அமெரிக்காவைத் தலைமையிடமாகக் கொண்டு இயங்கும் மெக்டோனால்ட் நிறுவனம் உலகின் மிகப் பெரிய சங்கிலித் தொடர் துரித உணவு உணவகங்களின் நிறுவனம் ஆகும்.

119 நாடுகளில் செயல்படும் இந்த அமைப்பு தினம் 68 மில்லியன் வாடிக்கையாளர்களுக்கு சேவை புரிகின்றது. ஜப்பான் நாட்டிலும் இந்த நிறுவனத்தின் பல கிளைகள் செயல்பட்டு வருகின்றன. இவற்றில் வடக்கு டோக்கியோவில் உள்ள ஒரு உணவகத்தில் காணப்பட்ட அறிவிப்புப் பலகையானது இணையதளத்தில் விவாதம் எழுமளவிற்கு பரபரப்பை ஏற்படுத்திவிட்டது.

மோசமான சுகாதாரம் கொண்டவர்களும், வீடற்றவர்களும் உள்ளே நுழையக்கூடாது என்று அந்தக் கடை வாசலில் இருந்த அறிவிப்புப் பலகையில் காணப்பட்ட வாசகங்களே பிரச்சினைக்குக் காரணமாயிற்று.

திடீரென பெரிய நிறுவனங்களின் ஆட்குறைப்பு நடவடிக்கைகளும், வாழ்நாள் வேலைவாய்ப்புகள் குறைந்ததுவும் ஜப்பானில் நடுத்தர வயது கொண்டவர்களைக்கூட வேலையில்லாதவர்களாக ஆக்கியுள்ளது.

பாரம்பரிய குடும்ப உறவுகளுக்கும் அதனை ஒட்டிய செல்வத்திற்கும் இந்நாடு முக்கியத்துவம் அளித்துவரும்போதும் இங்கும் வீடற்றவர்களைக் காண முடிகின்றது. இந்த ஆண்டு ஜனவரி மாதக் கணக்கெடுப்பின்படி ஜப்பானில் மொத்தம் 8,265 பேர் வீடற்றவர்களாகக் குறிப்பிடப்பட்டுள்ளனர்.

இதனால் மற்ற நாடுகளைப் போல் இளவயதினர் மட்டுமில்லாமல் ஜப்பானின் தெருக்களில் வசிப்பவர்களில் பெரும்பான்மையானோர் முதியவர்களாகவும் காணப்படுகின்றனர்.

இத்தகைய நிலையில் வீடற்றவர்களைப் பற்றி அந்த உணவகத்தில் குறிப்பிட்டிருந்தது விவாதத்தை ஏற்படுத்தியது. இதனால் ஏற்பட்ட புகார்களை அறிந்த மெக்டோனால்ட் நிறுவனம் இன்று ஒரு மன்னிப்பு அறிக்கையை வெளியிட்டுள்ளது.

குறிப்பிட்ட வார்த்தையை அறிவிப்புப் பலகையிலிருந்து நீக்கியுள்ளதோடு உரத்த குரலில் பேசுதல், தூங்குதல் மற்றும் மோசமான சுகாதாரம் போன்றவற்றால் மற்றவர்களை அசவுகரியமாக உணரவைப்பவர்களுக்கு அனுமதி கிடையாது என்று மாற்றியுள்ளது.

இந்த அறிவிப்பின் நோக்கம் கடையில் உள்ள மற்ற வாடிக்கையாளர்கள் வசதியாக உணரவேண்டும் என்பதுதான். எனினும்,இதற்காகத் தாங்கள் மன்னிப்புக் கோருவதாக ஜப்பானில் இயங்கும் மெக்டோனால்ட்ஸ் நிறுவனம் தங்களது மன்னிப்பு அறிக்கையில் தெரிவித்துள்ளது.

சஹாரா பாலைவனத்தை கடக்க முயன்ற போது தாயையும், சகோதரியையும் இழந்த சிறுமி தன்னுடைய அனுபவங்களை விவரித்துள்ளார்.

ஆபிரிக்க நாடான நைஜர் உலகில் உள்ள வறுமையான நாடுகளில் ஒன்றாகும். இங்குள்ள மக்கள் உணவு பற்றாக்குறை காரணமாக பட்டினியால் வாடி வருகின்றனர்.

வறுமையின் கொடுமை தாங்காமல் ஐரோப்பிய நாடுகளுக்கு செல்கின்றனர். அவ்வாறு செல்பவர்கள் உலகின் மிகப்பெரிய பாலைவனமான சஹாரா பாலைவனத்தை கடந்து செல்லவேண்டும்.

இவ்வாறு கடந்து செல்லும் போது தண்ணீர் கிடைக்காமல் பலர் பலியாவதுண்டு. சமீபத்தில் கூட இதேபோன்று சென்றவர்களில் 87 பேர் பலியாயினர்.

இவர்கள் செப்டம்பரின் கடைசி அல்லது அக்டோபரின் முற்பகுதியில் நைஜரின் ஆர்லீட் நகரிலிருந்து பயணத்தைத் தொடங்கியுள்ளனர். சஹாரா பாலைவனத்தைக் கடந்து அல்ஜீரியாவை அடைய முயன்ற போது உயிரிழந்துள்ளனர்.

தொழில்தேடி புறப்பட்டவர்களும் அவர்களின் குடும்பத்தினருமாக 52 சிறார்களும் 33 பெண்களும் இந்த பாலைவன பயணத்தில் உயிரிழந்துள்ளதாக தற்போது தெரியவந்துள்ளது.

இதில் தனது தாயையும்,சகோதரியையும் இழந்த சிறுமி ஒருவர், தனது கொடுமையான அனுபவங்கள் குறித்து பிபிசியிடம் விவரித்துள்ளார்.

வெப்பம் எரிக்கும் பாலைவனத்தில் வாகனம் பழுதடைந்த இடத்திலிருந்து இரண்டு நாட்களாக நடந்து சென்ற தமக்கு அந்த வழியால் வந்த ஒரு வாகனம் கூட உதவவில்லை என்று உயிர்தப்பிய 14 வயது சிறுமி ஷாஃபா பிபிசியிடம் கூறினாள்.

வரும்வழியில் உயிரிழந்த தாயையும் இரண்டு சகோதரிகளையும் தானே புதைத்துவிட்டு வந்ததாகவும் அந்தச் சிறுமி தெரிவித்துள்ளார்.

தேடுதல் பணியில் ஈடுபட்டுள்ள மீட்பு பணியாளர்கள் மக்கள் கூட்டம் கூட்டமாக உயிரிழந்து காணப்படுவதாக தெரிவித்துள்ளனர்.

பச்சை குத்தியதை அழிக்க சிகிச்சை மேற்கொண்டவர், மலேசியாவில் உயிரிழந்தார்.

மலேசியாவின் சுங்கை பெதானி பகுதியை சேர்ந்தவர் தினேஷ் நாயர்(25). இவர் மலேசிய பொலிஸ் பணிக்கு விண்ணப்பித்திருந்தார். தன் உடம்பில் குத்தப்பட்டிருந்த பச்சையால், நேர் முகத்தேர்வில் பாதிப்பு ஏற்படுமோ என்று பயந்த தினேஷ், தனியார் மருத்துவமனையை அணுகி, பச்சை குத்தப்பட்டதை அழிக்க சிகிச்சை மேற்கொண்டார்.

மலேசியாவில்கேதா என்ற இடத்தில் உள்ள மருத்துவமனையில், கடந்த செப்டம்பர் 12ம் திகதி சிகிச்சை மேற்கொண்ட தினேஷ், கோமா நிலைக்கு தள்ளப்பட்டார்.

நேற்று முன்தினம் அவர், நினைவு திரும்பாமலேயே இறந்தார். இது குறித்து, தினேஷின் பெற்றோர் அந்த மருத்துவமனையின் மீது புகார் கொடுத்துள்ளனர். எந்த வகையான சிகிச்சை அவருக்கு மேற்கொள்ளப்பட்டது என்பது குறித்து தற்போது விசாரணை நடக்கிறது.

இங்கிலாந்தில் உள்ள மன்செஸ்டர் விமான நிலையத்தில் இரண்டு பெண்கள் பாதுகாப்பு பகுதியில் திடீரென தங்கள் மேலாடையை கழட்டி அரைநிர்வாணமாக இருந்ததால் பெரும் பரபரப்பு ஏற்பட்டது.

இங்கிலாந்து மன்செஸ்டர் விமான நிலையத்திற்கு வந்த இரண்டு பெண்கள் தங்கள் உடமைகளை பரிசோதனை செய்யும் இடத்திற்கு வந்தபோது பாதுகாப்பு அதிகாரிகள் அவர்களின் கோட் மற்று பெல்ட்டை கழட்டுமாறு கேட்டுக்கொண்டனர். இதற்கு அவர்கள் முதலில் எதிர்ப்பு தெரிவித்தனர்.

ஆனால் பாதுகாப்பு அதிகாரிகள் கோட் மற்றும் பெல்ட்டை கழட்டினால் மட்டுமே அவர்கள் பயணத்திற்கு அனுமதிக்கப்படுவார்கள் என்று கூறியதால் கடுப்பான அந்த இரண்டு பெண்கள் உடனடியாக கோட், பெல்ட், மற்றும் ஆடைகள் அனைத்தையும் கழட்டி அதிர்ச்சி கொடுத்தனர்.

இதை சற்றும் எதிர்பாராத பாதுகாப்பு அதிகாரிகள் உடனே கோட்டை கொடுத்து அணிய சொல்லி வற்புறுத்தினர். பின்னர் அங்கிருந்த பெண் அதிகாரி ஒருவர் அவர்களை உடைகளை அணியுமாறு கேட்டுக்கொண்டார். இதுகுறித்து மன்செஸ்டர் விமான நிலைய பொலிஸாருக்கு தகவல் கொடுக்கப்பட்டது. அவர்கள் இருவரின் மீது வழக்குப்பதிவு செய்யப்பட்டுள்ளது.

அவுஸ்திரேலிய மாகாணம் ஒன்றில் பொலிஸாரிடம் அடையாளத்தை நிரூபிக்க முஸ்லிம் பெண்கள் தாங்கள் அணிந்திருக்கும் பர்தாவை விலக்கி முகத்தைக் காண்பிக்க வேண்டும் என்ற புதிய சட்டம் இயற்றப்பட்டுள்ளது.

முஸ்லிம் மற்றும் சீக்கிய மதத்தினருடன் கலந்தாலோசித்த பிறகு இந்தப் புதிய சட்டம் மேற்கு அவுஸ்திரேலிய மாகாண சட்டப் பேரவையில் வியாழக்கிழமை நிறைவேற்றப்பட்டுள்ளது.

இதுகுறித்து மேற்கு ஆஸி.யின் தாற்காலிக காவல்துறை அமைச்சர் ஜான் டே கூறியதாவது..

முஸ்லிம் மற்றும் சீக்கிய மதத்தவர்களின் ஆலோசனைக்குப் பிறகு முக்காடு என்ற வார்த்தைக்குப் பதிலாக முகம் மூடும் துணி என்று திருத்தம் செய்ய அரசு ஒப்புதல் அளித்துள்ளது.

இந்தத் திருத்தம் சம்பந்தப்பட்ட மதங்களைச் சேர்ந்தவர்களின் கவலைகளைப் போக்கியுள்ளது. இந்தச் சட்டத்தில் திருப்திகரமான சமரசம் எட்டப்பட்டுள்ளது என்று ஜான் டே தெரிவித்தார்.

எங்கள் தலைவர் கொலைக்கு பழிவாங்குவோம் என பாகிஸ்தான் தலிபான் எச்சரிக்கைவிடுத்துள்ளதாக தெரிவிக்கப்படுகின்றது.

பாகிஸ்தானின் வடக்கு வசிரிஸ்தான் பழங்குடியின பகுதியில் அமெரிக்கா நடத்திய ஆளில்லா விமான தாக்குதலில், தெஹ்ரிக்-இ-தலிபான் தீவிரவாத இயக்கத்தின் தலைவர் ஹக்கீமுல்லா மெஹ்சூத் கொல்லப்பட்டான்.

அவனுடன் அப்துல்லா, தாரிக் மெஹ்சூத் மற்றும் ஹக்கீமுல்லா மெஹ்சூத்தின் மெய்காப்பாளன் ஆகியோரும் கொல்லப்பட்டனர்.
தங்கள் தலைவனை கொன்றதால் கடும் ஆத்திரமடைந்துள்ள தலிபான் இயக்கம் இதற்கு பழிவாங்குவதாக மிரட்டல் விடுத்துள்ளது.

முன்னெப்போதும் இல்லாத வகையில் எங்கள் பழிவாங்கும் நடவடிக்கை இருக்கும். ஆளில்லா விமான தாக்குதலுக்கு பாகிஸ்தான் அரசு முழு உடந்தையாக இருக்கும் என்று நாங்கள் கருதுகிறோம். எங்கள் எதிரியை எங்களுக்கு நன்றாகத் தெரியும் என்று வடக்கு வசிரிஸ்தான் தலிபான் கமாண்டர் அபு ஓமர் கூறியதாக நியூயார்க் டைம்ஸ் செய்தி வெளியிட்டுள்ளது.