கொரோனா..

வவுனியாவில் கொரோனா தொற்று காரணமாக மேலும் இருவர் மரணமடைந்துள்ளதாக சுகாதாரப் பிரிவினர் தெரிவித்துள்ளனர்.
வவுனியாவில் கோவிட் தொற்று தீவிரம் அடைந்துள்ள நிலையில் பலரும் சிகிச்சைக்காக அனுமதிக்கப்பட்டு வருகின்றனர்.

இந்நிலையில் கொரோனா தொற்று காரணமாக சிகிச்சை பெற்று வந்த வவுனியா பட்டானிச்சூர் பகுதியைச் சேர்ந்த இருவர் மரணமடைந்துள்ளனர். ஒருவர் கொரோனா தொற்று உறுதி செய்யப்பட்ட நிலையில் வவுனியா வைத்தியசாலையின் கொரோனா விடுதியில் சிகிச்சை பெற்று வந்த நிலையில் சிகிச்சை பலனின்றி நேற்று இரவு (01.09) மரணமடைந்துள்ளார்.

மற்றைய நபர் வீட்டில் கொரோனா தொற்று காரணமாக தனிமைப்படுத்தப்பட்டிருந்த நிலையில் இன்று காலை (02.09) மரணமடைந்துள்ளார். குறித்த இருவரது சடலங்களையும் சுகாதார நடைமுறைகளைப் பின்பற்றி அடக்கம் செய்ய சுகாதாரப் பிரிவினர் நடவடிக்கை எடுத்துள்ளனர்.

இதேவேளை, வவுனியாவில் நேற்றைய தினம் (01.09) போகஸ்வேவ, இறம்பைவெட்டி, தோணிக்கல், சூசைப்பிள்ளையார்குளம், இளமருதங்குளம் ஆகிய பகுதிகளைச் 5 பேர் மரணமடைந்தமை குறிப்பிடத்தக்கது.

கொரோனா..

வவுனியா நகரசபையின் பொது சுகாதார பரிசோதகர் ஒருவருக்கும், நோயாளர் காவு வண்டி சாரதி ஒருவருக்கும் கொரோனா தொற்று உறுதி செய்யப்பட்டுள்ளது.

குறித்த இருவருக்கும் தடிமன் மற்றும் இருமல் ஏற்பட்டதையடுத்து மேற்கொண்டி அன்டிஜன் பரிசோதனையிலேயே தொற்று உறுதி செய்யப்பட்டது.

வவுனியாவில் கொரோனா தொற்று பரவல் தீவிரமடைந்துள்ள நிலையில் அதனைக் கட்டுப்படுத்த மக்கள் மத்தியில் அன்டிஜன் பரிசோதனை மேற்கொள்ளல், தொற்றாளர்களை தனிமைப்படுத்தல், தொற்றாளர்களை கண்காணித்தல்,

தனிமைப்படுத்தப்பட்டவர்களை கண்காணித்தல், தொற்றாளர்களை சிகிச்சை நிலையங்களுக்கு கொண்டு செல்லல் உள்ளிட்ட கள வேலைகளில் ஈடுபட்ட வவுனியா நகரசபையின் சுகாதார பரிசோதர் ஒருவரும், நோயாளர் காவு வண்டி சாரதியுமே இவ்வாறு கொரோனா தொற்றுக்குள்ளாகியுள்ளனர்.

இதனையடுத்து அவர்கள் தனிமைப்படுத்தப்பட்டு கொரோனா சிகிச்சை முன்னெடுக்கப்பட்டுள்ளது. அவர்களுடன் தொடர்புடையவர்களையும் சுகாதாரப் பிரிவினர் தனிமைப்படுத்த நடவடிக்கை எடுத்துள்ளனர்.

இதேவேளை, குறித்த சுகாதார பரிசோதருக்கு சில மாதங்களுக்கு முன்னரும் கொரோனா தொற்று ஏற்பட்டு அவர் குணமடைந்திருந்தமையும், இரு தடுப்பூசிகளையும் பெற்றுக் கொண்டமையும் குறிப்பிடத்தக்கது.

கொரோனா..

வவுனியா தெற்கு சிங்கள சுகாதார வைத்திய அதிகாரி பிரிவில் உள்ள நொச்சிக்குளம் கிராமத்தினை சேர்ந்த 32 பேருக்கு கொரோனா தொற்று உறுதிப்படுத்தப்பட்டது.

குறித்த கிராமத்தினை சேர்ந்த 3 பேர் சுகவீனம் காரணமாக வவுனியா வைத்தியசாலைக்கு சென்றனர். அவர்களிற்கு முன்னெடுக்கப்பட்ட அன்ரிஜன் பரிசோதனையில் கொரோனா தொற்று உறுதிசெய்யப்பட்டிருந்தது.

ஆயினும் குறித்த நபர்கள் வைத்தியசாலையில் தங்காமல் தப்பிச்சென்றிருந்தனர். இது தொடர்பாக நடவடிக்கைகளை முன்னெடுத்த சுகாதாரப் பிரிவினர் குறித்த கிராமத்தில் தேடுதல் நடாத்தி ஏழு நபர்களை தனிமைப்படுத்தியிருந்தனர்.

எனினும் தனிமைப்படுத்தப்பட்ட நபர்கள் அதனை கடைப்பிடிக்காமல் வெளியில் சுற்றித்திரிந்துள்ளனர். இது தொடர்பாக சுகாதார பிரிவிற்கு தகவல் வழங்கப்பட்டது.

இதனையடுத்து குறித்த பகுதியை சேர்ந்த 150 பேரிடம் அன்ரிஜன் பரிசோதனையினை முன்னெடுத்தனர்.

அதில் 32 பேர் தொற்றாளர்களாக அடையாளம் காணப்பட்டுள்ளனர். குறித்த பகுதியில் வசிக்கும் அனேக மக்கள் நாடோடி இனமக்கள் என்பது குறிப்பிடத்தக்கது.

கொரோனா..

வவுனியாவில் கொரோனா தொற்று காரணமாக நேற்று (01.09) ஐந்து பேர் மரணமடைந்துள்ளதாக சுகாதாரப் பிரிவினர் தெரிவித்துள்ளனர். வவுனியாவில் கொரோனா தொற்று தீவிரம் அடைந்துள்ள நிலையில் பலரும் சிகிச்சைக்காக அனுமதிக்கப்பட்டு வருகின்றனர்.

இந்நிலையில் கொரோனா தொற்று காரணமாக சிகிச்சை பெற்று வந்த, போகஸ்வேவ, இறம்பைவெட்டி, தோணிக்கல், சூசைப்பிள்ளையார்குளம், இளமருதங்குளம் ஆகிய பகுதிகளைச் சேர்ந்த முறையே 60, 54, 71, 72, 58 ஆகிய வயதுகளையுடைய 5 பேர் மரணமடைந்துள்ளனர்.

இந்நிலையில் மரணித்த 5 பேரினதும் உடல்களையும் சுகாதார நடைமுறைகளை பின்பற்றி தகனம் செய்ய சுகாதாரப் பிரிவினர் நடவடிக்கை எடுத்துள்ளனர்.

இதேவேளை, வவுனியா, செட்டிகுளம் பகுதியில் 25 வயது இளைஞன் ஒருவரும் நேற்று முன்தினம் (31.08) இரவு மரணமடைந்திருந்தமை குறிப்பிடத்தக்கது.

இதேவேளை நேற்று (01.09.2021) இரவு வெளியான பரிசோதனை முடிவுகளில் 237 பேருக்கு கொரோனா தொற்று ஏற்பட்டுள்ளதாக சுகாதாரப் பிரிவினர் தெரிவித்துள்ளனர்.

கொரோனா..

வவுனியாவில் 237 பேருக்கு கொரோனா தொற்று ஏற்பட்டுள்ளதாக சுகாதாரப் பிரிவினர் தெரிவித்துள்ளனர். வவுனியாவில் இனங்காணப்பட்ட கொரோனா தொற்றாளர்களுடன் தொடர்புகளைப் பேணியோர்,

வவுனியா வைத்தியசாலையில் சிகிச்சைக்காக அனுமதிக்கப்பட்டோர் மற்றும் எழுமாறாக மேற்கொள்ளப்பட்ட பிசிஆர் மற்றும் அன்டிஜன் பரிசோதனையின் முடிவுகள் சில நேற்று (01.09.2021) இரவு வெளியாகின.

அதில் வவுனியா, வவுனியா வடக்கு, செட்டிகுளம், வவுனியா தெற்கு ஆகிய பிரிவுகளை உள்ளடக்கியதாக மாவட்டம் முழுவதும் கோவிட் தொற்று பரவல் அடைந்துள்ள நிலையில் 237 பேருக்கு கோவிட் தொற்று உறுதி செய்யப்பட்டுள்ளது.

இந்நிலையில் தொற்றாளர்களை கொரோனா சிகிச்சை நிலையத்திற்கு அனுப்பி வைப்பதற்கும் அவர்களுடன் தொடர்புடையவர்களை தனிமைப்படுத்துவதற்கும் சுகாதாரப் பிரிவினர் நடவடிக்கை எடுத்துள்ளனர்.

புதிய ஜனநாயக மாக்ஸ்சிச லெனினிச கட்சி..

கொரோனா பெருந்தொற்று காலத்தினை பேரிடர்காலமாக கருத்தில்கொண்டு கட்டணமின்றி சடலங்களை எரியூட்ட நடவடிக்கை எடுக்குமாறு புதிய ஜனநாயக மாக்ஸ்சிச லெனினிச கட்சியின் வன்னி மாவட்டங்களின் செயலாளர் நி.பிரதீபன் கோரிக்கை விடுத்துள்ளார். குறித்த விடயம் தொடர்பாக அவர் அனுப்பியுள்ள செய்தி அறிக்கையில் மேலும் தெரிவிக்கப்பட்டுள்ளதாவது,

நாட்டில் கோவிட் பெருந்தொற்றின் மூலம் அதிகளவு மரணங்கள் பதிவாகி வருகின்றது. அதன் ஒரு பகுதியாக வன்னி மாவட்டத்திலும் இறப்புக்கள் அதிகரித்துள்ளது.

இறப்பவர்களின் உடல்களை அடக்கம் செய்வதற்கு குறைந்தது 50 ஆயிரம் ரூபாய் வரை குடும்ப உறவுகள் செலவு செய்வதை காணக்கூடியதாக உள்ளது. இறப்பவர்களில் அதிகமானோர் சாதாரண குடும்பங்களை சேர்ந்தவர்களாகவே இருக்கின்றனர்.

இந்நிலையில் வவுனியா பூந்தோட்டத்தில் அமைந்துள்ள நகரசபைக்கு சொந்தமான எரிவாயு மாயானத்தில் ஒரு சடலத்தினை எரியூட்டுவதற்கு 7 ஆயிரம் ரூபாய் அறவிடப்படுகின்றது. இது நிறுத்தப்பட்டு எதுவித கட்டணமும் இன்றி சடலங்கள் எரியூட்டப்பட வேண்டும் என நாம் கோருகிறோம்.

இறப்பவர்கள் வறுமைக் கோட்டிற்கு உட்பட்டவர்களாக இருப்பின் கிராமசேவையாளரால் அவர்களது வறுமை நிலை உறுதிப்படுத்திய சான்றிதழ் வழங்கும் பட்சத்தில் கட்டணமின்றி உடல்களை எரியூட்டமுடியும் என்று வவுனியா நகரசபை நிர்வாகம் கூறுகின்றது. இது மரத்தில் இருந்து வீழ்ந்தவரை மாடு ஏறி மிதிப்பது போன்றதாகிவிடும்.

எனவே, கொரோனா பெருந்தொற்று காலத்தினை தேசிய அனர்த்த பேரிடர் காலமாக கருத்தில் கொண்டு துயர் அடைந்திருக்கும் குடும்ப உறவுகளை மேலும் அசௌகரியங்களிற்கு உட்ப்படுத்தாமல் எந்தவித கட்டணமுமின்றி அந்த சடலங்களை எரியூட்டுவதற்கு நடவடிக்கை எடுக்கப்படவேண்டும்.

குறித்த விடயத்தில் மத்திய அரசு, மாகாண உள்ளூராட்சி சபைகள், வன்னி பாராளுமன்ற உறுப்பினர்கள், மாவட்ட அரச அதிபர், சுகாதாரத் திணைக்களம் ஆகிய தரப்பினர்கள் ஒன்றிணைந்து உரிய பொறிமுறை ஒன்றை உருவாக்கி அதற்கான நடவடிக்கையினை மேற்கொள்ளுமாறு கோருகிறோம் என தெரிவிக்கப்பட்டுள்ளது.

ஏமாற்றதுடன் செல்லும் மக்கள்..

சதொச மற்றும் கூட்டுறவுச் சங்கங்களில் சீனியைப் பெறுவதற்காக சென்ற வவுனியா மக்கள் அங்கு சீனி இன்மையால் ஏமாற்றத்துடன் திரும்பிச் சென்றனர்.

சதொச மற்றும் கூட்டுறவுச் சங்கங்களில் சிவப்பு சீனியை இன்று (01.09) முதல் நடாளாவிய ரீதியில் 130 ரூபாய்க்கு பெற்றுக் கொள்ள முடியும் என அரசாங்கம் அறிவித்திருந்தது.

கடந்த சில நாட்களாக வவுனியா மாவட்டத்திலும் சீனிக்கான தட்டுப்பாடு நிலவி வருவதுடன், தனியார் விற்பனை நிலையங்களில் ஒரு கிலோ சீனி 200 ரூபாய்க்கு மேல் விற்பனை செய்யப்பட்டும் வருகின்றது.

இந்நிலையில் அரசாங்கத்தின் அறிவுறுத்தலுக்கு அமைய கொரோனா பரவலின் தீவிர தன்மை மற்றும் ஊரடங்கு சட்டம் என்பவற்றுக்கு மத்தியில் சிவப்பு சீனியை 130 ரூபாய் விலையில் பெற்றுக் கொள்வதற்காக வவுனியாவின் பல்வேறு கிராமங்களிலும் இருந்து சதொச மற்றும் கூட்டுறவுச் சங்கங்களுக்கு மக்கள் வருகை தந்திருந்தனர்.

எனினும் குறித்த அரச விற்பனை நிலையங்களில் சீனி இல்லை என தெரிவிக்கப்பட்டது. இதனையடுத்து மக்கள் ஏமாற்றத்துடன் வீடுகளுக்கு திரும்பிச் சென்றதை அவதானிக்க முடிந்தது.