அனுமதிப்பத்திரம் இன்றி மரங்களை ஏற்றிச் சென்ற மூவர் ஒட்டுசுட்டான் பொலிஸாரால் கைதுசெய்யப்பட்டுள்ளனர். இவர்கள் வசமிருந்து 205 மரக்குற்றிகள் மற்றும் லொறி ஒன்றும் கைப்பற்றப்பட்டுள்ளதாக பொலிஸார் தெரிவித்துள்ளனர்.
நேற்றையதினம் ஒட்டுசுட்டான் பொலிஸ் பிரிவின் ஹெரண அகுரு வீதியில் வைத்தே இவர்கள் கைதாகியுள்ளனர். சந்தேகநபர்கள் ஒட்டுசுட்டான் மற்றும் மாங்குளம் ஆகிய பகுதிகளைச் சேர்ந்தவர்கள் எனத் தெரியவந்துள்ளது.
இவர்கள் முல்லைத்தீவு நீதவான் நீதிமன்றத்தில் ஆஜர்படுத்தப்படவுள்ளனர்.
23 வருடங்களின் பின் யாழ்தேவி ரயில் இன்று கிளிநொச்சி நோக்கி தனது பயணத்தை ஆரம்பித்துள்ளது. இன்று காலை 9.30 மணிக்கு ஓமந்தை ரயில் நிலையத்திலிருந்து ரயில் மூலம் கிளிநொச்சி ரயில் நிலையத்தைச் சென்றடைந்துள்ளது.
நாளை 15 ஆம் திகதி முதல் பயணிகளுக்கான ரயில் சேவைகள் கிளிநொச்சிவரை இடம்பெறவுள்ளன.
வவுனியாவில் இருந்து காங்கேசன்துறை வரையுள்ள 29 ரயில் நிலையங்கள் அரச மற்றும் தனியார் நிறுவனங்களின் உதவியுடன் நிர்மாணிக்கப்பட்டு வந்தன.
யாழ்ப்பாணம் காங்கேசன்துறை வரை தனது சேவையை வழங்கி வந்த யாழ்தேவி 1990ம் ஆண்டு ஜூலை மாதம் 23ம் திகதியின் பின்னர் வவுனியா வரை மட்டுமே பயணித்தது.
கொழும்பிலிருந்து சென்னைக்கு தங்கம் கடத்த முயற்சித்த இலங்கை தம்பதிகள் கைது செய்யப்பட்டுள்ளனர். இவர்கள் வட பழனியிலுள்ள வைத்தியசாலை ஒன்றில் கருத்தரிப்பு சிகிச்சைக்காக செல்வதாக கூறியுள்ளனர்.
எனினும் இவர்கள் மீது சந்தேகம் ஏற்படவே சுங்க அதிகாரிகள் சோதனையிட்டுள்ளனர். இதன்போது இவர்களிடமிருந்து 585 கிராம் தங்கம் மீட்கப்பட்டுள்ளது.
38 வயதான சுப்பையா மற்றும் 28 வயதான லதா தங்கவேல் என்போரே இவ்வாறு கைது செய்யப்பட்டுள்ளனர்.
வவுனியாவில் ஹெரோயின் விற்பனையில் ஈடுபட்ட கொழும்பைச் சேர்ந்த நால்வர் கைதுசெய்யப்பட்டுள்ளனர். நேற்றையதினம் வவுனியா பொலிஸாருக்கு கிடைத்த தகவலின் அடிப்படையில் மேற்கொள்ளப்பட்ட சுற்றிவளைப்புக்களில் இருவர் கைதாகியுள்ளனர்.
அதில் ஒருவர் 70 மில்லிகிராம் ஹெரோயினை விற்பனை செய்ததுடன் 370 மில்லிகிராம் ஹெரோயினை தன்னகத்தே வைத்திருந்ததாக தெரியவந்துள்ளது. இவர் மாலிகாவத்தை பகுதியைச் சேர்ந்தவர் என்பதோடு இவர் வசமிருந்து முச்சக்கர வண்டியொன்றும் கைப்பற்றப்பட்டுள்ளதாக பொலிஸார் தெரிவித்துள்ளனர்.
மற்றையவர் கிரன்பாசைச் சேர்ந்தவர். இவர் வசமிருந்து 70 மில்லிகிராம் ஹெரோயின் கைப்பற்றப்பட்டுள்ளது.
இதேவேளை வவுனியா ரயில் நிலையத்துக்கு அருகில் மேற்கொள்ளப்பட்ட சுற்றிவளைப்புக்களில் மேலும் இருவர் கைதாகியுள்ளனர்.
70 மில்லிகிராம் ஹெரோயின் விற்பனை செய்ததோடு 2 கிராம் 160 மில்லிகிராம் ஹெரோயினை தன்னகத்தே வைத்திருந்த, மாளிகாவத்தை பகுதியைச் சேர்ந்த ஒருவரும், 170 மில்லிகிராம் ஹெரோயினுடன் மிரானியா வீதி கொழும்பை சேர்ந்த ஒருவருமே இவ்வாறு கைது செய்யப்பட்டுள்ளதாக பொலிஸார் தெரிவித்தனர்.
சந்தேகநபர்கள் இன்று வவுனியா நீதவான் நீதிமன்றத்தில் ஆஜர்படுத்தப்படவுள்ளனர்.
உடலில் கொத்து கொத்தாக தங்க நகைகளை அணிந்து வந்த வாலிபரை சென்னை விமான நிலையத்தில் சுங்க அதிகாரிகள் கைது செய்தனர்.
சிங்கப்பூரில் இருந்து இன்று அதிகாலை சென்னை வந்த விமான பயணிகளை குடியிரிமை அதிகாரிகள் மற்றும் சுங்கத்துறை அதிகாரிகள் சோதனை செய்தனர்.
அப்போது புதுக்கோட்டையை சேர்ந்த சிசுபாலன் (32) என்பவர் கழுத்து, கைகளில் கொத்து கொத்தாக நகை அணிந்து கொண்டு வந்தார். அவர் அணிந்து வந்த நகைகளுக்கு எந்தவித ஆதாரமும் காட்டவில்லை.
இதையடுத்து சிசுபாலனை அதிகாரிகள் தனி அறைக்கு அழைத்து சென்று விசாரணை நடத்தினர். அவர் உடலில் அணிந்திருந்த நகைகள் மொத்தம் 290 கிராம். அவற்றின் மதிப்பு 9 லட்ச இந்திய ரூபாய்கள்.
நகைகளை பறிமுதல் செய்து அவரிடம் மேலும் விசாரணை நடத்தியதில் தங்க நகைகளை உடலில் அணிந்து வந்தால் அதிகாரிகளுக்கு சந்தேகம் ஏற்படாது என்பதால் உடலில் போட்டு வந்தேன்.
இவற்றை கொண்டு சேர்த்தால் கணிசமான பணம் கிடைக்கும் என்று தெரிவித்துள்ளார். இதையடுத்து அவர் கைது செய்யப்பட்டார். யாருக்காக அவர் நகைகளை கடத்தி வந்தார் என்பது பற்றி போலீசார் விசாரணை மேற்கொண்டுள்ளனர்.
மருதானை பகுதியில் விபச்சார விடுதியொன்று சுற்றிவளைக்கப்பட்டு 13 பெண்கள் உட்பட 14 பேர் கைதுசெய்யப்பட்டுள்ளனர்.
நேற்று முன்தினம் மேற்கொள்ளப்பட்ட இந்த சுற்றிவளைப்பில் கைது செய்யப்பட்டவர்கள் 20 முதல் 40 வயதுடையவர்கள் எனத் தெரியவந்துள்ளது.
இந்த விபச்சார விடுதியை நடத்திச் சென்ற ஒருவரும் இதற்கு உதவியாக இருந்த 13 பெண்களுமே கைதாகியுள்ளனர்.
மேலும் இவர்கள் கொழும்பு, அவிசாலவ, கலேவெல, கடுபொல உள்ளிட்ட பகுதியைச் சேர்ந்தவர்கள் எனத் தெரியவந்துள்ளது.
சந்தேகநபர்கள் நேற்றையதினம் மாலிகாகந்த நீதவான் நீதிமன்றத்தில் ஆஜர்படுத்தப்பட்டதன் பின்னர்,எதிர்வரும் 25ம் திகதி வரை விளக்கமறியலில் வைக்கப்பட்டுள்ளனர்.
வடக்கு, மத்திய மற்றும் வடமேல் மாகாணசபை தேர்தல் கண்காணிப்பு பணிகளுக்காக சர்வதேச தேர்தல் கண்காணிப்பாளர்கள் இலங்கை வந்தடைந்துள்ளதாக பெப்ரல் அமைப்பு தெரிவித்துள்ளது.
இம்முறை இடம்பெறவுள்ள மாகாணசபை தேர்தல் பணிகளில் சர்வதேச கண்காணிப்பாளர்கள் ஈடுபடுத்தப்பட வேண்டும் என பல்வேறு தரப்பிலும் கருத்துக்கள் முன்வைக்கப்பட்டன.
இதன்படி உள்ளூர் கண்காணிப்பு குழுக்கள் தேர்தல் செயலகம் மற்றும் கட்சி பிரதிநிதிகளுக்கிடையிலான பேச்சுவார்த்தையைத் தொடர்ந்து சர்வதேச கண்காணிப்பாளர்கள் அழைக்கப்பட்டுள்ளனர்.
இதேவேளை மத்திய மற்றும் வடமேல் மாகாண மக்களுக்கு தேர்தல் தொடர்பில் அதிக ஈடுபாடு இல்லை என தேர்தல் கண்காணிப்பாளர் மத்தியசபை தெரிவித்துள்ளது.
வட மாகாண மக்கள் மத்தியில் தேர்தல் தொடர்பில் பெரும் எதிர்பார்ப்பு உள்ளதாக தேர்தல் கண்காணிப்பாளர்கள் மேற்கொண்ட ஆய்வின் மூலம் தெரியவந்துள்ளது.
இம் மூன்று மாகாண சபைகளுக்குமான தேர்தல் எதிர்வரும் 21ம் திகதி இடம்பெறவுள்ளது.
மும்பையை சேர்ந்த மருத்துவர் ஒருவர் மனைவியின் செயல்பாடுகளால் அவதியுற்றதால் குடும்ப நீதிமன்றம் அவருக்கு விவாகரத்து அளித்துள்ளது.
கடந்த 1994ம் ஆண்டு ஜனவரி மாதம் திருமணம் செய்துகொண்ட மருத்துவத் தம்பதியினர் மும்பையில் வசித்து வந்தனர்.
இவர்களுக்கு குழந்தைகள் இல்லை. கடந்த 2011ம் ஆண்டு செப்டெம்பர் மாதம் அந்தக் கணவர் குடும்ப நீதிமன்றத்தில் விவாகரத்திற்கு விண்ணப்பித்திருந்தார்.
விவாகரத்திற்கு காரணமாக அந்த நபர் தெரிவித்திருந்ததாவது, திருமணத்தின்போது தான் மும்பையிலும் தனது மனைவி கர்நாடக மாநிலத்திலும் படித்துக் கொண்டிருந்ததாகவும் தான் ஆண்கள் விடுதி ஒன்றில் அப்போது தங்கியிருந்ததாகவும் கூறியிருந்தார்.
ஆயினும் மும்பை வரும்போது எல்லாம் தன்னுடன் தங்க வேண்டும் என்று மனைவி வலியுறுத்தியதால் தான் இடம் மாறநேரிட்டது என்றும், அது தன்னுடைய முதுநிலைப் படிப்பையே ஒரு வருடம் தடை செய்தது என்றும் அவர் குறிப்பிட்டுள்ளார்.
மனைவியின் சந்தேகத்தினால் தான் தன்னுடைய மருத்துவமனையையே மூட நேரிட்டது என்று அந்த மருத்துவர் தெரிவித்துள்ளார்.
உணவு தண்ணீர் முதலிய அடிப்படைத் தேவைகளைக் கூட தனக்கு அளிக்க மறுத்து தங்கள் வீட்டில் உள்ள குளிர்சாதனப் பெட்டியைக் கூட பூட்டி வைத்துக் கொள்ளுவதாகக் குறிப்பிட்டிருந்தார்.
தன்னுடைய வயது முதிர்ந்த தோற்றம் கூட பிரச்சினைகளை வளர்த்ததாகவும் அவர் தெரிவித்திருந்தார்.
தொடர்ந்து நடைபெற்ற விசாரணைகளிலும் அவரது மனைவி நீதிமன்றத்திற்கு வராததால், கணவரின் குற்றச்சாட்டுகளை ஏற்றுக்கொண்ட குடும்பநல நீதிமன்றம் அவருக்கு விவகாரத்து வழங்கியுள்ளது.
டெல்லியில் மருத்துவ மாணவி பலாத்காரத்திற்கு உட்படுத்தப்பட்டு கொல்லப்பட்ட வழக்கில் கொலை, பாலியல் பலாத்காரம், கொள்ளை, இயற்கைக்கு மாறான முறையில் சித்திரவதை உள்ளிட்ட 14 பிரிவுகளில் குற்றவாளிகளுக்கு மரண தண்டனை விதிக்கப்பட்டுள்ளது.
நீதிபதி யோகேஷ் கண்ணா தீர்ப்பு வழங்கிய பின்னர் குற்றவாளிகள் முகேஷ், வினய் சர்மா, பவன் குப்தா, அக்ஷய் சிங் தாகூர் ஆகிய 4 பேரும் தீர்ப்பை கேட்டு கண்ணீர் விட்டு அழுதனர்.
நீதிபதியிடம் ´Sir ji, Sir ji” என்று கெஞ்சியுள்ளனர்.
இதேவேளை குற்றவாளிகள் நான்கு பேருக்கும் மரண தண்டனை விதிக்கப்பட்டமை மகிழ்ச்சி அளிப்பதாக பலியான மாணவியின் பெற்றோர் தெரிவித்துள்ளனர்.
வழக்கை நீதிமன்றத்தில் அமர்ந்து பார்த்த மாணவியின் பெற்றோர் இந்த தீர்ப்பு எங்களுக்கு மகிழ்ச்சியை அளித்துள்ளது. எங்களுக்கு நீதி கிடைத்துள்ளது.
எனது மகள் குற்றவாளிகள் அனைவரையும் தீயிட்டு கொளுத்தவேண்டுமென கூறியிருந்தாள். ஆனால் அவர்கள் இந்த குற்றத்தை செய்ததற்கு அவர்களுக்கு மரண தண்டனை விதிக்கப்பட்டுள்ளது எங்களுக்கு மகிழ்ச்சியை அளிக்கிறது என்றனர்.
2012ம் ஆண்டு டிசம்பர் மாதம் 16ம் திகதி ஓடும் பேருந்தில் 6 பேர் கொண்ட கும்பலால் மாணவி பாலியல் பலாத்காரத்திற்கு உட்படுத்தப்பட்டு கொல்லப்பட்டார்.
இதனால் இந்தியா முழுவதும் போராட்டம் வெடித்ததை அடுத்து, டெல்லியில் விரைவு நீதிமன்றம் அமைக்கப்பட்டு கடந்த ஜனவரியில் வழக்கின் விசாரணை தொடங்கியது குறிப்பிடத்தக்கது.
கடந்த சில மாதங்களுக்கு முன் நடிகை அஞ்சலி தனது வீட்டை விட்டு வெளியேறி தலைமறைவானார். பின் பத்திரிகையாளர்களிடம் தனது சித்தி பாரதிதேவியும் இயக்குனர் களஞ்சியமும் தன்னை கொடுமைப்படுத்தி சொத்துகளை அபகரிக்க முயல்வதாக புகார் தெரிவித்திருந்தார்.
இந்த புகார் தன் மீது கூறப்பட்ட அவதூறு என்றும் பொய்யான புகாரை கூறிய நடிகை அஞ்சலி மீது கிரிமினல் வழக்கு தொடர்ந்து தண்டிக்க வேண்டும் என்று கூறி இயக்குனர் களஞ்சியம் சார்பில் அவரது வழக்கறிஞர்கள் சைதாப்பேட்டை நீதிமன்றத்தில் மனுதாக்கல் செய்தனர்.
இந்த வழக்கு விசாரணையின்போது அஞ்சலி ஆஜராகாமல் இருந்து வந்தார். நேற்று இந்த வழக்கு விசாரணைக்கு வந்தது. அப்போது அஞ்சலி சார்பில் ஆஜரான வழக்கறிஞர் அடுத்த விசாரணையின்போது அவர் ஆஜராவார் என்று தெரிவித்தார். இதனை ஏற்க மாஜிஸ்திரேட் மறுத்து விட்டார்.
மேலும் நடிகை அஞ்சலியை நீதிமன்றத்தில் ஆஜர்படுத்துமாறு பிடிவாரண்ட் பிறப்பித்து உத்தரவிட்டார். வழக்கு விசாரணையை அடுத்த மாதம் 3ம் திகதிக்கு தள்ளிவைத்தார்.
வை திஸ் கொல வெறி பாடலுக்கு இசையமைத்ததன் மூலம் பிரபலமானவர் அனிருத். இவர் ஆண்ட்ரியாவுடன் உதட்டுடன் உதடு முத்தம் கொடுத்த படத்தை வெளியிட்டு பரபரப்பை ஏற்படுத்தினார்.
அதற்குப்பிற்கு தற்போது உதயநிதி மனைவி கிருத்திகா இயக்கும் வணக்கம் சென்னை படத்தில் இருவரும் சேர்ந்து ஒரு பாடலுக்கு பணியாற்றினார்கள் என்ற செய்தி வெளிவந்தது. இதை அனிருத் மறுத்துள்ளார். இதுகுறித்து அவர் கூறியதாவது..
வணக்கம் சென்னை படத்திற்கு நான் இசையமைக்கிறேன். இப்படத்தில் எங்கடி பொறந்த எங்கடி பொறந்த என்ற பாடலை ஆண்ட்ரியா பாடியுள்ளார். இந்தபாடலின் ஒரு பகுதிக்காக நான் மும்பையில் ரெக்கார்டிங் செய்து கொண்டிருந்தேன்.
அதே வேளையில் ஆண்ட்ரியாவுடன் எனது உதவியாளர் சென்னையில் ரெக்கார்டிங் செய்துகொண்டிருந்தார். ஆகையால் நாங்கள் இருவரும் சேர்ந்து பணியாற்றவில்லை என்றார்.
Lenovo நிறுவனமானது தனது புத்தம் புதிய வடிவமைப்பில் உருவாக்கப்பட்ட S5000 மடிக் கணணியை அறிமுகம் செய்துள்ளது.
கூகுளின் Android 4.2 Jelly Bean இயங்குதளத்தினை அடிப்படையாகக் கொண்டு உருவாக்கப்பட்ட இந்த கணனிகள் 1280 x 800 Pixel Resolution உடைய 7 அங்குல தொடுதிரையினைக் கொண்டுள்ளன.
இவை தவிர 1.2GHz வேகத்தில் செயலாற்றக்கூடிய MediaTek 8389 Processor, பிரதான நினைவகமாக 1GB RAM ஆகியனவும் காணப்படுகின்றன.
மேலும் 5 மெகா பிக்சல்களை உடைய பிரதான கமெரா, வீடியோ அழைப்புக்களை ஏற்படுத்துவதற்கென 1.6 மெகா பிக்சல்களை உடைய துணையான கமெரா ஆகியனவும் தரப்பட்டுள்ளன.
கேரள மாநிலம் கொச்சி அருகே உள்ள பறவூர் பகுதியை சேர்ந்தவர் சுதீர். கூலி தொழிலாளி. இவரது குடும்பம் வறுமையில் வாடியது.
இதை பயன்படுத்தி அதே பகுதியை சேர்ந்த பெண் புரோக்கர் கதீஜா என்பவர் சுதீரிடம் அவரது வறுமை நீங்க வேண்டும் என்றால் அவரது மகளை விபசாரத்தில் ஈடுபடுத்தும்படி கூறினார்.
இதைத்தொடர்ந்து சுதீர் 10 ஆயிரம் ரூபா பெற்றுக் கொண்டு தனது 13 வயது மகளை கதீஜாவிடம் விற்று விட்டார். அந்த சிறுமியை ஒரு அறையில் அடைத்து வைத்து கதீஜா விபசாரத்தில் ஈடுபடுத்தினார். கதிஜாவுக்கு உடந்தையாக வில்சன், ஜவகர், சுலேத் ஆகியோர் இருந்தனர்.
10 நாட்கள் அறையில் அடைக்கப்பட்ட அந்த சிறுமியை பலர் பாலியல் பலாத்காரம் செய்தனர். இந்த கொடுமையில் இருந்து தப்பிய அந்த சிறுமி கொச்சி போலீசில் தனக்கு நேர்ந்த கொடுமை பற்றி புகார் செய்தார். இதைத் தொடர்ந்து பொலிஸார் சுதீர் உள்பட 5 பேர் மீது வழக்குப்பதிவு செய்தனர்.
இந்த சம்பவம் கடந்த 2009ம் ஆண்டு நடைபெற்றது. இந்த வழக்கு கொச்சி நீதிமன்றத்தில் நடந்து வந்தது. இந்த வழக்கை விசாரித்த நீதிபதி அஜீத்குமார் தீர்ப்பு கூறினார். அவர் தனது தீர்ப்பில் சுதீருக்கு 7 வருடம் சிறைத் தண்டனையும், கதீஜா, வில்சன், ஜவகர், சுலேத் ஆகியோருக்கு 10 வருட சிறைத் தண்டனையும் விதித்தார்.
ஐபிஎல் போட்டிகளில் சூதாட்டத்தில் ஈடுபட்டு சிக்கிய ராஜஸ்தான் ரோயல்ஸ் அணியின் ஸ்ரீசாந்த், அங்கித் சவான் ஆகியோருக்கு இந்திய கிரிக்கெட் கட்டுப்பாட்டு சபை வாழ்நாள் தடை விதித்துள்ளது.
பரபரப்பான ஐபிஎல் போட்டிகளுக்கு நடுவே சூதாட்ட விவகாரம் சூடு பிடித்தது. இதில் ராஜஸ்தான் அணி வீரர்கள், புக்கிகள் என பலரும் சிக்கினர்.
இதன்படி ராஜஸ்தான் ரோயல்ஸ் அணியின் ஸ்ரீசாந்த், அஜித் சான்டிலா, அங்கீத் சவான், அமித் சிங் ஆகியோர் கைதுசெய்யப்பட்டு சிறையில் அடைக்கப்பட்டனர்.
இந்த 4 பேர் மீதான வழக்கு ஒருபுறம் நடந்து வந்தாலும் இந்திய கிரிக்கெட் கட்டுப்பாட்டு சபை ரவி சவானி தலைமையில் விசாரணை ஆணையத்தை அமைத்தது.
இந்த ஆணைய விசாரணையின் போது 4 வீரர்களுமே சூதாட்டத்தில் ஈடுபட்டிருப்பது நிரூபிக்கப்பட்டிருக்கிறது. அத்துடன் ஆட்ட நிர்ணயத்தில் ஈடுபட்ட வீரர்கள் கிரிக்கெட் விளையாட தடை விதிக்கவும் விசாரணை ஆணையம் பரிந்துரைத்தது.
இதைத் தொடர்ந்து இந்திய கிரிக்கெட் கட்டுப்பாட்டு சபையின் ஒழுங்கு நடவடிக்கைக் குழு இன்று கூடியது. டெல்லியில் என்.சீனிவாசன், அருண் ஜேட்லி, நிரஞ்சன் ஷா ஆகியோர் அடங்கிய ஒழுங்கு நடவடிக்கை குழு விசாரணை அறிக்கையின் பரிந்துரைகள் அடிப்படையில் ஒவ்வொரு வீரரிடம் தனிப்பட்ட முறையில் விளக்கம் கேட்டது.
அதன் பின்னர் அந்த குழு வீரர்களுக்கான தண்டனை விவரத்தை வெளியிட்டது. இந்த ஒழுங்கு நடவடிக்கைக் குழுவின் கூட்டத்தில் ஸ்ரீசாந்த், அங்கீத் சவான் ஆகியோருக்கு வாழ்நாள் தடை விதிக்க முடிவு செய்யப்பட்டுள்ளது.
கிரிக்கெட் சூதாட்டத்தில் சிக்கிய மற்றொரு வீரரான அமீத் சிங்குக்கு 5 ஆண்டுகால தண்டனை விதிக்கப்பட்டுள்ளது. மற்றொரு வீரரான சித்தார் திரிவேதி ஓராண்டு காலம் கிரிக்கெட் விளையாட தடை விதிக்கப்பட்டுள்ளது.
ஹர்மீத் சிங் என்ற வீரருக்கு மன்னிப்பு கொடுக்கப்பட்டுள்ளது. அவருக்கு எதிராக போதுமான ஆதாரம் இல்லை என்று அறிவிக்கப்பட்டுள்ளது. சாண்டிலாவுக்கு என்ன மாதிரியான தண்டனை விதிப்பது என்பது பற்றி பின்னர் முடிவு செய்யப்பட இருக்கிறது.
நினைத்தாலே இனிக்கும் படத்தின் டிரைலர் வெளியீட்டு விழாவில் கலந்துகொண்ட நடிகர் கமலஹாசன் பேசியதாவது..
இவ்விழாவிற்கு நினைத்தாலே இனிக்கும் படக்குழுவினர் சார்பாக வந்திருக்கிறேன். சகோதரர் ரஜினிகாந்த் இந்த விழாவுக்கு வரமுடியவில்லை. அவர் சார்பாகவும் நான் வந்திருக்கிறேன். அதுபோல், நான் வரமுடியாத நிகழ்ச்சிகளுக்கு என் சார்பாக அவர் கலந்து கொள்வார். இப்படித்தான் நாங்கள் வளர்ந்திருக்கிறோம்.
இந்தப் படத்தில் இடம்பெறும் எங்கேயும் எப்போதும் சந்தோஷம் சங்கீதம் என்ற பாடல் சத்யா ஸ்டுடியோவில் படமாக்கப்பட்டது. அப்போது படப்பிடிப்பு இடைவேளையின்போது ஸ்டுடியோவின் வெளியே வந்து ரஜினியிடம் நாம் ஒரு சம்பளத்தை இருவரும் பங்கிட்டு வாங்கிக் கொள்கிறோம்.
நீ ஒரு திரை நட்சத்திரம் நான் ஒரு நடிகன். நாம் சந்திக்கும்போது சந்திக்கலாம். நாம் இருவரும் தனித்தனியாக நடித்தால் நன்றாக இருக்கும். இதை அனுபவிக்கணும் என்று கூறினேன். அதற்கு அவரும் சம்மதித்தார்.
தனித்தனியாக நடித்ததால் இன்று அதிக சம்பளம் வாங்குகிறோம். ஒன்றாக நடித்திருந்தால் ஆட்டோ ரிக்ஷாவில்தான் வந்துகொண்டிருப்போம். சினிமாவில் இந்த வியூகத்தை புரிந்து கொண்டு செயல்பட்ட இரண்டு சகோதரர்களின் கதைதான் என்னுடைய கதையும், ரஜினியின் கதையும். இந்த வெற்றிக்கு பலபேர் உறுதுணையாக இருந்திருக்கிறார்கள். அதில் முதலாவது நபர் பாலச்சந்தர் என்று சொல்வதற்கு நான் கடமைப்பட்டிருக்கிறேன்.
பாலச்சந்தரை பார்த்து இயக்குனராக வேண்டும் என்று வந்தவன்தான் நான். இன்று என்னை இந்தியாவின் சிறந்த இயக்குனர் என்று சொல்கிறார்கள். அதற்கு வித்திட்டவர் பாலபாடம் போல் கற்றுக்கொண்டது எல்லாம் பாலச்சந்தரிடம்தான். இந்த அதிர்ஷ்டம் இங்குள்ள பல இயக்குனர்களுக்கு கிடைக்கவில்லை என்பதுதான் எனக்கு கிடைத்த தற்பெருமை.
அவரிடம் நான் ஒன்றும் கற்றுக் கொள்ளவில்லை என்று சொன்னால் என்னைவிட மடையன் யாருமில்லை. கொஞ்சம் கற்றுக் கொண்டேன் என்று சொன்னால் நான் சோம்பேறி என்று அர்த்தம். அவரிடம் இருந்து நிறைய கற்றுக் கொண்டிருக்கிறேன். இன்று என்னிடம் இருக்கும் பல விஷயங்கள் அவரிடமிருந்து கற்றுக் கொண்டதுதான்.
அவர் ஒரு அபாரமான நடிகர். நல்லவேளை அவர் நடிக்க வரவில்லை. தற்போது அந்த திறமையை பயன்படுத்திக் கொள்ளவேண்டிய நேரமும் வந்துவிட்டதாக எண்ணுகிறேன். அவருடன் இணைந்து நடிக்க வேண்டும் என்பது என்னுடைய நீண்ட நாள் ஆசை. அது விரைவில் நிறைவேறும் என்று எதிர்பார்க்கிறேன். அவருடைய சம்மதத்துக்காக காத்திருக்கிறேன் என்று அவர் பேசினார்.
தமிழ்நாட்டில் பாடசாலை மாணவன் ஒருவன் காலண்டு பரீட்சை எழுத மது அருந்திவிட்டு வந்ததால் பள்ளியிலிருந்து தற்காலிக நீக்கம் செய்யப்பட்டுள்ளார்.
தூத்துக்குடி மாவட்டம் கழுகுமலையில் அரசு மேல்நிலைப் பள்ளியில் நேற்று முன்தினம் காலாண்டு பரீட்சைகள் தொடங்கின.
நேற்று முன்தினம் பிற்பகல் நடந்த தேர்வின்போது வகுப்பறையில் இருந்து மது வாடை வீசியது. ஆசிரியர்கள் நடத்திய விசாரணையில் பிளஸ் 1 வரலாற்று பிரிவு மாணவர் ஒருவர் மது அருந்திவிட்டு முழு போதையில் தேர்வு எழுத வந்திருப்பது தெரியவந்தது.
இதனைத் தொடர்ந்து மாவட்ட ஆட்சியர் பொலிசார் மற்றும் கல்வி அதிகாரிகளுக்கு தலைமை ஆசிரியர் ஜிந்தா மதார்பக்கீர் தகவல் தெரிவித்துள்ளார். பொலிசார் பள்ளிக்கு வந்து சம்பந்தப்பட்ட மாணவரிடம் விசாரணை நடத்தியதில் அவர் மது குடித்து விட்டு வந்ததை ஒப்புக்கொண்டுள்ளார்.
பின்பு இதுதொடர்பாக கோவில்பட்டி தாசில்தார் ரமேஷ், துணை தாசில்தார் பாஸ்கரன் ஆகியோர் பள்ளிக்கு வந்து தலைமையாசிரியிடம் விசாரணை நடத்தினர்.
தொடர்ந்து மாணவரின் பெற்றோரை அழைத்து அதிகாரிகள் பேச்சுவார்த்தை நடத்திய பின்பு மது அருந்திவிட்டு பள்ளிக்கு வந்த மாணவரை வரும் 20 நாள் தற்காலிக நீக்கம் செய்து அதிகாரிகள் உத்தரவிட்டுள்ளனர்.
