திருவள்ளூர் மாவட்டம் பொன்னேரி அருகே வீட்டில் தூங்கிக் கொண்டிருந்த 10 வயது சிறுமியை அதிகாலையில் ஒரு கும்பல் கடத்திச் சென்று பாலியல் பலாத்காரம் செய்த செயல் பரபரப்பை ஏற்படுத்தியுள்ளது. அந்த சிறுமி தற்போது உயிருக்கு ஆபத்தான நிலையில் மருத்துவமனையில் சேர்க்கப்பட்டுள்ளாள்.

பொன்னேரி அருகே உள்ளது சோழவரம் அம்பேத்கர் நகர். இங்கு வசித்து வருகின்றார் அந்த சிறுமி. 10 வயதாகும் அச்சிறுமி 4வது வகுப்பு படித்து வருகின்றார். நேற்று இரவு தனது வீட்டில் பெற்றோருடன் தூங்கிக் கொண்டிருந்தார். காற்று வரட்டுமே என்பதற்காக வீட்டுக்கதவைப் பூட்டாமல் திறந்து வைத்துத் தூங்கியுள்ளனர்.

இன்று காலை எழுந்து பார்த்த சிறுமியின் பெற்றோர் மகளைக் காணாமல் திடுக்கிட்டனர். அக்கம் பக்கத்தில் தேடத் தொடங்கினர். கிராம மக்களும் திரண்டு வந்தனர்.இந்த நிலையில் வீட்டுக்கு சற்று தொலைவில் உள்ள மயானத்தில் ஒரு சிறுமி கிடப்பதாக தகவல் வந்தது. இ தையடுத்து ஓடிப் போய்ப் பார்த்தபோது அது காணாமல் போன சிறுமி என்று தெரிய வந்தது. உடலிலிருந்து நிறைய ரத்தம் வெளியேறிய நிலையில் உயிருக்குப் போராடிக் கொண்டிருந்தாள் சிறுமி.

இதையடுத்து அவளை மருத்துவமனைக்குக் கொண்டு சென்றனர். பின்னர் மேல் சிகிச்சைக்காக சிறுமியை எழும்பூர் குழந்தைகள் மருத்துவமனைக்குக் கொண்டு சென்றனர். அங்கு உயிருக்கு ஆபத்தான நிலையில் சிறுமிக்கு சிகிச்சை அளிக்கப்பட்டு வருகிறது.சம்பந்தப்பட்ட சிறுமி பாலியல் பலாத்காரக் கொடுமைக்குள்ளாக்கப்பட்டுள்ளார் என்று தெரிய வந்துள்ளது.

5 பேர் சேர்ந்து சிறுமியைக் கடத்தியதாகவும் கூறப்படுகிறது. இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

அனில் அம்பானியின் ஐடி கணக்கை முடக்கிய 21 வயது சிஏ மாணவி மீது சைபர் க்ரைம் வழக்கு பதிவு செய்யப்பட்டுள்ளது.

அனில் திருபாய் அம்பானி குழுமத்தின் தலைவராக இருப்பவர் அனில் அம்பானி. இவரது வருமான வரி கணக்கை மும்பையில் உள்ள கணக்கு தணிக்கை நிறுவனம் ஒன்று பராமரித்து வருகிறது.

இந்த நிறுவனத்துக்கு கடந்த ஜூன் 26ம் திகதி வருமான வரி கணக்கு அலுவலகத்தில் இருந்து இமெயில் தகவல் ஒன்று வந்துள்ளது. அதில், அனில் அம்பானியின் இணையதள கணக்குக்கான பாஸ்வேர்ட் மாற்றப்பட்டுள்ளது என்று தெரிவிக்கப்பட்டிருந்தது.

அடுத்ததாக ஜூலை 12ம் திகதி மீண்டும் இதேபோன்ற தகவல் இமெயில் வந்தது. இதனால் சுதாரித்த கணக்கு தணிக்கை நிறுவனம் உடனடியாக அனில் அம்பானியின் கணக்கை ஆராய முயன்றபோது அது முடக்கப்பட்டிருந்தது தெரியவந்தது.

இது குறித்து சம்பந்தப்பட்ட நிறுவனம் பொலிசில் புகார் செய்தது. விசாரணையில் ஐதராபாத்தைச் சேர்ந்த மனோஜ் டகா அண்ட் கம்பெனி என்ற கணக்கு தணிக்கை அலுவலகத்தில் சிஏ முடித்து பயிற்சி பெற்று வந்த 21 வயது மாணவிதான் அனில் அம்பானியின் கணக்கை முடக்கி அதில் இருந்த விவரங்களை பார்த்தது தெரியவந்தது.

அவரிடம் நடத்தப்பட்ட விசாரணையில் அனில் அம்பானி எவ்வளவு வரி செலுத்தியுள்ளார், அவரது பான் கார்டு எண் என்ன என்பதை பார்ப்பதற்காக கணக்கை முடக்கியது தெரியவந்தது.

இதையடுத்து சைபர் குற்றத்தின்கீழ், கடந்த 7ம் திகதி சம்பந்தப்பட்ட மாணவி மீது பொலிசார் வழக்குப் பதிவு செய்துள்ளனர். இந்த வழக்கின்கீழ் அவர் கைது செய்யப்படலாம் என்று எதிர்பார்க்கப்படுகிறது.

தமிழகத்தில் சென்னை பாலவாக்கத்தில் பெண்ணை காரில் கடத்திச்சென்று கழுத்தை அறுத்து நகைகளை கொள்ளையடித்த தாய், மகள் உள்பட 3 பேரை பொலிசார் கைதுசெய்துள்ளனர்.

சென்னையை அடுத்த பாலவாக்கம் கந்தசாமி நகரை சேர்ந்தவர் தேன்மொழி(55). இவர் அந்த பகுதியில் உள்ள பெரியார் சாலையில் ஹோட்டல் நடத்தி வருகிறார்.

இவரது ஹோட்டலுக்கு பாலவாக்கம் வி.ஜி.பி. நகரை சேர்ந்த கங்கா(36) என்பவர் அடிக்கடி வந்து சென்றார். இதனால் இருவருக்கும் பழக்கம் ஏற்பட்டது. இந்த நிலையில் கங்காவுக்கு பணம் தேவைப்பட்டது. எனவே தேன்மொழியிடம் கேட்டார். அதற்கு அவர், பணம் இல்லை என கூறினார்.

இதையடுத்து கங்கா தேன்மொழியை தனது வீட்டுக்கு அழைத்துச் சென்று குடிப்பதற்கு பால் கொடுத்தார். அதை குடித்த தேன்மொழிக்கு மயக்கம் ஏற்பட்டது. பின்னர் கங்காவும் அவரது மகள் கீதாஞ்சலி, வளர்ப்பு மகன் விக்னேஷ் ஆகியோர் மயக்கம் அடைந்த தேன்மொழியை காரில் ஏற்றி கடத்திச் சென்றனர்.

பெரியபாளையம் அருகே உள்ள ஜெயபுரம் என்ற பகுதியில் காரை நிறுத்திய அவர்கள் தேன்மொழி அணிந்து இருந்த 15 பவுன் தங்க நகைகளை கழற்றினார்கள்.

பின்னர் தேன்மொழியின் கழுத்தை அறுத்து காரில் இருந்து அவரை கீழே தள்ளி விட்டு தப்பிச்சென்று விட்டனர். அருகில் இருந்த ஒரு நிறுவனத்தில் பணியாற்றும் காவலாளி பெண்ணின் முணகல் சத்தம் கேட்டு ஓடி வந்து பார்த்தார்.

அங்கு கழுத்து அறுக்கப்பட்ட நிலையில் தேன்மொழி கிடப்பதை கண்டு அதிர்ச்சி அடைந்தார். இதுபற்றி பொன்னேரி பொலிசாருக்கு தகவல் கொடுத்தார். சம்பவ இடத்துக்கு விரைந்து வந்த பொலிசார் தேன்மொழியை மீட்டு வைத்தியசாலைக்கு அனுப்பி வைத்தனர்.

பின்னர் உயிர்பிழைத்த தேன்மொழி நடந்த சம்பவங்களை பொலிசாரிடம் கூறினார். இதுபற்றி நீலாங்கரை பொலிசாருக்கும் தகவல் அளிக்கப்பட்டது.

நடத்திய விசாரணையில் நகை, பணத்துக்காக தேன்மொழியை காரில் கடத்திச் சென்று அவரது கழுத்தை அறுத்து தள்ளிவிட்டது தெரியவந்தது.
இதையடுத்து பாலவாக்கத்தில் பதுங்கி இருந்த கங்கா, அவரது மகள் கீதாஞ்சலி, வளர்ப்பு மகன் விக்னேஷ் ஆகிய 3 பேரையும் பொலிசார் கைது செய்தனர்.

தமிழகத்தின் அம்பாசமுத்திரம் அருகே வரதட்சனை கேட்டு காதல் மனைவி மீது மண்ணெண்ணையை ஊற்றி தீ வைத்து கொடூரமான கணவன் மீது பொலிஸார் வழக்குப் பதிந்து விசாரித்து வருகின்றனர்.

அம்பாசமுத்திரம் அருகே அயன்சிங்கம்பட்டி அம்மன் கோவில் வீதியை சேர்ந்த வேம்பு மகன் மதியழகன் (23) என்பவர் வைராவிகுளம் காமராஜர்புரம் பகுதியை சேர்ந்த சுப்பிரமணியன் மகள் அபிராமி(22) என்பவரை 2 வருடங்களுக்கு முன் காதலித்து திருமணம் செய்து கொண்டார்.

இத்தம்பதிக்கு 7 மாத பெண் குழந்தை உள்ளது. காதல் திருமணம் செய்து கொண்டதால் அபிராமிக்கு அவரது பெற்றோர் தங்க நகைகள் எதுவும் சீதனமாக வழங்கவில்லையாம்.

இதற்கிடையே அபிராமியின் சகோதரி பிரபாவதிக்கு சில தினங்களுக்கு முன் திருமணம் நடைபெற்றது. பிரபாவதிக்கு அவரது சகோதரர் சீதனமாக தங்க நகைகள் போட்டு திருமணம் செய்து கொடுத்தாராம்.

இதையடுத்து அபிராமியிடம் மதியழகன் நீயும் தங்க நகைகள் வாங்கி வருமாறு கேட்டாராம். இது தொடர்பாக வெள்ளிக்கிழமை இரவு இருவருக்கும் இடையே தகராறு ஏற்பட்டதாம். இதில் மதியழகன் தனது மனைவி அபிராமி மீது மண்ணெண்ணையை ஊற்றி தீ வைத்தாராம்.

பலத்த காயமடைந்த அபிராமி திருநெல்வேலி அரசு மருத்துவமனையில் தீவிர சிகிச்சை பிரிவில் சேர்க்கப்பட்டார். கல்லிடைக்குறிச்சி பொலிஸார் மதியழகன் மீது வழக்குப் பதிந்து விசாரித்து வருகின்றனர்.