நடிகர் கமலஹாசன் நேற்று தனது 59வது பிறந்த நாளை கொண்டாடினார். நடிகர், நடிகைகள் பலர் நேரிலும் போனிலும் வாழ்த்தினார்கள். பிறந்த நாளையொட்டி நேற்று நள்ளிரவு முக்கியஸ்தர்களுக்கு சென்னையில் உள்ள ஹொட்டல் ஒன்றில் விருந்து கொடுத்தார்.

இதில் நடிகர்கள் ஆர்யா, தனுஷ், இயக்குனர்கள் மணிரத்னம், செல்வமணி, நடிகை சுகாசினி உள்ளிட்ட பலர் பங்கேற்று கமலுக்கு பூங்கொத்து கொடுத்து வாழ்த்தினார்கள்.

நடிகை கவுதமியும் இதில் பங்கேற்றார். பின்னர் கமல் கேக் வெட்டினார். கமலை அர்ஜுன் வாழ்த்தியுள்ளார். அவர் கூறும்போது, இந்திய சினிமாவில் நவீன தொழில் நுட்பங்களை அறிந்து வைத்துள்ள ஒரே நடிகர் கமல். பல்துறைகளில் திறமை வாய்ந்தவர். என்னைப் போன்ற நடிகர்களுக்கு துண்டுதலாக இருக்கிறார். அவருடன் யாரும் போட்டியிட முடியாது. அடுத்த ஐம்பது ஆண்டுகள் அவர் ஆரோக்கியமாக வாழ வேண்டும் என்றார்.

நடிகை குஷ்பு கூறும் போது கமல் எனது சிறந்த நண்பர்களில் ஒருவர். அவரை வாழ்த்துகிறேன் என்றார். பிறந்த நாளையொட்டி ஆழ்வார்பேட்டையில் உள்ள அலுவலகத்தில் ஏழைகளுக்கு கமலஹாசன் உதவிகளை வழங்கினார்.

பெண்களுக்கு தையல் எந்திரம், ஊனமுற்றோருக்கு மூன்று சக்கர சைக்கிள், ஏழை மாணவர்களுக்கு கணனிகள் போன்றவைகளை வழங்கினார். கமலஹாசன் ரசிகர்மன்ற பொறுப்பாளர் தங்கவேலு உள்ளிட்ட நிர்வாகிகள் கலந்து கொண்டனர்.

இயக்குனரும், நடிகருமான பார்த்திபன் கதையே இல்லாமல் ஒரு படத்தை இயக்க முடிவு செய்துள்ளார். தன்னுடைய படங்களில் தலைப்பை வித்தியாசமாக வைக்கும் பார்த்திபன் இந்த படத்திலும் வித்தியாசமான தலைப்பை தேர்வு செய்துள்ளார்.

இவர் இயக்கும் புதிய படத்திற்கு “கதை திரைக்கதை வசனம் இயக்கம்” என பெயர் வைத்துள்ளார். இந்த படத்தின் போஸ்டர்களை 100 ஆண்டு இந்திய சினிமாவுக்கு செலுத்தும் மரியாதை என்ற அறிவிப்போடு வெளியிட்டுள்ளார்.

இப்படத்தின் தொடக்கவிழா நேற்று சென்னையில் உள்ள பிரபல நட்சத்திர ஹோட்டலில் நடைபெற்றது. இதில் பார்த்திபன் கலந்து கொண்டு பத்திரிகையாளரிடம் தன்னுடைய புதிய படம் குறித்து விளக்கம் கொடுத்தார்.

இந்த விழாவுக்கு சிறப்பு விருந்தினர்கள் யாரும் அழைக்கப்படவில்லை. பத்திரிகை நண்பர்களும், ஊடக நண்பர்களும்தான் என்னுடைய சிறப்பு விருந்தினர் என விழா தொடக்கத்திலேயே அனைவரையும் நெகிழ்ச்சியில் ஆழ்த்தினார்.

விழாவில் நடிகர் பார்த்திபன் பேசும்போது, இப்படத்தில் பெரிய நடிகர், நடிகைகள் எல்லாம் நடிக்கவில்லை. இப்படத்தில் பணிபுரியும் அனைவருமே புதுமுகங்கள்தான். கதையே இல்லாமல் இந்த படத்தை எடுத்திருக்கிறேன்.

ஒவ்வொரு மனிதனும் நாளை என்ன நடக்கும் என்பதை எதிர்பார்க்காமலேயே தன்னுடைய வாழ்க்கையை வாழ்ந்து வருகிறான். அதுபோல் இந்த படத்திலும் கதாபாத்திரங்களின் ஓட்டத்திலேயே கதை நகரும். தமிழ் சினிமாவுக்கு இது ஒரு புது முயற்சியாக இருக்கும் என்று அவர் பேசினார்.

இப்படத்தின் அறிமுகப் பாடலை மதன் கார்க்கி எழுதியுள்ளார். படத்திற்கு மலையாளத்தை சேர்ந்த அல்போன்ஸ் என்பவர் இசையமைக்கிறார். இவர் விண்ணைத்தாண்டி வருவாயா படத்தில் இடம்பெற்ற ஆரோமலே என்ற பாடலை பாடியவர்.

சிம்புவுக்கும், ஆண்ட்ரியாவுக்கும் நெருக்கம் ஏற்பட்டுள்ளதாகவும் இதனால் ஹன்சிகா அதிர்ச்சியில் இருப்பதாகவும் செய்திகள் வெளியாயின. சிம்பு, ஹன்சிகா இடையே ஏற்கனவே காதல் மலர்ந்தது. இதனை இருவரும் அதிகாரபூர்வமாக அறிவித்தனர்.

திருமணத்துக்கு சிம்பு அவசரப்படுத்தியதாகவும் ஹன்சிகா ஐந்து வருடம் கழித்தே திருமணம் செய்து கொள்ள வேண்டும் என்று பிடிவாதமாக மறுத்ததாகவும் கூறப்பட்டது. இதுவே இருவருக்கும் இடையில் கருத்து வேறுபாட்டை உருவாக்கியதாகவும் கிசுகிசுக்கப்பட்டது.

இந்த நிலையில் இங்க என்ன சொல்லுது படத்தில் ஆண்ட்ரியாவும், சிம்புவும் நெருக்கமாக நடித்த படங்கள் இணையத்தில் பரவின. இருவரும் பொருத்தமான ஜோடியாக இருப்பதாக நடிகர் வி.டி.வி.கணேஷ் வர்ணித்தார். சிம்பு, ஆண்ட்ரியாவுக்கு நெருக்கம் ஏற்பட்டுள்ளதாக திரையுலகில் செய்திகள் பரவின.

இதற்கு ஆண்ட்ரியா சார்பில் அவரது செய்தி தொடர்பாளர் மறுப்பு தெரிவித்துள்ளார். அவர் கூறும்போது, இங்க என்ன சொல்லுது படத்தில் சிம்புவும், ஆண்ட்ரியாவும் கவுரவ வேடத்தில் வருகிறார்கள். இருவரும் ஐந்து மணி நேரம் மட்டுமே நடித்தனர்.

இருவருக்கும் தொழில்ரீதியான தொடர்பே உள்ளது. அதை தாண்டி எந்த உறவும் இல்லை. ஆண்ட்ரியா யாரையும் காதலிக்கவில்லை. தனியாகத்தான் இருக்கிறார். நடிப்பில் மட்டுமே கவனம் செலுத்துகிறார் என்றார்.