பாடசாலை மாணவர்களின் அடுத்த வருடத்திற்கான விடுமுறைகள் தொடர்பில் வெளியாகியுள்ள முக்கிய அறிவிப்பு!!

பாடசாலை விடுமுறைகள்..

பாடசாலை மாணவர்களின் அடுத்த வருடத்திற்கான விடுமுறைகள் குறைக்கப்பட்ட பாடசாலை நாட்காட்டியொன்று கல்வியமைச்சினால் வெளியிடப்பட்டுள்ளது.

கொரோனா தொற்று காரணமாக இந்த ஆண்டு பாடசாலை செயற்பாடுகள் அதிகளவில் பாதிக்கப்பட்டதனால் அடுத்த வருடத்திற்கான விடுமுறைகள் குறைக்கப்பட்டுள்ளதாக தெரிவிக்கப்பட்டுள்ளது.

இதற்கமைய, சிங்கள மற்றும் தமிழ் பாடசாலைகளின் முதலாம் தவணையின் முதல் கட்டம் எதிர்வரும் ஜனவரி மாதம் 4 ஆம் திகதி திங்கட்கிழமை முதல் சனி, ஞாயிறு தினங்கள் உள்ளடங்கலாக ஜனவரி மாதம் 15 ஆம் திகதி வரையில் இடம்பெறவுள்ளன.

அதன் பின்னர் கல்வி பொது தாரதர சாதரண பரீட்சைக்காக எதிர்வரும் ஜனவரி மாதம் 16 ஆம் திகதி முதல் 31 ஆம் திகதி வரையில் பாடசாலைகளுக்கான விடுமுறை வழங்கப்படவுள்ளது.

இதனையடுத்து இரண்டாம் கட்டமாக அடுத்த வருடம் பெப்ரவரி முதலாம் திகதி திங்கட்கிழமை முதல் ஏப்ரல் மாதம் 09 ஆம் திகதி வரையில் சனி, ஞாயிறு தினங்கள் அடங்கலாக பாடசாலைகள் நடத்தப்படவுள்ளன.

இதனையடுத்து இரண்டாம் தவணை ஏப்ரல் மாதம் 19 ஆம் திகதி ஆரம்பிக்கப்பட்டு ஜுலை மாதம் 30 ஆம் திகதி வரையில் சனி மற்றும் ஞாயிறு தினங்கள் அடங்கலாக பாடசாலை செயற்பாடுகள் இடம்பெறும்.

இதேவேளை,மூன்றாம் தவணை ஆகஸ்ட் மாதம் 30 ஆம் திகதி முதல் அடுத்த வருடம் டிசம்பர் மாதம் 3 ஆம் திகதி வரை பாடசாலை செயற்பாடுகள் இடம்பெறும் என கல்வி அமைச்சு வெளியிட்டுள்ள அறிக்கையில் தெரிவிக்கப்பட்டுள்ளது.

இதனை தவிர்ந்த, முஸ்லிம் பாடசாலைகளின் முதலாம் தவணை முதலாம் கட்டமாக ஜனவரி மாதம் 4 ஆம் திகதி ஆரம்பிக்கப்பட்டு ஜனவரி மாதம் 15 ஆம் திகதி வரையில் சனி மற்றும் ஞாயிறு தினங்கள் அடங்கலாக இடம்பெறவுள்ளது.

இரண்டாம் கட்டமாக பெப்ரவரி முதலாம் திகதி ஆரம்பமாகி ஏப்ரல் 09 ஆம் வரை சனி மற்றும் ஞாயிறு தினங்கள் அடங்கலாக இடம்பெறும். இரண்டாம் தவணை மே மாதம் 17 ஆம் திகதி ஒகஸ்ட் 25 ஆம் திகதி வரை வாரத்தில் ஏழு நாட்களும் நடைபெறும்.

அதன்பின்னர் முஸ்லிம் பாடசாலைகளுக்கு ஒகஸ்ட் 26 மற்றும் 27 ஆம் திகதிகள் விடுமுறை வழங்கப்பட்டு, பின்னர் ஏனைய பாடசாலைகளை போன்று மூன்றாம் தவணை செயற்பாடுகள் இடம்பெறும் என கல்வி அமைச்சு வெளியிட்டுள்ள அறிக்கையில் தெரிவிக்கப்பட்டுள்ளது.

லொஸ்லியாவின் தந்தை மரணம் : இலங்கைக்கு உடலை கொண்டு வர நடவடிக்கை!!

லொஸ்லியாவின் தந்தை..

பிக்பாஸ் புகழும், தென்னிந்திய திரைப்பட நடிகையுமான லொஸ்லியாவின் தந்தை மரியநேசன், உடல் சுகவீனத்தால் உயிரிழந்ததாக அவரது உறவினர்கள் தெரிவித்துள்ளனர். கனடாவில் வாழ்ந்து வந்த மரியநேசன், நேற்றைய தினம் தனது 52வது வயதில் காலமானார்.

மரியநேசன் மாரடைப்பால் உயிரிழந்ததாக அவரது உறவினர்கள் தெரிவிக்கின்றனர். இந்த நிலையில் அவரது உடலை, தாய் நாடான இலங்கைக்கு கொண்டு வருவதற்கான நடவடிக்கைகள் தற்போது முன்னெடுக்கப்பட்டு வருகின்றன.

லொஸ்லியாவின் தந்தை கனடாவில் உயிரிழந்த நிலையில், அவரது குடும்பம் இலங்கையில் வாழ்ந்து வருகிறது. அதேபோன்று, லொஸ்லியா, தற்போது சென்னையில் வாழ்ந்து வருகின்றார்.

இவ்வாறு ஒவ்வொருவரும் ஒவ்வொரு நாடுகளில் இருந்து வருகின்றமையினால், லொஸ்லியாவின் தந்தை மரியநேசனின் பூதவுடலை நாட்டிற்கு கொண்டு வருவதில் சிக்கல் நிலை ஏற்பட்டுள்ளதாக கூறப்படுகின்றது.

உலகம் முழுவதும் ஏற்பட்டுள்ள கொவிட் தொற்றுக்கு மத்தியில், பல்வேறு விதிமுறைகளை பின்பற்றி, அவரது உடலை தாயகத்துக்கு கொண்டு வர முயற்சி எடுக்கப்பட்டு வருகிறது.

இதற்கிடையே, லொஸ்லியாவின் தந்தை உயிரிழந்த தகவல் தொடர்பாக அவரது ரசிகர்கள் ட்விட்டர் பக்கத்தில் தங்களுடைய இரங்கலையும் வருத்தத்தையும் பதிவு செய்து வருகின்றனர்.

இலங்கையின் வடக்கு மாகாணத்தின் கிளிநொச்சி மாவட்டத்தை பூர்விகமாகக் கொண்டு லொஸ்லியாவின் குடும்பம் வாழ்ந்து வந்தது. யுத்த சூழ்நிலை காரணமாக, கிழக்கு மாகாணத்தின் திருகோணமலை நகரை நோக்கி லொஸ்லியாவின் குடும்பம் பின்னரான காலத்தில் இடம்பெயர்ந்தனர்.

மிகவும் வறுமை நிலைமைக்கு மத்தியில் வாழ்ந்த மரியநேசன், குடும்பத்தின் கஷ்ட சூழ்நிலைக்கு முற்றுப் புள்ளி வைக்கும் நோக்குடன், 2009ஆம் ஆண்டில் தொழில் வாய்ப்புக்களை தேடி அவர் கனடா சென்றார்.

அப்போது லொஸ்லியா தனது இரண்டு சகோதரிகளுடனும், தாயின் அரவணைப்பிலும் இலங்கையிலேயே வாழ்ந்தார். லொஸ்லியாவின் தந்தை தனது உழைப்பில் குடும்பத்தை சிறந்ததொரு இடத்திற்கு கொண்டு வந்துள்ளதாக அவரது உறவினர்கள் தெரிவித்தனர்.

இந்த நிலையில், பல்வேறு சிரமங்களுக்கு மத்தியில் லொஸ்லியா, பிக்பாஸ் நிகழ்ச்சியில் பங்கேற்றபோது, பல வருடங்களின் பின்னர் தனது தந்தையை நேரில் சந்திக்கும் வாய்ப்பு அப்போதே அவருக்கு கிடைத்தது.

பிக்பாஸ் நிகழ்ச்சியில் திடீரென நிகழ்ச்சிக்குள் மரியநேசன் வருகை தந்து, லொஸ்லியாவை அவேசமாக திட்டிய காட்சி, ரசிகர்கள் மத்தியில் இன்றும் நினைவில் இருக்கும் ஒரு சம்பவமாக காணப்படுகிறது.

அது தொடர்பான காட்சியில், “என்ன சொல்லி வந்த நீ… நான் உன்னை அப்படியா வளர்த்தேன்… கதைக்கக்கூடாது..” என மரியநேசன், லொஸ்லியாவை பார்த்து கோபத்துடன் கேள்வி எழுப்பினார்.

அப்போது குறுக்கிட்ட பிக் பாஸ் நிகழ்ச்சியில் பங்கெடுத்த திரைப்பட இயக்குநர் சேரன், அவரை சமாதானப்படுத்த முயற்சித்த காட்சிகள் இன்றும் நினைவிலிருந்து நீங்காதுள்ளது.

பிக்பாஸ் நிகழ்ச்சியில், அந்த சில நிமிடங்கள் மாத்திரமே, லொஸ்லியா, தனது தந்தை மரியநேசனை பார்த்துள்ளதாக அவரது நண்பர்கள் பிபிசி தமிழிடம் தெரிவிக்கின்றனர்.

இதேவேளை, சென்னையில் தற்போது வாழ்ந்து வரும் லொஸ்லியா, இலங்கைக்கு வருகை தருவதற்கான முயற்சிகளை மேற்கொண்டு வருவதாக அறிய முடிகிறது.

கொவிட் தொற்று இலங்கையில் மிக வேகமாக பரவி வரும் சூழலில், இலங்கைக்கு வருகை தருவதற்கான அனுமதியை கோரி லொஸ்லியா விண்ணப்பித்துள்ளதாக அவரது நண்பர்கள் தெரிவித்தனர்.

வவுனியா விபுலானந்தா கல்லூரியில் 62 மாணவர்கள் சித்தி பெற்று சாதனை!!

விபுலானந்தா கல்லூரியில்..

வவுனியா, பண்டாரிகுளம் விபுலானந்தா கல்லூரியில் 62 மாணவர்கள் புலமைப் பரிசில் பரீட்சையில் சித்தியடைந்து சாதனை படைத்துள்ளனர்.

தரம் 5 புலமைப்பரிசில் பரீட்சைப் பெறுபேறுகள் வெளியாகியுள்ளன. அதில் வவுனியா விபுலானந்தா கல்லூரியில் இருந்து தோற்றிய 160 மாணவர்களில் 62 மாணவர்கள் சித்தியடைந்துள்ளனர்.

அதில் மயூரன் கிரிஷிகன் என்ற மாணவன் 190 புள்ளிகளைப் பெற்று பாடசாலையில் முதலிடம் பிடித்து சாதனை படைத்துள்ளார். சித்தியடைந்த மாணவர்கள் அனைவருக்கும் வவுனியா நெற் வாசகர்கள் சார்பாக வாழ்த்துக்களை தெரிவித்துக் கொள்கின்றோம்.

பாடசாலை மாணவர்களுக்கு இன்று முதல் அறிமுகமாகும் புதிய சேவை!!

புதிய சேவை..

கொரோனா வைரஸ் பரவல் காரணமாக தடைப்பட்டுள்ள பாடசாலை மாணவர்களின் கல்வி நடவடிக்கைக்காக தொலைக்காட்சி நிகழ்ச்சி ஒன்று ஆரம்பிக்கப்பட்டுள்ளது.

இன்று முதல் 16 மணித்தியாலங்கள் கல்வி நடவடிக்கைகள் ஒளிபரப்பும் வகையில் ஊடகங்ளின் ஆதரவு பெற்றுக்கொள்வதற்கு கல்வி அமைச்சு நடவடிக்கை மேற்கொண்டுள்ளது.

தேசிய தொலைக்காட்சி சேவையான Channel eyeஐ யை பயன்படுத்தி இந்த வேலைத்திட்டத்தை காலை 4 மணி முதல் இரவு 12 மணி வரை வாரத்தின் 7 நாட்கள் முழுவதும் ஒளிபரப்ப நடவடிக்கை மேற்கொள்ளப்பட்டுள்ளதாக தேசிய கல்வி நிறுவனத்தின் பிரதி இயக்குனர் ரஞ்சித் பத்மசிறி தெரிவித்துள்ளார்.

தினமும் காலை 4 மணி முதல் காலை 6 மணி வரை உயர்தர மாணவர்களுக்காகவும், அதன் பின்னர் ஏனைய வகுப்புகளுக்காக ஒதுக்கப்பட்டுள்ளது.

திங்கட்கிழமை சிங்கள மொழியில் ஒளிபரப்பப்படவுள்ள நிலையில் செவ்வாய்க்கிழமை தமிழ் மொழியில் ஒளிபரப்பப்படுகின்றது. இரண்டு வாரங்கள் முழுவதும் முன்னெடுக்கப்படும் இந்த சேவையின் 11வது நாள் ஆங்கில மொழியில் கல்வி நடவடிக்கைகள் முன்னெடுக்கப்படவுள்ளதாக குறிப்பிடப்படுகின்றது.

இந்த நிகழ்ச்சிகாக மேல் மாகாணத்தில் பிரதான பாடசாலை அதிபரின் உதவியுடன் 200 ஆசிரியர்களின் உதவி பெற்றுக் கொள்ளப்பட்டுள்ளது. தமிழ் மொழிக்காக யாழ் மாவட்டத்தின் பிரதான பாடசாலைகளின் ஆசிரியர்களின் ஆதரவு பெற்றுக்கொள்ளப்படவுள்ளது.

இது தொடர்பில் மேலதிக தகவல்களை 1377 என்ற விசேட இலக்கம் அல்லது 011-7601702 என்ற இலக்கத்திற்கு தொடர்பு கொள்ள முடியும்.

வாகன இறக்குமதிக்கான தடை மேலும் ஒரு வருடத்திற்கு நீடிப்பு!!

வாகன இறக்குமதி…

வாகனங்களை இறக்குமதி செய்வதற்கான தடையை மேலும் ஒரு வருடத்திற்கு நீடிப்பது என நிதியமைச்சு தீர்மானித்துள்ளது. இந்த தடை காரணமாக ஒரு பில்லியன் அமெரிக்க டொலர்களை சேமிக்க முடியும் என அமைச்சு கூறியுள்ளது.

மேலும் நாட்டில் தேவையான அளவுக்கு வாகனங்கள் இருப்பதாகவும் நிதியமைச்சு குறிப்பிட்டுள்ளது. எவ்வாறாயினும் வாகன இறக்குமதிக்கு அனுமதி வழங்கப்பட வேண்டும் என வாகன இறக்குமதியாளர்கள் கோரிக்கை விடுத்துள்ளனர்.

குறைவான வாகனங்களே கையிருப்பில் இருப்பதால், புதிய மற்றும் பழைய வாகனங்களின் விலைகள் அதிகரிக்கலாம் எனவும் அவர்கள் கூறியுள்ளனர்.

 

மூன்றாம் தவணைக்காக பாடசாலைகளை ஆரம்பிப்பதில் தொடரும் நெருக்கடி!!

பாடசாலைகளை ஆரம்பிப்பதில்..

பாடசாலைகளின் மூன்றாம் தவணைக்கான கற்றல் நடவடிக்கைகளை ஆரம்பிப்பது தொடர்பில் இதுவரையில் உரிய தீர்மானம் எடுக்கவில்லை என கல்வி சீர்திருத்தங்கள் மற்றும் தொலைதூர கல்வி இராஜாங்க அமைச்சின் செயலாளர் பேராசிரியர் உபாலி சேதர தெரிவித்துள்ளார்.

எதிர்வரும் 23ஆம் திகதி மூன்றாம் தவணை பாடசாலைகள் ஆரம்பிப்பது தொடர்பில் முன்னர் கலந்துரையாடல்கள் மேற்கொள்ளப்பட்டன. அதற்கான கலந்துரையாடல் சுகாதார சேவை பணிப்பாளரின் ஆலோசனைக்கமைய இந்த வாரம் பெற்றுக் கொள்ளப்படும் என அவர் குறிப்பிட்டுள்ளார்.

மூன்றாம் தவணை ஆரம்பத்தின் போது ஆரம்ப பாடசாலை மாணவர்களை முதலில் அழைப்பதற்கு கல்வி அமைச்சு அவதானம் செலுத்தியுள்ளது. பாடசாலை கல்வி நடவடிக்கைகள் முழுமையாக இன்றி ஆரம்ப பாடசாலை மாணவர்களே அதிகம் பாதிக்கப்படுவதாக பேராசிரியர் உபாலி சேதர மேலும் தெரிவித்துள்ளார்.

வவுனியா புதுக்குளம் கனிஸ்ட வித்தியாலய மாணவன் க.தபிசாந் 192 புள்ளிகளைப் பெற்று சாதனை!

க.தபிசாந்..

வவுனியா வடக்கு வலயத்தில் 7 ஆவது வருடமாகவும் புதுக்குளம் கனிஸ்ட வித்தியாலயம் புலமைப் பரிசில் பரீட்சை பெறுபேற்றில் முதலிடம் பெற்றுள்ளது என பாடசாலை அதிபர் திருமதி கமலா சொக்கலிங்கம் தெரிவித்துள்ளார்.

வெளியாகியுள்ள தரம் 5 மாணவர்களின் புலமைப் பரிசில் பரீட்சைப் பெறுபேற்றில் வவுனியா வடக்கு வலயத்தில் புதுக்குளம் கனிஸ்ட வித்தியாலய மாணவன் க.தபிசாந் 192 புள்ளிகளைப் பெற்று வலய மட்டத்தில் முதலிடம் பெற்றுள்ளதுடன், மாவட்ட மட்டத்தில் இரண்டாம் இடம் பெற்றுள்ளார்.

இம்முறை புலமைப் பரிசில் பரீட்சையில் புதுக்குளம் கனிஸ்ட வித்தியாலயத்தில் இருந்து 52 மாணவர்கள் பரீட்சைக்கு தோற்றிய நிலையில் 35 மாணவர்கள் சித்திபெற்றுள்ளதுடன், 16 மாணவர்கள் 100 புள்ளிகளுக்கு மேல் பெற்று சாதனை படைத்துள்ளனர்.

7ஆவது வருடமாக பாடசாலையின் சாதனைப் பயணம் தொடர கற்பித்த ஆசிரியர்கள் மற்றும் ஒத்துழைப்பு வழங்கிய பெற்றோர்கள், பாடசாலை நலன்விரும்பிகள், பழைய மாணவர்கள் அனைவருக்கும் நன்றிகள் எனவும் பாடசாலை அதிபர் தெரிவித்துள்ளார்.

பலத்த மழையால் ஏற்படக்கூடிய இயற்கை ஆபத்துகள் : பொதுமக்களுக்கு விடுக்கப்பட்டுள்ள எச்சரிக்கை!!

பலத்த மழை..

இலங்கையில் பெய்யும் பலத்த மழைகாரணமாக இன்று காலை முதல் எதிர்வரும் 24 மணிநேரத்தில் இயற்கை ஆபத்துகள் பல ஏற்படக்கூடுமென ஆரம்ப எச்சரிக்கை மையம் எச்சரிக்கை விடுத்துள்ளது.

இலங்கைக்கு அருகிலுள்ள குறைந்த அளவிலான வளிமண்டல தாழமுக்கம் காரணமாக நிலவும் மழையுடனான நிலை இன்று முதல் அடுத்த சில நாட்களுக்குள் அதிகரிக்கும் என்று எதிர்பார்க்கப்படுகிறது.

வடக்கு, வட மத்திய, கிழக்கு, தெற்கு மற்றும் ஊவாவில் சில நேரங்களில் மழை அல்லது இடியுடன் கூடிய மழை பெய்யக்கூடுவதன் சில இடங்களில் 100 மில்லி மீற்றருக்கும் அதிகமான அளவில் கனமழை பெய்யும் வாய்ப்புள்ளது.

குறிப்பாக பிற்பகல் அல்லது இரவு வேளைகளில் பல இடங்களில் மழை அல்லது இடியுடன் கூடிய மழை பெய்யக்கூடும். இடியுடன் கூடிய பலத்த காற்று மற்றும் மின்னல் தாக்கத்தினால் ஏற்படக்கூடிய பாதிப்புக்களை குறைக்க போதுமான முன்னெச்சரிக்கை நடவடிக்கைகளை எடுக்குமாறு பொது மக்கள் கேட்டுக்கொள்ளப்படுகிறார்கள்.

198 புள்ளிகளை பெற்றுள்ள மட்டக்களப்பு வின்சன்ட் மகளிர் உயர் தேசிய பாடசாலை மாணவி!!

சிறிசங்கர் பவினயா..

வெளியாகியுள்ள ஐந்தாம் தர புலமைப்பரிசில் பரீட்சை பெறுபேறுகளின் அடிப்படையில் மட்டக்களப்பு வின்சன்ட் மகளிர் உயர் தேசிய பாடசாலை மாணவி 198 புள்ளிகளை பெற்றுள்ளார்.

வின்சன்ட் மகளிர் உயர் தேசிய பாடசாலை மாணவியான சிறிசங்கர் பவினயா என்னும் மாணவியே 198 புள்ளிகளை பெற்று பாடசாலைக்கு பெருமை சேர்த்துள்ளார்.

இதேவேளை வின்சன்ட் மகளிர் உயர் தேசிய பாடசாலையில் உறுதிப்படுத்தப்படாத தகவலின் அடிப்படையில் அப்பாடசாலையில் 74 மாணவர்கள் வெட்டுப்புள்ளிக்கு மேல் பெற்று சித்தி பெற்றுள்ளதாக தெரிவிக்கப்படுகின்றது. மேலும், இம்முறை மட்டக்களப்பு மாவட்டத்தில் சித்தி அடைவு மட்டம் அதிகரித்து உள்ளதாகவும் தெரிவிக்கப்படுகின்றது.

 

வவுனியா பாவற்குளம் மகா வித்தியாலயத்தில் 5 மாணவர்கள் புலமைப்பரிசில் பரீட்சையில் சாதனை!!

பாவற்குளம் மகா வித்தியாலயத்தில்..

வெளியான புலமைப்பரிசில் பரீட்சை பெறுபேறுகளின் அடிப்படையில் வவுனியா பாவற்குளம் கணேஸ்வரா மகா வித்தியாலய நான்கு மாணவர்கள் வெட்டுப்புள்ளிகளுக்கு மேல் பெற்று சித்தியடைந்துள்ளனர்.

சி.அட்சயா 182, த.வர்சினி 175, வி.சோபிகன் 173, த.கொன்சிகா 165 ஆகிய புள்ளிகளை பெற்று பாடசாலைக்கு பெருமை சேர்த்துள்ளனர்.

இவர்களை பாடசாலை அதிபர் ஆசிரியர்கள் மற்றும் பாடசாலை சமூகத்தினர் பாராட்டுக்களை தெரித்துள்ளனர். இவர்களுக்கு வவுனியா நெற் வாசகர்கள் சார்பாக வாழ்த்துக்களை தெரிவித்துக் கொள்கின்றோம்.

வவுனியா பாவற்குளம் படிவம் 3 பாடசாலையில் 5 மாணவர்கள் சாதனை!!

5 மாணவர்கள் சாதனை..

வெளியான புலமைப்பரிசில் பரீட்சை பெறுபேறுகளின் அடிப்படையில் வவுனியா செட்டிக்குளம் பகுதியில் உள்ள பாவற்குளம் படிவம் 3 இலக்கம்-9 கனிஷ்ட வித்தியாலய மாணவர்கள் வெட்டுப்புள்ளிகளுக்கு மேல் பெற்று சித்தியடைந்துள்ளனர்.

சிவசக்தி சஞ்யய் 173, பிரதீஷ்வரன் அஷ்வி 173, இந்திரகுமார் சாருஷா 166, சிவதாசன் கிசோந்தன் 161, புஷ்பராசா துரிசன் 160 ஆகிய புள்ளிகளை பெற்று சித்தியடைந்துள்ளதுடன்,

வவுனியா வீரபுரம் மணிவாசகர் மகா வித்தியாலயத்தில் தீலிபன் கவிசாளினி 171 புள்ளிகளையும் பெற்று சித்தியடைந்துள்ளார்.

சித்தியடைந்த மாணவர்கள் அனைவருக்கும் வவுனியா நெற் வாசகர்கள் சார்பாக வாழ்த்துக்களை தெரிவித்துக் கொள்கின்றோம்.

வவுனியாவில் முதலிடம் பெற்ற அஸ்வின்யா : அம்மா அப்பாவைப் போல் வைத்தியராகி பணியாற்றுவதே இலக்கு!!

அஸ்வின்யா..

எனது தாய் தந்தையரைப் போல் வைத்தியராகி பணியாற்றுவதே எனது இலக்கு என வவுனியா மாவட்டத்தில் புலமைப் பரிசில் பரீட்சையில் முதலிடம் இறம்பைக்குளம் மகளிர் மகாவித்தியாலய மாணவி ஜெயந்தன் அஸ்வின்யா தெரிவித்துள்ளார்.

தரம் 5 மாணவர்களின் புலமைப் பரிசில் பரீட்சை முடிவுகள் வெளியாகியுள்ளன. இதில் வவுனியா மாவட்டத்தில் 196 புள்ளிகளைப் பெற்று இறம்பைக்குளம் மகளிர் வித்தியாலய மாணவி ஜெயந்தன் அஸ்வின்யா முதலிடம் பெற்றுள்ளார்.

தனது வெற்றி குறித்து அம் மாணவி கருத்து தெரிவித்த போதே இவ்வாறு தெரிவித்தார். அவர் மேலம் தெரிவிக்கையில், நான் தரம் 5 புலமைப்பரிசில் பரீட்சையில் மாவட்ட மட்டத்தில் முதலிடம் பெற்ற பெருமை என்னை வழிகாட்டிய எனது பாடசாலை அதிபர், ஆசிரியர்கள், எனது பெற்றோர், அம்மம்மா மற்றும் என்னை வழிகாட்டிய ஏனைய ஆசிரியர்களையே சாரும்.

கொரோனா விடுமுறைக் காலத்திலும் கடந்த கால வினாக்கள் மற்றும் பயிற்சிகளை நிறையவே செய்தேன். அந்த முயற்சிக்கு கிடைத்தே வெற்றியே இது. இதேபோல் மாணவர்கள் கடுமையாக பயிற்சிகளைச் செய்து முயற்சி செய்தால் சிறந்த பெறுபேறுகளைப் பெற முடியும்.

எனது தாய், தந்தையர் வைத்தியர். அவர்கள் வவுனியா வைத்தியசாலையில் பணியாற்றுகின்றனர். அவர்களைப் போல் வைத்தியராகி மக்களுக்கு சேவை செய்வதே எனது இலக்கு என அந்த மாணவி மேலும் தெரிவித்துள்ளார்.

வவுனியாவில் அஸ்வின்யா ஜெயந்தன் 196 புள்ளிகளை பெற்று முதலிடம்!!

அஸ்வின்யா ஜெயந்தன்..

கடந்த ஒக்டோபர் மாதம் இடம்பெற்ற தரம் 5 புலமைப்பரிசில் பரீட்சைப் பெறுபேறுகள் நேற்று இரவு வெளியாகியுள்ளது. பெறுபேறுகள் அடிப்படையில் வவுனியா மாவட்டத்தில்,

வவுனியா இறம்பைக்குளம் மகளிர் மகாவித்தியாலயத்தின் மாணவி அஸ்வின்யா ஜெயந்தன் 196 புள்ளிகளை பெற்று சித்தியடைந்துள்ளார்.

வவுனியா பொது வைத்தியசாலையின் வைத்தியர்களான விசேட வைத்திய நிபுணர் ஜெயந்தன் தம்பதியினரின் மகளான இவர் 196 புள்ளிகளை பெற்று மாவட்டத்தில் அதிகூடிய புள்ளிகளை பெற்றுள்ளமை குறிப்பிடத்தக்கது.

நாட்டில் நிலவும் கொரோனா வைரஸ் அச்சுறுத்தலுக்கு மத்தியிலும் நடந்த பரீட்சையில் இந்த சாதனை நிலை நாட்டப்பட்டுள்ளதாக பலரும் பாராட்டு தெரிவித்துள்ளனர். அஸ்வின்யாவிற்கு வவுனியா நெற் வாசகர்கள் சார்பாக வாழ்த்துக்களை தெரிவித்துக் கொள்கின்றோம்.

23இல் பாடசாலை மீள ஆரம்பமா? உயர்மட்டப் பேச்சுகள் நடக்கின்றன : கல்வி அமைச்சு தெரிவிப்பு!!

23இல் பாடசாலை மீள ஆரம்பமா?

கொரோனா வைரஸின் மூன்றாவது அலையின் தாக்கம் நாட்டில் அதிகரித்து வருகின்ற நிலையில் எதிர்வரும் 23ஆம் திகதி மூன்றாம் தவணை கற்றல் நடவடிக்கைகளுக்காகப் பாடசாலைகளை மீண்டும் ஆரம்பிப்பதா? இல்லையா? என்பது தொடர்பில் கல்வி அமைச்சு மட்டத்தில் உயர்மட்டப் பேச்சுகள் நடக்கின்றன.

அதேவேளை, மாகாணக் கல்வி அமைச்சுகள், வலயக் கல்வி அலுவலகங்கள் மற்றும் பாடசாலை அதிபர்களுடனும் பாடசாலைகளை மீள ஆரம்பிப்பது தொடர்பில் கல்வி அமைச்சு பேச்சுகளை நடத்தி வருகின்றது.

சுகாதாரப் பாதுகாப்பு அறிவுறுத்தல்கள் முழுமையாக அமுல்படுத்தி எதிர்வரும் 23 ஆம் திகதி மூன்றாம் தவணை கற்றல் நடவடிக்கைகளுக்காக பாடசாலைகள் மீண்டும் ஆரம்பிக்கப்படவுள்ளன எனக் கல்வி அமைச்சர் பேராசிரியர் ஜி.எல்.பீரிஸ் ஏற்கனவே தெரிவித்திருந்தார்.

எனினும், கொரோனாவின் மூன்றாவது அலையின் தாக்கம் குறைவடையாமல் இருப்பதால் மாணவர்களின் பாதுகாப்பைக் கருத்தில்கொண்டு குறித்த திகதியில் பாடசாலைகளை மீள ஆரம்பிப்பதா என்பது தொடர்பில் பேச்சுகள் நடக்கின்றன.

இந்தத் தகவலை கல்வி அமைச்சின் செயலாளர் பேராசிரியர் கபில பெரேரா உறுதிப்படுத்தினார். இதேவேளை, ஏற்கனவே அறிவிக்கப்பட்டுள்ள திகதிகளிலேயே ஜி.சீ.ஈ. சாதாரணப் பரீட்சையை நடத்தத் திட்டமிடப்பட்டுள்ளது எனக் கல்வி அமைச்சின் செயலாளர் குறிப்பிட்டார்.

இதனடிப்படையில் எதிர்வரும் ஜனவரி 18ஆம் திகதி முதல் 28ஆம் திகதி வரை ஜி.சீ.ஈ. சாதாரணப் பரீட்சைகள் நடைபெறும் எனவும் அவர் மேலும் கூறினார்.

-தமிழ்வின்-

பல வருடங்களின் பின்னர் புலமைப்பரிசில் பரீட்சையில் சாதனை படைத்த மாணவர்கள்!!

பரீட்சையில் சாதனை..

இலங்கையில் பல வருடங்களின் பின்னர் புலமைபரிசில் பரீட்சையில் மாணவர்கள் சிலர் சாதனை படைத்துள்ளதாக தெரிவிக்கப்படுகின்றது.

நேற்று இரவு வெளியாகிய புலமைபரிசில் பரீட்சை பெறுபேறுகளுக்கமைய இந்த விடயம் வெளியாகியுள்ளது. இதுவரை வெளியாகிய தகவலுக்கமைய 7 மாணவர்கள் 200 புள்ளிகளை பெற்று சாதனை படைத்துள்ளனர்.

இலங்கையில் நீண்டகாலமாக எந்தவொரு மாணவரும் 200 புள்ளிகளை பெறவில்லை என சுட்டிக்காட்டப்படுகிறது. நாட்டில் நிலவும் கொரோனா வைரஸ் அச்சுறுத்தலுக்கு மத்தியிலும் நடந்த பரீட்சையில் இந்த சாதனை நிலை நாட்டப்பட்டுள்ளதாக பலரும் பாராட்டு தெரிவித்துள்ளனர்.

 

மகாஜனக் கல்லூரி மாணவி ஜனுஸ்கா வடக்கில் முதலிடம்!!

ஜனுஸ்கா..

2020ஆம் ஆண்டு தரம் 5 புலமைப்பரிசில் பரீட்சை முடிவுகளின் அடிப்படையில் யாழ்ப்பாணம், தெல்லிப்பழை மகாஜனக் கல்லூரி மாணவி சுபாஸ்கரன் ஜனுஸ்கா 198 புள்ளிகள் பெற்று வடக்கு மாகாணத்தில் முதலிடம் பிடித்துள்ளார்.

தமிழ்மொழி மூலமான பரீட்சார்த்திகளில் புத்தளம் ஸாஹிரா கல்லூரி மாணவி முகமட் அல்சாத் அதீபாத் ஷைனா 199 புள்ளிகளைப் பெற்று அகில இலங்கை ரீதியில் முதலிடம் பிடித்துள்ள நிலையில், மகாஜனக் கல்லூரி மாணவி சுபாஸ்கரன் ஜனுஸ்கா அகில இலங்கை ரீதியில் இரண்டாவது நிலையைப் பெற்றுள்ளார்.

இதேவேளை, வடக்கில் யாழ்.மாவட்டத்தில் வழமைபோல் இம்முறையும் தரம் 5 புலமைப்பரிசில் பரீட்சைப் பெறுபேறுகளில் புனித பொஸ்கோ ஆரம்பப் பாடசாலை மற்றும் யாழ். இந்து ஆரம்பப் பாடசாலை ஆகியவற்றில் அதிக மாணவர்கள் வெட்டுப்புள்ளியைத் தாண்டி சித்தி பெற்றுள்ளனர்.

யாழ். இந்து ஆரம்பப் பாடசாலையில் 232 மாணவர்கள் பரீட்சைக்குத் தோற்றினர். 149 பேர் சித்தியடைந்துள்ளனர். புனித பொஸ்கோ ஆரம்பப் பாடசாலையில் கூடிய எண்ணிக்கையான மாணவர்கள் தோற்றினர். 159 பேர் சித்தியடைந்துள்ளனர். மேற்படி இரு பாடசாலைகளிலும் ஒவ்வொரு மாணவர்கள் 195 புள்ளிகள் பெற்று முன்னிலை அடைந்துள்ளனர்.