சித்தார்த்துக்கும், சமந்தாவுக்கும் ரகசிய திருமணம் நடந்ததாக கிசுகிசுக்கள் பரவின. இருவரும் சேர்ந்து வாழ்வதாகவும் கூறப்பட்டது.

தெலுங்கு படமொன்றில் சமந்தாவும், சித்தார்த்தும் ஜோடியாக நடித்தனர். அப்போது இருவருக்கும் நெருக்கம் ஏற்பட்டு காதல் மலர்ந்ததாக செய்தி வெளியானது. கோவில்களுக்கு குடும்பத்தினருடன் ஜோடியாக சென்று சாமி கும்பிட்டும் வந்தார்கள். இதுகுறித்து சமந்தாவிடம் கேட்டபோது மறுத்தார். அவர் கூறியதாவது..

என் திருமணம் பற்றி நிறைய வதந்திகள் பரவி வருகின்றன. எனக்கு ஏற்கனவே திருமணம் நடந்து விட்டதாக எழுதுகிறார்கள். ஒருவருடன் சேர்ந்து குடும்பம் நடத்துவதாகவும் கூறுகிறார்கள்.

இது உண்மையல்ல. நான் ஏன் ரகசிய திருமணம் செய்து கொள்ள வேண்டும். இப்போது என் திருமணம் நடக்காது. சில வருடங்கள் கழித்துதான் திருமணம் செய்து கொள்வேன். திருமணம் நடக்கும் போது அதை எல்லோருக்கும் தெரிவிப்பேன்.

தெலுங்கு படங்களில் அடுத்த வருடம் முதல் நடிக்கமாட்டேன். சில தமிழ் படங்கள் கைவசம் உள்ளன. தமிழ் படங்களில் மட்டுமே நடிக்க முடிவு செய்துள்ளேன். தெலுங்கில் நடித்த படம் ஒன்று இந்த மாதம் ரிலீசாக உள்ளது.

அதன் பிறகு புது தெலுங்கு படங்களுக்கு ஒப்பந்தம் ஆகவில்லை. என் கரக்டருக்கு முக்கியத்துவம் உள்ள படங்களில் மட்டுமே நடிக்கிறேன். கதை நன்றாக இருந்தால் நடிப்பேன். சிறு பட்ஜெட் படமாக இருந்தாலும் பிரச்சினை இல்லை. பீட்சா படம் குறைந்த பட்ஜெட்டில் எடுக்கப்பட்டு வெற்றிகரமாக ஓடி உள்ளது என்று சமந்தா கூறினார்.

தமிழில் நான் ஈ படத்தை இயக்கிய ராஜமௌலி தெலுங்கில் இயக்கி வரும் படம் ராணி ருத்ரம்மா தேவி. பிரம்மாண்ட பட்ஜெட்டில் உருவாகி வரும் இப்படத்தில் ராணி ருத்ரம்மா தேவி வேடத்தில் அனுஷ்கா நடித்து வருகிறார்.

இப்படத்தின் முதல் இரண்டு கட்ட படப்பிடிப்புகளில் அதிரடிக் காட்சிகளை இயக்குனர் படமாக்கினார். இந்த காட்சிகளில் நடிப்பதற்காக ஆயுதம் மற்றும் தற்காப்பு கலைகளை கற்று, நடித்து வந்தார் அனுஷ்கா. தற்போது இப்படத்தின் இறுதிக்கட்டப் படப்பிடிப்பில் பாடல் மற்றும் கிளுகிளுப்பான காட்சிகளை படமாக்கி வருகிறார் ராஜமௌலி.

இதற்காக பிரம்மாண்ட அரண்மனை போன்று அரங்கு போடப்பட்டு, அதில் அனுஷ்கா ஆடிப்பாடும் அந்தப்புர பாடல் காட்சி ஒன்று படமாக்கப்பட்டுள்ளது. இந்த பாடலில் கவர்ச்சி மிகுதியாகவும், அதேவேளையில் தத்ரூபமாகவும் இருப்பதற்காக ஆடைகளை குறைத்து நகைகளை மட்டுமே கொண்டு உடம்பை மறைத்தபடி காட்சியை படமாக்கியிருக்கிறார் இயக்குனர்.

இந்த காட்சியை படமாக்கும்போது ஒட்டுமொத்தப் படக்குழுவும் நின்று அனுஷ்காவின் அழகை வேடிக்கை பார்த்ததால் வெட்கத்தில் கூனிக்குறுகி போய்விட்டாரம் அனுஷ்கா. அந்த காட்சியில் நடிக்க ரொம்பவே தயக்கம் காட்டினாராம்.

அதன்பிறகு இயக்குனர் வேடிக்கை பார்த்த படக்குழுவினரை வெளியே அனுப்பிவிட்டு இயக்குனர், கமராமேன் உள்ளிட்ட ஒரு சிலர் மட்டுமே அந்த காட்சியை படமாக்கினார்களாம். அதன்பிறகு அந்த பாடல் காட்சியில் தைரியமாக நடித்தாராம் அனுஷ்கா.

கற்றது தமிழ் படம் மூலம் தமிழ் சினிமாவுக்கு இயக்குனராக அறியப்பட்டவர் ராம். இவர் சமீபத்தில் நடித்து இயக்கி வெளிவந்த படம் தங்கமீன்கள். இப்படம் தந்தை-மகளுக்கிடையே உள்ள பாச உணர்வை மையப்படுத்தி எடுக்கப்பட்டிருந்தது. வெளியிட்ட இடங்களில் எல்லாம் இப்படத்திற்கு ரசிகர்கள் ஏகோபித்த ஆதரவை தெரிவித்திருந்தனர்.

இந்நிலையில் இப்படம் அடுத்த மாதம் கோவாவில் நடைபெறும் இந்திய சர்வதேச திரைப்பட விழாவில் திரையிட இந்தியன் பனோரமா பிரிவில் தேர்வு செய்யப்பட்டுள்ளது. இந்த சர்வதேச திரைப்பட விழாவில் தேர்ந்தெடுக்கப்பட்ட 25 படங்களில் ஒரே ஒரு தமிழ்ப்படம் தங்க மீன்கள் என்பது குறிப்பிடத்தக்கது.

மேலும் 18வது சர்வதேச குழந்தைகள் திரைப்பட விழாவில் தங்க மீன்கள் படத்தை குழந்தைகள் உலகம் என்ற பிரிவில் மற்ற உலகப் படங்களோடு திரையிடத் தேர்ந்தெடுத்து இருக்கிறார்கள்.

சர்வதேச திரைப்பட விழாக்களில் தங்கமீன்கள் படம் திரையிட தேர்ந்தெடுக்கப்பட்டத்தில் இயக்குனர் ராம், தயாரிப்பாளர் ஜே.சதிஷ்குமார் மற்றும் தயாரிப்பை ஒருங்கிணைத்த கௌதம் வாசுதேவ் மேனன் ஆகியோர் மட்டுமல்லாது ஒட்டுமொத்த படக்குழுவினரும் மிகுந்த மகிழ்ச்சியில் ஆழ்ந்துள்ளனர்.

இந்திப்பட உலகின் கவர்ச்சி கன்னியாக பரபரப்பாக பேசப்படுபவர் நடிகை மல்லிகா ஷெரவாத். அரியானா மாநிலத்தின் ஜாட் குடும்பத்தில் பிறந்த மல்லிகா மும்பையில் மொடலிங் தொழில் செய்தார். தொலைக்காட்சி மற்றும் சினிமா படங்களில் கவர்ச்சி நடனமாடி ரசிகர்களை கவர்ந்தார்.

மணிரத்தினத்தின் குரு படத்தில் மையா மையா பாடலுக்கு கவர்ச்சி நடனம் ஆடினார். அதன்பிறகு கமலஹாசனின் தசாவதாரம் படத்தில் முக்கிய வேடத்தில் நடித்தார். ஒஸ்தி படத்தில் சிம்புவுடன் கலாசலா சலசலா என்ற பாடலுக்கும் நடனம் ஆடினார்.

லைப் ஓ.கே என்ற ஆங்கில தொலைக்காட்சியில் மாப்பிள்ளை தேடும் வித்தியாசமான நிகழ்ச்சி ஒளிப்பரப்பாகிறது. இதில் நடிகை மல்லிகா ஷெராவத் கலந்து கொண்டார். அவரை மணக்க விரும்பும் போட்டியாளர்கள் நிகழ்ச்சியில் பங்கேற்றனர். அவர்களிடம் மல்லிகா ஷெராவத்தை விரும்பும் காரணங்கள் பற்றி விளக்கங்கள் கேட்கப்பட்டன. அவர்களுக்கான தகுதி திறமை போட்டியும் நடந்தது.

இறுதியில் 15 போட்டியாளர்கள் தகுதி பெற்றனர். இதில் ஜாஷன் சிங் என்பவர் மல்லிகாவை கரம் பிடிக்க விரும்பினார். சினிமா நடிகையாக மட்டுமல்லாது மற்ற விஷயங்களிலும் அவரை பிடித்து இருப்பதாக கூறினார்.

ஒவ்வொரு போட்டியாளரும் ஒவ்வொரு விதமான காரணங்களை தெரிவித்தனர். முடிவில் ஒரு போட்டியாளர் பிடித்துப் போய்விடவே அவரை தனது வாழ்க்கை துணையாக மல்லிகா ஷெராவத் தேர்வு செய்தார். அவரை மணக்கவும் மல்லிகா ஷெராவத் சம்மதித்தார்.

நேற்று இந்நிகழ்ச்சி லைப் ஓ.கே சனலில் ஒளிபரப்பானது. இது தொலைக்காட்சி நிகழ்ச்சி என்றாலும் உண்மையிலேயே திருமணம் செய்து கொள்ளும் நிகழ்ச்சியாகும். தொலைக்காட்சி நிகழ்ச்சியில் பங்கேற்ற போட்டியாளரை மல்லிகா ஷெராவத் விரைவில் மணக்க இருக்கிறார்.

கண்ணா லட்டு தின்ன ஆசையா படத்திற்கு பிறகு அந்த படத்தில் நடித்த சந்தானம், சேது, விஷாகா ஆகிய மூவரும் மீண்டும் ஒரு படத்தில் இணைந்து நடிக்கின்றனர். இந்த படத்திற்கு வாலிப ராஜா என்று பெயர் வைத்திருக்கின்றனர்.

இப்படத்தில் சந்தானம் மனநல மருத்துவராகவும், சேது டிசைனராகவும், விஷாகா மனநல மருத்துவம் படிக்கும் மாணவியாகவும் வருகிறார். மேலும் இப்படத்தில் பொலிவுட் நடிகை நுஸ்ரத் என்பவரும் தமிழ் சினிமாவுக்கு அறிமுகமாகிறார்.

இந்த படத்திற்கு கதை, திரைக்கதை, வசனம் எழுதி இயக்குகிறார் சாய் கோகுல் ராம்நாத். இவர் கே.வி.ஆனந்திடம் உதவியாளராக இருந்தவர். சென்னை, பாண்டிச்சேரியில் இதுவரை 26 நாட்கள் படமாக்கியுள்ளனர். இன்னும் மதுரை, குற்றாலம் ஆகிய இடங்களுக்கும் சென்று மீதி படத்தை எடுக்க திட்டமிட்டுள்ளனர்.

கண்ணா லட்டு தின்ன ஆசையா பட கூட்டணி என்று சொன்னாலும் அந்த படத்தில் நடித்த பவர் ஸ்டார் சீனிவாசன் இந்த படத்தில் நடிக்கவில்லை. கண்ணா லட்டு தின்ன ஆசையா படத்தின் வெற்றிக்கு பவர் ஸ்டார் சீனிவாசனும் ஒரு காரணமாக இருந்தவர். அதன்பிறகு, பல்வேறு வழக்குகளில் சிக்கி சிறை சென்றதால், இந்த படத்தில் இருந்து அவர் கழற்றி விடப்பட்டுள்ளதாக கூறப்படுகிறது.

2006ம் ஆண்டு வெளியான திருட்டு பயலே படத்தின் மூலம் தமிழ் சினிமாவில் தயாரிப்பாளராக கால்பதித்த நிறுவனம் ஏ.ஜி.எஸ் எண்டர்டெயின்மண்ட். இதன் உரிமையாளர் கல்பாத்தி எஸ்.அகோரம்.

இவர் தொடர்ந்து சந்தோஷ் சுப்பிரமணியம், இரும்புக் கோட்டை முரட்டு சிங்கம், மதராச பட்டணம், எங்கேயும் காதல், யுத்தம் செய், அவன் இவன், மாற்றான் உள்ளிட்ட பல வெற்றி படங்களை தயாரித்துள்ளார். தயாரிப்பு மட்டுமின்றி கந்தக்கோட்டை, மைனா, பயணம் உள்ளிட்ட பல படங்களுக்கு விநியோகஸ்தராகவும் இருந்துள்ளார்.

இவ்வாறு திரைப்படத் துறையில் முத்திரை பதித்த கல்பாத்தி எஸ்.அகோரம் சமீபத்தில் தமிழ்நாடு கிரிக்கெட் சங்கத்தின் துணைத்தலைவராக தேர்ந்தெடுக்கப்பட்டார். தற்போது இந்திய கிரிக்கெட் சங்கத்தின் சந்தைப்படுத்தல் பிரிவின் உறுப்பினராகவும் இவர் தேர்ந்தெடுக்கப்பட்டிருக்கிறார்.

ஏ.ஜி.எஸ் நிறுவனம் சார்பில் தற்போது ஜெய் நடிப்பில் உருவாகி வரும் நவீன சரஸ்வதி சபதம், தனுஷ் நடிப்பில் கே.வி.ஆனந்த் இயக்கும் அனேகன்’ உள்ளிட்ட பல படங்கள் தயாராகி வருகிறது.