திண்டுக்கல்லில்..

திண்டுக்கல் மாவட்டம் குட்டத்துக்குட்டி கிராமத்தில் வசித்து வருபவர் டேவிட்ராஜ். இவருடைய மனைவி ஜெனிபர். அவருடைய மகள் ஜோஸ்லின் ஜெனியா. இவர் திருப்பூர் செரங்காடு பகுதியில் பெற்றோருடன் வாடகை வீட்டில் வசித்து வருகிறார். திருப்பூர் செரங்காடு மாநகராட்சி நடுநிலைப் பள்ளியில் 8 ம் வகுப்பு பயின்று வருகிறார்.

ஜோஸ்லின் ஜெனியா என்ற மாணவி ஆகஸ்ட் 5 ம் தேதி பள்ளிக்கு சென்றார். அங்கு கழிவறைக்கு சென்ற போது கழிப்பறையின் கூரையில் இருந்து ஒரு வயர் ஒன்று அறுந்து தொங்கியது. இதிலிருந்து மின்சாரம் பாய்ந்துள்ளது. இதில் தூக்கி வீசப்பட்ட ஜோஸ்லின் ஜெனியா படுகாயம் அடைந்தார்.

திருப்பூர் அரசு மருத்துவக் கல்லூரி மருத்துவமனையில் சிகிச்சை பெற்ற அவருக்கு முழங்கை எலும்பு மற்றும் தோள்பட்டை எலும்பு முறிவு ஏற்பட்டு கழுத்திலும் காயம் ஏற்பட்டுள்ளது.

அரசு மருத்துவக் கல்லூரி மருத்துவமனையில் 7 நாட்கள் சிகிச்சைக்கு பிறகும் சரியாக காது கேட்கவில்லை. ஜோஸ்லின் ஜெனியாவின் பெற்றோர் தனியார் மருத்துவமனையில் சென்று காண்பித்தனர்.

இதில் அவரது காதுகள் பாதிக்கப்பட்டு விட்டதால், 90 சதவீத காது கேட்கும் திறன் இழந்து விட்டதாக கூறியுள்ளனர். சிறுமி ஜோஸ்லின் ஜெனியா அரசு பள்ளியின் அஜாக்கிரதை காரணமாக மின்சாரம் தாக்கி அடிபட்டுள்ளார்.

இந்நிலையில், அரசோ, பள்ளி நிர்வாகமோ உதவ முன்வரவில்லை எனவும், தனது மகளின் சிகிச்சைக்கு உதவ வேண்டும் எனவும் தாய் ஜெனிபர் கண்ணீர் கோரிக்கை விடுத்துள்ளார்.

இதுகுறித்து ஜெனிபர் “திருப்பூர் செரங்காட்டில் வசிக்கும் நான் கூலித்தொழில் செய்து வருகிறேன். மகள் ஜோஸ்லின் ஜெனியா மாநகராட்சிப் பள்ளியில் படித்து வந்தார். இந்நிலையில், 20 நாட்களுக்கு முன்னர் பள்ளியில் மின்சாரம் தாக்கி தூக்கி வீசப்பட்டு படுகாயம் அடைந்தார்.

இச்சம்பவத்தில் பள்ளி நிர்வாகம் அஜாக்கிரதையாக இருந்து விட்டு, எனது மகளை குறை சொல்கிறார்கள். எனது மகள் ஜோஸ்லின் ஜெனியாவுக்கு முழங்கை, தோள்பட்டை எலும்பு, கழுத்திலும் பாதிப்பு ஏற்பட்டு இருக்கிறது.

காதுகள் 90 சதவீதம் கேட்கும் திறனை இழந்து விட்டது. தனியார் மருத்துவமனையில் சிகிச்சைக்கு செலவு செய்யும் அளவுக்கு வசதி இல்லை. தமிழக அரசு எனது மகளின் சிகிச்சைக்கு உதவ வேண்டும் என கண்ணீர் மல்க வேண்டுகோள் விடுத்துள்ளார்.

கூடுவாஞ்சேரியில்..

கூடுவாஞ்சேரி அருகே கணவனை விட்டு பிரிந்து காதலனுடன் வசித்து வந்த பெண் தற்கொலை செய்துகொண்ட சம்பவம் சோகத்தை ஏற்படுத்தியுள்ளது. செங்கல்பட்டு மாவட்டம் பொத்தேரி பகுதியை சேர்ந்தவர் கோவிந்தராஜ், இவர் பொத்தேரி அடுத்த தைலாவரம் பகுதியில் கேபிள் ஆப்ரேட்டர் தொழில் செய்து வருகிறார்.

இவருக்கு இரு மகள்கள் உள்ள நிலையில், இவரது நிறுவனத்தில் வேலை செய்த தமிழ்வாணன் என்பவரும் மூத்த மகளான பவித்ராவும், (24) காதல் வயப்பட்ட நிலையில், கோவிந்தராஜ் சென்ணை வண்ணாரப்பேட்டையை சார்ந்த புருஷோத்தமன் என்பவருக்கு கடந்த 2016 ஆம் ஆண்டு திருமணம் செய்து வைத்துள்ளார். இந்த தம்பதிகளுக்கு 6 வயது மகள் உள்ளார்.

இந்நிலையில் பவித்ரா மற்றும் தமிழ்வாணன் ஆகிய இருவரும் சென்போனில் பேசிக்கொண்டு பழைய காதலை தொடர்ந்த நிலையில் பவித்ரா மற்றும் அவரது கணவர் இருவருக்கும் பிரச்சினை ஏற்பட்டுள்ளது.

இப்பிரச்சினை காரணமாக சில மாதங்களுக்கு முன்பு, பவித்ரா தனது கணவர் புருசோத்தமனை விட்டு குழந்தையுடன் பிரிந்து தனது பழைய காதலன் தமிழ்வாணனுடன் பொத்தேரி அடுத்த தைலாவரம் பகுதியிலுள்ள வீட்டுவசதி வாரிய குடியிருப்பில் வாடகைக்கு வீடு எடுத்து வசித்து வந்துள்ளார்.

இந்நிலையில் நேற்று இரவு பவித்ரா தூக்கிட்டு தற்கொலை செய்து கொண்டார். இந்நிலையில் பவித்ராவின் உடலை கைப்பற்றிய கூடுவாஞ்சேரி போலீசார் செங்கல்பட்டு அரசு மருத்துவமனைக்கு அனுப்பி வைத்துவிட்டு தற்கொலைக்கான காரணம் குறித்து தீவிர விசாரணை நடத்தி வருகின்றனர். இச்சம்பவம் அப்பகுதியில் பெரும் பரபரப்பை ஏற்படுத்தி உள்ளது.

கள்ளக்குறிச்சியில்..

கள்ளக்குறிச்சி அருகே மனைவி மீது உள்ள கோபத்தால் இரண்டு மகன்களை கழுத்தை நெரித்து தந்தை கொன்ற சம்பவம் பெரும் பரபரப்பை ஏற்படுத்தியுள்ளது. கள்ளக்குறிச்சி மாவட்டம், கச்சிராயபாளையம் அடுத்த எடுத்தவாய்நத்தம் கிராமத்தை சேர்ந்தவர் பழனி மகன் சுரேஷ் (35).

செங்கல்பட்டு மாவட்டம் கெங்கதேவன்குப்பம் கிராமத்தை சேர்ந்தவர் சரிதா (31). 10 ஆண்டுகளுக்குமுன் இருவரும் காதலித்து திருமணம் செய்து கொண்டனர். இவர்களுக்கு பெர்லின் சஞ்சு(9), கேசவ்(6) என 2 மகன்கள். பெர்லின் 4ஆம் வகுப்பும், கேசவ் 1ஆம் வகுப்பும் படித்து வந்தனர்.

கடந்த 2 ஆண்டுகளாகவே கணவன், மனைவிக்குள் குடும்ப தகராறு இருந்துள்ளது. கடந்த 2 நாட்களுக்கு முன்பு கணவன், மனைவி இடையே தகராறு ஏற்பட்டுள்ளது. இதையடுத்து சரிதா தனது கணவர் மற்றும் மகன்களை பிரிந்து செங்கல்பட்டு மாவட்டம் கங்கதேவன்குப்பம் கிராமத்தில் உள்ள தனது தாய் வீட்டுக்கு சென்றார்.

இந்நிலையில், நேற்று முன்தினம் வீட்டில் இருந்த பெர்லின் சஞ்சு மற்றும் கேசவை சுரேஷ் கழுத்தை நெரித்து கொலை செய்து விட்டு தப்பிச்சென்றார். இந்நிலையில் சுரேஷின் தந்தை வீட்டிற்கு சென்று பார்தபோது பேரன்கள் இருவரும் சடலமாக கிடந்ததை பார்த்து அதிர்ச்சியடைந்தார்.

பின்னர் இதுகுறித்து அவர் கொடுத்தத் தகவலின் பேரில் கச்சிராயப்பாளையம் போலீசார் சம்பவ இடத்திற்கு விரைந்து வந்து சிறுவர்களின் சடலங்களை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். இது குறித்த புகாரின் பேரில் கச்சிராயப்பாளையம் போலீசார் சுரேசை தேடி வந்தனர்.

இதில் கங்கதேவன்குப்பம் பேருந்து நிறுத்தம் அருகே பதுங்கி இருந்த சுரேசை போலீசார் மடக்கி பிடித்து கைது செய்தனர். சுரேஷ் போலீசிடம் அளித்த வாக்குமூலத்தில், “என் மனைவி எனது நடத்தையில் சந்தேகப்பட்டு வந்தார். இதன் காரணமாக எங்கள் இருவருக்கும் இடையே அடிக்கடி சண்டை வந்தது. இதனால் நான் விரக்தி நிலைக்கு சென்றேன்.

என் மனைவி என்னிடம் கோபித்து கொண்டு தாய் வீட்டுக்கு சென்றார். இதில் மனமுடைந்த நான் தற்கொலை செய்து கொள்ள முடிவு செய்தேன். ஆனால் நான் சென்றுவிட்டால், குழந்தைகள் அனாதை ஆகிவிடுவார்கள் என கருதினேன். எனவே முதலில் அவர்களை முகத்தில் தலையணையை வைத்து அழுத்தி கொன்றுவிட்டேன்.

பின்னர் நான் தூக்குப்போட்டு தற்கொலை செய்து கொள்ள முயன்றேன். எனக்கு ஏற்பட்ட பிரச்சினைக்கு காரணமான மனைவி கொல்ல திட்டமிடேன். அதன்படி நான் எனது மாமியார் வீட்டுக்கு புறப்பட்டு சென்றேன்.

அப்போது என்னை போலீசார் கைது செய்துவிட்டனர்” என்று கூறியுள்ளார். மனைவி மீது உள்ள கோபத்தால் இரண்டு மகன்களை கழுத்தை நெரித்து கொன்ற சம்பவம் பெரும் பரபரப்பை ஏற்படுத்தியுள்ளது.

கிருஷ்ணகிரியில்..

கிருஷ்ணகிரி அருகே கணவனை கயிற்றால் இறுக்கி கொன்று விட்டு மனைவி கிணற்றில் குதித்து தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது.

கிருஷ்ணகிரி மாவட்டம் காவேரிப்பட்டணம் பகுதியைச் சேர்ந்தவர் ரங்கசாமி. இவர் எலக்ட்ரீசியன் வேலை செய்து வந்தார். இவருடைய மனைவி ஜெயந்தி. இவர்களுக்கு சந்தோஷ் (வயது19) என்ற மகனும், துர்கா (14) என்ற மகளும் உள்ளனர்.

சந்தோஷ் கூலி வேலைக்கு சென்று வருகிறார். தீபிகா படித்து வருகிறார். இதனிடையே, கணவன், மனைவி இடையே அடிக்கடி தகராறு ஏற்பட்டுள்ளது. இந்நிலையில் நேற்று சந்தோஷ் வேலைக்காக வெளியே சென்று விட்டார். அப்போது கணவன்-மனைவி இருவ ருக்கும் இடையே தகராறு ஏற்பட்டது.

இதனால் ஜெயந்தி மனஉளைச்சலில் இருந்துள்ளார். நேற்று முன்தினம் இரவு, மகன், மகள் தூங்க சென்று விட்டனர். அதன் பின்னர் கணவன்-மனைவியிடையே தகராறு ஏற்பட்டுள்ளது. அப்போது, ஆத்திரமடைந்த ஜெயந்தி கயிற்றை எடுத்து ரங்கசாமியின் கழுத்தில் போட்டு இறுக்கினார்.

இதில் மூச்சுத்திணறி உயிரிழந்தார். பின்னர், அவரது உடலை அறையில் வைத்து அதன் மீது துணிகளை போட்டு ஜெயந்தி மூடி மறைத்து வைத்தார். நேற்று காலை எழுந்த மகள் தீபா, அப்பா எங்கே? என கேட்டுள்ளார். அதற்கு அவர் சரியாக பதில் அளிக்கவில்லை. இதையடுத்து, அருகேயுள்ள பாட்டி சுசீலாவின் வீட்டுக்கு சென்று தெரிவித்துள்ளார்.

உடனே ரங்கசாமியின் வீட்டுக்கு வந்த சுசீலா, பேத்தியுடன் சேர்ந்து மகனை தேடியுள்ளார். அப்போது அறையில், ரங்கசாமி சடலம் துணிகளை கொண்டு மூடப்பட்டு கிடந்ததை கண்டு அலறியடித்தபடி வெளியே ஓடி வந்தனர்.

அவர்களை பார்த்ததும் ஜெயந்தி அப்பகுதியில் இருந்த 45 அடி ஆழ கிணற்றில் குதித்தார். அக்கம்பக்கத்தினர், அவரை மீட்கும் முயற்சியில் ஈடுபட்டனர். அதற்குள் நீரில் மூழ்கி ஜெயந்தி உயிரிழந்தார்.

இந்த சம்பவம் குறித்து துர்கா காவேரிப்பட்டணம் போலீசாருக்கு தகவல் தெரிவித்தார். உடனே சம்பவ இடத்திற்கு வந்த போலீசார் ரங்கசாமி, அவரது மனைவி ஜெயந்தி ஆகிய 2 பேரின் உடல்களை கைப்பற்றி பிரேத பரிசோதனைக்காக காவேரிப்–பட்டணம் அரசு மருத்துவமனைக்கு அனுப்பி வைத்தனர். இதுகுறித்து காவேரிப்பட்டணம் போலீசார் வழக்கு பதிந்து விசாரித்து வருகின்றனர்.

வாழ்க்கையில் வரும் கவலைகளும், துன்பங்களும் நிரந்தமானது அல்ல. அவற்றை தற்காலிகமாக்குவதும், நிரந்தரமாக்குவதும் நாம்அதை எதிர்கொள்வதில் தான் உள்ளது.

தற்கொலை எதற்கும் தீர்வு ஆகாது. வாழ்க்கையை மகிழ்வாய் வாழும் வழிகளை கண்டறிய துவங்கினால் வாழ்க்கை சுவாரஸ்யமானதாக இருக்கும். ஒருவேளை உங்களுக்கு மன அழுத்தம் ஏற்பட்டாலோ, தற்கொலை எண்ணம் உருவானாலோ அதிலிருந்து மீண்டும் வர கீழ்காணும் எண்களை அழைக்கலாம்.

மதுரையில்..

திருமணமாகி பல ஆண்டுகளாகியும் குழந்தை இல்லாததால் மனமுடைந்த மதுரையைச் சேர்ந்த தம்பதியர் கொடைக்கானலுக்கு சுற்றுலா சென்று அங்கேயே தற்கொலை செய்து கொண்டனர்.

மதுரை: திருமணமாகி 13 ஆண்டுகள் ஆகியும் குழந்தை இல்லாத ஏக்கத்தில் மதுரையைச் சேர்ந்த தம்பதியர் தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது.

நாட்டில் நடைபெறும் பாதி பிரச்சினைகளுக்கு அக்கம்பக்கத்தினரும், நாகரீகமே தெரியாத சில உறவினர்களும்தான் காரணம். ஒரு இளைஞனுக்கோ, இளம்பெண்ணுக்கோ திருமணம் சிறிது தள்ளிச் சென்றாலே போதும்.. உடனே கிளம்பி வந்து விடுவார்கள் மக்கள்.

“ஏன் உனக்கு திருமணம் தள்ளிப் போயிட்டே இருக்கு”.. “ஜாதகத்தில் ஏதாவது பிரச்சினை இருக்கா”.. பையனுக்கு ஏதாவது குறை இருக்கும் போல” என வெறும் வாய்க்கு அவல் கிடைத்ததை போல பேசி பேசியே சம்பந்தப்பட்டவர்களை பதட்டம் அடைய செய்து விடுவார்கள்.

திருமணம் தானே பிரச்சினை.. சரி திருமணமும் செய்தாகிவிட்டது என்றாலும் அவர்கள் விட மாட்டார்கள். திருமணமாகி 3 மாதத்திலேயே வீட்ல விசேஷம் இருக்கா என கேட்டு நச்சரிக்க தொடங்கி விடுவார்கள்.

இவர்கள் கொடுக்கும் அழுத்தம்தான், சம்பந்தப்பட்டவர்களை ஏதோ குறை உள்ள மனிதர்கள் போல மாற்றிவிடும். இதுவே சில விபரீதத்திற்கும் காரணமாகி விடுகிறது. அதுபோன்ற ஒரு சம்பவம்தான் மதுரையில் நடந்திருக்கிறது. மதுரை மாவட்டம் தல்லாகுளத்தைச் சேர்ந்தவர்கள் ராஜ்குமார் – சித்ரா புஷ்பம் தம்பதியர்.

இவர்களுக்கு 13 ஆண்டுகளுக்கு முன்பு திருமணம் நடைபெற்றுள்ளது. ஆனால் அவர்களுக்கு குழந்தை இல்லை. இதனால் உறவினர்களும், அக்கம்பக்கத்தினரும் பேசும் பேச்சுகள் இந்த தம்பதியரை மிகவும் காயப்படுத்தியுள்ளது. மேலும், விசேஷ வீடுகளுக்கு கூட செல்ல முடியாத நிலை ஏற்பட்டிருக்கிறது.

அவர்களும் பல மருத்துவமனைகளுக்கும், கோயில்களுக்கும் ஏறி இறங்கியுள்ளனர். ஆனால், குழந்தை பாக்கியம் கிடைக்கவில்லை. இதனால் விரக்தியடைந்த தம்பதியர் தங்கள் உயிரை மாய்த்துக் கொள்ள முடிவு செய்தனர். அதன்படி, கொடைக்கானலுக்கு நேற்று முன்தினம் அவர்கள் சென்றுள்ளனர்.

அங்கு பல இடங்களை அவர்கள் சுற்றி பார்த்துள்ளனர். பின்னர் ஒரு அறை எடுத்து தங்கிய அவர்கள், அன்றைக்கு இரவே தூக்கிட்டு தற்கொலை செய்து கொண்டனர். இதுகுறித்து கொடைக்கானல் போலீஸார் வழக்கு பதிவு செய்து விசாரணை நடத்தி வருகிறார்கள்.

ராஜஸ்தானில்..

இந்திய மாநிலம் ராஜஸ்தானில், 10ஆம் வகுப்பு மாணவன் வகுப்பறையிலேயே தூக்கிட்டு தற்கொலை செய்துகொண்ட சம்பவம் அதிர்ச்சியை ஏற்படுத்தியுள்ளது. ராஜஸ்தான் மாநிலம் கொட்புட்லி – பிஹ்ரோர் மாவட்டத்தச் சேர்ந்த பள்ளி மாணவர் சச்சின்.

இவர் பிரஹ்புரா பகுதியில் உள்ள தனியார் பள்ளி ஒன்றில் 10ஆம் வகுப்பு படித்து வந்தார். இந்த நிலையில், ஆசிரியர் திட்டியதால் சச்சின் மனமுடைந்து இருந்ததாக கூறப்படுகிறது. இதனால் வகுப்பறையில் யாரும் இல்லாத சமயம் சச்சின் தூக்கிட்டு தற்கொலை செய்து கொண்டார்.

இதுகுறித்து தகவல் அறிந்த பொலிஸார் உடனடியாக பள்ளிக்கு விரைந்தனர். மாணவனின் உடலைக் கைப்பற்றிய பொலிஸார், தற்கொலை குறித்து வழக்குப்பதிவு செய்து விசாரணை மேற்கொண்டனர்.

முதற்கட்ட விசாரணையில், விவேக் மற்றும் ராஜ்குமார் ஆகிய ஆசிரியர்கள் இருவர் சச்சினுக்கு தொல்லை கொடுத்து வந்துள்ளனர். ஆசிரியர்கள் சச்சினை சாதி ரீதியில் தொல்லை கொடுத்தாக தெரிகிறது.

சச்சினை தேர்வில் தோல்வியடைய வைத்து வாழ்வை சீரழித்து விடுவதாக அவர்கள் மிரட்டியதுடன், தாக்கியும் உள்ளதாக கூறப்படுகிறது. இதற்கிடையில், மாணவனை ஆசிரியர்கள் கொலை செய்துவிட்டதாக கிராம மக்கள் காவல் நிலையத்தை முற்றுகையிட்டு போராட்டத்தில் ஈடுபட்டதால் பரபரப்பு ஏற்பட்டது.

கரூரில்..

“எங்க ரெண்டு குடும்பத்துக்கும், ஒருத்தவங்க பேசுறது மத்தவங்களுக்குப் புரியாது. ஆனா, மொழி தாண்டி கொஞ்சம் கொஞ்சமா மனுஷங்களை புரிஞ்சிக்க ஆரம்பிச்சுட்டாங்க. இப்போ நல்லபடியா கல்யாணம் பண்ணி வெச்சிட்டாங்க. ரொம்ப சந்தோஷமா இருக்கு!” – மணப்பெண் பிரியங்கா

கரூரைச் சேர்ந்த பி.டெக் பட்டதாரிப் பெண் பிரியங்கா, துருக்கியைச் சேர்ந்த தன் காதலரை, இருவீட்டார் சம்மதத்துடன் திருமணம் செய்துகொண்டார். கரூரில் உள்ள பசுபதிபாளையம் பகுதியைச் சேர்ந்தவர் பிரியங்கா. பி.டெக் படித்துள்ள இவர், தற்போது டெல்லியில் உள்ள தனியார் நிறுவனத்தில் வேலைபார்த்து வருகிறார்.

டெல்லியில், ஒன்றரை வருடங்களுக்கு முன்பு அஹமத் ஜெமில் கயான் என்பவருடன், பிரியங்காவுக்கு நட்பு ஏற்பட்டுள்ளது. துருக்கி நாட்டைச் சேர்ந்த இவர், டெல்லி மற்றும் துருக்கியில் தொழில் செய்து வருகின்றார். நண்பர்களாக அறிமுகமாகிய இவர்கள், கடந்த 6 மாதங்களாகக் காதலித்து வந்துள்ளனர்.

இதையடுத்து, இருவரும் திருமணம் செய்துகொள்ள முடிவெடுத்தனர். இருவீட்டாரும் சம்மதம் தெரிவித்த நிலையில், நேற்று கரூரில் உள்ள பிரியங்கா வீட்டில் திருமணம் நடைபெற்றது. இந்தத் திருமணத்தில், முன்னாள் போக்குவரத்துத்துறை அமைச்சர் எம்.ஆர். விஜயபாஸ்கர் கலந்து கொண்டு மணமக்களை நேரில் வாழ்த்தினார்.

காதல் பயணம் குறித்து பிரியங்காவிடம் பேசினோம். “நாங்க ரெண்டு பேரும் முதன்முதலாக டெல்லியில் சந்திச்சோம். கிட்டத்தட்ட ஒன்றரை வருஷமா இவரை தெரியும். ட்ராவல் பண்ணும்போதுதான், இவரை சந்திச்சேன். ஆரம்பத்துல ஃப்ரெண்ட்ஸா பழகினோம். அப்புறம், ரெண்டு பேருக்கும் ஒருத்தரை ஒருத்தர் பிடிச்சிருந்தது. ஆறு மாசத்துக்கு முன்னாடிதான், புரொப்போஸ் பண்ணிக்கிட்டோம்.

அதுக்குப் பிறகு, நாங்க ரெண்டு பேரும் எங்களோட வீட்டுல பேசினோம். அவங்க வீட்டுல பத்து நிமிஷத்துல ஓகே சொல்லிட்டாங்க. அப்புறம், வீடியோ கால் பண்ணிப் பேசினோம். எங்க வீட்டுல ஒரு வாரம் கழிச்சு ஒத்துக்கிட்டாங்க.

இவரை கரூருக்கு கூட்டிட்டு வந்து, எங்க ஃபேமிலிகிட்ட அறிமுகப்படுத்தி வெச்சேன். இவரை எங்க வீட்டுல எல்லோருக்கும் ரொம்பப் பிடிச்சுபோச்ச்சு. நாடு, மொழி, மதம்னு வேறுபாடு இருந்தாலும், எங்க ரெண்டு பேரையும் புரிஞ்சிக்கிட்டு சம்மதம் தெரிவிச்சிட்டாங்க.

இப்போ மொழிதான் பிரச்னையா இருக்கு. நான் துருக்கி மொழி கத்துக்கிட்டு இருக்கேன். அவர், தமிழ் கத்துக்கிட்டு இருக்கார். இன்னும் ஆறு மாசத்துல முழுசா பேச ஆரம்பிச்சிடுவோம். அவரை தமிழ் பேச வெச்சிடுவோம்’’ என்று சிரித்தவர்,

குடும்பத்துக்கிட்ட சொல்லுவேன். எங்க ரெண்டு குடும்பத்துக்கும், ஒருத்தவங்க பேசுறது மத்தவங்களுக்குப் புரியாது. ஆனா, மொழி தாண்டி கொஞ்சம் கொஞ்சமா மனுஷங்களை புரிஞ்சிக்க ஆரம்பிச்சுட்டாங்க. இப்போ நல்லபடியா கல்யாணம் பண்ணி வெச்சிட்டாங்க. ரொம்ப சந்தோஷமா இருக்கு” எனப் பூரிப்புடன் பேசினார் பிரியங்கா.

திண்டுக்கல்லில்..

திண்டுக்கல் மாவட்டம் நிலக்கோட்டை அருகே, ஆசை ஆசையாக கட்டிக்கொண்டிருந்த வீட்டில் கணவர் மீது மின்சாரம் பாய்ந்த நிலையில், அவரை தள்ளிவிட்டு காப்பாற்றிவிட்டு, மனைவி உயிரை விட்டுள்ளார். இந்த சம்பவம் சோகத்தை ஏற்படுத்தி உள்ளது.

திண்டுக்கல் மாவட்டம் நிலக்கோட்டை அருகே குளத்துப்பட்டியை சேர்ந்த 37 வயதாகும் பாண்டி கார் டிரைவராக பணியாற்றி வருகிறார். இவருடைய மனைவி 30வயதாகும் உதயசூரியா நிலக்கோட்டையில் உள்ள பெட்ரோல் விற்பனை நிலையத்தில் ஊழியராக பணியாற்றி வந்தார். இந்த தம்பதிக்கு ஒரு மகன், ஒரு மகள் இருக்கிறார்கள்.

இன்று தேர்தல் நடக்கட்டும்.. மோடி “கன்ஃபார்மா” பிரதமர் ஆவார்! பட் காங்கிரஸும் டுவிஸ்ட் வைக்குதே? இன்று தேர்தல் நடக்கட்டும்.. மோடி “கன்ஃபார்மா” பிரதமர் ஆவார்! பட் காங்கிரஸும் டுவிஸ்ட் வைக்குதே?

நிலக்கோட்டை அருகே உள்ள மீனாட்சிபுரத்தில் டிரைவர் பாண்டி புதிதாக வீடு ஒன்றை கட்டி வருகிறார். அண்மையில் தான் அந்த வீட்டிற்கு மேல்தளம் (கான்கிரீட் ) போட்டார்கள். மாடிக்கான வேலை நடப்பதால் வெளிச்சத்துக்காக, வீட்டுக்குள் தற்காலிகமாக மின்விளக்கு ஒன்றை அவர் எரிய விட்டிருக்கிறார்.

இந்நிலையில் சனிக்கிழமை இரவு நேரத்தில் கணவன்-மனைவி 2 பேரும் புதிய வீட்டுக்கு சென்றுள்ளார்கள். அங்கு தாங்கள் ஆசையோடு கட்டி வரும் வீட்டிற்கு தண்ணீரை குழாய் மூலம் பீய்ச்சி அடித்தனர். அப்போது விளக்குக்கு பயன்படுத்திய வயரில் இருந்து மின்கசிவு ஏற்பட்டிருந்தது.

அதன் மீது தண்ணீர் பட்டவுடன், எதிர்பாராதவிதமாக பாண்டி மீது மின்சாரம் பாய்ந்தது. இதனால் அதிர்ச்சி அடைந்த பாண்டி கூச்சலிட்டார். இதையடுத்து கொஞ்சம் கூட யோசிக்காத உதயசூரியா தனது கணவரை காப்பாற்றுவதற்காக அவரை அங்கிருந்து தள்ளி விட்டார். இதனால் உதயசூரியா மீது மின்சாரம் பாய்ந்தது. இதனையடுத்து அவர்கள் 2 பேரும் தூக்கி வீசப்பட்டனர்.

அக்கம்பக்கத்தினர் அவர்களை மீட்டு சிகிச்சைக்காக திண்டுக்கல் அரசு மருத்துவமனையில் சேர்த்தனர். அங்கு பரிசோதனை செய்த டாக்டர், ஏற்கனவே உதயசூரியா இறந்து விட்டதாக தெரிவித்தனர். உயிருக்கு ஆபத்தான நிலையில் பாண்டிக்கு தீவிர சிகிச்சை அளிக்கப்பட்டு வருகிறது.

இதுகுறித்து நிலக்கோட்டை போலீஸ் இன்ஸ்பெக்டர் குரு வெங்கட்ராஜ் வழக்குப்பதிவு செய்து விசாரணை நடத்தி வருகிறார். கணவரை காப்பாற்ற முயன்றபோது மின்சாரம் பாய்ந்து மனைவி பலியான சம்பவம், திண்டுக்கல் நிலக்கோட்டை பகுதியில் பெரும் சோகத்தை ஏற்படுத்தி உள்ளது.

சென்னையில்..

சென்னைஅயனாவரம் பூசனம் தெருவில் வசித்து வந்தவர் கீதா கிருஷ்ணன் (வயது 52). இவர் இஎஸ்ஐ மருத்துவமனையில் தூய்மை பணியாளர்களுக்கு மேற்பார்வையாளராக பணியாற்றி வந்தார். இந்நிலையில் நேற்று (ஆகஸ்டு. 23) இரவு இவரது வீட்டிற்கு ஓட்டேரியைச் சேர்ந்த லட்சுமிபதி என்பவர் வந்து நீண்ட நேரமாக கதவை தட்டி உள்ளார்.

நீண்ட நேரமாகியும் கதவு திறக்கப்படாததால் உடனே சந்தேகமடைந்த லட்சுமிபதி ஜன்னல் வழியாக பார்த்து உள்ளார்.அப்போது கீதா கிருஷ்ணன் சடலமாக கிடப்பதை கண்டு அதிர்ச்சியடைந்தார்.

பின்னர் தகவல் அறிந்த அயனாவரம் போலீசார் சம்பவ இடத்திற்கு வந்து விசாரித்த போது, கீதா கிருஷ்ணன் தனது 6 வயது மகள் மானசாவை கொன்றுவிட்டு, தானும் உயிரை மாய்த்து கொண்டது தெரிய வந்தது. அதனைத் தொடர்ந்து, 2 பேரின் உடலையும் மீட்ட போலீசார், பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர்.

தொடர்ந்து போலீசார் விசாரணை நடத்திய போது கடன் தொல்லையால் குடும்பமே உயிரிழந்த சோக சம்பவம் தெரியவந்ததாக கூறினர். அதாவது கோட்டூர்புரத்தில் வசித்து வந்த கீதா கிருஷ்ணனுக்கு கடந்த 2005 ஆம் ஆண்டு பேராசிரியை கல்பனா என்பவருடன் காதல் திருமணம் நடந்துள்ளது.

இவர்களுக்கு குணாலிஸ்ரீ மற்றும் மானசா என இரு மகள்கள் இருந்து வந்த நிலையில் கீதா கிருஷ்ணன் வேலைக்கு செல்லாமல் ஆன்லைன் ரம்மி சூதாட்டத்தில் ஈடுப்பட்டு பல பேரிடம் கடன் வாங்கியதாக தெரிகிறது.

இதனால் மனைவி கல்பனாவுக்கும், கீதா கிருஷ்ணனுக்கும் அடிக்கடி சண்டை ஏற்பட்ட நிலையில், ஒரு கட்டத்தில் கடன் கொடுத்தோர் நெருக்கடி கொடுத்ததால் குழந்தைகளை கொன்றுவிட்டு தற்கொலை செய்து கொள்ள கீதா கிருஷ்ணன் முடிவு செய்ததாக கூறப்படுகிறது.

மேலும் கடந்த 2020 ஆம் ஆண்டு கீதா கிருஷ்ணன் மூத்த மகள் குணாலினிஸ்ரீயை கொலை செய்துவிட்டு மனைவி கல்பனா தற்கொலை செய்து கொண்டு உள்ளார். அப்போது அதிர்ச்சியில் உறைந்த கீதா கிருஷ்ணன் தற்கொலை முடிவில் இருந்து மனம் மாறி இளைய மகள் மானசாவுடன் திருப்பதிக்கு தப்பிச்சென்ற நிலையில், அவர் சென்னை வந்த போது போலீசாரால் கைது செய்யப்பட்டு சிறையில் அடைக்கப்பட்டு உள்ளார்.

இந்நிலையில் 3 மாத சிறை தண்டனைக்குப் பிறகு, சமீபத்தில் ஜாமீனில் வெளிவந்த கீதா கிருஷ்ணன் தனது மகள் மானசாவுடன் அயனாவரத்தில் தங்கி வந்துள்ளார். மேலும் கடன் தொல்லை மீண்டும் இவரை சூழ்ந்ததால் ஒருவரிடம் கடன் வாங்கி அந்த கடனை அடைத்து வந்துள்ளார்.

இதற்கிடையே கீதா கிருஷ்ணனுக்கு சொந்தமான வீட்டை லட்சுமிபதி என்பவருக்கு லீசுக்கு விடுவதாக கூறியுள்ளார்.அதற்காக கீதா கிருஷ்ணன் 2 லட்சத்து 50 ஆயிரம் ரூபாய் பெற்றுக் கொண்டதாக தெரிகிறது. ஆனால் பணத்தை வாங்கிய கீதா கிருஷ்ணன் வீட்டை லீசுக்கு விடவில்லை என்று கூறப்படுகிறது. இதனால் லட்சுமிபதி பணத்தை திருப்பி தரும்படி கேட்டுள்ளார்.

ஆனால் அவர் தரவில்லை. இந்த நிலையில் தான் பணத்தை வாங்க அவரது வீட்டிற்கு லட்சுமிபதி சென்ற போது, தன் மகளை கொலை செய்து விட்டு கீதா கிருஷ்ணன் உயிரை மாய்த்து கொண்டதாக தெரிய வந்து உள்ளது. இது குறித்து போலீசார் தொடர்ந்து விசாரணை நடத்தி வருகின்றனர்.