மோசடி வழக்கில் கைதாகி டெல்லி திகார் ஜெயிலில் அடைக்கப்பட்ட பவர் ஸ்டார் சீனிவாசன் ஜாமீனில் வெளிவந்தார். தொடர்ந்து படங்களில் நடிக்கப் போவதாக கூறினார். பவர் ஸ்டார் சீனிவாசன் அளித்த பேட்டி வருமாறு..

நான் யாரையும் ஏமாற்ற வில்லை. சில துரோகிகள் என்னை பழிவாங்கி விட்டனர். பொருட்களை எடுத்துக் கொண்டு எங்கேயும் ஓடிப்போகவில்லை. தங்கள் வேலையை முடித்துக் கொடுக்க சிலர் பணம் கொடுத்தனர். அதை இன்னொருத்தரிடம் கொடுத்தேன். அவர் ஏமாற்றி விட்டார். மோசடி வழக்கில் சிக்கிய போது என்னுடன் நெருக்கமாக இருந்தவர்கள் கூட எதிரியாகி விட்டனர்.

சினிமாவில் நடிக்க வந்தேன். நிறைய பேர் என்னை ஏமாற்றினர். 20 கோடி வரை சினிமாவில் இழந்து விட்டேன். அந்த இயக்குனர்கள் யார் என்பதை சொல்ல விரும்பவில்லை. நான் சிறையில் இருந்த போது 8 கோடியில் கட்டிய ஆஸ்பத்திரியை சிலர் சூறையாடினர். பொருட்களையெல்லாம் அள்ளிச் சென்றனர். ஜெயிலுக்கு போனவனெல்லாம் குற்றவாளிகள் இல்லை.

வெளியில் இருப்பவனெல்லாம் நல்லவனும் இல்லை. ஜெயில் வாழ்க்கை கஷ்டமாக இருந்தது. என் இடத்தில் இன்னொருத்தர் இருந்து இருந்தால் தற்கொலை செய்து கொண்டு இருப்பார். எல்லாவற்றையும் பொறுத்துக் கொண்டேன். சினிமாவில் நிறைய பேரை தம்பி என்றுதான் அழைப்பேன். ஜெயிலில் இருந்த போது அவர்கள் யாரும் என்னை வந்து பார்க்கவில்லை.

நடிகர் பிரசாந்த் மட்டும் விசாரித்தார். ஒருத்தனுக்கு கஷ்டம் வந்தால் கூட இருக்கனும். அது தான் நட்பு என்னை வந்து பார்க்காதவர்கள் இதை உணர வேண்டும். இந்த மாதம் நான் நடித்த மூன்று படங்கள் ரிலீசாகிறது. இன்னும் நிறைய படங்களில் நடிக்க ஒப்பந்தம் ஆகியுள்ளேன் என்று பவர் ஸ்டார் சீனிவாசன் கூறினார்.

நடிகர் விஜயின் தலைவா படம் சர்ச்சைகளில் சிக்கி பிறகு ரிலீசானது. தற்போது தயாரிப்பாளர் சங்க தேர்தலிலும் தனது பெயர் இழுக்கப்பட்டுள்ளதாக விஜய் கூறினார். தயாரிப்பாளர் சங்க தேர்தல் நாளை நடக்கிறது. இதில் மூன்று அணிகள் மோதுகின்றன. இதில் ஒரு அணியை தான் ஆதரிப்பதாக வதந்திகள் பரவியுள்ளன என்றும் எந்த அணியையும் நான் ஆதரிக்க வில்லை என்றும் விஜய் கூறினார்.

இது குறித்து அவர் வெளியிட்ட அறிக்கையில் கூறியிருப்பதாவது..

நான் ஐதராபாத்தில் நடக்கும் ஜில்லா படப்பிடிப்பில் பங்கேற்று நடித்து வருகிறேன். தயாரிப்பாளர் சங்க தேர்தலில் குறிப்பிட்ட ஒரு அணியை நான் ஆதரிப்பதாக வதந்தி பரவியுள்ளது. பலர் என்னிடம் தொடர்பு கொண்டு இது குறித்து கேட்ட வண்ணம் உள்ளனர். நான் எந்த அணியையும் ஆதரிக்கவில்லை என்பதை தெரிவித்து கொள்கிறேன்.

இரண்டு அணிகளிலும் என்னை வைத்து படம் எடுத்த தயாரிப்பாளர்கள் உள்ளனர். எல்லா தயாரிப்பாளர்களுக்கும் நான் பொதுவானவன். இந்த தேர்தலில் வெற்றி பெறும் அனைத்து தயாரிப்பாளர்களுக்கும் எனது வாழ்த்துக்களை முன்னதாகவே தெரிவித்துக் கொள்கிறேன் என்று அறிக்கையில் குறிப்பிட்டு உள்ளார்.

தமிழ் திரைப்பட தயாரிப்பாளர் சங்க தேர்தல் இன்று நந்தனம் ஒய்.எம்.சி.ஏ. மைதானத்தில் நடக்கிறது. காலை 9 மணிக்கு ஓட்டுப்பதிவு துவங்கி மாலை 4 மணிவரை நடக்கிறது. தயாரிப்பாளர் சங்கத்தில் 3 ஆயிரத்துக்கும் மேற்பட்ட உறுப்பினர்கள் உள்ளனர். இதில் 832 பேருக்கு மட்டுமே ஓட்டு போட தகுதி உள்ளது. ஓட்டுப்பதிவில் அசம்பாவிதங்கள் நிகழாமல் இருக்க பலத்த போலீஸ் பாதுகாப்புக்கு ஏற்பாடு செய்யப்பட்டு உள்ளது.

தேர்தலில் மூன்று அணிகள் மோதுகின்றன. தலைவர் பதவிக்கு கே.ஆர்., கலைப்புலி தாணு ஆகியோர் போட்டியிடுகிறார்கள். கே.ஆர்.அணியில் டி.ஜி.தியாகராஜன், சுபாஷ் சந்திரபோஸ் துணை தலைவர் பதவிக்கும் டி.சிவா, ஞானவேல் ராஜா, செயலாளர் பதவிக்கும் ஆர்.ராதா கிருஷ்ணன் பொருளாளர் பதவிக்கும் போட்டியிடுகின்றனர்.

செயற்குழு உறுப்பினர் பதவிக்கு நடிகை தேவயாணி, ஏ.எல்.அழகப்பன், சோழ பொன்னுரங்கன், சமீலாநாசர், எடிட்டர் மோகன், கே.முருகன், கே.ராஜன், டி.டி.ராஜா, சவுந்தர பாண்டியன், விஜயகுமார், கே.பாலு, சித்ரா லட்சுமணன், எஸ்.எஸ்.துரை ராஜ், காஜாமைதீன், எச்.முரளி, பி.மதன், வேதா, பிரமிட் நடராஜன், ஜாகுவார் தங்கம், விஜயமுரளி, ஆர்.வி.உதயகுமார் ஆகியோர் நிற்கின்றனர்.

கலைப்புலி தாணு அணியில் பவித்ரன், கதிரேசன், துணை தலைவர் பதவிக்கும் சங்கிலி முருகன், தேனப்பன் செயலாளர் பதவிக்கும், புஷ்பா கந்தசாமி பொருளாளர் பதவிக்கும் போட்டியிடுகின்றனர்.

செயற்குழு உறுப்பினர் பதவிக்கு அமுதா துரைராஜ், ஆர்.கே.செல்வமணி, வி.சேகர், ஆர்.மாதேஷ், கிரிதிலால் நாக்பால், ராதாரவி, மனோஜ்குமார், தங்கர்பச்சான், கபார், கருணாஸ், தாகா, கோவை தம்பி, வெங்கடரமணி, சந்திர பிரகாஷ் ஜெயின், ராகவா, சி.பாஸ்கர், தங்கராஜ், பழனிவேல், ரிஷிராஜ், பாலாஜி, என்.ஜி.முருகேஷ் ஆகியோர் மோதுகின்றனர்.

மூன்றாவது அணியில் செயலாளர் பதவிக்கு சிவசக்தி பாண்டியன், துணை தலைவர் பதவிக்கு பட்டியல் கே.கே.சேகர் செயற்குழு உறுப்பினர் பதவிக்கு அழகன் தமிழ்மணி, மன்னன், ஷக்தி சிதம்பரம், மங்கை அரிராஜன், எம்.திருமலை, திரு என்ற கே.திருஞானம், குண்டேச்சா, வி.செல்வராஜ் ஆகியோர் போட்டியிடுகிறார்கள்.

சிவகார்த்திகேயன் நடிப்பில் நேற்று வெளியாகி வெற்றிகரமாக ஓடிக்கொண்டிருக்கும் படம் வருத்தப்படாத வாலிபர் சங்கம். இப்படத்தில் சிவகார்த்திகேயன் போஸ் பாண்டி என்ற கதாபாத்திரத்தில் நடித்துள்ளார். மேலும், இவருடன் ஸ்ரீதிவ்யா, சத்யராஜ், சூரி, பிந்துமாதவி ஆகியோரும் நடித்துள்ளனர்.

இப்படம் இன்று சென்னையில் மட்டும் 200க்கும் மேற்பட்ட காட்சிகள் திரையிடப்பட்டுள்ளது. இப்படம் வெளியான அனைத்து சென்டர்களிலும் ரசிகர்களின் ஏகோபித்த ஆதரவை பெற்றுள்ளது.

இப்படத்தில் முதன்முறையாக சிவகார்த்திகேயன் பாடல் ஒன்றையும் பாடியுள்ளார். இந்த பாடல் இணையதளம் மற்றும் தொலைக்காட்சிகளில் ஏற்கெனவே பிரபலமாகியிருந்தாலும் திரையரங்கில் பார்க்கும்போது அனைவரையும் எழுந்துநின்று ஆட்டம் போட வைத்திருக்கிறது என ரசிகர்கள் கூறியுள்ளனர்.

சிவகார்த்திகேயனை தன்னுடைய தம்பியாக ஏற்றுக்கொண்ட தனுஷ் இப்படம் குறித்து தனது டுவிட்டர் பக்கத்தில் கூறும்போது, வருத்தப்படாத வாலிபர் சங்கம் படத்தை யாரும் மிஸ் பண்ணிடாதீங்க. இப்படம் 350 சென்டர்களில் வெளியாகியுள்ளது. சிவகார்த்திகேயனுக்கு எனது வாழ்த்துக்கள் என குறிப்பிட்டுள்ளார்.

மயக்கம் என்ன படத்துக்குப் பிறகு செல்வராகவன் இயக்கியுள்ள படம் இரண்டாம் உலகம். ஆர்யாஅனுஷ்கா நடித்துள்ள இப்படத்துக்கு ஹரிஸ் ஜெயராஜ் இசையமைத்துள்ளார். செல்வராகவன் இயக்கும் படங்களுக்கு சினிமா ரசிகர்கள் மத்தியில் எப்போதும் பெரிய வரவேற்பும் எதிர்பார்ப்பும் உண்டு. அந்த வகையில் இந்த படத்திற்கு எதிர்பார்ப்பு அதிகமாகி உள்ளது.

நீண்ட நாட்களாக படப்பிடிப்பில் இருந்து வந்த இந்த படத்தை பி.வி.பி. சினிமாஸ் 60 கோடி ரூபாய் செலவில் மிகப் பிரம்மாண்டமாக தயாரித்து உள்ளது. படத்தில் ஆர்யா, அனுஷ்கா இருவருமே இரட்டை வேடத்தில் நடித்திருக்கிறார்களாம். ஆந்திரா மற்றும் சென்னையில் பிரம்மாண்ட செட் அமைத்து படப்பிடிப்பு நடத்தியுள்ளனர்.

இந்திய சினிமாவிலேயே முதன்முறையாக ஜோர்ஜியாவில் படமாக்கப்பட்ட படம் என்ற பெருமையையும் இது பெற்றுள்ளது. இப்படத்தின் மூலம் ஹரிஸ் ஜெயராஜுடன், செல்வராகவன் முதன்முறையாக கைகோர்த்துள்ளார். ஆயிரத்தில் ஒருவன் படத்தை விட இரண்டாம் உலகம் படத்தில் பத்து மடங்கு அளவிற்கு கிராபிக்ஸ் வேலைப்பாடுகள் நடந்து வருகிறதாம்.

இந்நிலையில் இரண்டாம் உலகம் திரைப்படம் தீபாவளியன்று வெளியிடப்படும் என்று தயாரிப்பு நிறுவனமான பிவிபி சினிமாஸ் அதிகாரபூர்வமாக அறிவித்துள்ளது. இப்படம் தமிழ் தவிர, தெலுங்கு, இந்தி, ஜார்ஜியன், ரஷ்யன், உஸ்பெக், துர்கிஷ் ஆகிய மொழிகளிலும் வெளியாக உள்ளது.

ஏற்கெனவே தீபாவளி ரேஸில் அஜீத்தின் ஆரம்பம், கார்த்தியின் ஆல் இன் ஆல் அழகு ராஜா படங்கள் உள்ளன. தற்போது அந்த போட்டியில் இரண்டாம் உலகம் திரைப்படமும் இணைந்துள்ளது.

மலையாள திரையுலகில் இருந்து தமிழுக்கு அறிமுகமானாலும் மலையாள சினிமாவில் நடிப்பதற்கு நயன்தாரா ரொம்பவும் தயக்கம் காட்டியே வருகிறார்.

தமிழ் மற்றும் தெலுங்கு படங்களில் பிசியாக நடித்து வரும் நயன்தாரா சமீபத்தில் கூட மலையாள இயக்குனர் மதுபாய் இயக்கத்தில் பிரித்விராஜ் ஜோடியாக நடிக்க வாய்ப்பு வந்தது.

ஆனால், இந்த வாய்ப்பை நயன்தாரா தட்டிக் கழித்துவிட்டார். ஆனால் மலையாள ரசிகர்களோ நயன்தாராவின் வரவை எதிர்பார்த்து காத்திருக்கின்றனர்.

நயன்தாரா தமிழில் நடித்த ஆரம்பம், ராஜா ராணி ஆகிய படங்கள் முடிவடைந்து வெளியாகும் தருவாயில் உள்ளது. மேலும் இது கதிர்வேலன் காதல், அனாமிகா ஆகிய படங்களில் நடித்து வருகிறார். ஜெயம் ரவி இயக்கும் ஒரு படத்துக்கும் ஒப்பந்தமாகியுள்ளார்.