வடக்கு மாகாண முதலமைச்சர் விக்னேஸ்வரன் நாட்டில் நிலவும் சமாதான சூழலுக்குப் பங்கம் ஏற்படுத்தும் வகையில் சிந்திப்பது தவறானது என அமைச்சர் கெஹெலிய ரம்புக்வெல்ல தெரிவித்தார்.

வடக்கு, கிழக்கு இணைப்பு தொடர்பில் வட மாகாண முதலமைச்சர் சீ.வி. விக்னேஸ்வரன் நேற்று ஊடகங்களில் தெரிவித்துள்ள கூற்றுக்கள் தொடர்பில் கருத்துத் தெரிவித்த போதே அமைச்சர் இவ்வாறு தெரிவித்தார்.

முதலமைச்சர் விக்னேஸ்வரன் எதனைத் தெரிவித்த போதும் நாட்டின் அரசியலமைப்புக்கு மாறாக எதையும் நடைமுறைப்படுத்த முடியாது என குறிப்பிட்ட அமைச்சர் நாட்டில் நிலவும் சமாதான சூழலுக்குப் பங்கம் ஏற்படுத்தும் வகையில் சிந்திப்பதே தவறானது எனவும் தெரிவித்தார்.

அமைச்சர் கெஹெலிய ரம்புக்வெல்ல இது தொடர்பில் மேலும் தெரிவிக்கையில்..

நாட்டில் அரசியலமைப்பு உள்ளது. அதற்கிணங்கவே நடவடிக்கைகள் முன்னெடுக்கப்படும். வடக்கு கிழக்கு இணைப்பானது நாட்டின் நடைமுறைச் சட்டங்களுக்கு அமைய நாட்டு மக்களின் இணக்கப்பாட்டோடு ஏற்படுத்தப்பட்டதாகும்.

முதலமைச்சர் விக்னேஸ்வரன் தாம் நினைத்தவாறு ஒரு ஒழுங்கு முறையின்றி மேலதிக அதிகாரங்களைப் பெற்றுக் கொள்ளும் நோக்கில் இவ்வாறு கூறுவாரானால் அது கவலைக்குரிய விடயமாகும்.

நாட்டில் தமிழ், சிங்கள, முஸ்லிம் மக்கள் அன்னியோன்ய நல்லுறவுடன் ஐக்கியமாக வாழும் நிலை உருவாக்கப்பட்டுள்ளது. இந்த நிலையில் தன்னிச்சையாக இத்தகைய கருத்துக்களைத் தெரிவிப்பது முறையற்றது எனவும் அமைச்சர் தெரிவித்தார்.

கிழக்கு மாகாணம் வட மாகாணத்துடன் சேர்ந்து செயற்பட எண்ணினால் வட மாகாணத்தின் இணக்கம் அதற்குத் தெரிவிக்கப்படுமானால் அரசாங்கம் அதனை நிறைவேற்றியாக வேண்டும் என வடமாகாண முதலமைச்சர் சி.வி. விக்னேஸ்வரன் ஊடகமொன்றுக்கு வழங்கிய பேட்டியொன்றில் குறிப்பிட்டுள்ளார்.

இது தொடர்பில் கருத்துத் தெரிவித்த போதே அமைச்சர் கெஹெலிய ரம்புக்வெல்ல இவ்வாறு தெரிவித்தார்.

பதுளையில் இருந்து கொழும்பு நோக்கிச் சென்ற ரயிலின் முன் பாய்ந்து பாடசாலை மாணவி ஒருவர் தற்கொலை செய்து கொண்டுள்ளார். பண்டாரவளை ரயில் நிலையத்தில் இருந்து தியத்தலாவ திசையில் 300 மீற்றர் தூரத்தில் இச்சம்பவம் இன்று காலை 08.10 அளவில் இடம்பெற்றுள்ளது.

வெலிமட மத்திய மகா வித்தியாலயத்தில் கல்வி பயிலும் 18 வயதுடைய ஜே.எம்.நதுஷானி ஷாலிகா என்ற மாணவியே இவ்வாறு தற்கொலை செய்து கொண்டதாக பொலிஸ் ஊடகப் பேச்சாளர் அலுவலகம் தெரிவித்துள்ளது.

சடலம் பண்டாரவளை வைத்தியசாலையின் பிரேத அறையில் வைக்கப்பட்டுள்ளது. தற்கொலைக்கான காரணம் இதுவரை கண்டறியப்படவில்லை. பண்டாரவளை பொலிஸார் மேலதிக விசாரணைகளை மேற்கொண்டு வருகின்றனர்

பொதுநலவாய நாடுகள் அமைப்பின் தலைமைப் பதவியை இலங்கைக்கு வழங்கக் கூடாது என மனித உரிமைகள் கண்காணிப்பகம் வலியுறுத்தியுள்ளது. இலங்கையில் பொதுநலவாய நாடுகள் அமைப்பு மாநாடு நிறைவில் அடுத்த இரண்டு வருடங்களுக்கு பொதுநலவாய அமைப்பின் தலைமை தீர்மானிக்கப்படவுள்ளது.

தலைமை பதவிக்க இலங்கை ஜனாதிபதி மஹிந்த ராஜபக்ஷவின் பெயர் முன்மொழியப்படவுள்ளது. இந்த நிலையில் இலங்கைக்கு சர்வதேசத்தில் இருந்து எதிர்ப்பு தெரிவிக்கப்பட்டு வருகிறது.
இந்த நடவடிக்கைக்கு நியூசிலாந்து பசுமைக் கட்சி எதிர்ப்பு தெரிவித்துள்ளது. அந்த வரிசையில் மனித உரிமைகள் கண்காணிப்பகமும் எதிர்ப்பு வெளியிட்டுள்ளது.

இலங்கை அமர்வுகளின் நிகழ்ச்சி நிரல் குறித்த இன்றும் நாளையும் லண்டனில் நடைபெறவுள்ள பொதுநலவாய நாடுகள் அமைச்சர்கள் மாநாடடில் தீர்மானம் எடுக்கப்படவுள்ளது,
இலங்கைக்கு தலைமைப் பதவி வழங்குவது பொதுநலவாய நாடுகள் அமைப்பின் கொள்கைகள் கோட்பாடுகளை பாதுகாப்பது தொடர்பில் பெரும் சர்ச்சையை ஏற்படுத்தும் என சுட்டிக்காட்டியுள்ளது.

யுத்தக் குற்றச் செயல்கள் மனித உரிமை மீறல்கள் தொடர்பில் குற்றம் சுமத்தப்பட்ட ஓர் நாட்டுக்கு தலைமைப் பதவி வழங்குவது பொதுநலவாய நாடுகள் அமைப்பின் நன்மதிப்பிற்கு குந்தகம் ஏற்படுத்தக் கூடுமென தெரிவித்துள்ளது.

உரிமை மீறல்களில் ஈடுபடும் நாட்டின் உறுப்புரிமையை ரத்து செய்யும் அதிகாரம் பொதுநலவாய நாடுகள் அமைப்பிற்கு காணப்படுவதாகக் குறிப்பிட்டுள்ளது.

மனித உரிமைகளைப் பாதுகாக்கவும், நல்லாட்சியை ஏற்படுத்தவும் பொதுநலவாய நாடுகள் அமைப்பு கூடுதல் முனைப்பு காட்ட வேண்டுமென மனித உரிமை கண்காணிப்பகம் மீண்டும் வலியுறுத்தியுள்ளது.

அகதி அந்தஸ்து நிராகரிக்கப்பட்ட இலங்கை குடும்பம் ஒன்றுக்கு மீண்டும் சுவிஸ்லாந்து வருவதற்கு அனுமதியளிக்கப்பட்டுள்ளது.

இதன்படி குறித்த குடும்பத்தினர் இந்த வாரம் சுவிஸ்லாந்திற்கு திரும்பியுள்ளதாக அதிகாரிகள் தெரிவித்துள்ளனர்.

தாய் ஒருவரும் இரண்டு பிள்ளைகளுமே சுவிஸ்லாந்து திரும்பியுள்ளனர். குறித்த தாயின் தேகாரோக்கியத்தை கருத்திற் கொண்டே அவர்கள் மீண்டும் சுவிஸ்லாந்து திரும்புவதற்கு அனுமதியளிக்கப்பட்டுள்ளதாக சுவிஸ்லாந்து அதிகாரிகள் தெரிவித்துள்ளனர்.

அகதி அந்தஸ்து நிராகரிக்கப்பட்ட குறித்த தாய் இலங்கைக்கு திருப்பியனுப்பப்பட்ட பின்னர் இலங்கையில் கைது செய்யப்பட்டு தடுத்து வைக்கப்பட்டிருந்தார்.

இதனையடுத்து சுவிஸ்லாந்தின் கொழும்பு தூதரக அதிகாரிகள் அவரை சென்று பார்வையிட்ட அடிப்படையில் இலங்கையில் இருந்தே அவருக்கு விசா அனுமதி கிடைத்துள்ளது. இதனையடுத்தே அவர்கள் சுவிஸ்லாந்து திரும்பியுள்ளனர்.