவரத்து அத்தியட்சகர் எல்.ஏ.ஆர். ரத்னாயக்க தெரிவித்தார்.

இந்த கடுகதி ரயில், கோட்டையில் இருந்து கிளிநொச்சி வரை கடுகதி ரயிலாக பயணிக்கவுள்ளது.

கிளிநொச்சியிலிருந்து யாழ்ப்பாணம் வரை சகல ரயில் நிலையங்களிலும் இந்த ரயில் நிறுத்தப்படும் என ரயில்வே போக்குவரத்து அத்தியட்சகர் மேலும் குறிப்பிட்டுள்ளார்.

இலங்கையின் மிகப் பெரும் அபிவிருத்தி செயற்திட்டமான யாழ். அதிவேகப் பாதைக்கு இன்று அடிக்கல் நாட்டும் வைபவம் நடைபெறவுள்ளது.

ஜனாதிபதி மஹிந்த ராஜபக்ஷ இந்த வைபவத்தில் பிரதம அதிதியாகக் கலந்து கொண்டு ரம்புக்கனை மற்றும் கலேவெல பிரதேசங்களில் இன்றும், பொத்துஹரயில் நாளையும் மூன்று தடவைகளில் அடிக்கல் நாட்டி வைத்து, நிர்மாணப் பணிகளை ஆரம்பிக்கவுள்ளார்.

யாழ்ப்பாணத்துக்கான அதிவேகப் பாதை கம்பஹா , வத்தளை , எண்டேரமுல்லயில் இருந்து ஆரம்பிக்கின்றது. இங்கிருந்து கம்பஹா நகரைத் தாண்டும் வரையிலும் அதிவேகப் பாதை பறக்கும் பாதையாக நிர்மாணிக்கப்படவுள்ளது. பின்னர் முதலாவது கட்டமாக தம்புள்ளை வரை இந்தப் பாதை நிர்மாணிக்கப்படும்.

தற்போதைக்கு நான்கு வழிப் பாதையாக நிர்மாணிக்கப்படும் அதிவேகப் பாதை எதிர்காலத்தில் தேவையேற்படின் ஆறுவழிப்பாதையாக நிர்மாணிக்கப்படுவதற்கான முறையில் இதன் நிர்மாணப் பணிகள் மேற்கொள்ளப்படவுள்ளது.

இதன் நுழைவாயில்களாக கம்பஹா, வேயன்கொடை, மீரிகம தெற்கு, மீரிகம வடக்கு, நாகலகமுவ,பொதுஹர உள்வட்டப் பாதை, தம்பொக்க, குருநாகல், ரிதீகம, மெல்சிரிபுர, கலேவெல, நாரங்வெல உள்வட்டப் பாதை, கலகெதர, ரம்புக்கன, அலதெனிய, கன்னொருவை, தம்புள்ள ஆகிய இடங்கள் தெரிவு செய்யப்பட்டுள்ளன.

முதலாம் கட்ட நிர்மாணப் பணிகள் நிறைவுற்ற பின்னர் யாழ்ப்பாணத்துக்கான அதிவேகப் பாதையின் இரண்டாம் கட்ட நிர்மாணப்பணிகளை மேற்கொள்ள உத்தேசிக்கப்பட்டுள்ளது.

இதன்போது தம்புள்ளையிலிருந்து யாழ்ப்பாணம் வரையும், தம்புள்ளையிலிருந்து திருகோணமலை வரையும், குருநாகலையிலிருந்து கண்டி வரையும் இந்தப் பாதை விஸ்தரிக்கப்படவுள்ளது.

இலங்கையில் மரண தண்டனை விதிக்கப்பட்டுள்ள ஐந்து இந்திய மீனவர்கள் குறித்து இதுவரை எந்த தீர்மானமும் மேற்கொள்ளப்படவில்லை என ஜனாதிபதி ஊடகப் பேச்சாளர் மொஹான் சமரநாயக்க தெரிவித்துள்ளார்.

ஜனாதிபதி மஹிந்த ராஜபக்ஷ ஐந்து மீனவர்களையும் மன்னிப்பு வழங்கி விடுவிக்கத் தயாராக இருப்பதாக, பிரதி அமைச்சர் பிரபா கணேசன் தெரிவித்துள்ள நிலையில் மொஹான் சமரநாயக்க இதனைத் தெரிவித்ததாக என இந்திய ஊடகச் செய்தி வெளியிட்டுள்ளன.

கடந்த செவ்வாய்க்கிழமை போதைப் பொருள் கடத்தியதாக குற்றம்சாட்டப்பட்டு மரண தண்டனை விதிக்கப்பட்ட மீனவர்கள் தரப்பில் இருந்து உயர்நீதிமன்றத்தில் மேன்முறையீடு செய்யப்பட்டது.

அதன்பின்னர் மாலை ஜனாதிபதி மஹிந்த ராஜபக்ஷவை சந்தித்த பிரபா கணேசன் மேன்முறையீடு செய்யாதிருந்தால் மீனவர்களுக்கு மன்னிப்பு வழங்கி விடுவிக்கத் தயாராகவிருப்பதாக, ஜனாதிபதி குறிப்பிட்டார் என ஊடகங்களுக்கு கருத்து தெரிவித்திருந்தார்.

எது எவ்வாறு இருப்பினும் ஜனாதிபதி அலுவலகத்தில் இருந்து இது குறித்த உத்தியோகபூர்வ செய்திகள் எதுவும் வெளியாகவில்லை என்பதும் குறிப்பிடத்தக்கது.