மருதானை பொலிஸ் பிரிவில் தற்காலிக விடுதி என்ற பெயரில் இயங்கி வந்த விபச்சார விடுதி ஒன்று முற்றுகையிடப்பட்டுள்ளது.

மேல் மாகாண குற்றத் தடுப்புப் பிரிவினர் நேற்று மேற்கொண்ட சுற்றிவளைப்பில் இந்த விபச்சார விடுதி முற்றுகையிடப்பட்டுள்ளது.

இதன்போது விபச்சார விடுதியை இயக்கிச் சென்ற இருவரும் விபச்சார தொழிலில் ஈடுபட்டதாகக் கூறப்படும் 6 பெண்களும் கைது செய்யப்பட்டுள்ளனர்.

கைது செய்யப்பட்ட பெண்கள் பன்வில, வௌ்ளவத்தை, ஆட்டுப்பெட்டித்தெரு, மோதரவீதி, களனி, வவுனியா மற்றும் தெஹிவளை பகுதிகளைச் சேர்ந்தவர்களாவர்.

கைது செய்யப்பட்ட அனைவரும் மாளிகாவத்தை நீதவான் நீதிமன்றில் ஆஜர் செய்யப்பட்டு 07ம் திகதி வரை விளக்கமறியலில் வைக்கப்பட்டுள்ளனர். மேல் மாகாண குற்றத் தடுப்புப் பிரிவினர் விசாரணைகளை மேற்கொண்டு வருகின்றனர்.

வெளிநாட்டு வேலைவாய்ப்பை பெற்றுச் செல்பவர்களை விமான நிலையத்தில் பதிவு செய்யும் நடைமுறை இன்று ஜனவரி முதலாம் திகதி முதல் நீக்கப்படுகிறது.

இன்று முதல் பணியகத்தின் தலைமை அலுவலகத்திலும், பிரதான அலுவலகங்கள் சிலவற்றில் மட்டுமே பதிவுகள் மேற்கொள்ளப்படும் என இலங்கை வெளிநாட்டு வேலை வாய்ப்பு பணியகத்தின் பிரதி பொது முகாமையாளரும் பேச்சாளருமான மங்கள ரந்தெனிய தெரிவித்தார்.

விமான நிலையத்துக்கு வருவதற்கு முன்னதாக பணியகத்தின் பிரதான அலுவலகங்களான பத்தரமுல்லையிலுள்ள தலைமை அலுவலகம், அநுராதபுரம், பதுளை, சிலாபம், தம்புள்ள, காலி, யாழ்ப்பாணம், திருகோணமலை, கல்முனை, மத்துகம, கண்டி, கேகாலை, வவுனியா போன்ற அலுவலகங்களில் பதிவு செய்ய முடியும்.

வெளிநாட்டு வேலைவாய்ப்பை பெற்றுச் செல்பவர்கள் தங்களது தொழில் ஒப்பந்தங்களை காண்பித்து பதிவு செய்த பின்னரேயே செல்ல அனுமதிக்கப்படுவார்கள். எனவே பதிவு செய்வது கட்டாயமாக பின்பற்றப்பட வேண்டும் என்றும் அறிவிக்கப்பட்டுள்ளது.

பதிவுசெய்யாமல் வெளிநாடு செல்வதற்கு எத்தனித்து இறுதி நேரத்தில் பிடிபடுபவர்கள் வெளிநாடு செல்வதற்கு உள்ள சந்தர்ப்பத்தை இழக்க நேரிடும் என்பதையும் நினைவில் வைத்துக்கொள்ள வேண்டும் என்றும் மங்கள ரந்தெனிய தெரிவித்தார்.

ஐக்கிய நாடுகள் மனித உரிமைப் பேரவை அமர்வுகளில் இலங்கைக்கு நிபந்தனையற்ற அடிப்படையில் ஆதரவளிக்கப்படும் என ரஷ்யா தெரிவித்துள்ளது.

நிபந்தனைகளின் அடிப்படையில் ரஷ்யா இலங்கைக்கு ஆதரவளிப்பதாக வெளியான செய்திகளில் உண்மையில்லை என சிங்களப் பத்திரிகையொன்று செய்தி வெளியிட்டுள்ளது.

ரஷ்யாவின் நிலைப்பாட்டை அந்நாட்டு ஜனாதிபதி ஏற்கனவே அறிவித்துள்ளார். மேற்குலக நாடுகளின் ஆலோசனைகளை ரஷ்யா ஏற்றுக்கொள்ளாது என தெரிவிக்கப்படுகிறது.

ஐந்தாம் ஆண்டு புலமைப் பரிசில் பரீட்சையை ரத்து செய்யும் திட்டமில்லை என கல்வி அமைச்சர் பந்துல குணவர்தன தெரிவித்துள்ளார்.

புலமைப் பரிசில் பரீட்சையை ரத்து செய்வது தொடர்பில் அரசாங்கம் இறுதித் தீர்மானம் எதனையும் எடுக்கவில்லை என அவர் குறிப்பிட்டுள்ளார்.

எதிர்வரும் 2014 மற்றும் 2015ம் ஆண்டுகளுக்கான பரீட்சைகளில் மாற்றம் செய்யப்பட வேண்டுமென பரிந்துரை செய்யப்பட்டுள்ளதாகத் தெரிவித்தள்ளார்.

புலமைப் பரிசில் பரீட்சை ரத்து செய்யப்படும் என்ற கருத்து தொடர்பில் ஊடகங்களில் பல்வேறு கருத்துக்கள் வெளியிடப்பட்டு வருகின்றமை குறிப்பிடத்தக்கது.

கிராமப் புற மாணவர்களின் கல்வி வாய்ப்புக்களை வரையறுப்பது அரசாங்கத்தின் நோக்கமல்ல என அவர் சுட்டிக்காட்டியுள்ளார்.

மஹியங்கனை, நிதன்கல பிரதேசத்தில் ஆற்றில் மிதந்து வந்த சிசுவொன்றின் சடலத்தை மஹியங்கனை பொலிஸார் நேற்று மீட்டுள்ளனர்.

மஹியங்கனை, நிதன்கலை மற்றும் ஹத்தட்டாவ பிரதேசத்தை அண்மித்த ஆற்றிலிருந்தே இச்சடலம் கண்டெடுக்கப்பட்டுள்ளது.
சுமார் ஒன்பது மாதமுடைய பெண் சிசுவே சடலமே இவ்வாறு மீட்கப்பட்டுள்ளது என்று பொலிஸார் தெரிவிக்கின்றனர்.

இச்சடலத்தை அடையாளம் காண்பதற்காக பொலிஸார் விசாரணைகளை மேற்கொண்டு வருகின்றனர்

கொழும்பு துறைமுகத்தில் அவதானத்துடன் இருந்த சுங்க அதிகாரிகள் கதிரியக்கம் படிந்திருந்த ஒரு கொள்கலனை சரியான வேளையில் கண்டுபிடித்ததனால் கொழும்பு மாநகரமே கதிரியக்க தாக்கத்தில் மூழ்க வேண்டிய ஆபத்து தவிர்க்கப்பட்டது.

ஜப்பானின் யொக்கோ ஹோமா துறைமுகத்தில் இருந்து கொழும்பு துறைமுகத்திற்கு சமீபத்தில் கொள்கலன்களை ஏற்றிவந்த கப்பலிலேயே இது கண்டுபிடிக்கப்பட்டது.

இந்தக் கப்பலில் வாகனங்களின் உதிரிப் பாகங்கள் பெருமளவில் கொண்டு வரப்பட்டது. இதனை அவதானித்த சுங்க அதிகாரிகள் சிசியம் 137 (Caesium 137) என்ற கதிரியக்க சக்தியைக் கொண்ட பொருட்கள் இருப்பதை அவதானித்தார்கள்.

இது வெளியில் இருந்தால் மனிதர்களின் உடலில் தீப்புண்கள் ஏற்படுவதுடன், மரணத்தை ஏற்படுத்தக்கூடிய பாரதூரமான கதிரியக்க தாக்கமும் ஏற்படும் என்று அறிவிக்கப்படுகிறது.

டிசம்பர் 11ம் திகதியன்று இந்த கொள்கலன் திறக்கப்பட்ட போது கொழும்புத் துறைமுகத்தில் உள்ள கதிரியக்கத்தை கண்டுபிடிக்கும் கருவி ஆபத்தை அறிவுறுத்தும் மணி ஒலிக்க ஆரம்பித்தது.

இதனால் சுங்க அதிகாரிகள் உடனடியாக அந்த கொள்கலனை மூடிவிட்டார்கள். துறைமுகத்தில் தன்னியக்க கருவிகள் கதிரியக்கம் இருப்பதை கண்டுபிடித்ததை அடுத்து நாம் அந்த கொள்கலனை ஒதுக்குப் புறமாக வைத்துவிட்டோம் என்று சுங்கத்திணைக்களத்தின் பேச்சாளரும், சட்டத்துறை பணிப்பாளருமான லெஸ்லி காமினி தெரிவித்தார்.

யக்கலையில் உள்ள ஒரு நிறுவனமே இந்த கொள்கலனை ஜப்பானில் இருந்து இறக்குமதி செய்துள்ளது. இறக்குமதியாளர்கள் இந்த கொள்கலன்களில் வாகனங்களின் உதிரிப்பாகங்கள் மாத்திரமே இருப்பதாக அறிவித்தனர்.

இதனை இறக்குமதி செய்தவர்களுக்கு இந்த கொள்கலனில் கதிரியக்க சக்திவாய்ந்த பொருட்கள் இருப்பது தெரியாதிருந்தது என்றும் அவர் கூறினார்.

இதுகுறித்து ஜப்பானில் உள்ள அதிகாரிகளுக்கு அறிவிக்கப்பட்டதை அடுத்து அது மீண்டும் ஜப்பானுக்கு திருப்பி அனுப்பப்பட்டது. இந்த சிசியம் 137 கதிரியக்கம் 1960களில் ஆயுதங்களை பரிசோதனை செய்து பார்த்த போது சுற்றாடலில் கலந்திருப்பதாக அறிவிக்கப்படுகிறது.

இதனால் மக்களும் நாளாந்த வாழ்க்கையில் இந்த கதிரியக்க தாக்கத்திற்கு உட்படுத்தப்படுகிறார்கள். இந்த கதிரியக்கப் பொருள் பெருமளவில் இருந்தால் மரணம் உட்பட பாரதூரமான விளைவுகளை ஏற்படுத்தும்.

கதிரியக்க சிகிச்சை முறையும் இதன் மூலமே மேற்கொள்ளப்படுகிறது. இந்த கதிரியக்கச் சக்தி சீல் வைக்கப்பட்ட கொள்கலன்களில் இருக்க வேண்டுமென்றும் அது பொதுமக்கள் இருக்கும் இடங்களில் வைக்கப்படலாகாதென்றும் விஞ்ஞானிகள் எச்சரிக்கையும் செய்துள்ளார்கள்.

இவற்றை வேண்டுமென்றோ அல்லது தவறுதலாக திறந்தால் அந்த கதிரியக்கம் அப்பகுதியில் உள்ள மக்கள் அனைவரையும் தாக்கும் ஆபத்தை ஏற்படுத்தும். இந்த கதிரியக்கச் சக்தி மனிதர்களுக்கு புற்றுநோயை ஏற்படுத்தும் ஆபத்தை கொண்டுள்ளது.

இதனைத் தவறுதலாக சுவாசித்தால் உடலில் உள்ள மென்மையான சவ்வுகளை பாதித்து கதிரியக்கத் தாக்கத்தை ஏற்படுத்தும் என்றும் எச்சரிக்கப்படுகிறது.