ஸ்டெர்லிங் பவுண்ட்..

இலங்கை ரூபாவிற்கு நிகரான ஸ்டெர்லிங் பவுண்ட் பெறுமதி புதிய உச்சத்தை எட்டியுள்ளதாக இலங்கை மத்திய வங்கி தெரிவித்துள்ளது. இலங்கை மத்திய வங்கி இன்றைய தினம் வெளியிட்டுள்ள நாணய மாற்று வீதத்திற்கமைய, இந்த விடயம் வெளியாகியுள்ளது.

அதற்கமைய இன்றைய தினம் ஸ்டெர்லிங் பவுண்ட் ஒன்றின் விற்பனை விலை 302.92 ரூபாவை எட்டியுள்ளதாக மத்திய வங்கி தெரிவித்துள்ளது. பவுண்ட் ஒன்றின் கொள்வனவு விலை 294.06 ரூபாவாக பதிவாகியுள்ளது. இலங்கையில் ஸ்டெர்லிங் பவுண்ட் ஒன்றிற்கு செலுத்தப்பட்ட மிக அதிகபட்ச கட்டணம் இதுவென்பது குறிப்பிடத்தக்கது.

இதேவேளை அமெரிக்க டொலர் ஒன்றின் கொள்வனவு விலை இன்றைய தினம் 225.20 ரூபாயாக பதிவாகியுள்ளது. அத்துடன் அமெரிக்க டொலர் ஒன்றின் விற்பனை விலை 229.99 டொலராக பதிவாகியுள்ளதென இலங்கை மத்திய வங்கி வெளியிட்ட அறிக்கையில் குறிப்பிடப்பட்டுள்ளது.

இலங்கையில் பணவீக்கம் அதிகரித்துள்ள நிலையில் டொலரின் பெறுமதியை குறிப்பிட்ட பெறுமானத்தில் வைத்திக்க நடவடிக்கை எடுக்கப்பட்டுள்ளதாக நேற்று மத்திய வங்கி அறிவித்திருந்தது. அதற்கமைய ஒரு அமெரிக்க டொலரின் விற்பனை 230 ரூபாவாக பேணுமாறு அறிவிக்கப்பட்டிருந்தமை குறிப்பிடத்தக்கது.

தங்கத்தின் விலை..

உலக சந்தையில் ஒரு அவுன்ஸ் தங்கத்தின் விலை 2 ஆயிரம் அமெரிக்க டொலர்கள் மேல் அதிகரித்துள்ளது. ஒரு அவுன்ஸ் தங்கம் நடந்த இரண்டு நாட்களில் 30 டொலர்களாக அதிகரித்துள்ளதால், விலைகள் 2 ஆயிரம் டொலர்களை கடந்துள்ளது.

உலக சந்தையில் ஒரு அவுன்ஸ் தங்கத்தின் விலை ஒரு மாத காலத்திற்குள் 130 டொலர்களுக்கு மேல் அதிகரித்துள்ளது. ஒரு அவுன்ஸ் தங்கம் என்பது அண்ணளவாக சுமார் 28.3 கிராமாகும்.

ரஷ்யா மற்றும் உக்ரைன் இடையில் ஏற்பட்டுள்ள போர் நிலைமை உலக சந்தையில் தங்கத்தின் விலை அதிகரிப்பு காரணமாக அமைந்துள்ளதாக சர்வதேச ஊடகங்கள் தெரிவிக்கின்றன.

இலங்கைச் சிறுமி..

சர்வதேச பெண்கள் தினமான இன்று தென்னிலங்கையில் சுனாமி பேரலையில் சிக்கிய ஐந்து வயது சிறுமி ஒருவர் தொடர்பான தகவல் வெளியாகி உள்ளது.

தங்காலையில் சுனாமியில் சிக்கிய 5 வயதுடைய சிறுமி 18 வருடங்களின் பின்னர் 2 பிள்ளைகள் உள்ள நிலையில் மெதிரிகிரிய பிரதேசத்தில் உள்ள பாழடைந்த வீட்டில் கண்டுபிடிக்கப்பட்டுள்ளார்.

வயது, உரிய பெயர், பிறப்பு சான்றிதழ் எதுவும் இல்லாமல் வாழும் இந்த பெண் கடுமையான வறுமையில் சிக்கித் தவிப்பதாக தெரியவந்துள்ளது.

சரியான வயது தெரியாத கே.ஏ.கமலா பெரேரா எனப்படும் அந்த பெண் தற்போது இலக்கம் 191, ஜயகம்புர மஹ அம்பகஸ்வெவ, மெதிரிகிரிய என்ற விலாசத்தில் வாழ்ந்து வருகின்றார்.

ஆரம்ப பாடசாலை மற்றும் இம்முறை புலமை பரிசில் பரீட்சை எழுதும் 2 பிள்ளைகளின் தாயான அவர் கணவனை இழந்துள்ளார். இந்த நிலையில் கூலி வேலை செய்து வாடகை வீடு ஒன்றில் வாழ்ந்து வருகின்றார்.

தங்காலை பிரதேசத்தில் பிறந்த அவர் 2004ஆம் ஆண்டு டிசம்பர் மாதம் 26ஆம் திகதி ஏற்பட்ட சுனாமி பேரலையில் தாய், தந்தை, இரண்டு சகோதரர்கள், சகோதரி மற்றும் தானும் அடித்து செல்லப்பட்டுள்ளதாக குறிப்பிட்டுள்ளார்.

முழு குடும்பமும் சுனாமியில் சிக்கி காணாமல் போன நிலையில் அவரை யாரோ ஒருவர் காப்பாற்றியுள்ள போதிலும் இன்று வரையிலும் அது யார் என தெரியாமலேயே போயுள்ளது.

தங்காலை பிரதேச சுனாமி முகாமில் இருந்த அவரை, தங்காலை பிரதேச பாடசாலை அதிபர் ஒருவர் தனது வீட்டில் வளர்த்து வந்துள்ளார். குறித்த அதிபர் அவருக்கு கமலா என பெயர் வைத்துள்ளார். 12 வயதாகும் போது அதிபர் புற்று நோயினால் உயிரிழந்துள்ளார்.

அதிபரின் சகோதரி கொழும்பில் உள்ள வீட்டிற்கு பணிப்பெண் போன்று பணியாற்ற அவரை அழைத்து சென்றுள்ளார். இரண்டு வருடங்கள் பணியாற்றிய நிலையில் அந்த வீட்டில் நிர்மாணிப்பு பணியில் ஈடுபட்டிருந்த இளைஞன் ஒருவர் தொலைபேசி ஊடாக அவரை தொடர்பு கொண்டுள்ளார்.

14 வயதான சிறுமியாக இருக்கும் போதே குறித்த இளைஞன் அவரை அழைத்து சென்றுள்ளார். இளைஞனை சந்தித்த முதல் நாளிலேயே இந்த சம்பவம் இடம்பெற்றுள்ளது.

குறித்த இளைஞன் இராணுவத்தில் இருந்து தப்பி வந்தவராகும். அவர் கொழும்பு மெதிரிகிரிய பிரதேசத்தில் உள்ள வீட்டிற்கு அழைத்து சென்று அங்கு சில காலம் வாழ்ந்த நிலையில் அவருக்கு போலி வயது கூறி அடையாள அட்டை ஒன்றும் தயாரித்துள்ளார்.

உரிய கல்வி அறிவு இல்லாம் அன்புக்காக ஏங்கிய நிலையில் சிறு வயதிலேயே இரண்டு பிள்ளைகளின் தாயான அந்த பெண்ணுக்கு கணவனின் மோசமான செயற்பாடு தொடர்பில் தகவல் கிடைத்துள்ளது.

அவர் இளம் பெண்களை ஏமாற்றி அழைத்து செல்லும் நபர் என தெரியவந்துள்ளதுடன் அவர் பிரதேசத்தை விட்டு தப்பிச் சென்றுள்ளார்.

இன்றும் வாழ்வதற்கு இடமின்றி வாடனை வீட்டில் தவித்து வரும் இந்த பெண் யாராவது உதவி செய்வார்களா என காத்திருப்பதாக குறிப்பிட்டுள்ளார்.

மன்னாரில்..

மன்னாரிலிருந்து கொழும்பு நோக்கிச் சென்ற அரச பேருந்தில் பயணம் செய்த முதியவரிடம் இருந்து சுமார் ஒரு லட்சத்து ஐம்பதாயிரம் ரூபா பெறுமதியான பணத்தை நானாட்டான் பேருந்து தரிப்பு நிலையத்தில் பயணிகள் ஏறுவதற்காக நிறுத்திய போது பறித்துச் சென்ற இளைஞரை அப்பகுதியைச் சேர்ந்த இளைஞர்கள் மடக்கிப் பிடித்துள்ளனர்.

நேற்று(7) இரவு குறித்த சம்பவம் தொடர்பில் மேலும் தெரியவருகையில், வவுனியா – மெனிக்பாம் பகுதியில் வசிக்கும் முதியவர் ஒருவர் மன்னார் எழுத்தூர் பகுதியில் வசிக்கும் அவருடைய மகளிடம் இருந்து பணத்தைப் பெற்றுக் கொண்டு கொழும்பு பேருந்து மூலம் வவுனியாவுக்குச் செல்வதற்காக மன்னாரிலிருந்து குறித்த பேருந்தில் பயணித்துள்ளார்.

அதேநேரம் குறித்த பேருந்தில் திருகோணமலையைச் சேர்ந்த 22 வயது மதிக்கத்தக்க இளைஞன் ஒருவர் முதியவரின் அருகிலிருந்து பயணித்துள்ளார்.

மன்னாரில் குறித்த பேருந்து நானாட்டான் பிரதேச பேருந்து தரிப்பு நிலையத்தைச் சென்றடைந்து பயணிகளை ஏற்றுவதற்காகப் பேருந்து தரிப்பிடத்தில் நிறுத்திய போது குறித்த முதியவர் வைத்திருந்த பணத்தை இளைஞன் பறித்துக் கொண்டு பேருந்திலிருந்து பாய்ந்து ஓடியுள்ளார்.

இந்த நிலையில் முதியவரின் கூச்சலைக் கண்ட அப்பகுதியிலிருந்த இளைஞர்கள் குறித்த திருடனைத் துரத்திச் சென்று பணத்தோடு மடக்கிப்பிடித்தனர்.

உடனடியாக முருங்கன் பொலிஸாருக்கு தகவல் வழங்கப்பட்ட நிலையில் சம்பவ இடத்திற்கு வருகை தந்த முருங்கன் பொலிஸாரிடம் பணத்தைத் திருடிய இளைஞரை இளைஞர்கள் ஒப்படைத்துள்ளனர்.

உடனடியாக குறித்த இளைஞரையும், முதியவரையும் மேலதிக விசாரணைக்காக பொலிஸார் முருங்கன் பொலிஸ் நிலையத்திற்கு அழைத்துச் சென்றமையும் குறிப்பிடத்தக்கது.

அமெரிக்க டொலர்..

புலம்பெயர் தொழிலாளர்கள் அனுப்பும் அந்நியச் செலாவணி பணத்திற்காக ஒரு அமெரிக்க டொலருக்கு 38 ரூபா ஊக்குவிப்பு கொடுப்பனவாக வழங்க அமைச்சரவை தீர்மானித்துள்ளது.

புத்தாண்டின் போது புலம்பெயர் தொழிலாளர்களுக்கு இந்த சலுகையை வழங்க தீர்மானிக்கப்பட்டுள்ளது. அமைச்சர் நிமல் சிறிபால டி சில்வாவினால் சமர்ப்பிக்கப்பட்ட அமைச்சரவைப் பத்திரத்திற்கு அமைச்சரவை அனுமதி வழங்கியுள்ளது.

இலங்கை எதிர்கொள்ளும் டொலர் நெருக்கடியைத் தீர்ப்பதற்காக புலம்பெயர்ந்த தொழிலாளர்களின் அந்நிய செலாவணி வருமானத்தை கொண்டு வருவதற்கான ஊக்கப்படுத்தும் நடவடிக்கையாக இந்த முடிவு எடுக்கப்பட்டுள்ளது.

தடுப்பூசி அட்டை..

எதிர்வரும் ஏப்ரல் மாதம் 30ஆம் திகதி முதல் பொது இடங்களில் முழுமையான தடுப்பூசி செலுத்தப்பட்டமைக்கான அட்டையை கைவசம் வைத்திருத்தல் அவசியமாகும் என சுகாதார சேவைகள் பணிப்பாளர் நாயகம் அசேல குணவர்தன தெரிவித்துள்ளார்.

எதிர்வரும் ஏப்ரல் மாதம் 30ஆம் திகதிக்கு முன்னர் கோவிட்-19 செயலூக்கி தடுப்பூசியைப் பெற்றுக் கொள்ளுமாறு சுகாதார அமைச்சு மீண்டும் பொது மக்களுக்கு அறிவிப்பு விடுத்துள்ளது.

இதேவேளை, கோவிட் – 19 மரணங்களுக்கு அரசாங்கத்தினூடாக வழங்கப்பட்ட போக்குவரத்து செயற்பாடுகள் கைவிடப்பட்டுள்ளதாகவும் அவர் தெரிவித்துள்ளார்.

தங்கத்தின் விலை..

ஆசிய சந்தையில் தங்கத்தின் விலை மீண்டும் அதிகரித்துள்ளது. இதற்கமைய, ஒரு அவுன்ஸ் தங்கத்தின் விலை 2,000 அமெரிக்க டொலர்களாக அதிகரித்துள்ளது.

ரஷ்யா – யுக்ரைன் யுத்தம் காரணமாக தங்கத்தின் விலை இவ்வாறு அதிகரித்துள்ளதாக தெரிவிக்கப்பட்டுள்ளது. உலக சந்தையில் தங்கத்தின் விலை 2,000.69 அமெரிக்க டொலர்களாக அதிகரித்ததுடன்,

அது மீண்டும் 1998.38 அமெரிக்க டொலர்களாகக் குறைவடைந்தது. அத்துடன், யுக்ரைன் – ரஷ்யா யுத்தத்தால் மசகு எண்ணெய்யின் விலையும் 130 அமெரிக்க டொலர்களாக அதிகரித்துள்ளது.

மின்வெட்டு..

நாளைய தினம் மின்வெட்டு நடைமுறைப்படுத்தப்படும் விதம் தொடர்பான அறிவிப்பை இலங்கை மின்சார சபை அறிவித்துள்ளது. அதற்கமைய, நாளை E மற்றும் F ஆகிய வலயங்களுக்கு உட்பட்ட பகுதிகளுக்கு,

காலை 8 மணி முதல் மாலை 6 மணிவரையான காலப்பகுதியினுள் சுழற்சி முறையில் 5 மணித்தியாலங்களுக்கும், மாலை 6 மணிமுதல் இரவு 11 மணிவரையான காலப்பகுதியினுள் இரண்டரை மணித்தியாலங்களுக்கும் மின்வெட்டு நடைமுறைப்படுத்தப்படவுள்ளது.

மேலும், P Q R S T U V W ஆகிய வலயங்களுக்கு உட்பட்ட பிரதேசங்களுக்கு காலை 8.30 மணிமுதல் மாலை 5.30 மணிவரையான காலப்பகுதியினுள் 3 மணித்தியாலங்களுக்கும், மாலை 6 மணிமுதல் இரவு 10 மணிவரையான காலப்பகுதியினுள் ஒரு மணித்தியாலத்துக்கும் மின்வெட்டு நடைமுறைப்படுத்தப்படும் என அறிவிக்கப்பட்டுள்ளது.