இந்திய தலைநகர் டில்லியைச் சேர்ந்த இளைஞர் ஒருவர் கனவில், வயிற்றில் குழந்தைகள் உள்ளதாகவும் அவை பசியால் துடிப்பதாகவும் தெரிந்ததை அடுத்து தன் வயிற்றையே வெட்டி குடலை வெளியே உருவியவர் ஆபத்தான நிலையில் மருத்துவமனையில் சிகிச்சை பெற்று வருகிறார்.

கிழக்கு டில்லி பகுதியில் உணவகம் ஒன்றில் வேலை பார்க்கிறார் நேபாளத்தைச் சேர்ந்த, 27 வயது நபர். இரண்டு நாட்களுக்கு முன், அவர் தூங்கிக் கொண்டிருந்த போது கனவு வந்துள்ளது. அதில் அந்த நபரின் வயிற்றில் மூன்று குழந்தைகளை யாரோ கணணி மூலம் வலி தெரியாமல் வைத்து விட்டதாகவும், அந்தக் குழந்தைகள் பசியால் துடித்துக் கொண்டிருப்பது போலவும் காட்சிகள் தோன்றின.

இதனால் அதிர்ச்சி அடைந்த அந்த நபர் கனவிலிருந்து விடுபட்டு, வயிற்றைத் தடவிப் பார்த்தபோது வயிறு சற்றுப் பெரிதாக இருந்துள்ளது. இதனால், கனவில் கண்டது உண்மை தான் என கருதிய நபர் வயிற்றில் இருந்த குழந்தைகளை வெளியே எடுத்து அவற்றைக் காப்பாற்ற நினைத்தார். இலவச அம்புலன்சுக்கு போன் செய்து, வீட்டை விட்டு கீழிறங்கி தெருவுக்கு வந்தார்.

முன்னதாக வயிறு நிறையத் தண்ணீர் குடித்தார். கையில் இருந்த பிளேடால் வயிற்றைக் கிழித்து உள்ளே இருந்த குடலை வெளியே எடுத்துப் போட்டு குழந்தைகளைத் தேடியுள்ளார். ரத்தம் வீணானதால், மயக்கமடைந்த அவர் குடலைப் பிடித்தபடி தெருவோரத்தில் சாய்ந்தார்.

அந்த நேரம் அம்புலன்ஸ் வந்து ரத்த வெள்ளத்தில் கிடந்த அந்த நபரைத் தூக்கிக் கொண்டு மருத்துவமனை விரைந்தது. டில்லி லால் பகதூர் சாஸ்திரி அரசு மருத்துவமனையில் தீவிர சிகிச்சைப் பிரிவில் அனுமதிக்கப்பட்டுள்ள அந்த நபரிடம் வைத்தியர்கள் விசாரித்த போது தனக்கு வந்த கனவு பற்றி கூறி அனைவரையும் அதிர்ச்சியில் ஆழ்த்தினார்.

மனநிலை பாதிக்கப்பட்டவர் போல தெரியவில்லை அவருக்கு ஏற்பட்ட கனவை உண்மை என நம்பியதால் இந்த விபரீதத்தில் ஈடுபட்டு உள்ளார். எனினும் அவர் நலமடைந்ததும் மனநல மருத்துவமனைக்கு அனுப்ப உள்ளோம் என வைத்தியர் கவுரவ் சால்யா கூறினார். பொலீஸ் விசாரணையில் தான் மேற்கொண்ட செயல் தவறு தான் என ஒப்புக்கொண்ட அந்த நபர் அதற்காக வருந்துவதாகவும் கூறியுள்ளார்.

இந்திய மேற்கு வங்க மாநிலத்தில் பிரசித்தி பெற்ற, பிரசிடென்சி பல்கலைக்கழகத்தில் காதலிப்பது எப்படி என்பது தொடர்பான பாடம் மாணவர்களுக்கு அடுத்த ஆண்டு கற்றுக் கொடுக்கப்படவுள்ளது. மேற்குவங்கத் தலைநகர் கொல்கட்டாவில் உள்ளது, பிரசிடென்சி பல்கலைக்கழகம்.

பிரபலமானவர்கள் பலர் படித்த அந்தப் பல்கலைக்கழகத்தில், அடுத்த கல்வியாண்டு முதல் காதல் தொடர்பான பாடங்கள் மாணவர்களுக்கு கற்றுக் கொடுக்கப்படுகிறது. இதற்கான அறிவிப்பை நேற்று வெளியிட்ட பல்கலை துணை வேந்தர் மாளவிகா சர்க்கார் என்ற பெண் தியரி பாடங்கள் மட்டும் தான், பிரக்டிகலுக்கு இடமில்லை என நகைச்சுவையாக குறிப்பிட்டார்.

அந்தப் பல்கலைக்கழகத்தில் புதுமையாக பல பாடப்பிரிவுகள் உள்ளன. அறிவியல் கற்றிராதவர்களும் அன்றாட வாழ்க்கையில் இயற்பியல் என்ற பாடத்தை எடுத்து படிக்க வாய்ப்பு வழங்கப்படுகிறது. இது போல் அன்றாட வாழ்க்கைக்கு பயன்படும், பல பாடப்பிரிவுகளை அறிமுகப்படுத்தி அசத்தி வருகிறார் மாளவிகா.

விடுதலைப் புலிகள் இயக்கத் தலைவர் பிரபாகரனின் மனைவி மதிவதனி அவரது மாமனார் வீட்டில் பதுங்கியிருப்பதாக கூறி பொய்யான தகவலைப் பரப்பிய பொறியியலாளர் ஒருவர் கைது செய்யப்பட்டுள்ளார்.

மனைவி தன்னுடன் வந்து வாழ மறுத்ததால் மாமனார் குடும்பத்தினருக்கு சிக்கல் ஏற்படுத்துவதற்காக இப்படி தவறான செய்தியை அவர் பரப்பினார் என்பது விசாரணையில் தெரிய வந்துள்ளது.

திருச்சி மாவட்டம் துறையூரை சேர்ந்தவர் கே.துரைராஜ் பொறியியலாளராக உள்ளார். இவருக்கும் சேலம் கிச்சிப்பாளையம் வ.உ.சி.நகரை சேர்ந்த செல்வராணி என்பவருக்கும் கடந்த ஒரு வருடத்திற்கு முன்பு திருமணம் நடைபெற்றது.

துரைராஜ் முதலில் தஞ்சையில் உள்ள தனியார் கல்லூரி ஒன்றில் பேராசிரியராக பணியாற்றி நின்று விட்டார். பின்னர் வேறு கல்லூரிகளுக்கு விண்ணப்பித்து வேலை தேடி வந்தார். இந்த நிலையில் துரைராஜ் தனது மனைவியுடன் சேலம் வந்து தனது மாமனார் வீட்டுக்கு அருகில் வாடகைக்கு வீடு எடுத்து தனியே வசித்து வந்தார்.

கரூரில் உள்ள தனியார் கல்லூரிக்கு வேலைக்கேட்டு விண்ணப்பித்து இருந்தார் துரைராஜ். அந்த கல்லூரியிலிருந்து வேலை நியமன உத்தரவு சில நாட்களுக்கு முன்பு அனுப்பப்பட்து. தனது முகவரியாக மாமனார் வீட்டு முகவரியைக் கொடுத்திருந்தார் துரைராஜ்.

எனவே கடிதம் துரைராஜ் மாமனார் வீட்டுக்குப் போனது. ஆனால் மாமனார் வீட்டில் இதுகுறித்துக் கூறவில்லை. தபாலையும் துரைராஜிடம் தரவில்லை. இதனால் வேலை போய் விட்டது. இந்த நிலையில் விஷயம் அறிந்து பெரும் வருத்தமடைந்தார் துரைராஜ்.

தனது மனைவியிடம் அவர் சண்டை பிடித்தார். இதனால் துரைராஜின் மனைவி கோபித்துக் கொண்டு தனது தாய் வீட்டுக்குப் போய்விட்டார். பலமுறை மனைவியை அழைத்தும் அவர் வரவில்லை. இதனால் வெறுத்துப் போன துரைராஜ் தனது மாமனாரால்தான் இத்தனை குழப்பமும் என்று நினைத்து குடும்பத்தோடு பழிவாங்க முடிவெடுத்தார்.

இதையடுத்து சிபிஐ அதிகாரிகளுக்கு ஒரு தவறான குறுந்தகவலை அனுப்பினார். அதில் சேலம் கிச்சிப்பாளையம் வ.உ.சி. நகரில் வசிக்கும் பட்டறைக்காரர் மணி, பாப்பாத்தி, தர்மலிங்கம், கார்த்தி ஆகியோருடன் விடுதலைப்புலி தலைவர் பிரபாகரனின் மனைவி மதிவதனி தங்கி உள்ளார் என்றும் இவர்கள் அனைவரும் சேலத்தில் இருந்து தப்பி செல்ல முயற்சிக்கிறார்கள். எனவே எச்சரிக்கையாக இருங்கள் என்றும் தெரிவித்து இருந்தார்.

இந்தத் தகவலைப் பெற்ற டெல்லி சிபிஐ அதிகாரிகள் தமிழக காவல்துறை அதிகாரிகளுக்குத் தகவல் தெரிவித்தனர் . சென்னை, சேலம் பொலிஸாரும் உஷார்படுத்தப்பட்டனர். சேலம் மாநகர நுண்ணறிவு பிரிவு போலீசாரும், கியூ பிரிவு போலீசாரும் கடந்த இரண்டு நாட்களாக கிச்சிப்பாளையம் பகுதியில் விசாரித்து வந்தனர்.

பிறகு துரைராஜின் மாமனார் மணியின் வீட்டில் ஏராளமான பொலீசார் குவிக்கப்பட்டு விசாரிக்கப்பட்டனர். அப்போது அங்கு விடுதலைப்புலி இயக்கத்தை சேர்ந்தவர்கள் யாரும் இல்லை என்றும் விடுதலைப் புலி தலைவர் பிரபாகரனின் மனைவி மதிவதனியும் இல்லை என்றும் தெரியவந்தது.

பின்னர் பொலீசார் நடத்திய விசாரணையில் துரைராஜ் தனது மாமனார் குடும்பத்தை பழிவாங்க இப்படி தகவல் அனுப்பியது தெரியவந்தது. போலீசார் துரைராஜை பிடித்து விசாரித்தனர். அப்போது அவர் உண்மையை ஒப்புக் கொண்டார்.

போலீசாரிடம் அவர் அளித்த வாக்குமூலத்தில் எனது மாமனார் மணி, மாமியார் பாப்பாத்தி, மைத்துனர்கள் தர்மலிங்கம் , கார்த்தி ஆகியோர் எனக்கு வேலை கிடைக்காமல் செய்ததோடு எனது மனைவியையும் பிரித்து சென்று விட்டனர். இதனால் அவர்களை பொலீசில் சிக்க வைக்க டெல்லியில் உள்ள சி.பி.ஐ. அதிகாரிகளுக்கு விடுதலைப் புலிகள் சேலத்தில் பதுங்கி உள்ளனர் என்று தகவல் அனுப்பி வைத்தேன் என்று கூறினார். அவரைப் பொலீஸார் கைது செய்துள்ளனர்.