பிற மொழிகளில் வெற்றிபெற்ற படங்களை தமிழில் ரீமேக் செய்து காசு பார்ப்பது வழக்கம். அந்த வகையில் இந்த வருடம் மட்டுமே பல்வேறு படங்கள் வேறு மொழிகளில் இருந்து தமிழில் ரீமேக் செய்யப்பட்டுள்ளன.

அதேபோல தமிழில் வெற்றிபெற்ற படங்களை பிற மொழிகளிலும் ரீமேக் செய்வார்கள். குறிப்பாக, சூர்யா நடித்த படங்கள் தெலுங்கில் ரீமேக் அல்லது டப் செய்யப்பட்டு, ஆந்திராவில் வசூலை வாரிக் குவிக்கும்.

ஆந்திராவுக்கு ஏற்றபடி காரசாரமான படங்களில் சூர்யா நடிப்பதால், அங்கும் அவருக்கு ஏராளமான ரசிகர் பட்டாளம் உருவாகி இருக்கிறது. இதனால், நேரடி தெலுங்குப் படத்தில் நடிக்கும் முடிவுக்கு வந்திருக்கிறார் சூர்யா.

இதைத் தெரிந்துகொண்ட தயாரிப்பாளர்கள் சூர்யாவின் மேனேஜருக்கு போன் செய்து கால்ஷீட் கேட்டு வருகின்றனர். தற்போது லிங்குசாமி படத்தில் நடிக்க இருக்கும் சூர்யா அதை முடித்துவிட்டு நேரடி தெலுங்கு படத்தில் நடிக்கலாம் என்று கூறப்படுகிறது.

2D Entertainment என சொந்தமாக தயாரிப்பு நிறுவனம் தொடங்கியது பற்றி சூர்யா “சில சமயங்களில் நல்ல கதைகளைக் கேட்கும்போது கால்ஷீட் பிரச்னையால் அதில் நடிக்க முடியாத சூழல் ஏற்படுகிறது. அதற்காக அந்த கதைகளை அப்படியே விட்டுவிட முடியவில்லை. அதில் ஒரு பகுதியாக இருக்க விரும்புவதால்தான் தயாரிப்பு நிறுவனம் தொடங்கி இருக்கிறேன்” என்று தெரிவித்து உள்ளார்.

எதுவா இருந்தாலும் பிரண்டுகிட்ட ஷேர் பண்ணிக்கலாம் – இதுதான் நட்பின் இலக்கணம். அப்படி நம்பி ஷேர் பண்ணிய சில ஹீரோக்கள் இப்போது விழிபிதுங்கி நிற்கிறார்கள்.

விஜய் சந்தர் இயக்கத்தில் சிம்பு, ஹன்சிகா நடித்து வரும் படம் “வாலு” இந்தப் படத்தில் நடிப்பதற்கு முதலில் ஜெய்யை அணுகினாராம் விஜய் சந்தர். ஜெய்யிடம் முழுக்கதையையும் சொல்லி, படத்தில் நடிப்பதற்கு சம்மதமும் வாங்கிவிட்டாராம்.

அந்தக் கதையை ஜெய் தன்னுடைய நண்பனான சிம்புவிடம் எதார்த்தமாக சொல்லப்போக சிம்புவுக்கு கதை ரொம்பவே பிடித்துவிட்டதாம். விளைவு ஜெய்யிடம் கூட சொல்லாமல் விஜய் சந்தரை மடக்கிய சிம்பு நான்தான் இந்தக் கதையில் நடிப்பேன் என ஒத்தக்காலில் நின்றாராம்.

வேறு வழியில்லாமல் விஜய் சந்தரும் ஓ.கே. சொல்லியிருக்கிறார்.ஏன்டா சிம்புவிடம் கதை சொன்னோம் என புலம்பித் தவிக்கிறார் ஜெய்.

அதேபோல “ராஜா ராணி”யில் ஹீரோ கேரக்டரை சிவகார்த்திகேயனை மனதில் வைத்துதான் உருவாக்கினாராம் அட்லீ. முதலில் நயன்தாராவை புக் செய்துவிட்டு பின்னர் சிவகார்த்திகேயனிடம் பேசலாம் என நினைத்து, நயன்தாராவிடம் கதை சொன்னார் அட்லீ.

நயன்தாராவுக்கு கதை பிடித்திருக்கிறது. ஆனால், ஹீரோவைத்தான் பிடிக்கவில்லை. இப்ப ஃபீல்டுக்கு வந்தவன் கூட நான் நடிக்கிறதா என்று நினைத்தவர் ஆர்யாவிடம் கதையைச் சொல்லி, இந்தக் கதையில நாம ரெண்டு பேரும் நடிச்சா தான் நல்லா இருக்கும் என்றிருக்கிறார்.

இதுபோதாதா ஆர்யாவுக்கு? அட்லீயைப் பிடித்து என்ன சொன்னாரோ தெரியவில்லை “ராஜா ராணி”யில் ஆர்யா ராஜாவாகிவிட்டார். இந்த விஷயத்தை லேட்டாகத் தெரிந்துகொண்ட சிவகார்த்திகேயன் நயன்தாரா கூட நடிக்கிற வாய்ப்பு போச்சே என புலம்பிக் கொண்டிருக்கிறாராம்.

இதுபோலவே பல ஏமாற்று வேலைகள் கோடம்பாக்கத்தில் நடந்து கொண்டிருக்கிறதாம்.

தான் ஒன்றும் வேலை இல்லாமல் இல்லை என்றும், அதனால் தனது நேரத்தை வீணடிக்க வேண்டாம் என்றும் குஷ்பு ட்விட்டரில் தெரிவித்துள்ளார்.

திமுகவில் இருந்து விரைவில் குஷ்பு கழற்றிவிடப்படுவார் என்ற தகவல் காட்டுத்தீயாக பரவி வருகிறது.

திமுக தலைவர் பதவி விவகாரத்தில் அக்கட்சியின் பொருளாளர் முக ஸ்டாலினுக்கு எதிராக கருத்து தெரிவித்ததால் குஷ்புவை தொண்டர்கள் விரட்டி விரட்டி அடித்தனர் என்பது குறிப்பிடத்தக்கது.

இந்நிலையில் குஷ்பு ட்விட்டரில் கூறியிருப்பதாவது,

ஒரு செய்தி அது வதந்தி என்று தெரிந்தும் ஒருவர் அதை நான் மறுக்க வேண்டும் என்று கூறி எனக்கு போன் செய்தார்.

ஹலோ, யாரோ எதையோ கூறியது குறித்து என் நேரத்தை வீணடிக்க நான் ஒன்றும் வேலை இல்லாமல் இல்லை. இது ஜனநாயக நாடு. மக்கள் சிந்திக்க, உளற, தங்கள் விருப்பப்படி எழுத அவர்களுக்கு முழு சுதந்திரம் உள்ளது.

அது குறித்து விளக்கம் கேட்டு என்னிடம் வராதீர்கள். நான் ஒரு பிசியான பெண்மணி என்று தெரிவித்துள்ளார்.

இயக்குநர் செல்வராகவன் சில நாட்களுக்கு முன்பு மருத்துவமனையில் அனுமதிக்கப்பட்டு தீவிர சிகிச்சைக்குப் பின் தற்போது வீடு திரும்பி இருக்கிறார்.

ஆர்யா நடித்துள்ள “இரண்டாம் உலகம்” பட வேலைகளில் பிஸியாக இருக்கிறார் செல்வராகவன். சில நாட்களுக்கு முன்பு “இரண்டாம் உலகம்” படப்பணிகளில் இருந்த போது நெஞ்சுவலிப்பதாகக் கூற, பதறிப்போய் அருகில் உள்ள தனியார் மருத்துவமனையில் சேர்த்திருக்கிறார்கள்.

அவரை பரிசோதித்த மருத்துவர்கள் இதயத்தில் சில பிரச்னைகள் இருப்பதாகக் கூறி உள்ளனர். அதோடு வயிறு தொடர்பான தொற்றுநோயும் ஏற்பட்டுள்ளதாகக் கூறி இருக்கின்றனர்.

இதுபற்றி டிவிட்டரில் தெரிவித்துள்ள செல்வராகவன் மனைவி, “மிகப்பெரிய அபாயம் எதுவும் இல்லை. கடவுளுக்கு நன்றி” என குறிப்பிட்டுள்ளார்.

மது, சிகரெட் இரண்டையும் தொடவே கூடாது என மருத்துவர்கள் தடை விதித்துள்ளனர். “மதுவும், சிகரெட்டும் இல்லாமல் எப்படி அருமையாக இருக்கிறேன் என்பதை வர்ணிக்க வார்த்தைகள் இல்லை” என டுவிட்டரில் தட்டியிருக்கிறார் செல்வராகவன்.

சிகிச்சைக்குப் பின் வீடு திரும்பியுள்ள செல்வராகவன், மறுபடியும் “இரண்டாம் உலகம்” படத்தின் போஸ்ட் புரொடக்ஷன் வேலைகளில் ஈடுபட்டு வருகிறார். ஓகஸ்ட்டில் ரிலீஸ் செய்யும் வகையில் வேலைகள் வேகமாக நடைபெற்று வருகின்றன.

தமிழ் திரையுலகில் தற்போது பிரம்மாண்ட தயாரிப்பாக உருவாகி வரும் படம் “ஐ”. அந்நியன் படத்தினைத் தொடர்ந்து மீண்டும் ஷங்கர் – விக்ரம் இப்படத்தில் இணைந்து இருக்கிறார்கள்.

நீண்ட நாட்களாக தயாரிப்பில் இருந்து வரும் “ஐ” படத்தினைப் பற்றி தனது அதிகாரப்பூர்வ இணையத்தில் தகவல்களை வெளியிட்டு வந்தார் இயக்குனர் ஷங்கர்.

“ஐ” படத்தினைப் பற்றி தற்போது இயக்குனர் ஷங்கர் கூறியிருப்பது “ஐ படத்தின் படப்பிடிப்பு தொடங்கி ஒரு வருடம் ஆகிவிட்டது. விக்ரமின் உடலமைப்பு மாற்றங்கள், கதாப்பாத்திரத்துக்கான ஒப்பனை உள்ளிட்ட விஷயங்களுக்காக இவ்வளவு நாட்கள் காத்திருக்க வேண்டியதாகிவிட்டது. ஆனால், அந்தக் காத்திருப்பின் முழு பலனும் இப்போது கிடைத்திருப்பதாக நம்புகிறேன்.

கடந்த மே மாதம் நியூஸிலாந்தின் வீட்டா (Weta) வொர்க்ஷாப்பையும், அதன் இணை நிறுவனர் ரிச்சட் டெய்லர் உள்ளிட்ட அனைத்துக் கலைஞர்களையும், தொழில்நுட்ப வல்லுநர்களையும் சந்தித்தேன். சிற்பம் உள்ளிட்ட கலைகளில் ஈடுபட்டுவரும் ரிச்சட் டெய்லர் மற்றும் அவரது கலைஞர்களின் கலைத் திறமைகளைக் கண்டு வியந்தேன். ரிச்சர்ட் டெய்லர் வர்த்தக ரீதியிலான லாபத்தைவிட படைப்பாற்றலுக்கே முக்கியத்துவம் தருகிறார் என்பது தான் என்னை மிகவும் கவர்ந்தது.

அவர்களுடன் “ஐ” படத்துக்கான வேலைகள் நடைபெற்றது. வீட்டா அண்மையில் பங்குவகித்த படங்களின் விஷுவல்கள், மேக்கப், கலைப் பொருட்கள் முதலியவற்றைக் கண்டு வியப்புற்றேன். எந்திரனுக்காக அமெரிக்காவின் ஸ்டான் வட்ஸன் ஸ்டூடியோவுக்குச் சென்றபோதும் ஏற்பட்ட அதே அனுபவத்தை வீட்டாவும் தந்தனர்.

ஜூனில் பெங்களூரு, மைசூர் மற்றும் சென்னையில் மூன்று வாரங்களில் “ஐ” படப்பிடிப்பு நடந்தது. ஷான் ஃபுட் மற்றும் டேவினா லாமவுன்ட் ஆகியோர் விக்ரமுக்காக செய்த ஒப்பனைகள் கண்களுக்கு விருந்து படைத்தன. விக்ரம் மீண்டும் ஒரு முறை தன்னை மகத்தான நடிகர் என்று நிரூபித்துள்ளார். இப்போது, 75 சதவீத படிப்பிடிப்பு நிறைவடைந்துள்ள நிலையில், அடுத்த சில நாட்களில் அடுத்த கட்டப் படப்பிடிப்பு தொடங்கும்” என்று ஷங்கர் விவரித்துள்ளார்.

இயக்குனரும், தயாரிப்பாளருமான லிங்குசாமி மீது இயக்குனர் சீமான் இயக்குனர் சங்கத்தில் அளித்த புகார் காரணமாக நடிகர் சூர்யா கடும் கடுப்பில் உள்ளதாக தகவல்கள் வெளியாகியுள்ளன.

இது குறித்து மேலும் தெரியவருவதாவது,

கௌதம்மேனன் இயக்கத்தில் சூர்யா நடித்த “துருவ நட்சத்திரம்” படம் சில நாட்கள் படப்பிடிப்பு நடந்த நிலையில் திடீரென நிறுத்தப்பட்டது. “துருவ நட்சத்திரம்” பட கதையில் திருப்தி இல்லாததால் கதையை மாற்றச் சொல்லி சூர்யா நிபந்தனை போட்டதால் படப்பிடிப்பு நின்று போனது.

அந்த சூழலில் திருப்பதி பிரதர்ஸ் சார்பில் ஒரு கதை சொல்லி சூர்யாவிடம் ஓகே வாங்கியிருந்தார் இயக்குனர் லிங்குசாமி.
லிங்கு சொன்ன கதை பிடித்திருந்தால் “துருவ நட்சத்திரம்” படத்திற்கு தந்த கால்ஷீட் திகதிகளை லிங்குசாமி இயக்கப்போகும் படத்திற்கு கொடுத்தார் சூர்யா.

படப்பிடிப்பும் விரைவில் தொடங்க இருந்த நிலையில்தான் சிக்கல் ஆரம்பமானது..

பிரபல தயாரிப்பாளர் தாணு தனது நிறுவனம் சார்பில் நடிகரும், இயக்குனருமான சீமானிடம் ஒரு கதை கேட்டு படம் தயாரிக்க ஒப்புக் கொண்டிருந்தார். இந்த படத்திற்கு “பகலவன்” என பேரும் வைத்திருந்தார்கள். ஜெயம்ரவி நாயகனாக நடிக்கயிருந்தார். கதை விவாதம் முடிந்து படப்பிடிப்பு தொடங்கும் திகதியும் முடிவானது.

இந்த நிலையில்தான், லிங்குசாமி இயக்கத்தில் சூர்யா நடிக்கும் படத்தின் கதையும் “பகலவன்” கதையும் ஒரே கதைதான் என்பது சீமானுக்கு தெரியவந்தது.

கடுப்பான சீமான் தமிழ் திரைப்பட இயக்குனர்கள் சங்கத்தில் லிங்குசாமியின் மீது புகார் அளித்திருக்கிறார். இந்த விவரம் தெரிந்ததும் இருவரையும் சமாதானப்படுத்த செயலாளர் ஆர்.கே.செல்வமணியும் சில முக்கிய சங்க நிர்வாகிகளும் முயற்சி மேற்கொண்டு வருகிறார்கள்.

புகார் விவரம் வெளியே தெரியாமல் தடுக்கவும் புகாரை மீளப் பெறவும் சீமானிடம் பிரபலங்கள் பலர் பேச்சு நடத்தியும் பலன் ஏற்படவில்லை.

சில ஆண்டுகளுக்கு முன்பு லிங்குசாமி இயக்கத்தில் வெளியான “ஆனந்தம்” படமும், விக்ரமன் இயக்கத்தில் வெளியான “வானத்தைப்போல” படமும் ஒரே கதை என்றும், இதேபோல பிரச்சினை ஏற்பட்டமை குறிப்பிடத்தக்கது.