கொரோனா..

வவுனியா வைத்தியசாலையில் சிகிச்சைக்காக அனுமதிக்கப்பட்டிருந்த நபர் ஒருவர் கொரோனா தொற்றால் நேற்று (23.07.2021) மரணமடைந்துள்ளார். குறித்த நபர் சுகவீனம் காரணமாக வவுனியா வைத்தியசாலையில் அண்மையில் அனுமதிக்கப்பட்டார்.

இதன்போது முன்னெடுக்கப்பட்ட பரிசோதனையில் கொரோனா தொற்றுக்குள்ளானமை உறுதிப்படுத்தப்பட்டது. இதனையடுத்து வைத்தியசாலையின் கோவிட் விடுதியில் அவர் அனுமதிக்கப்பட்டிருந்தார்.

எனினும் சிகிச்சை பலனின்றி அவர் நேற்று மரணமடைந்துள்ளார். வவுனியா ஶ்ரீநகர் பகுதியை சேர்ந்த 38 வயதான குடும்பஸ்தரே இவ்வாறு மரணமடைந்தவராவார்.

டெல்டா வைரஸ்..

இலங்கையில் கோவிட் உருமாறிய திரிபான டெல்டா வைரஸ் தொற்றியவர்களின் எண்ணிக்கை 68 ஆக அதிகரித்துள்ளது. இலங்கையில் பல பிரதேசங்களில் டெல்டா வைரஸ் தொற்றியவர்கள் அடையாளம் காணப்பட்டுள்ளனர்.

டெல்டா வைரஸ் தொற்றியவர்கள் அடையாளம் காணப்பட்டுள்ள பிரதேசங்களில் விபரங்கள் வெளியிடப்பட்டுள்ளன. இதனடிப்படையில், கொலன்னாவை, கோட்டே, நவகமுவ, மாஹபாகே, அங்கொடை,

இரத்மலானை, கட்டுநாயக்க, நீர்கொழும்பு, பேருவளை, காலி, மாத்தறை, தம்புள்ளை, வவுனியா மற்றும் முல்லைத்தீவு ஆகிய பிரதேசங்களில் டெல்டா வைரஸ் தொற்றவர்கள் அடையாளம் காணப்பட்டுள்ளனர்.

ஆர்ப்பாட்டம்..

அதிபர், ஆசிரியர்களின் சம்பளப் பிரச்சனையை தீர்க்கக் கோரியும், கொத்தலாவல பல்கலைக்கழகத்திற்கு எதிர்ப்பு தெரிவித்தும் வவுனியாவில் கவனயீர்ப்பு ஆர்ப்பாட்டம் ஒன்று முன்னெடுக்கப்பட்டது.

வவுனியா பழைய பேருந்து நிலையம் முன்னால் அதிபர், ஆசிரியர்களின் தொழிற் சங்கங்களின் கூட்டிணைவில் இன்று (23.07) குறித்த ஆர்ப்பாட்டம் நடைபெற்றது.

அதிபர், ‘ஆசிரியர்களின் சம்பளப்பிரச்சனைக்கு உடனடித் தீர்வு வேண்டும், கல்வியை இராணுவ மயப்படுத்தாதே, இலவசக் கல்வியை சிதைக்காதே, கொத்தலாவ பல்கலைக்கழகத்தை நிறுத்து’ போன்ற கோசங்களை எழுப்பியவாறு ஆர்ப்பாட்டத்தில் ஈடுபட்டதுடன்,

பழைய பேருந்து நிலையத்தில் இருந்து நகர மணிக்கூட்டு கோபுர சந்தி வரை சென்று அங்கிருந்து கண்டி வீதி ஊடாக வவுனியா தெற்கு வலயக் கல்வி பணமனை வரை சென்ற ஆர்ப்பாட்டக்காரர்கள் மீண்டும் கண்டி வீதி ஊடாக பழைய பேரூந்து நிலையத்தை அடைந்து அங்கு வீதியை மறித்து ஆர்ப்பாட்டத்தில் ஈடுபட்டனர்.

இதன்போது ஆர்ப்பாட்டத்தில் ஈடுபட்டவர்கள் கருத்து தெரிவிக்கையில், அதிபர், ஆசிரியர்களின் சம்பளப் பிரச்சனைக்கு தீர்வு வேண்டும்.

அரசாங்கத்துடனான பேச்சுவார்த்தை தோல்வி அடைந்துள்ளது. அதனால் எமது தொழிற்சங்க போராட்டங்கள் தொடரும். இலவசக் கல்வியை ஒழிந்து கல்வியில் இராணுமயமாக்கலை இந்த அரசாங்கம் செய்து வருகின்றது.

அதனை உடனடியாக நிறுத்த வேண்டும். அதிபர், ஆசிரியர்களின் நியாயமான கோரிக்கையை தீர்ப்பதற்கு அரசாங்கம் முன்வர வேண்டும் எனவும் தெரிவித்தனர்.

பெருளமளவான அதிபர், ஆசிரியர்கள் குறித்த போராட்டத்தில் கலந்து கொண்டமையால் கண்டி வீதி போக்குவரத்து சுமார் ஒரு மணிநேரத்திற்கு மேலாக பாதிப்படைந்திருந்தது. பின்னர் பொலிசார் ஆர்ப்பாட்டகாரர்களை அகற்றி போக்குவரத்தை சீர் செய்திருந்தனர்.

மர்ம பொதியால் பரபரப்பு..

வவுனியா நகரில் காணப்பட்ட மர்ம பொதியால் பதற்றநிலை ஏற்பட்டதுடன், விசேட அதிரடிப்படையினரின் குண்டு செயலிழக்கச் செய்யும் பிரிவினர் வருகை தந்து சோதனை நடத்தினர்.

வவுனியாவில் அமைந்துள்ள கொப்பேகடுவ சிலைக்கு முன்பாக இன்று (23.07) தமிழ் தேசிய மக்கள் முன்னனியின் ஏற்பாட்டில் கறுப்பு யூலை கலவரத்தை நினைவு கூர்ந்தும், இனப்படுகொலைக்கு நீதி வேண்டியும் போராட்டம் ஒன்று இடம்பெற்றிருந்தது.

போராட்டம் முடிவடைந்து சிறிது நேரத்தில் குறித்த பகுதியில் இருந்த கொப்பேகடுவா சிலை முக்பாக இராணுவ சீருடையில் தயாரிக்கப்பட்ட பை ஒன்று காணப்பட்டது.

இதனை அவதானித்தவர்கள் பொலிசாருக்கு தகவல் கொடுத்தையடுத்து சம்பவ இடத்திற்கு வந்த வவுனியா பொலிசார் குறித்த மர்ம பொதி அருகில் எவரும் செல்ல விடாது பாதுகாத்தனர்.

அதன்பின்னர், விசேட அதிரடிப் படையினரின் குண்டு செயலிக்க செய்யும் பிரிவினரை வரவழைத்து, குறித்த சிலை அருகில் இருந்த வர்த்தக நிலையங்களை சிறிது நேரம் மூடியதுடன், கண்டி வீதி ஊடான போக்குவரத்தையும் 20 நிமிடங்கள் தடை செய்து குறித்த பொதியை குண்டு செயலிழக்க செய்யும் கருவியின் உதவியுடன் சோதனை செய்தனர்.

இதன்போது குறித்த பொதியில் ஆலய துண்டு பிரசுரங்களும், அதிஸ்டலாப சீட்டுக்களும், வேறு தாள்களும் காணப்பட்டன. அதனை மீட்ட அதிரடிப்படையினர் அவற்றை வவுனியா பொலிசாரிடம் ஒப்படைந்தனர். இதனையடுத்து நகரம் வழமைக்கு திரும்பியிருந்தது.

ஆர்ப்பாட்டம்..

கறுப்பு யூலையை நினைவு கூர்ந்தும், இனப்படுகொலைக்கு நீதி கோரியும் வவுனியாவில் ஆர்ப்பாட்டம் ஒன்று முன்னெடுக்கப்பட்டது.

வவுனியா பழைய பேருந்து நிலையத்திற்கு அருகில் தமிழ் தேசிய மக்கள் முன்னனியின் ஏற்பாட்டில் இன்று காலை (23.07) குறித்த ஆர்ப்பாட்டம் இடம்பெற்றது.

ஆர்ப்பாட்டத்தில் ஈடுபட்டவர்கள் ‘ஈழத் தமிழ் மக்கள் மீதான இலங்கை அரசின் இனப்படுகொலைக்கு சர்வதேச நீதி வேண்டும், அடக்கு முறைகளால் மக்களை அடக்க நினைக்காதே, இராணுவத்தின் கைகளில் கொடுக்கப்பட்ட எமது உறவுகள் எங்கே,

பாதக அரசே படுகொலை அரசே தண்டிக்கப்படுவாய், இனப்படுகொலைக்கு சர்வதேச விசாரணை வேண்டும், 1948 முதல் இடம்பெற்று வருகின்ற இனப்படுகொலையை சர்வதேச குற்றவியல் நீதிமன்றில் விசாரிக்க வேண்டும்’ என எழுதப்பட்ட பதாதைகளையும், கறுப்புக் கொடிகளையும் ஏந்தியவாறும் கோசங்களை எழுப்பியவாறும் போராட்டத்தில் ஈடுபட்டனர்.

இவ் ஆர்ப்பாட்டத்தில் தமிழ் தேசிய மக்கள் முன்னனியின் தலைவரும், பாராளுமன்ற உறுப்பினருமான கஜேந்திரகுமார் பொன்னம்பலம், சட்டத்தரணி காண்டீபன், கட்சியின் உள்ளூராட்சி மன்ற உறுப்பினர் ச.தனுஸ்காந், கட்சியின் உறுப்பினர்கள், காணாமல் ஆக்கப்பட்டோரின் உறவுகள், பொதுமக்கள் எனப் பலரும் கலந்து கொண்டனர்.

கையெழுத்துப் போராட்டம்..

முன்னாள் அமைச்சர் றிசாட் பதியதீன் வீட்டில் மரணித்த சிறுமி ஹிசாலியின் மரணத்திற்கு நீதி கோரி ஜனாதிபதிக்கு கடிதம் அனுப்புவதற்காக வவுனியாவில் கையெழுத்துப் போராட்டம் ஒன்று முன்னெடுக்கப்பட்டது.

வவுனியா இலுபையடிச் சந்தியில் சுயாதீன இளைஞர் அமைப்பின் ஏற்பாட்டில் இன்று (23.07) காலை முதல் மதியம் வரை இந்த கையெழுத்துப் போராட்டம் இடம்பெற்றது.

முன்னாள் அமைச்சர் றிசாட் பதியுதீன் வீட்டில் பணிப் பெண்ணாக பணி புரிந்து மரணமடைந்த ஹிசாலினியின் மரணத்திற்கு நீதியான விசாரணை இடம்பெற்று, குற்றவாளிகள் சட்டத்தின் முன் நிறுத்தப்பட்டு தண்டனை வழங்கப்பட வேண்டும் எனவும் பெண்கள் மற்றும் சிறுவர்களின் பாதுகாப்பை உறுதிப்படுத்தக் கோரியும் குறித்த கையெழுத்துப் போராட்டம் இடம்பெற்றது.

குறித்த கையெழுத்துப் போராட்டத்தின் பின் அதன் கடிதங்கள் ஜனாதிபதி கோட்டபாய ராஜபக்ஸ அவர்களுக்கு அனுப்பி வைக்கப்பட்டமை குறிப்பிடத்தக்கது. இதில் பொதுமக்கள் பலரும் கலந்து கொண்டு நீதி கோரி கையெழுத்திட்டனர்.

பிசிஆர் பரிசோதனை..

வவுனியா சந்தை சுற்றுவட்ட வீதி தற்காலிகமாக இன்று காலை (23.07.2021) இராணுவத்தினரால் முடக்கப்பட்டுள்ளது. குறித்த வீதியில் அமைந்துள்ள சிகையலங்கார செய்யும் நிலையத்தில் பணிபுரியும் 3 பேருக்கு கொரோனா தொற்று இருப்பது நேற்று முன்தினம் உறுதிசெய்யப்பட்டது.

இதனையடுத்து இன்று காலை குறித்த வீதியுடனான போக்குவரத்து இராணுவத்தால் துண்டிக்கப்பட்டு முற்றாக முடக்கப்பட்டு முடக்கப்பட்ட பகுதியில் அமைந்துள்ள வியாபார நிலையங்களில் பணிபுரியும் ஊழியர்களிற்கு சுகாதார பரிசோதகர்களால் பிசிஆர் பரிசோதனை முன்னெடுக்கப்பட்டு வருகின்றமை குறிப்பிடத்தக்கது.

இதேவேளை சந்தை உள்வட்ட வீதியில் உள்ள சிகையலங்கார நிலையத்திற்கு சென்றவர்களை தாமாகவே முன்வந்து பிசீஆர் அல்லது அன்டிஜன் பரிசோதனை மேற்கொள்ளுமாறு சுகாதாரப் பிரிவினர் கோரியுள்ளனர்.

சந்தை மக்கள் பாவனைக்கு..

வவுனியா குழுமாட்டு சந்தியில் வவுனியா கமநல அபிவிருத்தி திணைக்களத்திற்கு சொந்தமான நெளுக்குளம் குளத்தின் அணைக்கட்டின் கீழ் பக்கத்தில் வவுனியா தெற்கு பிரதேச சபையினால் 2 மில்லியன் ரூபா நிதியில் கட்டப்பட்ட மரக்கறி மற்றும் மீன்சந்தை மக்கள் பாவனைக்கு கையளிக்கப்பட்டுள்ளது.

வவுனியா தெற்கு பிரதேச சபைக்குட்பட்ட குழுமாட்டுச் சந்தியில் உள்ளூர் பொருளாதார அபிவிருத்தி திட்டத்தின் ஊடாக வறுமை மட்டத்தை குறைத்தல் (2017-2020) எனும் கருப்பொருளின் கீழ்,

இலங்கை உள்ளூராட்சி மன்றங்களின் சம்மேளனம் பொதுநலவாய உள்ளூராட்சி மன்றங்களின் இணையம், ஐக்கிய இராஜ்ஜியத்தின் சர்வதேச அபிவிருத்தி திணைக்களம் ஆகியவற்றின் பங்களிப்புடன் மரக்கறி மற்றும் மீன் சந்தை நிர்மாணிக்கப்பட்டுள்ளது.

எனினும் குறித்த கட்டிடம் வவுனியா கமநல அபிவிருத்தி திணைக்களத்திற்கு சொந்தமான நெளுக்குளம் குளத்தின் அணைக்கட்டின் கீழ் பக்கத்தில் அமைந்துள்ளமையினால் கமநல அபிவிருத்தி திணைக்களத்தின் அனுமதியின்றி வவுனியா தெற்கு பிரதேச சபையினால் கட்டப்பட்ட குறித்த மரக்கறி மற்றும் மீன்சந்தை கட்டடிடத்தினை அகற்றுமாறு கமநல அபிவிருத்தி திணைக்களத்தினால் உத்தரவிடப்பட்டது.

இந்நிலையில் குறித்த சந்தையினை பிரதேச சபையினர் மக்கள் பாவனைக்கு கையளித்துள்ளதுடன் குழுமாட்டு சந்தியில் வீதியோரத்தில் மீன் வியாபாரம் மேற்கொள்ள தடையும் விதித்துள்ளனர்.

அவசர கோரிக்கை..

வவுனியா, சந்தை உள்வட்ட வீதியில் உள்ள சிகையலங்கார நிலையத்திற்கு சென்றவர்களை தாமாகவே முன்வந்து பிசீஆர் அல்லது அன்டிஜன் பரிசோதனை மேற்கொள்ளுமாறு சுகாதாரப் பிரிவினர் கோரியுள்ளனர்.

வவுனியா சந்தை உள்வட்ட வீதியில் உள்ள சிகையலங்கார நிலையத்தில் பணியாற்றும் மூவர் கோவிட் தொற்றாளர்களாக இனங்காணப்பட்டுள்ளனர். குறித்த சிகையலங்கார நிலையம் தொற்றாளர்கள் அடையாளம் காணும் வரை தொடர்ந்தும் இயங்கி வந்திருந்தது.

இந்நிலையில், குறித்த சிகையலங்கார நிலையத்திற்கு பலர் சென்று வந்துள்ளனர். அவர்களுக்கும் கோவிட் தொற்று ஏற்படக் கூடிய அபாய நிலை உள்ளதால்,

கடந்த 10 நாட்களுக்குள் குறித்த சிகையலங்கார நிலையத்திற்கு சென்று வந்தவர்கள் தாமாகவே முன்வந்து சுகாதார திணைக்களத்தில் பிசீஆர் அல்லது அன்டிஜன் பரிசோதனையை மேற்கொண்டு தமது பாதுகாப்பையும், குடும்பத்தினதும், சமூகத்தினதும் பாதுகாப்பையும் உறுதிப்படுத்திக் கொள்ளுமாறு சுகாதரப் பிரிவினர் தெரிவித்துள்ளனர்.