தூள், உத்தமபுத்திரன், கில்லி, ரெண்டு, மாயாண்டி குடும்பத்தார் உள்பட பல தமிழ் படங்களில் நகைச்சுவை வேடத்தில் நடித்தவர் மயில்சாமி. இவரது வீடு வடபழனி சாலிகிராமத்தில் உள்ளது.

இவரது செல்போனுக்கு நேற்று காலை மிஸ் கோல் ஒன்று வந்தது. மாலையில் அந்த நம்பரில் மயில்சாமி தொடர்பு கொண்டு பேசினார். மறுமுனையில் ஒரு ஆண் பேசினார். அவர் பேசும் போது நான் போலீஸ்காரர் விபசார வழக்கில் ஒரு பெண்ணை பிடித்து உள்ளேன். அவரது செல்போனில் உங்கள் செல்போன் நம்பர் உள்ளது. 50 ஆயிரம் கொடுத்தால் இந்த விஷயத்தை வெளியில் தெரியாமல் மறைத்து விடுவேன் என்றார்.

அப்போது அந்த போனில் ஒரு பெண் பேசினார். அவர் கூறும்போது, போலீஸ்காரர் கூறியபடி இன்றே பணத்தை கொடுத்து விடுங்கள் என்றார்.

உடனே மயில்சாமி என்னிடம் எந்த போலீசாரும் வந்தது இல்லை. நீங்கள் யார் என்று கேட்டார். உடனே அந்த பெண் செல்போனை துண்டித்து விட்டார். இதுகுறித்து நடிகர் மயில்சாமி இன்று விருகம்பாக்கம் போலீசில் புகார் செய்தார். இதுபற்றி அவர் நிருபர்களிடம் கூறியதாவது..

எனக்கு தினமும் ஏராளமானவர்கள் போன் பண்ணுவார்கள். படப்பிடிப்பில் இருக்கும்போது என்னால் பேசமுடியாது. இதனால் மாலை நேரத்தில் எனது போனுக்கு வந்த நம்பருக்கு நானே தொடர்பு கொண்டு பேசுவேன். பலர் என்னிடம் உதவி கேட்பது உண்டு.

கடந்த மாதம் கும்பகோணத்தைச் சேர்ந்த பெண்ணின் கஷ்டத்தை தீர்க்க 10 ஆயிரம் அனுப்பினேன். நேற்றும் செல்போனில் பதிவான 10க்கும் மேற்பட்ட நம்பர்களில் பேசினேன். இந்த குறிப்பிட்ட நம்பரில் பேசிய ஆணும், பெண்ணும் 50 ஆயிரம் தர வேண்டும். இல்லையேல் உங்கள் பெயருக்கு களங்கம் ஏற்படுத்தி விடுவேன் என்கிற ரீதியில் மிரட்டினார்கள்.

எனவே இதுபற்றி போலீசில் புகார் செய்தேன். அவர்கள் மீது நடவடிக்கை எடுக்க வேண்டும் என்று கேட்டுக்கொண்டேன் என்று அவர் கூறினார்.

போலீசார் அந்த நம்பருடன் தொடர்புகொண்டபோது சுவிட்ச் ஓப் என பதில் கிடைத்தது. என்றாலும் போலீசார் தொடர்ந்து விசாரணை நடத்தி வருகிறார்கள்.

விஜயகாந்தின் மகன் சண்முக பாண்டியன் சகாப்தம் படத்தின் மூலம் ஹீரோ ஆகிறார். விஜயகாந்தின் மூத்த மகன் பிரபாகரன், பி.ஈ. ஆர்க்கிடெக்ட் படித்து வருகிறார். இளைய மகன் சண்முக பாண்டியன் சென்னை லயோலா கல்லூரியில் விஷுவல் கம்யூனிகேஷன் படிக்கிறார்.

பிரபாகரன் ஆரம்பத்தில் சினிமா ஆசையில் இருந்தார். ஆனால், அதற்கான எந்த முயற்சியையும் எடுக்கவில்லை. இளைய மகன் சண்முக பாண்டியன் சினிமாவில் கதாநாயகன் ஆக வேண்டும் என்ற ஆசையிலும் ஆர்வத்திலும் இருந்து வருகிறார்.

சண்முக பாண்டியனின் திரையுலக அறிமுகம் அனைத்து தரப்பினரும் வரவேற்கும் வகையில் இருக்க வேண்டும் என்று விஜயகாந்தும், பிரேமலதாவும் விரும்பினார்கள்.

இதற்காக அவர்கள் தனது மைத்துனர் சுதீஷுடன் சேர்ந்து, சண்முக பாண்டியனுக்காக கதை கேட்க ஆரம்பித்தார் விஜயகாந்த்.

நல்ல கதை கிடைத்திருக்கிறதாம். படத்துக்கு சகாப்தம் என டைட்டில் வைத்திருக்கிறார்கள். ரஜினியின் பிறந்த நாளான டிசம்பர் 12ல் விஜயகாந்த் தன் மகனை ஹீரோவாக அறிமுகப்படுத்த இருக்கிறார்.

கௌதம் மேனன் சிம்பு, பல்லவி நடிப்பில் புதிய படத்தை இயக்கிக் கொண்டு இருக்கிறார். சட்டென்று மாறுது வானிலை என்று முதலில் டைட்டில் வைத்தார்கள்.

இப்போது அந்த டைட்டில் இல்லை. ஏற்கனவே ரவிராஜ் என்பவர் அதே டைட்டிலில் படம் இயக்கி முடித்து யு சான்றிதழ் பெற்றுள்ளார்.
இதனால் வேறு டைட்டில் வைக்கலாம் என்று தீவிர யோசனையில் இருக்கிறார் இயக்குநர் கௌதம்.

இதற்கிடையில் பெப்ரவரியில் தொடங்க இருக்கும் புதிய படம் குறித்து அஜித்திடம் பேச கௌதம் சென்றிருக்கிறார். சிம்புவும் இந்தப் படத்தில் நடிக்கட்டுமே என்று அஜித்தே முன்வந்து கேட்டதோடு, உடனே சிம்புவுக்குப் போன் போட்டு பேசினாராம்.

சிம்பு, அஜித்துடன் நடிக்க உடனே ஓ.கே.சொல்லிவிட்டாராம். இப்போது சிம்புவுக்கான கதாபாத்திரத்தை மெருகேற்றுவதில் கவனம் செலுத்தி வருகிறார் கௌதம்.

சிம்பு தல பேசிய உற்சாகத்தில் ஆனந்த தாண்டவம் ஆடிக்கொண்டிருக்கிறார் . ஆர்யா, விதார்த்தைத் தொடர்ந்து இப்போது சிம்புவும் அஜித் படத்தில் நடிக்கிறார்.

2013ல் புதுமுக நடிகைகள் அதிகம் கவர்ந்தனர். நயன்தாரா, காஜல் அகர்வால், த்ரிஷா, அனுஷ்கா, ஹன்சிகா, அமலாபால் போன்றோர் மார்க்கெட்டை நிலையாக தக்க வைத்துக் கொண்டனர்.

நயன்தாரா இந்த வருடமும் தமிழ், தெலுங்கில் நம்பர் வன் ஹீரோயினாக இருக்கிறார். காதல் சர்ச்சைகளால் ஒரு வருடம் இடைவெளி விட்டு வந்தாலும் நயனுக்கு அதே கிரேஸ் இருந்தது ஆச்சர்யம். ஆர்யாவுடன் ஜோடி சேர்ந்த ராஜா ராணி படம் வெற்றிகரமாக ஓடி வசூல் குவித்தது. அஜித்துடன் நடித்த ஆரம்பம் படமும் ஹிட்டானது.

தற்போது தமிழ், தெலுங்கில் தயாராகும் அனாமிகா படத்தில் கர்ப்பிணி வேடத்தில் நடிக்கிறார். இது இந்தியில் வித்யாபாலன் நடித்து பரபரப்பாக ஓடிய கஹானி படத்தின் ரீமேக் . இதில் நயன்தாராவுக்கு விருதுகள் கிடைக்கும் என எதிர்பார்க்கப்படுகிறது.

உதயநிதி ஜோடியாக இது கதிர்வேலன் காதல் படத்திலும் நடிக்கிறார். சிம்பு படம் உள்பட மேலும் மூன்று படங்களில் நடிக்கும் அளவுக்கு பிஸியாக இருக்கிறார்.

காஜல் அகர்வாலை கடந்த வருடம் ரிலீசான துப்பாக்கி படம் முன்னணி நடிகையாக்கியது. ஆல் இன் ஆல் அழகு ராஜா படத்தில் நடித்தார். தற்போது விஜய்யுடன் மீண்டும் ஜில்லா படத்தில் நடித்து வருகிறார்.

அனுஷ்கா நடித்து இந்த வருடம் அலெக்ஸ் பாண்டியன், சிங்கம் 2, இரண்டாம் உலகம் படங்கள் வந்தன. இதில் சிங்கம் 2 அதிக வசூல் குவித்தது. தற்போது தமிழ், தெலுங்கில் தயாராகும் ருத்ரமாதேவி, பாஹுபலி ஆகிய இரு படங்களில் நடித்து வருகிறார். இப்படங்கள் கதாநாயகிக்கு முக்கியத்துவம் உள்ள கதையம்சம் கொண்டவை.

ஹன்சிகாவுக்கு இந்த வருடம் தீயா வேலை செய்யணும் குமாரு, சிங்கம் 2 படங்கள் கைகொடுத்தன. கார்த்தி நடிக்கும் பிரியாணி படம் டிசம்பர் 20ல் ரிலீஸ் ஆக உள்ளது. வாலு, அரண்மனை, வேட்டை மன்னன், மான் கராத்தே, உயிரே உயிரே என நிறைய படங்கள் ஹன்சிகாவின் கவைசம் உள்ளன.

தலைவாவில் விஜய் ஜோடியான அமலாபால், இப்போது ஜெயம் ரவியுடன் நிமிர்ந்து நில் தனுஷுடன் வேலையில்லா பட்டதாரி படங்களில் நடிக்கிறார்.

த்ரிஷாவுக்கு சமர் படம் மட்டும் ரிலீஸ் ஆனது, ஜீவாவுடன் நடித்த என்றென்றும் புன்னகை டிசம்பர் 20ல் ரிலீஸ் ஆகிறது. ஜெயம் ரவியுடன் பூலோகம் படத்திலும் நடித்து வருகிறார்.

நேரம் படத்தில் அறிமுகமான நஸ்ரியா, ராஜா ராணி படத்திலும் கவனம் ஈர்த்தார். நையாண்டி படம் சரியாகப் போகாவிட்டாலும் நஸ்ரியா முன்னணி நடிகையாக இருக்கிறார்.

வருத்தப்படாத வாலிபர் சங்கம் படத்தில் ஊதா கலரு ரிப்பனால் பிரபலமாகிவிட்டார் ஸ்ரீதிவ்யா. இப்போது பென்சில். வீர தீர சூரன், ஈட்டி எனும் மூன்று படங்களைக் கையில் வைத்திருக்கிறார்.

தமன்னா, ஸ்ருதி, இலியானா, சமந்தா , அஞ்சலி போன்றோருக்கு தமிழில் இந்த வருடம் படங்கள் இல்லை.