ஆந்திராவில் பஸ் எரிந்த விபத்தில் பலியானவர்களில் 35 பேர் யார் என்று அடையாளம் தெரியவந்துள்ளது. அவர்களில் 28 பேர் கர்நாடக மாநிலத்தை சேர்ந்தவர்கள். 7 பேர் ஆந்திராவையும், ஒருவர் ராஜஸ்தானையும் சேர்ந்தவர்.

அவர்களில், நடிகர் சிரஞ்சீவிக்கு திருமண அழைப்பிதழ் கொடுப்பதற்காக சென்று பலியான அண்ணன், தங்கை பற்றிய உருக்கமான தகவல் வெளியாகி உள்ளது.

பெங்களூரை சேர்ந்த வெங்கடேஷ் யாதவ் (45) என்பவரும், அவருடைய தங்கை அனிதாவும்(38) இந்த விபத்தில் பலியானார்கள்.

பெங்களூர் கலாசிபாளையம் கோட்டே பகுதியில் வெங்கடேஷ் தனது மனைவி, குழந்தைகளுடன் வசித்து வந்தார். வெங்கடேஷ், மற்றும் அவருடைய குடும்பத்தினர் நடிகரும், மத்திய அமைச்சருமான சிரஞ்சீவியின் தீவிர இரசிகர்கள்.

அகில கர்நாடக சிரஞ்சீவி இரசிகர் நலச்சங்கத்தின் தலைவராகவும் வெங்கடேஷ் இருந்து வந்தார். வெங்கடேஷின் சகோதரி அனிதாவும் சிரஞ்சீவியின் இரசிகை ஆவார்.

அனிதாவின் மூத்த மகளான அனுஜா என்ஜினீயரிங் படித்து முடித்து விட்டார். அவருக்கு திருமணம் நிச்சயம் செய்யப்பட்டு உள்ளது. நடிகர் சிரஞ்சீவிக்கும், ஆந்திராவில் உள்ள உறவினர்களுக்கும் அனுஜாவின் திருமண அழைப்பிதழ் கொடுப்பதற்காக வெங்கடேஷும், அனிதாவும் அந்த பஸ்சில் பயணம் செய்து பலியாகி விட்டனர்.

தகவல் அறிந்ததும் அவர்களுடைய குடும்பத்தினர் கதறி அழுதனர். இந்த விபத்தில் நீதிபதி ஒருவரின் மகளான பிரியங்கா என்பவரும் பலியானார்.

விபத்தில் பலியானவர்களில் 35 பேர் பற்றிய விவரம் தெரிந்தாலும், நேற்று மாலை வரை 4 பேருடைய உடல்கள் மட்டுமே அடையாளம் காண முடிந்தது. மற்ற உடல்கள், மரபணு பரிசோதனைக்கு பின்னர்தான் அடையாளம் காண முடியும் என்று தெரிகிறது.

பஸ்சில் சாரதி, கிளீனர் தவிர 43 பயணிகளை மட்டுமே ஏற்றிச்செல்ல முடியும். ஆனால், இரு ஊழியர்களுடன் மொத்தம் 52 பேர் அந்த பஸ்சில் ஏற்றப்பட்டது குறித்தும் அதிகாரிகள் விசாரணை நடத்தி வருகிறார்கள்.

மும்பை சக்தி மில்ஸ் கட்டடத்தில் சில மாதங்களுக்கு முன்பு பெண் புகைப்படக் கலைஞர் தனது நண்பருடன் படம் பிடிக்க சென்றார்.

அப்போது அங்கு இருந்த 5 பேர் கொண்ட கும்பல் நண்பரை கட்டிப் போட்டு பெண் புகைப்படக் கலைஞரை கொடூரமாக பாலியல் துஷ்பிரயோகம் செய்தனர்.

இந்த சம்பவம் பெரும் பரபரப்பை ஏற்படுத்தியது. குற்றவாளிகள் 5 பேரையும் பொலிசார் கைது செய்தனர். அவர்கள் மீதான வழக்கு மும்பை விரைவு நீதிமன்றில் நடந்து வருகிறது.

நேற்று இந்த வழக்கு விசாரணை நடந்து கொண்டிருந்த போது, திடீரென 18 வயது இளம் பெண் ஒருவர் வந்து நீதிபதியிடம் தானும் இந்த 5 பேர் கும்பலால் பாலியல் பலாத்காரத்திற்கு உட்படுத்தப்பட்டதாக பரபரப்பு புகார் கூறினார்.

தான் தொலைபேசி இயக்குனராக வேலை பார்ப்பதாகவும், கடந்த ஜூலை 31ம் திகதி சக்தி மில்ஸ் பகுதிக்கு தனது நண்பருடன் சென்ற போது 5 பேர் கும்பல் நண்பரை கட்டிப்போட்டு தன்னை துஷ்பிரயோகம் செய்ததாகவும் கூறினார்.

அவரது வாக்குமூலத்தை பதிவு செய்ய நீதிபதி உத்தரவிட்டார். அந்தப் பெண் அழுது கொண்டே தனக்கு நேர்ந்த கொடுமைகளை விவரித்தார்.

அப்போது அவர் என்னை பலாத்காரம் செய்த போது நான் அவர்களுடன் போராடினேன். கயவர்கள் என்னை மிருகத்தனமாக தாக்கினார்கள். அவர்களை இப்போது அடித்து உதைக்க அனுமதி தாருங்கள் என்று கூறியவாறு நீதிபதியைப் பார்த்து கதறி அழுதார்.

பின்னர் குற்றவாளிகளை அடையாளம் காட்ட முடியுமா என்று நீதிபதி கேட்டார். அதற்கு அந்த பெண் எனக்கு அவர்கள் அருகில் செல்லவே பயமான இருக்கிறது என்றார்.

உடனே நீதிபதி அந்தப் பெண்ணை குற்றவாளிகளிடம் பாதுகாப்பாக அழைத்துச் செல்லுமாறு கூறினார். இதையடுத்து 5 பேரில் 4 பேர்தான் தன்னை பலாத்காரம் செய்ததாக அடையாளம் காட்டினார்.

சம்பவ இடத்தில் மீட்கப்பட்ட ஆடைகள் மற்றும் இதர பொருட்களையும் அந்தப் பெண் அடையாளம் காட்டினார்.

இது பற்றி வக்கீல் உஜ்வல் நிகாம் கூறுகையில் 18 வயது பெண் திடீர் என்று நீதிமன்றத்தில் வந்து நீதிபதியிடம் கதறி தனக்கு நேர்ந்த கொடுமையை சொன்னார். அவரது வாக்குமூலம் ஏற்றுக் கொள்ளப்பட்டது. குற்றவாளியை அடிக்க அனுமதி கேட்டார். அதற்கு நீதிமன்றம் அனுமதிக்க வில்லை என்றார்.

இந்தியாவின் பாட்னா குண்டுவெடிப்பு வழக்கில் தொடர்புடைய மேலும் ஒரு குற்றவாளி, டெல்லி விமான நிலையத்தில் வைத்து நேற்று கைது செய்யப்பட்டுள்ளான்.

பீகார் மாநிலம் பாட்னாவில் கடந்த ஞாயிற்றுக்கிழமை பாஜகவின் பிரதமர் வேட்பாளர் நரேந்திர மோடியின் கூட்டம் நடந்த காந்தி மைதானத்தில் 7 குண்டுகள் அடுத்தடுத்து வெடித்தன. இதில் 6 பேர் பலியாகினர், 82 பேர் காயம் அடைந்தனர்.

இந்தியன் முஜாஹிதீன் அமைப்பைச் சேர்ந்த 6 பேர் தலா 3 குண்டுகள் வீதம் 18 குண்டுகளை வைத்திருந்தனர். அதில் 7 குண்டுகள் வெடித்தன. மீதமுள்ள குண்டுகளை வெடிகுண்டு நிபுணர்கள் அகற்றினர். இந்த சம்பவம் நடந்த உடன் பொலிசார் தவ்சீம், இம்தியாஸ் அன்சாரி ஆகிய 2 பேரை பாட்னாவில் வைத்து கடந்த ஞாயிற்றுக்கிழமை கைது செய்தனர்.

இதையடுத்து பீகாரின் கிழக்கு சாம்பரன் மவாட்டத்தில் உள்ள அலாவ்லி கிராமத்தில் வைத்து அர்ஷத் அகமது என்பவனை உள்ளூர் பொலிசார் கைது செய்தனர். இந்நிலையில் நேற்று உஜ்ஜைர் அகமது என்ற குற்றவாளி ராஞ்சியில் கைது செய்யப்பட்டான்.

அவனுடைய உறவினரும் மற்றொரு குற்றவாளியுமான முகமது அப்சல் தனது மனைவியை பார்க்க இன்று டெல்லி விமான நிலையத்திற்கு வந்தான். அவ்வாறு வந்த இடத்தில் அப்சல் கைது செய்யப்பட்டான். அவனிடம் பொலிசார் விசாரணை நடத்தி வருவதாக கூறப்படுகிறது.

டெல்லியில் கடந்த ஆண்டை விட இந்த ஆண்டு பாலியல் துஷ்பிரயோக குற்றங்கள் இருமடங்காக அதிகரித்துள்ளதாக தெரிவிக்கப்படுகின்றது.

2012ம் ஆண்டில் 706 பாலியல் பலாத்கார குற்றங்கள் நடந்துள்ளன. இந்த ஆண்டு அக்டோபர் 15ம் திகதி வரை எடுக்கப்பட்ட புள்ளி விபரப்படி 1330 பாலியல் பலாத்கார சம்பவங்கள் பதிவாகியுள்ளன.

அதாவது 2013ம் ஆண்டு முடிவடைவதற்கு 2 மாதம் இருக்கும் நிலையில் 10 மாதத்தில் இரு மடங்கு பாலியல் குற்றங்கள் நடந்துள்ளன.

அதேபோல் மானபங்கம் சம்பவங்கள் 4 மடங்கு பெருகி விட்டதாக கூறப்படுகின்றது. 2012ல் 727 மானபங்க வழக்குகள் பதிவானது. 2013ல் 2,844 மானபங்க வழக்குகள் பதிவாகி உள்ளன.

பகிடிவதை சம்பவம் 2009ல் 238ம், இந்த ஆண்டு 793ம் இடம்பெற்றுள்ளன. கடத்தல் குற்றங்கள் 2009ல் 1655ம், இந்த ஆண்டு 2906ம் நடந்துள்ளன.

இதேபோல் டெல்லியில் கணவனால் மனைவி கொடுமைப்படுத்தப்பட்டமை தொடர்பாக 2009ம் ஆண்டு 1297 சம்பவங்களும், 2013ம் ஆண்டு 2487 சம்பவங்களும் பதிவாகியுள்ளன.

வரதட்சணை கேட்டு கொடுமைப்படுத்தியதாக 2009ம் ஆண்டு 6 வழக்குகள் பதிவானது. இந்த ஆண்டு 14 வழக்குகள் பதிவு செய்யப்பட்டுள்ளன.

இந்திய உச்ச நீதிமன்றத்தில் தொடரப்பட்ட ஒரு வழக்கு தொடர்பாக, டெல்லி மாநில அரசு சார்பில் கூடுதல் சொலிசிட்டர் ஜெனரல் சித்தார்த் லுத்ரா ஆஜராகி தாக்கல் செய்த மனுவில் இந்த புள்ளி விவரங்கள் தெரிவிக்கப்பட்டுள்ளன.