வருத்தப்படாத வாலிபர் சங்கம் ஹிட்டடித்ததால் ஊதா கலர் ரிப்பன் புகழ் ஸ்ரீதிவ்யாவுக்கு வாய்ப்புகள் குவிகின்றன. பென்சில் படத்தில் இசை அமைப்பாளர் ஜி.வி.பிரகாஷின் ஜோடியாக ஶ்ரீதிவ்யா நடிக்கிறார்.

இந்தப் படத்தின் படப்பிடிப்பில் வருகிற நவம்பர் 20ம் திகதி முதல் கலந்துகொள்ள இருக்கிறார். இந்தப் படத்தைத் தொடர்ந்து சுசீந்திரன் அடுத்து இயக்க இருக்கும் வீர தீர சூரன் படத்தில் விஷ்ணு விஷாலுக்கு ஜோடியாக ஶ்ரீதிவ்யா நடிக்கிறார்.

இந்தப் படங்கள் தவிர இன்னும் இரண்டு படங்களில் கமிட் ஆக உள்ளார் ஸ்ரீதிவ்யா. வருத்தப்படாத வாலிபர் சங்கம் படத்திற்குப் பிறகு நிறைய படங்களில் நடிக்க அழைப்பு வருவது மகிழ்ச்சி அளிக்கிறது.

ஆனால் எனது சொந்த ஊரான ஹைதராபாத்தில் படித்து வருவதால் நடிப்புடன் படிப்பையும் கவனிக்க வேண்டியதாக இருக்கிறது.

இதனால் நிறைய படங்களுக்கு கால்ஷீட் கொடுக்க முடியவில்லை. நல்ல கதை, நல்ல இயக்குனர் மற்றும் பெரிய ஹீரோ என்றால் என் கால்ஷீட் நிச்சயம் உண்டு என்கிறார் ஶ்ரீதிவ்யா.

நடிகை சரிதாவை திருமணம் செய்து கொண்டு வாழ்ந்த மலையாள நடிகர் முகேஷ் திடீரென அவரை விட்டு பிரிந்தார். கேரளாவை சேர்ந்த நடனக் கலைஞர் தேவிகாவை சமீபத்தில் இரண்டாம் திருமணம் செய்து கொண்டார்.

கொச்சியில் உள்ள ரிஜிஸ்தர் அலுவலகத்தில் பதிவு திருமணம் செய்து கொண்டார். இந்த திருமணத்துக்கு முகேசின் முதல் மனைவி சரிதா எதிர்ப்பு தெரிவித்தார். இது குறித்து அவர் கூறும்போது..

முகேஷ் சட்டவிரோதமாக தேவிகா என்ற பெண்ணை திருமணம் செய்து கொண்டு உள்ளார். எனக்கும் அவருக்கும் இதுவரை விவாகரத்து நடக்கவில்லை. விவாகரத்து பெறாமல் இரண்டாம் திருமணம் செய்தது கிரிமினல் குற்றம். எனவே அவருக்கு எதிராக வழக்கு தொடரப்போகிறேன் என்றார்.

சரிதா குற்றச்சாட்டுக்கு பதில் அளித்து முகேஷ் வெளியிட்ட அறிக்கையில் கூறி இருப்பதாவது..

எனது முன்னாள் மனைவி சரிதாவும் நானும் 1996ல் பிரிந்து விட்டோம். அதன் பிறகு சரிதாவிடம் விவாகரத்து கேட்டு எர்ணாகுளம குடும்ப நல நீதிமன்றத்தில் வழக்கு தொடர்ந்தேன்.

2012ல் எங்களுக்கு நீதிமன்றம் விவாகரத்து வழங்கியது. தேவிகாவை 2ம் திருமணம் செய்தபோது விவாகரத்து பெற்ற ஆவணங்கள் ரிஜிஸ்தர் அலுவலகத்தில் தாக்கல் செய்யப்பட்டன. எனவே எனது 2ம் திருமணம் சட்டப்படி செல்லத்தக்கது. இவ்வாறு அறிக்கையில் குறிப்பிட்டு உள்ளார்.

நூற்றாண்டு காலத் தமிழ் சினிமாவில் ஓர் புதிய முயற்சியாக சேரன் இயக்கத்தில் வெளியாகவிருக்கிற ஜேகே எனும் நண்பனின் வாழ்க்கை திரைப்படப் போட்டியில் தமிழகமெங்கும் உள்ள அனைத்து கல்லூரி மாணவர்கள் பங்கேற்கின்றனர்.

வழக்கமாக, ஒரு திரைப்படம் வெளியான பின்னர் அந்த படத்தின் இடம் பெற்றிருக்கும் பாடல் காட்சிகளின் நடனங்களை மாணவர்கள், இளைஞர்கள், கலைஞர்கள் நடன இயக்குனர் வடிவமைத்தபடியே மேடைகளில் அரங்கேற்றி வருகின்றனர்.

முதன் முறையாக திரைப்படம் வெளியாவதற்கு முன்னமே அத்திரைப்படத்தின் காட்சிகள் குறித்த தங்கள் திறமையையும் கற்பனையும், படைப்பாற்றலையும் வெளிப்படுத்த இயக்குநர் சேரன் கல்லூரி மாணவர்களுக்கு வாய்ப்பளித்துள்ளார்.

ஜேகே எனும் நண்பனின் வாழ்க்கை திரைப்படத்தின் ஓடியோ வெளியீட்டு விழா அழைப்பிதழ் வித்தியாசமான சிறந்த முயற்சி என்று பாராட்டப்பட்டது. படத்தின் விளம்பர யுக்திகளில் புதுமை செய்யும் முயற்சியாக, தமிழில் முதன் முறையாக மூன்று லட்சம் ஓடியோ சிடிக்கள் ஒரு முன்னணி வார இதழுடன் இணைந்து தமிழகமெங்கும் உள்ள மக்களுக்கு இலவசமாக வழங்கப்பட்டது.

இப்போது அடுத்த கட்டமாக இந்த கல்லூரி மாணவர்களுக்கான போட்டியை சேரன் துவக்கியிருக்கிறார். பாரதி கண்ணம்மாவில் தொடங்கி தனது பத்தாவது இயக்கத்தில் ஜேகே எனும் நண்பனின் வாழ்க்கை திரைப்படத்தை இயக்கித் தயாரித்துள்ள சேரன் வரும் நவம்பர் 22ம் திகதி உலகமெங்கும் வெளியிடத் திட்டமிட்டிருக்கிறார்.

நல்ல கதைகளுடன் முற்போக்கு கருத்துகளுடன் வழக்கமாக திரைப்படங்களை இயக்கி வரும் சேரன் ஜேகே எனும் நண்பனின் வாழ்க்கை திரைப்படத்திலும் இளைஞர்களை மாணவர்களை, எதிர்காலத் தலைமுறையை மையமாகக் கொண்ட கதைக்கருவைக் கையில் எடுத்திருக்கிறார்.

அதை அனைவரும் அறிந்து கொள்ளும் பொருட்டு இப்போது சேரனின் ஜேகே ஃபெஸ்ட் 2013 என்ற பெயரில் ஒரு போட்டியை அறிவித்திருக்கிறார். இதன்படி, அனைத்துக் கல்லூரி மாணவர்களுக்கான மேடைத் திறன் போட்டி மற்றும் காட்சிப் போட்டி என்று இரண்டு வகையான போட்டிகள் நடத்தப்படுகிறது.

மேடைத் திறன் போட்டியில் அனைத்துக் கல்லூரி மாணவர்களும் பங்கேற்கலாம். ஒரு கல்லூரியில் அதிகபட்சம் நான்கு அணிகள் பங்கேற்கலாம். ஒரு அணியில் குறைந்த பட்சம் இருவரும் அதிக பட்சம் பத்து பேரும் இடம் பெற்றிருக்கலாம்.

ஜேகே எனும் நண்பனின் வாழ்க்கை திரைப்படத்தில் இடம் பெற்றிருக்கும் பாடல்களில் ஏதேனும் ஒரு பாட்டுக்கு மாணவர்கள் தங்கள் கற்பனைத் திறமைப் பயன்படுத்தி, நடனம், நாடகம் அல்லது வேறு பிற வகைகளில் அவர்கள் மேடையில் திறனை வெளிப்படுத்த வேண்டும்.

இதற்காக, சென்னை, கோவை, மதுரை, திருச்சி, நெல்லை, வேலூர் மற்றும் பாண்டிச்சேரி ஆகிய பெருநகரங்களில் போட்டி மையங்கள் அமைக்கப்பட்டுள்ளன. பங்கேற்பவர்களில் சிறந்த பத்து பேர் தேர்வு செய்யப்பட்டு, முதல் பரிசாக இருபத்தைந்தாயிரம் ரூபாயும், மற்ற ஒன்பது குழுக்களுக்கு தலா பத்தாயிரம் ரூபாயும் வழங்கப்பட இருக்கிறது.

காட்சித் திறன் போட்டியில் தமிழகத்திலுள்ள அனைத்துக் கல்லூரிகளில் பயிலும் விஷுவல் கம்யூனிகேசன், மாஸ் கம்யூனிகேசன், மற்றும் எலக்ட்ரோனிக் மீடியோ ஆகிய இவற்றின் சார்புத் துறைகளைச் சார்ந்த மாணவர்கள் பங்கேற்க முடியும்.

ஜேகே எனும் நண்பனின் வாழ்க்கை திரைப்படத்தின் எதேனும் ஒரு பாடல் காட்சிக்கு தங்கள் கற்பனைத் திறனைப் பயன்படுத்தி ஒளிப்பதிவு செய்து, இயக்கி நடிக்க வேண்டும். தமிழ் சினிமாவில் காலடி எடுத்து வைக்கும் விதமான இந்த படைப்பை சிறப்பாகப் பதிவு செய்யும் அணிகளில் முதல் பரிசாக ஒரு லட்சம் ரூபாயும், இரண்டாம் பரிசாக எழுபத்தைந்தாயிரம் ரூபாயும், மூன்றாம் பரிசாக ஐம்பதாயிரம் ரூபாயும் வழங்கப்படுகிறது.

மேலும் முதல் மூன்று இடங்களைப் பிடித்தவர்கள் பதிவு செய்த காட்சிகள் ஜேகே எனும் நண்பனின் வாழ்க்கை திரைப்படத்தோடு இணைக்கப்பட்டு அனைத்து திரையரங்குகளிலும் திரையிடப்படுகிறது. படத்துவக்கம், இடைவேளை மற்றும் இறுதியில் இவை இடம் பெறும். இவற்றோடு போட்டிகளில் வெற்றி பெற்றவர்களின் பெயர் விபரமும், கல்லூரி விபரமும் இடம் பெற்றிருக்கும்.

இப்போட்டி குறித்த அறிவிப்பு வெளியான அன்றைய தினமே, தமிழகமெங்கும் உள்ள கல்லூரிகளில் இருந்து 82 அணிகள் தங்கள் பங்கேற்பை உறுதி செய்துள்ளன. மாணவர்களிடையே இப்போட்டிகளுக்கு கிடைத்திருக்கும் வரவேற்பின் காரனமாக போட்டியில் பங்கேற்பதற்கான இருதி நாளாக நவம்பர் 5ம் திகதி வரை நீட்டிப்பு செய்யப்பட்டுள்ளது.

தமிழ் சினிமாவில் இளைஞர்களையும், மாணவர்களையும், புதிய தலைமுறையினரையும் அழைத்து வரும் விதமாக இந்தப் போட்டிகள் அமைந்துள்ளன. இதன் மூலம் புதிய பரிமாணங்களில் திரைப்படங்கள் வருவதற்கான வாய்ப்புகள் உருவாகியுள்ளதாக நம்பலாம்.

புதுமுக இயக்குனர் சஞ்சீவன் இயக்கும் புதிய படம் வலியுடன் ஒரு காதல். இப்படத்தில் புதுமுகங்கள் ராஜேஷ், கௌரி நம்பியார் ஆகியோர் நடித்துள்ளனர். இப்படத்தின் ஓடியோ மற்றும் டிரைலர் வெளியீட்டு விழா சென்னையில் நடந்தது.

இதில் கில்டு சங்கத் தலைவர் மற்றும் செயலாளர் ஜாக்குவார் தங்கம், இயக்குனர்கள் மனோஜ் குமார், சிலந்தி ஆதிராம், பி.டி.செல்வகுமார், மு.களஞ்சியம், உள்ளிட்ட சினிமா பிரபலங்கள் கலந்து கொண்டனர்.

இந்த விழாவில் பேசிய களஞ்சியம் சிறிய முதலீட்டில் உருவாகியுள்ள வலியுடன் ஒரு காதல் மாதிரி உருவான என்னுடைய படமான ஊர்சுற்றி புராணம் படத்தில் இருந்து நடிகை அஞ்சலி பாதியில் ஓடிவிட்டார்.

சினிமா திரையுலகில் நடிகர் சங்கம், இயக்குனர் சங்கம், தயாரிப்பாளர் சங்கம், பெப்சி உள்ளிட்ட பல்வேறு சங்கங்களில் இதுகுறித்து நான் புகார் கொடுத்துவிட்டேன். ஆனால், யாரும் இதுகுறித்து விசாரிக்கவும் இல்லை எந்த நடவடிக்கையும் இல்லை.

தயாரிப்பாளர் ஒருவர் பலகோடி ரூபாய் போட்டு இதுமாதிரி சிறிய படங்களை எடுத்து படம் வெளிவரும் என்று நம்பிக்கையுடன் இருக்கும்போது ஏதேனும் சிக்கல்கள் ஏற்பட்டால் அதை பேசி தீர்க்கத்தான் இதுமாதிரியான சங்கங்கள் உள்ளன. ஆனால் அவர்கள் தங்களது கடமைகளை செய்வதில்லை.

தமிழ் சினிமாவில் புதிய தயாரிப்பாளர்கள் வருவது அஞ்சலி மாதிரியான நடிகைகளால் கேள்விக்குறியாகி விடுகிறது. பின்னர் எப்படி சிறு தயாரிப்பாளர்கள் தமிழ் சினிமாவை நோக்கி வருவார்கள். இதற்கெல்லாம் சங்கங்களில் முக்கிய பொறுப்பில் உள்ளவர்கள்தான் பதில் சொல்ல வேண்டும். எனது ஊர்சுற்றி புராணம் வெளிவர வேண்டும் என்று ஆவேசமாக பேசிவிட்டு அமர்ந்தார்.

இதற்கு பதிலளிக்கும் விதமாக ஜாக்குவார் தங்கம் இனி அஞ்சலி மாதிரி ஒரு நடிகை தமிழ் சினிமா படப்பிடிப்புகளில் நடந்து கொண்டார் என்றால் அவரை செருப்பால் அடிக்கவும் தயங்கமாட்டோம் என்று பேசிவிட்டு அமர்ந்தார்.

நடிகர் சந்தானம், தயாரிப்பாளர்கள் ஆர்.பி.சவுத்ரி, ஏ.எம்.ரத்னம் வீடுகள் உள்பட வருமான வரித்துறை அதிகாரிகள் நேற்று சோதனை நடத்தினர்.

தீபாவளி பண்டிகையையொட்டிய அஜித் மற்றும் ஆர்யா நடித்த ஆரம்பம், கார்த்தி நடித்த ஆல் இன் ஆல் அழகுராஜா, விஷால் நடித்த பாண்டியநாடு ஆகிய படங்களின் தயாரிப்பாளர்கள் மற்றும் நடிகர்கள் வீடுகளில் வருமான வரித்துறை அதிகாரிகள் திடீர் சோதனை நடத்தினர்.

சென்னையில் 23 இடங்கள், கோவை, சேலம் உட்பட தமிழகம் முழுவதும் 29 இடங்களிலும், ஐதராபாத்தில் ஒரு வீட்டிலும் சோதனை நடந்தது. காலையில் தொடங்கிய சோதனை மாலை வரை நீடித்தது.

சென்னையில் ஆர்.பி.சவுத்ரி, ஏ.எம்.ரத்னம், நடிகர் சந்தானம் ஆகியோரின் வீடுகள், அலுவலகம், உறவினர்களின் வீடுகளில் சோதனை நடந்தது.

சென்னை – ஆழ்வார்பேட்டை சீதாம்மாள் கொலனியில் உள்ள நடிகர் சந்தானத்தின் வீடு, தியாகராய நகரில் உள்ள ஆர்.பி.சவுத்ரியின் அலுவலகம், பாண்டிபஜார் தணிகாசலம் சாலையில் உள்ள தயாரிப்பாளர் ஞானவேல்ராஜாவின் அலுவலகம், சாலிகிராமத்தில் உள்ள தயாரிப்பாளர் ஏ.எம்.ரத்னத்தின் வீடு, சேலம் புதிய பேருந்து நிலையம் அருகே உள்ள தயாரிப்பாளர்கள் ஞானவேல்ராஜா, அசோக் சாம்ராஜ் ஆகியோரின் அலுவலகங்கள், ஆந்திராவில் ஒரு தயாரிப்பாளரின் வீடு என பல இடங்களில் சோதனை நடத்தப்பட்டது.

தீபாவளிக்கு ரிலீசான சில படங்களின் தயாரிப்பு செலவுக்கு கணக்கில் வராத கருப்பு பணம் பயன்படுத்தப்பட்டதாக வருமான வரித்துறைக்கு கிடைத்த தகவலை தொடர்ந்து இந்த சோதனை நடத்தப்பட்டது.

ஒவ்வொரு இடத்திலும் ஐந்து அதிகாரிகள் கொண்ட குழுவினர் சோதனை நடத்தினர். இதற்காக கோவை மற்றும் சேலத்தில் இருந்தும் வருமான வரித்துறை அதிகாரிகள் சென்னைக்கு வந்திருந்தனர்.

சோதனை நடந்த அனைத்து இடங்களில் இருந்தும் பல ஆவணங்களை அதிகாரிகள் கைப்பற்றிள்ளனர். தீபாவளி முடிந்த பிறகே இதுதொடர்பான விசாரணை இருக்கும் என்று அதிகாரிகள் தெரிவித்துள்ளனர்.

உதயநிதி ஸ்டாலின் நயன்தாரா நடிக்கும் கதிர்வேலன் காதல் படத்தில் நடிகர் சந்தானமும் நடிக்கிறார். அவர் நடிக்க வேண்டிய காட்சிகளின் படப்பிடிப்பு நடத்தப்படுவதாக இருந்தது.

இந்நிலையில் அவரது வீட்டுக்கு காலையிலேயே வருமான வரித்துறை அதிகாரிகள்சென்று விட்டதால் சந்தானம் படப்பிடிப்புக்கு செல்லவில்லை.