கோவையில்..

கோவை பொன்னையராஜபுரம் பகுதியைச் சேர்ந்த பலராமன் என்பவரது மகள் நேத்ராவதி (வயது 36). நேத்ராவதிக்கும் கார்த்திக் லட்சுமி நாராயணன் என்பவருக்கும் கடந்த 2016 ஆம் ஆண்டு கும்பகோணத்தில் பெற்றோர் முன்னிலையில் திருமணம் நடைபெற்றது.

கார்த்திக் லட்சுமி நாராயணன் ஹைதராபாத்தில் உள்ள சாப்ட்வேர் கம்பெனியில் பணிபுரிந்து வந்தார். திருமணத்தின் போது 15 லட்சம் ரூபாய் பணம் 100 சவரன் தங்க நகை மற்றும் 15 கிலோ வெள்ளி பொருட்கள் வரதட்சணையாக கொடுக்கப்பட்டது.

திருமணத்திற்கு பிறகு கார்த்திக் லட்சுமி நாராயணன் வேறு நிறுவனத்திற்கு பணிக்கு மாறியதால் பெங்களூருக்கு மனைவி நேத்ராவதியுடன் குடி பெயர்ந்து வசித்து வந்தார்.

பின்னர் 2020 ஆம் ஆண்டு ஒரு கோடியே 75 லட்ச ரூபாய் மதிப்பிலான வீட்டை வாங்கி அதில் வசித்து வந்தனர். திருமணத்திற்கு முன்பு கார்த்திக் லட்சுமி நாராயணன் நடத்தி வந்த நிறுவனத்தில் ஏற்பட்ட பிரச்சினைகளை தீர்க்க வழக்குகளுக்காக நேத்ராவதியின் குடும்பத்தார் 10 லட்ச ரூபாய் வரை செலவு செய்தனர்.

திருமணம் ஆகி 6 ஆண்டுகளாகியும் இவர்களுக்கு குழந்தை பிறக்கவில்லை. இதை தொடர்ந்து பெங்களூருவில் உள்ள செயற்கை கருத்தரித்தல் மையத்தில் நேத்திராவதிக்கு சிகிச்சை அளிக்கப்பட்டது .ஆனாலும் கரு கலைந்து போனது .

இந்நிலையில் கார்த்திக் லட்சுமி நாராயணனுக்கு பெங்களூரில் உள்ள சுவாமி நித்தியானந்தாவின் பிரசங்க கூட்டத்திற்கு அடிக்கடி சென்று வருவது வழக்கமாக இருந்துள்ளது.

அந்த சமயத்தில் மகேந்திரன் என்பவர் மூலம் பிரபுதாநந்தா என்ற சாமியார் மத்திய பிரதேச மாநிலம் தட்டுவாடா என்ற இடத்தில் ஆசிரமம் நடத்தி வருவதாக தெரியவந்தது .

தொடர்ந்து பிரபுதாநந்தாவை மத்திய பிரதேசத்திற்கு சென்று கார்த்திக் லட்சுமி நாராயணன் நேரில் சென்று சந்தித்து அவர் கூறிய பூஜை முறைகளை தொடர்ந்து செய்து வந்துள்ளார்.

கார்த்திக் லட்சுமி நாராயணன் இரவு நேரங்களிலும் நவராத்திரி போன்ற முக்கிய தினங்களிலும் ஆக்ரோஷமான பூஜை முறைகளை செய்து வருவதை பார்த்த நேத்ராவதிக்கு அவருடைய நடவடிக்கைகள் அதிர்ச்சியை ஏற்படுத்தியது .

தொடர்ந்து இதுகுறித்து நேத்ராவதி தனது கணவரிடம் கேட்ட போது குழந்தை வேண்டும் என்பதற்காக தான் பூஜைகள் செய்து வருவதாக கூறியிருக்கிறார் மேலும் பிரபுதாநந்தா சாமியாரிடம் குழந்தை வேண்டுமென முறையிடு அப்போதுதான் நமக்கு குழந்தை கிடைக்கும் என கூறியிருக்கிறார்.

இதை நம்பிய நேத்ராவதி தனது கணவருடன் மத்திய பிரதேசத்தில் உள்ள பிரபுதாநந்தா சுவாமிகள் ஆசிரமத்திற்கு சென்று 20 நாட்கள் தங்கி இருந்து கணவனின் கட்டாயத்தின் பேரில் சேவை செய்துள்ளார்.

இந்நிலையில் கடந்த ஆண்டு பிப்ரவரி மாதம் கோவைக்கு நேத்ராவதி வந்திருந்தார். அதன் பிறகு அவரது தந்தைக்கு விபத்து ஏற்பட்டதால் தொடர்ந்து கோவையிலேயே அவர் இருந்துள்ளார்.

மீண்டும் ஏப்ரல் மாதம் பெங்களூருக்கு கணவர் வீட்டுக்கு அவர் சென்றுள்ளார். அப்போது அவரது கணவர் கார்த்திக் லட்சுமி நாராயணன் தனது மனைவி நேத்ராவதியை அழைத்துக் கொண்டு பெங்களூருக்கு வந்திருந்த பிரபுதாநந்தா சுவாமிகளை சந்திக்க சென்றுள்ளார்.

அப்போது நேத்ராவதியிடம் தனிமையில் பேசிய சாமியார் பிரபுதாநந்தா தனது ஆசைகளை நிறைவேற்றினால் தான் உனக்கு குழந்தை பிறக்கும் என்றும் தனது ஆசைக்கு இணங்காவிட்டால் உன்னையும் கணவனையும் பிரித்து விடுவேன் என கூறி இருக்கிறார்.

இதை கேட்டு அதிர்ச்சி அடைந்த நேத்ராவதி தனது கணவரிடம் இது குறித்து கூறியுள்ளார். அப்போது அவரது கணவர் குருஜி சொல்படி நடந்து கொள் என்று கூறியிருக்கிறார்.

இதற்கிடையே கார்த்திக் லட்சுமி நாராயணனின் நண்பர் ஒருவரின் மனைவி பிரதீபா என்பவர் செல்போன் மூலம் நேத்ராவதியை தொடர்பு கொண்டு உள்ளார். அவரும் பிரபுதாநந்தா சுவாமிகள் சொல்வதை கேட்டு நடக்காவிட்டால் குழந்தை பெற வாய்ப்பில்லை என்றும் கூறியிருக்கிறார் .

இதற்கு நேத்ராவதி மறுப்பு தெரிவித்துள்ளார். இதை தொடர்ந்து கார்த்திக் லக்ஷ்மி நாராயணன் குருஜி நந்தாவின் ஆசைகளை நிறைவேற்றாவிட்டால் விவாகரத்து செய்து விடுவேன் என கூறி மிரட்டியுள்ளார்.

பின்னர் நேத்ராவதியை கோவையில் உள்ள அவரது பெற்றோர் வீட்டிற்கு அழைத்து வந்து விட்டு விட்டு சென்று விட்டார். இந்நிலையில் கார்த்திக் லட்சுமி நாராயணன் அனுமதி இல்லாமல் நேத்ராவதி உள்ளே நுழையக்கூடாது என பெங்களூரில் உள்ள அப்பார்ட்மெண்ட் நிர்வாகத்திடம் கடிதம் கொடுத்துள்ளார்.

இதனால் அதிர்ச்சி அடைந்த நேத்ராவதி தனது கணவர் கார்த்திக் லக்ஷ்மி நாராயணன், பிரபுதாநந்தா சுவாமிகள் மற்றும் அவரது தோழி பிரதீபா மீது பெங்களூரு மாரத்தஹள்ளி போலீஸ் ஸ்டேஷனில் புகார் அளித்தார்.

ஆனால் எந்த நடவடிக்கையும் இல்லாததால் அவர் கோவைக்கு மீண்டும் திரும்பி வந்தார். தொடர்ந்து தனது கணவரிடம் போனில் பேச முயன்ற போது கார்த்திக் லஷ்மி நாராயணன் தனது குருஜி பிரபுதாநந்தா சுவாமிகள் உன்னுடன் வாழக்கூடாது என சொல்லிவிட்டார் என கூறியுள்ளார்.

அதன் பிறகு சிறிது நேரம் கழித்து நேத்ராவதியுடன் போன் மூலம் பேசிய பிரபுதாநந்தா சாமிகள் என்னுடைய ஆசைகளை நிறைவேற்றினால் மட்டுமே உன்னை கணவனுடன் சேர்த்து வைக்க பூஜைகள் செய்வேன் என கூறி மிரட்டியுள்ளார் .

அதேபோல பிரதீபாவும் வாட்ஸ் அப் மெசேஜ்கள் அனுப்பி குருஜி சொல்வதை கேட்டுக் கொள் என மிரட்டியுள்ளார். இதை தொடர்ந்து நேத்ராவதி தனது கணவர் கார்த்தி லஷ்மி நாராயணன் ,பிரபுதாநந்தா சுவாமிகள் மற்றும் கார்த்திக் லட்சுமி நாராயணனின் தோழி பிரதீபா ஆகிய மூவர் மீதும் நடவடிக்கை எடுக்க வேண்டும் என கோவை மாநகர போலீஸ் கமிஷனரிடம் புகார் அளித்தார். புகாரின் பேரில் கோவை அனைத்து மகளிர் கிழக்கு போலீசார் விசாரணை நடத்தி வருகின்றனர்.

தஞ்சாவூரில்..

தஞ்சாவூர் மாவட்டம் கும்பகோணம் அருகே திருபுவனம் தெற்கு வீதியில் விக்னேஷ் –(20) தம்பதியினர் வசித்து வந்தனர். விக்னேஷ் சரக்கு ஆட்டோ டிரைவர். பி.எஸ்சி. நர்சிங் படித்து வந்த துர்கா பெற்றோரின் எதிர்ப்பையும் மீறி தான் காதலித்த விக்னேஷை கடந்த ஆண்டு திருமணம் செய்து கொண்டார்.

அப்போது மகளை காணவில்லை என துர்காவின் பெற்றோர் போலீசில் புகார் அளித்த நிலையில் துர்கா – விக்னேஷ் காதல் ஜோடினர் திருவிடைமருதூர் காவல் நிலையத்தில் தஞ்சம் அடைந்தனர். இதனையடுத்து போலீசார் துர்காவின் பெற்றோரை அழைத்து சமாதானம் செய்து அனுப்பிவைத்தனர்.

அதன்பின்னர் திருபுவனத்தில் தனது கணவருடன் குடும்பம் நடத்தி வந்த துர்கா நிறைமாத கர்ப்பிணியாக இருந்துள்ளார். இதற்கிடையே கணவன், மனைவி இடையே அடிக்கடி குடும்ப தகராறு ஏற்பட்டு வந்துள்ளது.

இந்நிலையில் நேற்று முன்தினம் இரவு வீட்டில் தனியாக இருந்த துர்கா தூக்கு போட்டு தொடங்கியுள்ளார். வீட்டில் சத்தம்கேட்டு நச்தேகம் அடைந்த உறவினர்கள் சென்று பார்த்தபோது அதிர்ச்சி அடைந்தனர்.

உடனடியாக துர்காவை உறவினர்கள் மீட்டு சிகிச்சைக்காக மருத்துவமனை கொண்டு சென்றனர். ஆனால் செல்லும் வழியில் துர்கா பரிதாபமாக இறந்துள்ளார்.

இது குறித்து போலீசார் வழக்கு பதிவு செய்து விசாரணை மேற்கொண்டு வருகின்றனர். இந்த சம்பவம் அந்த பகுதியில் பெரும் சோகத்தை ஏற்படுத்தி உள்ளது.திருமணமாகி ஒரு ஆண்டே ஆவதால் கும்பகோணம் ஆர்.டி.ஓ. மேல்விசாரணை நடத்தி வருகிறார்.

ராமநாதபுரத்தில்..

ராமநாதபுரம் மாவட்டம் பரமக்குடியை சேர்ந்த சஞ்சீவ் குமார் (18), என்ற இளைஞர் திருப்பூரில் டாஸ்மாக் கடையில் வேலை பார்த்து வந்தார். இவர் தனது பிறந்த நாளை சென்னையில் உள்ள தன்னுடைய காதலியுடன் கொண்டாடுவதற்காக கடந்த 7 ம் தேதி திருப்பூரில் இருந்து சென்னைக்கு வந்திருக்கிறார்.

சென்னையில் காதலியுடன் பல்வேறு இடங்களை சுற்றிப் பார்த்து விட்டு 7ம் தேதி இரவு மீண்டும் திருப்பூர் செல்வதற்காக கோயம்பேடு பேருந்து நிலையத்திற்கு சென்றார். அவரது காதலியான 16 வயது சிறுமி வாங்கி வந்த குளிர்பானத்தை சஞ்சீவ் குமார் குடித்துள்ளார்.

அதனை குடித்து முடித்ததும், என்னை மன்னித்து விடு உன்னை பழி வாங்குவதற்காகவே சென்னைக்கு வரவழைத்து குளிர்பானத்தில் எலி மருந்தை கலந்து கொடுத்தேன், என காதலியான சிறுமி சஞ்சய் குமாரிடம் அழுது கொண்டே தெரிவித்ததாக கூறப்படுகிறது. இதனால் அதிர்ச்சி அடைந்த அவர் சுதாரிப்பதற்குள் அடுத்த அதிர்ச்சி நடந்தது.

அதாவது, சிறுமி, கோயம்பேடு பேருந்து நிலையம் வந்திருப்பதை அறிந்த அவரது தாயார் மற்றும் மூத்த சகோதரி ஆகிய இருவரும் அங்கு வந்து சஞ்சீவ் குமாரை கடுமையாக தாக்கி செல்போனையும் உடைத்துள்ளனர்.

இதனால் பயந்து போன சஞ்சய் குமார் இரவு முழுவதும் கோயம்பேடு பேருந்து நிலையத்திலேயே தங்கி விட்டு மறுநாள் காலை ஆவடியில் உள்ள தனது மாமா செல்வராஜ் என்பவரது வீட்டிற்குச் சென்றுள்ளார்.

அங்கு சென்ற அவர், தான் காதலித்த பெண் தனக்கு விஷம் கொடுத்து விட்டதாகக் கூறியதைத் தொடர்ந்து அவரை அருகில் உள்ள ஆரம்ப சுகாதார நிலையத்திற்கு அழைத்துச் சென்று பரிசோதனை செய்துள்ளனர். அதன் பின்னர் உடல்நிலை மோசமடையவே கீழ்ப்பாக்கம் அரசு மருத்துவமனையில் அனுமதிக்கப்பட்டுள்ளார்.

இதனிடையே சிகிச்சையில் இருந்த சஞ்சீவ் குமார், தன்னுடைய காதலி, தனக்கு குளிர்பானத்தில் எலி மருந்தை கலந்து கொடுத்து விட்டதாகக் காவல் துறையினரிடம் மரணம் வாக்குமூலம் கொடுத்திருக்கிறார். பின்னர் தனியார் மருத்துவமனைக்கு அழைத்துச் செல்லும் வழியில் அவர் உயிரிழந்து விட்டார்.

பின்னர் சஞ்சீவ் குமாரின் உடல் அவருடைய சொந்த ஊரான பரமக்குடிக்கு கொண்டு சென்றுள்ளனர். இதனை கொலை வழக்காக பதிவு செய்திருப்பதால், போலீசாரின் உத்தரவின்பேரில் சஞ்சீவ் குமாரின் உடல் பிரேத பரிசோதனைக்காக பரமக்குடி அரசு மருத்துவமனைக்கு கொண்டுசெல்லப்பட்டது.

இதைத் தொடர்ந்து கோயம்பேடு போலீசார் கொலை, கொலை முயற்சி, ஆபாசமாக பேசுதல், தாக்குதல் உள்ளிட்ட நான்கு பிரிவுகளின் கீழ் வழக்குப் பதிவு செய்து சம்பவ இடத்தில் உள்ள சிசிடிவி காட்சிகளை வைத்து விசாரணை நடத்தியுள்ளனர்.

முதற்கட்ட விசாரணையில் சஞ்சீவ் குமார் கடந்த மூன்று ஆண்டுகளுக்கு முன்பாக காதலி சிறுமிக்கு இன்ஸ்டாகிராம் மூலமாக பழக்கம் ஏற்பட்டிருக்கிறது. நாளடைவில் அது காதலாக மாறிய நிலையில், கடந்த ஆண்டு சிறுமியின் பெற்றோருக்கு இந்த விவகாரம், தெரியவந்ததை அடுத்து அண்ணா நகர் காவல் நிலையத்தில் அளித்த புகார் அளித்தனர். அதன்பேரில் சஞ்சீவ் குமாரை (17) கைது செய்து கூர்நோக்கு இல்லத்திற்கு அனுப்பி இருக்கிறார்கள்.

அவர் வெளியே வந்தபிறகும் காதல் தொடர்ந்துள்ளது. இந்த நிலையில் காதலியான சிறுமி சஞ்சீவ் குமாருக்கு விஷம் கலந்த குளிர்பானம் கொடுத்து கொலை செய்ததாக புகாரின் அடிப்படையில் போலீசார் விசாரணை நடத்துகின்றனர்.

புதுச்சேரியில்..

புதுச்சேரியில் குடிபோதையில் ஏற்பட்ட தகராறு காரணமாக பிறந்து 29 நாளே ஆன பெண் குழந்தையை தாயே மணலில் புதைத்து கொலை செய்துள்ள சம்பவம் பரபரப்பை ஏற்படுத்தியுள்ளது.

புதுச்சேரியை அடுத்த மூர்த்திகுப்பம் – புதுகுப்பம் கடற்கரையில் இன்று பச்சிளம் குழந்தையின் கால் மட்டும் மணலில் புதைந்த நிலையில் தெரிந்தது. அப்பகுதி வழியாக சென்றவர்கள் இதனை கண்டு அதிர்ச்சி அடைந்தனர். தொடர்ந்து இது குறித்து கிருமாம்பாக்கம் போலிசாருக்கும் தகவல் தெரிவித்தனர்.

தகவலின் பேரில் சம்பவ இடத்திற்கு வந்த போலிசார் அதனை தோண்டி பார்க்கையில் குழந்தை புதைக்கப்பட்டிருப்பது தெரிய வந்தது. இதையடுத்து பிஞ்சு குழந்தையின் உடலை மீட்டு மருத்துவமனைக்கு அனுப்பி வைத்ததோடு இதுகுறித்து விசாரணையை தொடங்கினர்.

இதனிடையே புதுக்குப்பம் குளத்துக்கு அருகே குடும்பத்துடன் வசிக்கும் நாடோடி பழங்குடி வகுப்பை சேர்ந்த சென்னை கொரட்டூர் பகுதியை சேர்ந்த குமரேசன் (32), அவரின் இரண்டாவது மனைவி சங்கீதா (24) ஆகியோர் தங்கள் குழந்தையை காணவில்லை என்று புகார் கொடுத்தனர்.

அந்த புகாரில், குமரேசனுக்கு ஏற்கனவே ராஜேஸ்வரி என்ற பெண்ணுடன் திருமணமாகி 4 ஆண் குழந்தை உள்ளது. இந்த சூழலில் சங்கீதாவை இரண்டாவது திருமணம் செய்துள்ளார்.

கடந்த சில மாதம் முன்பு கர்ப்பிணியான சங்கீதா, தனது தம்பி குடும்பத்துடன் கிருமாம்பாக்கம் பகுதிக்கு வந்துள்ளார். பின்னர் குளக்கரைக்கு அருகில் வந்து வசித்துள்ளனர்.

கடந்த 29 நாட்களுக்கு முன்பு சங்கீதாவுக்கு பெண் குழந்தை பிறந்துள்ளது. நேற்றைய தினம் குழந்தை அழுததால் குமரேசன் குழந்தையை கவனித்து கொண்டிருந்தார். குழந்தையோடு, தானும் தூங்கிவிட்டதாகவும் அதன்பின் குழந்தை காணவில்லை என்றும் தெரிவித்துள்ளார்.

எனவே இந்த குழந்தை குறித்து அந்த தம்பதிக்கு தகவல் தெரிவிக்கப்பட்டது. தகவலறிந்து சம்பவ இடத்துக்கு ஓடி வந்து பார்த்தபோது மணலில் புதைத்து இறந்து கிடந்த குழந்தை தங்களுடையது என தெரிந்து கதறி அழுதனர்.

தொடர்ந்து போலிசார் அவர்களிடம் நடத்திய விசாரணையில் புகாரில் கூறியதை போலவே கூறி வந்துள்ளனர். ஆனால் அவர்கள் மீது காவல்துறைக்கு சந்தேகம் ஏற்படவே கிடுக்குபிடி விசாரணை மேற்கொண்டனர்.

அப்போது தன் குழந்தையை தானே உயிரோடு புதைத்ததாக தாய் சங்கீதா அதிர்ச்சிகரமான வாக்குமூலம் அளித்தார். மேலும் போலிசாரின் விசாரணையில் சம்பவத்தன்று இரவு கணவன் – மனைவிக்குள் தகராறு ஏற்பட்டுள்ளது.

அதோடு குடிபோதையில் இருந்த கணவன், இந்த குழந்தை யாருக்கு என மனைவியை தகாத வார்த்தைகளால் கூறி வசைபாடியுள்ளார். இதனால் மிகுந்த விரக்தியடைந்த சங்கீதா பிறந்த 29 நாட்களே ஆன பச்சிளம் குழந்தையை உயிரோடு மணலில் போட்டு புதைத்து கொன்றது தெரியவந்தது.

இதையடுத்து தாய் சங்கீதவை கைது செய்த போலிசார் அவரிடம் தொடர்ந்து விசாரணை மேற்கொண்டு வருகின்றனர். பெற்ற தாயே 29 நாட்களான பச்சிளம் குழந்தையை உயிருடன் புதைத்து கொன்றுள்ள சம்பவம் புதுச்சேரியில் பெரும் பரபரப்பை ஏற்படுத்தியுள்ளது.

இந்தியாவில்..

இந்தியாவின் கேரள மாநிலம் பாலக்காட்டை சேர்ந்த பெண் ஒருவர், இத்தாலி இளைஞரை காதலித்து திருமணம் செய்து கொண்டுள்ளார். கேரளா மாநிலம் பாலக்காட்டை சேர்ந்த வீணா (Veena) என்பவர் தனது மேற்படிப்பிற்கு அமெரிக்கா சென்றுள்ளார்.

அப்போது தன்னுடன் விமானத்தில் பயணித்த இத்தாலியை சேர்ந்த டேரியோ(deriyo) என்ற இளைஞருடன் அறிமுகமாகியுள்ளார். இருவரும் தொடர்ந்து போனில் பேசி கொண்டிருந்திருக்கிறார்கள்.

இதனிடையே நட்பாக தொடங்கிய அவர்களது உறவு பின்னர் காதலாக மலர்ந்துள்ளது. அவர்கள் இருவரும் ஆறு ஆண்டுகளாக காதலித்து வந்துள்ளார். அவ்வப்போது சந்தித்து கொண்டு இருந்துள்ளனர்.

இதனைத் தொடர்ந்து அவர்கள் இருவரும் திருமணம் செய்து கொள்ள முடிவெடுத்துள்ளனர். அமெரிக்காவில் படித்துக் கொண்டிருந்த வீணா தனது காதலனான டேரியோவுடன் பதிவு திருமணம் செய்து கொள்ளத் திட்டமிட்டுள்ளனர்.

இருவரும் சில தினங்களுக்கு முன்னர், அவர்களது நண்பர்களின் உதவியுடன் அமெரிக்காவில் பதிவு திருமணம் செய்து கொண்டுள்ளனர். திருமணத்திற்கு பின்னர் ஊருக்கு சென்ற தம்பதியினர் இருவரும் கேரள காலச்சார முறைப்படி திருமணம் செய்ய ஆசைப்பட்டுள்ளனர்.

தனது விருப்பத்தை வீணா தனது வீட்டில் தெரிவிக்க , வீணாவின் பெற்றோர் மற்றும் சுற்றத்தின் முன்னிலையில் இருவருக்கும் கேரள காலச்சார முறைப்படி திருமணம் நடைபெற்றுள்ளது. மேலும் இவர்களது திருமண புகைப்படம் இணையத்தில் வைரலானதால், பலரும் இந்த தம்பதியினருக்கு தங்களது வாழ்த்துகளை தெரிவித்துள்ளனர்.