அமெரிக்காவில் கடைகளில் திருடி வந்த ஒரு நாய் பிடிக்கப்பட்டுள்ளது. தெற்கு கரோலினா மாநிலம் கிளிண்டனில் உள்ள ஒரு சூப்பர் மார்க்கெட்டில் இச்சம்பவம் நடைபெற்றது. அங்கு அடிக்கடி பொருட்கள் திருடுபோய் வந்தன.

திருடனை கண்டுபிடிப்பதற்காக, கண்காணிப்பு கேமராவில் பதிவான காட்சிகளை கடை ஊழியர்கள் ஆய்வு செய்தனர். அதில், குற்றவாளி ஒரு நாய் என அறிந்து ஆச்சரியம் அடைந்தனர்.

அந்த நாய் கதவு திறக்கும் வரை காத்திருப்பதும், கதவு திறந்தவுடன் உள்ளே நுழைந்து, நாய்களுக்கான உணவு பொருட்கள், பிஸ்கட் உள்ளிட்ட பொருட்களை எடுத்துச் செல்வதும் பிறகு அருகில் உள்ள இடத்தில் அப்பொருட்களை புதைத்து வைப்பதும் பதிவாகி இருந்தது.

வேறு சில பெரிய கடைகளிலும் அந்நாய் இதேபோல் திருடி உள்ளது. கடைக்காரர்கள் கொடுத்த புகாரின் பேரில் அந்த நாயை பொலிசார் பிடித்து கூண்டில் அடைத்தனர்.

தாங்கள் கைது செய்தவர்களில் இதுதான் சிறந்த கைது என்று பொலிசார் வர்ணித்தனர். கடை ஊழியர்களோ நாய் மீதான குற்றச்சாட்டுகளை வற்புறுத்தப்போவதில்லை என்று முடிவு செய்துள்ளனர்.

ஸ்பெயினில் நடுவானில் விமானம் பறந்து கொண்டிருந்த போது, கர்ப்பிணி பெண்ணுக்கு குழந்தை பிறந்தது.

ஸ்பெயின் நாட்டின் வாலன்சியாவில் இருந்து ருமேனியா தலைநகர் புசாரெஸ்டிற்கு விஸ் என்ற நிறுவனத்தின் விமானம் நேற்று புறப்பட்டு சென்றது. விமானத்தில் கர்ப்பிணி ஒருவர் உள்பட ஏராளமான பயணிகள் பயணம் செய்தனர்.

அப்போது நடுவானில் பறந்து கொண்டிருந்த போது கர்ப்பிணிக்கு, திடீரென பிரசவ வலி ஏற்பட்டதால் பயணிகள் அதிர்ச்சி அடைந்தனர். உடனே இதுகுறித்து விமானிக்கு தகவல் தெரிவிக்கப்பட்டவுடன், ருமேனியாவின் ஒடோபெனி விமானநிலையத்தில் தரையிறக்க முயன்றார்.

அதற்குள் பெண்ணிற்கு பிரசவவலி அதிகமானதால் பயணிகள் சிலர் உதவியுடன் பிரசவம் பார்க்கப்பட்டது. இதனால் விமானம் தரையிறங்குவதற்கு முன்பாகவே அழகான ஆண் குழந்தை பிறந்தது.

விமானம் தரையிறங்கியதும் விமானநிலையத்தில் காத்திருந்த மருத்துவ குழுவினர் தாயையும், சேயையும் அம்புலன்ஸ் மூலம் அருகில் இருந்த மருத்துவமனைக்கு கொண்டு சென்றனர்.

விமானத்தில் பிரசவமான பெண்ணின் பெயர் வயது, எந்த நாட்டை சேர்ந்தவர் என்ற விவரத்தை விமான நிறுவனம் தெரிவிக்கவில்லை.

பிரான்சில் முன்னாள் மனைவியை பழிவாங்கும் நோக்கில் அவளின் கணவன் அந்தரங்க புகைப்படங்களை அனுப்பியுள்ளது பெரும் பரபரப்பை ஏற்படுத்தியுள்ளது.

பிரான்சை சேர்ந்த நபர் ஒருவர், முன்னாள் மனைவியின் மீதுள்ள கோபத்தில் தன்னுடன் நெருக்கமாக இருக்கும் புகைப்படங்களை சக ஊழியர்களுக்கும் நண்பர்களுக்கும் மின்னஞ்சல் மூலமாக அனுப்பியுள்ளார்.

இதனையடுத்து அப்பெண்ணின் முன்னாள் கணவனுக்கு 10 மாத சிறைதண்டனையும், 23,000 யூரோக்கள் அபராதமும் விதித்து நீதிமன்றம் தீர்ப்பளித்துள்ளது.

இதுகுறித்து இப்பெண்ணின் வழக்கறிஞர் கூறியதாவது இவளின் முன்னாள் கணவனின் தண்டனை காலம் ஒரு வருடமாக நீட்டிக்கப்பட வேண்டும் மற்றும் இக்கொடூர செயலை கண்ட முன்னாள் மனைவி மனம் நோந்து, தற்கொலைக்கு முயன்று, இப்போது மருத்துவமனையில் தீவிர சிகிச்சை பெற்று வருகிறார் என்று தெரிவித்துள்ளார்.

மேலும் தன் முன்னாள் மனைவியால் புறக்கணிக்கப்பட்ட வெறியில், அவளின் முன்னாள் கணவன் இவ்வாறு செய்துள்ளான் என்பது குறிப்பிடத்தக்கது.

தென் சூடானில் ஏற்பட்டிருக்கும் அவசர நிலையை அடுத்து, தமது பிரஜைகளின் பாதுகாப்புக் கருதி விமானமொன்றை பிரித்தானியா அனுப்பியுள்ளது.

தென்சூடானில் அரசியல் நெருக்கடி நிலை உக்கிரமடைந்துவரும் நிலையில் அங்குள்ள பிரித்தானியப் பிரஜைகளை மீண்டும் நாட்டுக்கு அழைத்துவரும் நோக்கில் விமானமொன்று அனுப்பி வைக்கப்பட்டுள்ளது.

இதுவரை 150 பிரித்தானியப் பிரஜைகள் தம்மைக் காப்பாற்றுமாறு வேண்டுகோள் விடுத்துள்ளதாக வெளிவிவகார அமைச்சு தெரிவித்துள்ளது. அத்துடன் தென் சூடானில் உள்ள பிரித்தானிய தூதரகத்தின் சில பணியாளர்களும் நாட்டுக்கு அழைக்கப்பட்டுள்ளனர்.

தென்சூடான் அரசாங்கத்தை கவிழ்க்க சதித்திட்டங்கள் மேற்கொள்ளப்பட்டு வருவதாக வெளியான தகவல்களை அடுத்து நெருக்கடி நிலைமை வலுப்பெற்றுள்ளது.

தென்சூடானில் தொடரும் வன்முறைகளில் நூற்றுக் கணக்கானவர்கள் உயிரிழந்துள்ளதுடன் சுமார் 20 ஆயிரம் பேர் அங்குள்ள ஐநா அலுவலகத்தில் அகதிகளாக தஞ்சம் கோரியுள்ளனர்.

தென்சூடான் ஜனாதிபதி சல்வா கிர்ருக்கும் பதவி விலக்கப்பட்ட பிரதி ஜனாதிபதிக்கும் இடையிலான அதிகாரப் போட்டியே அங்கு வன்முறைகளை தோற்றுவித்துள்ளது

அமெரிக்காவின் கப்பல் ஒன்றை தாக்கி அழித்ததாக சீனா ஒப்புக் கொண்டுள்ளது. கடந்த 5ம் திகதி தமது கப்பல் ஒன்று சீனாவினால் நிர்மூலமாக்கப்பட்டிருந்தாக அமெரிக்கா குற்றம் சுமத்தி இருந்தது.

இது தொடர்பில் தொடர்ந்து மௌனம் காத்து வந்த சீனா தற்போது தங்களின் யுத்தக் கப்பல் ஒன்றை அமெரிக்க கப்பலை தாக்கி அழித்ததாக ஒப்பு கொண்டுள்ளது.

சீனாவின் கடற்பகுதியில் அத்துமீறி நுழைந்தமையாலேயே இந்த தாக்குதல் மேற்கொள்ளப்பட்டதாக சீன தரப்பில் தெரிவிக்கப்பட்டாலும் சர்வதேச கடற்பரப்பில் வைத்தே இந்த தாக்குதல் நடத்தப்பட்டதாக அமெரிக்க தெரிவித்துள்ளது.

ஏற்கனவே சீனாவின் தன்னிச்சையான வான் பாதுகாப்பு வலயம் தொடர்பில் அமெரிக்கா எச்சரிக்கை விடுத்து வரும் நிலையில் இந்த தகவல் வெளியாகியுள்ளமை குறிப்பிடத்தக்கது.

அமெரிக்காவிலுள்ள 200 பெண்களில் ஒருவர் கன்னியாக இருக்கும்போதே கர்ப்பமடைந்துள்ளதாக பிரித்தானிய மருத்துவ பத்திரிக்கை செய்தி வெளியிட்டுள்ளது.

அமெரிக்காவில் இனப்பெருக்க ஆரோக்கியம் குறித்து ஆய்வை இளம் பெண்களிடம் நீண்டகாலம் நடத்திய மருத்துவர்கள் குழு, இந்த பிரம்மிக்க வைக்கும் நம்பமுடியாத தகவல்களை வெளியிட்டுள்ளனர்.

இதற்காக 15 வயது முதல் 28 வயது வரையிலான 7870 சிறுமி மற்றும் இளம்பெண்களிடம் இரகசிய ஆராய்ச்சிகளை மருத்துவர்கள் மேற்கொண்டனர்.

இதில் 45 பேர் தாங்கள் எந்த ஆணுடனும் உடலுறவு வைத்துக்கொள்ளாத போதே கர்ப்பமடைந்துள்ளதாக கூறியுள்ளனர். இதற்காக அவர்கள் செயற்கை கருவூட்டல் முறையை எடுத்துக்கொள்ளவில்லை என்றும் கூறியுள்ளனர்.

மேலும் சிலர் தவறாக கருவுற்றதையும், கருக்கலைந்து போனதையும் அப்போது அவர்கள் குறிப்பிட்டுள்ளனர்.

கன்னியின் கர்ப்பம் குறித்து உலகம் முழுவதும் விவாதங்கள் நடந்து வருகிறது. இந்நிலையில் பழமைவாத கிறிஸ்தவ குழுவினர் திருமணத்திற்கு பிறகே குழந்தைகள் பிறக்கவேண்டும் என்று வாதிட்டு வருகின்றனர்.

பிள்ளைப்பேறு அடைய 21 வயது 7 மாதங்கள் வயது வரம்பு உள்ளபோது, இந்த கன்னித்தாய்கள் அதைவிட இரண்டு வயது குறைவாக இருந்துள்ளனர். கன்னிகள் கர்ப்பமடைவது குறித்து ஆதி காலம் தொட்டு கூறப்பட்டாலும், கர்ப்பத்தின் வரலாறு மற்றும் உடலுறவு மூலம் கர்ப்பமடைதல் குறித்து எண்ணற்ற கேள்விகள் எழுந்துள்ளன.

பங்களாதேஷில் எட்டு மாணவர்களுக்கு மரண தண்டனையும் 13 பேருக்கு ஆயுள் தண்டனையும் விதிக்கப்பட்டுள்ளது.

பங்ளாதேஷில் சென்ற வருடம் டிசம்பர் மாதம் 9ம் திகதி ஆளும்கட்சியான அவாமி லீகை எதிர்த்து போராட்டங்கள் நடைபெற்றுக் கொண்டிருந்தன.

அந்த சமயத்தில் பழைய டாக்கா நகரத்தில் பிஸ்வஜித் (24) என்ற தையற்கலைஞர் தனது கடையைத் திறப்பதற்காக சாலையில் நடந்து சென்றுள்ளார்.

இவரைப் போராட்டவாதி என்று தவறாக நினைத்த மாணவர் குழு ஒன்று அவரை வழிமறித்து அடித்து கூரிய ஆயுதங்களால் குத்திக் கொன்றுள்ளது.

இந்த மாணவர்கள் அனைவரும் ஜெகநாத் பல்கலைக்கழகத்தினைச் சேர்ந்தவர்கள் என்றும், அவாமி லீகின் மாணவர் பிரிவான சத்ரா லீக் அணியைச் சேர்ந்தவர்கள் என்றும் தெரிவிக்கப்பட்டது.

பட்டப்பகலில் நடந்த இந்தக் கொலை மிகவும் கொடூரமானது என்றும் மிகவும் வருந்தத்தக்கது என்றும் பொதுமக்கள் ஆர்ப்பாட்டத்தில் ஈடுபட்டனர்.

இந்த வழக்கு விரைவு நீதிமன்றத்தின் மூலம் விசாரிக்கப்பட்டு நேற்று தீர்ப்பு வழங்கப்பட்டது. இதில் கொலைக்குற்றம் சாட்டப்பட்ட எட்டு மாணவர்களுக்கு மரண தண்டனையும், 13 பேருக்கு ஆயுள் தண்டனையும் விதிக்கப்பட்டுள்ளது.

குற்றத்தின் தீவிரத்தைப் பொறுத்து அதிகபட்ச தண்டனைகள் வழங்கியதன்மூலம் நீதி நிலைநிறுத்தப்பட்டுள்ளது என்று நீதிபதி எபிஎம் நிசாமுல் ஹக் குறிப்பிட்டுள்ளார்.

மரண தண்டனை விதிக்கப்பட்டுள்ள எட்டு பேரில் இருவரும், ஆயுள்தண்டனை விதிக்கப்பட்ட 13 பேரில் இருவரும் இன்னும் தலைமறைவாக இருக்கின்றனர்.

இவர்களில் பெரும்பான்மையானோர் மாணவர்கள் என்பது குறிப்பிடத்தக்கது.