இளைஞர் குழு அட்டகாசம்..

வவுனியா – மன்னார் பிரதான வீதியில் காமினி மகா வித்தியாலயத்திற்கு முன்பாக நேற்று (17.11.2021) இரவு வீதியில் செல்பவர்களை வழிமறித்து இளைஞர் குழு அட்டகாசம் புரிந்துள்ளர்.

காமினி மகா வித்தியாலயத்திற்கு முன்பாக வீதியில் மோட்டார் சைக்கிள் மற்றும் துவிச்சக்கரவண்டியில் நின்ற இளைஞர் குழுவினர் வீதியில் செல்பவர்களை அச்சுறுத்தியதுடன் மோட்டார் சைக்கிளில் பயணித்த ஆசிரியர் ஒருவர் மீதும் தாக்குதல் மேற்கொண்டுள்ளனர்.

இளைஞர் குழுவின் தாக்குதலுக்குள்ளாகி காயமடைந்த நிலையில் வவுனியா பண்டாரிக்குளம் விபுலானந்த பாடசாலை ஆசிரியர் ஒருவர் மாவட்ட பொது வைத்தியசாலையின் விபத்து பிரிவில் அனுமதிக்கப்பட்டுள்ளதுடன் மேலதிக விசாரணைகளை வவுனியா பொலிஸார் மேற்கொண்டு வருகின்றனர்.

விபத்து..

புதல்வியின் பதிவுத்திருமணத்திற்காக குடும்பத்தினருடன் வவுனியாவிலிருந்து கொழும்பு நோக்கி கயஸ் ரக வாகனத்தில் சென்றவர்கள் விபத்துக்குள்ளானதில் ஆறு பேர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

வவுனியா தோணிக்கல் பகுதியினை சேர்ந்த இவர்கள் நேற்றிரவு (17.11.2021) வவுனியாவிருந்து கொழும்பு நோக்கி பயணித்துள்ளனர். இதன் போது கல்கமுவ பகுதியில்,

இன்று (18.11.2021) அதிகாலை குறித்த கயஸ் ரக வாகனம் சாரதியின் கட்டுப்பாட்டையிழந்து முன்னால் சென்று கொண்டிருந்த கனரக வாகனத்துடன் மோதுண்டு விபத்துக்குள்ளானது.

இவ் விபத்தில் கயஸ் ரக வாகனத்தில் பயணித்த சாரதி உட்பட ஒரே குடும்பத்தினை சேர்ந்த அறுவர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

விபத்துக்குள்ளான இரு வாகனங்களும் கல்கமுவ பொலிஸ் நிலையத்திற்கு எடுத்து செல்லப்பட்டுள்ளதுடன் மேலதிக விசாரணைகளை பொலிஸார் முன்னெடுத்து வருகின்றனர்.

கொரோனா..

வவுனியா தாதியர் கல்லூரியில் 13 பேருக்கு கொரோனா தொற்று உறுதி செய்யப்பட்டுள்ளதாக சுகாதாரப் பிரிவினர் தெரிவித்துள்ளனர். வவுனியா மாவட்டத்தில் கொரோனா தொற்று மீண்டும் அதிகரித்து வரும் நிலையில், தொற்றாளர்களுடன் தொடர்புடைய மற்றும் எழுமாறாக சில பகுதிகளில் அன்டிஜன் பரிசோதனை மேற்கொள்ளப்பட்டு வருகின்றது.

அந்தவகையில், வவுனியா, தாதியர் கல்லூரியில் இன்று (17.11) முன்னெடுக்கப்பட்ட துரித அன்டிஜன் பரிசோதனையில் 13 பேருக்கு கொரோனா தொற்று உறுதி செய்யப்பட்டுள்ளது.

இதனையடுத்து தொற்றாளர்களை சிகிச்சைக்காக தனிமைப்படுத்தப்பட்டுள்ளதுடன், அவர்களுடன் தொடர்புடையவர்களையும் தனிமைப்படுத்த சுகாதாரப் பிரிவினர் நடவடிக்கை எடுத்துள்ளனர்.

இதேவேளை கொரோனா அச்சுறுத்தல் தொடர்ந்தும் இருப்பதால் சுகாதார நடைமுறைகளைப் பின்பற்றி பொதுமக்கள் பொறுப்புடன் செயற்பட வேண்டும் எனவும் சுகாதாரப் பிரிவினர் தெரிவித்துள்ளனர்.

திடீர் சோதனை..

வவுனியாவில் சுகாதார நடைமுறைகள் குறித்து திடீர் சோதனை நடவடிக்கை ஒன்றை முன்னெடுத்திருந்ததுடன், இருவருக்கு எதிராக வழக்கு தாக்கலும் செய்யப்பட்டுள்ளதாக சுகாதாரப் பிரிவினர் இன்று (17.11.2021) தெரிவித்துள்ளனர்.

வவுனியா மாவட்டத்தில் மீண்டும் கொரோனா தொற்றாளர்களின் எண்ணிக்கை அதிகரித்து வரும் நிலையில் அதனை கட்டுப்படுத்தும் செயற்பாட்டில் சுகாதாரப் பிரிவினர் ஈடுபட்டுள்ளனர்.

அதன் ஒரு கட்டமாக சுகாதாரப் பிரிவினர், இராணுவத்தினர் மற்றும் பொலிசார் இணைந்து வவுனியா பழைய பேரூந்து நிலையம் மற்றும் நகரப் பகுதியில் சுகாதார நடைமுறைகள் குறித்து திடீர் கண்காணிப்பு சோதனை நடவடிக்கை ஒன்றை முன்னெடுத்திருந்தனர்.

இதன்போது முககவசம் அணியாது நின்றோர், முககவசத்தை சீராக அணியாது நடமாடியோர், சமூக இடைவெளி பேணாதோர் உள்ளிட்ட நபர்கள் மற்றும் வர்த்தக நிலையங்களுக்கு கடுமையான எச்சரிக்கையும் வழங்கப்பட்டது.

அத்துடன், முககவசம் அணியாது பழைய பேருந்து நிலையப் பகுதியில் நடமாடிய ஒருவருக்கு எதிராகவும், முகக்கவசம் அணியாது நகரப் பகுதியில் நடமாடிய ஒருவருக்கு எதிராகவும் என இரண்டு பேருக்கு எதிராக வவுனியா நீதிமன்றில் வழக்கு தாக்கல் செய்யப்பட்டுள்ளதாகவும் சுகாதாரப் பிரிவினர் மேலும் தெரிவித்தனர்.

விறகுக்கு மாறும் மக்கள்..

வவுனியாவில் பொதுமக்கள் சமையல் எரிவாயு சிலிண்டரை பெற்றுக்கொள்வதற்காக வெற்று சிலிண்டர்களுடன் அலைந்து திரிவதையும், வவுனியாவில் விறகு கொள்வனவு செய்வதில் மக்கள் அதிகமாக ஆர்வம் காட்டி வருவதனால் விறகு வியாபாரிகள் விறகு விற்பனையில் அதிகமாக ஈடுபட்டு வருவதை அவதானிக்க முடிந்துள்ளது.

விறகு வியாபாரிகள் தூர இடங்களுக்கு சென்று விறகுகளை துவிச்சக்கரவண்டிகளிலும், மோட்டார் சைக்கிள்களில் ஏற்றிவந்து நகரிலுள்ளவர்களுக்கு விற்பனை செய்வதில் மும்முரமாக செயற்பட்டு வருகின்றனர்.

எரிவாயுக்கு பெரும் தட்டுப்பாடு நிலவி வருகின்றதால் எரிவாயு பெற்றுக்கொள்வதை தவிர்த்துவிட்டு விறகு கொள்வனவு செய்வதில் மக்கள் ஆர்வம் காட்டி வருகின்றனர்.

இவ்வாறு துவிச்சக்கரவண்டியில் எடுத்துவரும் விறகு ஆயிரத்தி எண்ணூறு ரூபாயாகவும் மோட்டார் சைக்கிளில் எடுத்துவரும் விறகு இரண்டாயிரத்து ஐந்நூறு ரூபாவாகவும் விற்பனை செய்யப்பட்டு வருகின்றன.

மருத்துவ முகாம்..

வவுனியா மாவட்டத்திலுள்ள மத வழிபாட்டுத்தலங்களில் கடமையாற்றுவோருக்கு இலவச மருத்துவ முகாமொன்று ஏற்பாடு செய்யப்பட்டுள்ளது.

மத வழிபாட்டுத்தலங்களில் கடமையாற்றும் மதகுருக்கள், நிர்வாகத்தினர் மற்றும் ஏனையோருக்காக வவுனியா சுத்தானந்த இந்து இளைஞர் சங்க மண்டபத்தில் நாளை (17.11.2021) புதன்கிழமை காலை 8.30 மணி தொடக்கம் இவ் இலவச மருத்துவ முகாம் இடம்பெறவுள்ளது.

எனவே இவ் மருத்துவ முகாமில் அனைவரும் கலந்து கொண்டு பயனடைவதுடன் மேலதிக விபரங்களுக்கு சமூக சேவைகள் பிரிவினை தொடர்பு கொள்ளுமாறும் வவுனியா உதவி பிரதேச செயலாளர் பிரியதர்சினி சஜிவன் கோரிக்கை விடுத்துள்ளார்.

சமயபுரம்..

வவுனியா சமயபுரம் – மணிபுரம் பிரதான வீதி அபிவிருத்தி பணிக்காக வீதியின் நடுவே கொட்டப்படிருக்கும் கிரவலினால் மக்கள் பல்வேறு இன்னல்களுக்கு முகங்கொடுத்து வருகின்றனர்.

குறித்த வீதி பல வருடங்களாக புனரமைப்புமின்றி காணப்பட்ட நிலையில் கடந்த சில மாதங்களுக்கு முன்னர் வீதி செப்பனிடும் பணி ஆரம்பிக்கப்பட்டு புனரமைப்பு பணிகள் இடம்பெற்று வந்தது.

இந்நிலையில் குறித்த வீதி செப்பனிடும் பணிக்காக. இரு வாரத்திற்கு முன்னர் வீதியின் நடுவே ஒரு கிலோ மீற்றர் தூரத்திற்கு கிரவல் கொட்டப்பட்டது. அதன் பின்னர் எவ்வித பணியும் முன்னெடுக்கப்படாது வீதியில் கிரவல் அவ்வாறே காணப்படுகின்றது.

இதன் காரணமாக 20க்கு மேற்பட்ட குடும்பத்தினர் வாகனத்தினை அவர்களது வீட்டிற்கு எடுத்துச்செல்ல முடியாத நிலைமையுடன் நடந்து கூட செல்ல முடியவில்லை .

கடந்த இரு தினங்களுக்கு முன்னர் அப்பகுதியில் வசிப்பவர் ஒருவருக்கு சுகயீனம் ஏற்பட்டு அவரை ஏற்றுவதற்கு வாகனம் செல்ல முடியாத நிலையில் அவரை ஒரு கிலோமீற்றர் தூரம் தூக்கிச்சென்றே வாகனத்தில் ஏற்றி வைத்தியசாலைக்கு அழைத்து சென்றனர்.

எனவே உரிய அதிகாரிகள் இவ்விடயத்தில் கவனத்தினை செலுத்தி அக் கிரவல்களை வீதி செப்பனிடும் பணிக்கு பயன்படுத்துமாறு கோருவதுடன் அல்லது அவற்றை வீதியிலிருந்து அகற்றுமாறு அப்பகுதி மக்கள் கோரிக்கை விடுத்துள்ளனர்.

வவுனியா நகரசபை..

வவுனியா நகரசபையின் 2022ம் ஆண்டுக்கான வரவு செலவுத்திட்டம் நிறைவேற்றப்பட்டுள்ளது. வவுனியா நகரசபை அமர்வு இன்று (16.11.2021) காலை 09.30 மணிக்கு வவுனியா நகரசபையில் இடம்பெற்றிருந்தது.

இதன்போது 2022ம் ஆண்டுக்கான வரவு செலவுத்திட்டத்தினை நகரசபை தலைவர் இ.கௌதமன் முன்வைத்திருந்தார். இதன் போது தமிழ் தேசிய மக்கள் முன்னணியின் உறுப்பினர் தனுஸ்காந் எதிர்த்து வாக்களித்த நிலையில் ஏனைய 18 உறுப்பினர்களின் ஆதரவுடன் வரவு செலவுத்திட்டம் நிறைவேற்றப்பட்டது.

இதன் போது 2022ம் ஆண்டுக்கான வரவு செலவுத்திட்டத்தினை நகரசபை உறுப்பினர் எம்.லரீப் முன்மொழிய, உபதலைவர் குமாரசாமி வழி மொழிந்திருந்தார்.

இப்பாதீட்டில் 10 வட்டாரங்களிற்கு தலா 3.5 மில்லியன் ரூபா வீதம் ஒதுக்கப்பட்டதுடன், வட்டார பராமரிப்பு, வருமான மேம்பாடு, திண்மக்கழிவு முகாமைத்துவதும், பொதுவிடயங்கள் உள்ளடங்களாக 86.32 மில்லியன் ரூபாவினை கொண்டமைந்தமை குறிப்பிடத்தக்கது.

மேலும் சுதந்திர கட்சியின் நகரசபை உறுப்பினர் திருமதி த.புஞ்சிகுமாரி மரணமடைந்ததை தொடர்ந்து அவருக்கு பதிலாக பிறிதொரு உறுப்பினர் தெரிவு செய்யப்படாத நிலையில் உள்ளமையும் குறிப்பிடத்தக்கது.