இத்தாலியில் மீண்டும் கொரோனா வைரஸினால் அவலம் : நேற்றும் 600 பேர் பலி!!

கொரோனா வைரஸ் காரணமாக மீண்டும் இத்தாலியில் அதிகளாவான மரணங்கள் நேற்று சம்பவிதுள்ளதாக சர்வதேச ஊடகங்கள் செய்தி வெளியிட்டுள்ளன.

இதன்படி, நேற்று மாத்திரம் 602 பேர் மரணமாகினர். இதனையடுத்து அங்கு கொரொனா வைரஸால் ஏற்பட்ட மரணங்களின் எண்ணிக்கை 6078 ஆக அதிகரித்துள்ளது.

அங்கு அரசாங்கத்தின் கோரிக்கையை ஏற்று இளைப்பாறிய 4000 தாதியர்களும், 500 வைத்தியர்களும் கொரோனா வைரஸ் தடுப்பு நடவடிக்கைளில் இணைந்துள்ளனர்.

இதனிடையே, கொரோனா வைரஸ் தடுப்பு திட்டத்தின் கீழ் பிரித்தானியாவில் கடும் உத்தரவுகள் பிறப்பிக்கப்பட்டுள்ளன.

இதன்படி அத்தியாவசிய தேவைகள் தவிர்ந்த நிலையில் பொதுமக்கள் வீடுகளுக்குள்ளேயே இருக்குமாறு உத்தரவிடப்பட்டுள்ளது.

கொரோனா வைரஸ் காரணமாக பிரித்தானியாவில் 335 பேர் இதுவரை பலியாகியுள்ளனர். அங்கு காவல்துறையினருக்கு கூடுதல் அதிகாரங்களும் அறிவிக்கப்பட்டுள்ளன.

ஸ்பெயினில் இதுவரை 2000 பேர் வரை இறந்துள்ளனர். சர்வதேச ரீதியில் இந்த தொற்றினால் இறந்தோர் எண்ணிக்கை 15 ஆயிரமாக உயர்ந்துள்ளது.

340, 000 பேர் தொற்றுக்கு உள்ளாகியுள்ளனர். இதேவேளை கொரோனா வைரஸ் தொற்று வேகமாக பரவி வருவதாக உலக சுகாதார மையம் எச்சரித்துள்ளது.

கொரோனா வைரஸ் தொற்று கண்டறியப்பட்ட நாளில் இருந்து 67 நாட்களில் ஒரு லட்சம் பேருக்கு அந்த தொற்று பரவியது இரண்டு லட்சம் பேருக்கு அடுத்த 11 நாட்களில் இந்த தொற்று பரவியுள்ளது.

மூன்று இலட்சம் பேருக்கான தொற்று கடந்த நான்கு நாட்களில் பரவியுள்ளதாக உலக சுகாதார மையம் சுட்டிக்காட்டியுள்ளது.

எனவே இன்னமும் சமூக இடைவெளி மூலம் இந்த தொற்று பரவலை தடுக்கமுடியும் என்று அந்த மையம் தெரிவித்துள்ளது.

கொழும்பு உள்ளிட்ட மூன்று மாவட்டங்கள் அதி அபாய வலயங்களாக அறிவிப்பு : மறு அறிவித்தல் வரும் வரை ஊரடங்கு சட்டம்!!

கொரோனா வைரஸ் வேகமாக பரவி வருகின்ற நிலையில் இலங்கையின் மூன்று மாவட்டங்கள் அதி அபாய வலயங்களாக அறிவிக்கப்பட்டுள்ளன.

அந்த வகையில் கொழும்பு, கம்பஹா, களுத்துறை ஆகிய மாவட்டங்களே கொரோனா வைரஸ் பரவும் அபாய வலயங்களாக அறிவிக்கப்பட்டுள்ளன.

இன்று ஊரடங்கு சட்டம் தளர்த்தப்பட்ட போது அதிகளவான மக்கள் ஒன்றுகூடியதன் காரணமாக கொரோனா வைரஸை கட்டுப்படுத்தும் வகையில் மேற்கொள்ளப்பட்ட முயற்சிக்கு பாரிய தடையாக அமைந்ததாக ஜனாதிபதியின் ஊடகப்பிரிவின் அறிக்கையில் தெரிவிக்கப்பட்டுள்ளது.

அத்துடன் குறித்த மூன்று மாவட்டங்களிலும் மறு அறிவித்தல் வரும் வரையில் ஊரடங்கு சட்டம் பிறப்பிக்கப்பட்டுள்ளது.

இந்த நிலையில் நாளை முதல் அத்தியாவசியமான பொருட்களை வீடுகளுக்கே விநியோகிக்கும் வகையிலான நடவடிக்கையும் எடுக்கப்பட்டுள்ளதாக சுட்டிக்காட்டப்பட்டுள்ளது.

முகக்கவசங்கள் அணியாதோர் திருப்பியனுப்பப்படும் நிலை!!

முகக்கவசங்கள் அணியாதோரை சில வங்கிகள், பல்பொருள் அங்காடிகள் மற்றும் ஏனைய இடங்களில் இருந்து திருப்பியனுப்பிய சம்பவங்கள் இடம்பெற்றுள்ளன.

எனினும் இது தவறான நடவடிக்கையாகும் என்று தெரிவித்துள்ள சுகாதார சேவைகள் பணிப்பாளர் அனில் ஜாசிங்க இன்னமும் முகக்கவசங்களை அணிவது அத்தியாவசியமில்லை என்றும் குறிப்பிட்டுள்ளார்.

இன்னமும் இது சமூக பரவல் நோயாக மாறவில்லை எனவே முகக்கவசங்களை அணியவேண்டுமாக இருந்தால் அது தொடர்பில் அறிவிக்கப்படும் என்று அனில் ஜாசிங்க தெரிவித்துள்ளார்.

எனவே வர்த்தக நிலையங்கள் முகக்கவசங்களை அணியவில்லை என்பதற்காக பொதுமக்களை திருப்பியனுப்ப கூடாது என்றும் அதற்கு பதிலாக அவை சமூக இடைவெளி என்ற ஒரு மீற்றருக்கு ஒருவர் என்ற நடவடிக்கையை வலியுறுத்தலாம் என்றும் அனில் ஜாசிங்க சுட்டிக்காட்டியுள்ளார்.

அடுத்த இரு வாரங்களுக்கு வடக்கு மக்களே மிக அவதானம் : மருத்துவர்கள் எச்சரிக்கை!!

யாழ்ப்பாணத்தில் கொரேனா நோயாளி ஒருவர் கண்டுபிடிக்கப்பட்டதுடன், சுவிஸில் இருந்து இங்கு வந்து ஆராதனை நடத்திய மதபோதகருக்கும் கொரோனா தொற்று உறுதிப்படுத்தப்பட்டுள்ளதால், வடக்கு மாகாண மக்கள் அடுத்த இரு வாரங்களும் மிகுந்த அவதானத்துடன் இருக்கவேண்டும் என்று மருத்துவர்கள் எச்சரிக்கை விடுத்துள்ளனர். அவர்கள் மேலும் தெரிவித்துள்ளதாவது,

“கொரோனா வைரஸ் தொற்றுடன் சுவிஸிலிருந்து வந்த மத போதகர் ஆராதனைக் கூட்டம் நடத்தியுள்ளார்.

மத போதகர் சென்று வந்த இடங்கள், அவரைச் சந்தித்தவர்கள் என்று பல தரப்பட்டவர்களுக்கு வைரஸ் தொற்றுவதற்கான வாய்ப்புக்கள் அதிகம் உள்ளன.

அதேபோன்று யாழ்ப்பாணத்தில் கொரோனா நோயாளி அடையாளம் காணப்பட்டுள்ளார்.

அவருக்கு நோய்த் தொற்று ஏற்பட்ட பின்னர் யாரைச் சந்தித்தார், எங்கு சென்றார் என்ற விடயங்கள் ஆராயப்பட வேண்டும். அவர் ஊடாகவும் வைரஸ் தொற்று ஏற்பட்டிருக்கலாம்.

தொற்று ஏற்பட்டவர்களுக்கு அறிகுறிகள் தென்படுவதற்கு சில நாட்கள் எடுக்கும். அதற்கிடையில் அவர்கள் ஊடாக ஏனையோருக்கும் பரவ வாய்ப்புண்டு.

எனவே, வடக்கு மாகாண மக்கள் அடுத்த இரண்டு வாரங்களுக்கு அவதானமாக இருக்கவேண்டும்” என்று குறிப்பிட்டுள்ளனர்.

வவுனியா மக்களுக்கு பொலிஸ் வாகனம் மூலம் விசேட விழிப்புணர்வு நடவடிக்கை!!

விழிப்புணர்வு

கொரோனா வைரஸ் தாக்கம் தொடர்பில் விழிப்புணர்வை ஏற்படுத்தி மக்கள் மத்தியில் பாதுகாப்பான சூழலை ஏற்படுத்தும் வகையில் வவுனியா பொலிஸாரினால் இன்று (24.03.2020) விழிப்புணர்வு நடவடிக்கை முன்னெடுக்கப்பட்டது.

நாட்டில் ஏற்பட்டுள்ள கொரனா தொற்றையடுத்து அமுல்படுத்தப்பட்டிருந்த ஊரடங்கு சட்டம் வவுனியா உள்ளிட்ட வடமாகாணத்தில் 8 மணிநேரம் தளர்த்தப்பட்ட நிலையில் அத்தியாவசியப் பொருட்களை கொள்வனவு செய்வதற்காக வர்த்தக நிலையங்களின் முன் மக்கள் குவிந்துள்ளனர்.

இதனையடுத்து வவுனியா பொலிஸாரினால் மக்கள் ஒன்று கூடியுள்ள பகுதிகளில் விழிப்புணர்வு நடவடிக்கை முன்னெடுக்கப்பட்டது. குறிப்பாக வவுனியா நகர், வங்கிகள், பஜார் வீதி, ஏ9 வீதி, ஹொரவப்பொத்தானை வீதி போன்ற பகுதிகளில் இவ் விழிப்புணர்வு நடவடிக்கை இடம்பெற்றது.

கொரோனா வைரஸ் தாக்கத்திலிருந்து மக்கள் உங்களை பாதுகாப்பதற்கு கொரோனா நோயாளி என சந்தேகிக்கப்படும் ஒருவருடன் பழகியிருந்தால் தங்களாகவே தனிமைப்படுத்தலுக்கு உட்படுத்த வேண்டும்.

அத்துடன் உரிய அதிகாரிகளுக்கு அறிவிக்க வேண்டும் அத்துடன் மற்றவர்களுடன் பழகும் சமயத்தில் குறைந்த பட்சம் ஒரு மீற்றர் தூரத்தினை பேணுதல் அவசியமாகும், மேலும் சுகாதார பாதுகாப்பு முகக்கவசம் அணிதல் வேண்டும் .

இருமல் , தும்மல் வருகின்ற சமயத்தில் முகத்தினை மறைத்தல் அவசியமாகும் தொடர்ந்தும் சவக்காரம் பாவித்து கை கழுவுதல் வேண்டும் . கொரோனா நோயாளியேன ஒருவரை தெரிந்தும் உரிய அதிகாரிகளுக்கு அறிவிக்காமல் இருப்பது தண்டணைக்குறிய குற்றமாகும் என பொலிஸாரினால் வாகனத்தின் ஒலிபெருக்கி மூலம் பொதுமக்களுக்கு அறிவுறுத்தல் வழங்கப்பட்டது.

இலங்கையில் 2 வாரங்களில் 20,000 பேருக்கு கொரோனா? மருத்துவர்கள் எச்சரிக்கை!!

“இலங்கையில் கொரோனா தொற்றுக்கு உள்ளானவர்களின் எண்ணிக்கை இரண்டு வாரங்களில் 20 ஆயிரமாக அதிகரிக்கும் வாய்ப்புக்கள் இருக்கின்றன.

உரிய தடுப்பு நடவடிக்கைகள் முன்னெடுக்கப்படாவிட்டால் இந்த நிலைமை ஏற்படும்.” என மருத்துவ அதிகாரிகள் எச்சரித்துள்ளனர்.

யாழ்ப்பாணம் பண்ணையில் அமைந்துள்ள வடக்கு மாகாண சுகாதாரத் திணைக்களத்தில் இன்று நடைபெற்ற கலந்துரையாடலிலேயே மருத்துவர்களால் இந்த விடயம் தெரிவிக்கப்பட்டது.

“உலகளாவிய ரீதியில் பெரும் அச்சுறுத்தலுக்குரிய விடயமாக கொரோனா தொற்று மாறியுள்ளது. இலங்கையிலும் கொரோனா தொற்றுக்கு இலக்கான 86 பேர் அடையாளம் காணப்பட்டுள்ளனர்.

இலங்கையில் கொரோனா தொற்று பரவும் வீதம் தொடர்பான வரைபு உலகின் ஏனைய நாடுகளில் பரவும் வீதம் தொடர்பான வரைபுடன் அச்சொட்டாக ஒத்துப் போகின்றது.

இப்படியே சென்றால் இன்னும் இரண்டு வாரங்களில் இலங்கையில் 20 ஆயிரம் பேர் கொரோனா தொற்றுக்கு இலக்காவார்கள். அவ்வாறு நடக்கக் கூடாது என்பதுதான் எங்களின் விருப்பம்.

உரிய தடுப்பு நடவடிக்கைகள் முன்னெடுக்கப்படாவிட்டால் இந்த நிலைமை நிச்சயம் ஏற்படும்” என்று மருத்துவர்கள் அந்தக் கூட்டத்தில் சுட்டிக்காட்டினார்கள்.

இலங்கையில் கொரோனா வைரஸ் தொற்றுக்கு இலக்கானவர்களின் எண்ணிக்கை 99 ஆக அதிகரிப்பு!!

இலங்கையில் கொரோனா வைரஸ் தொற்றுக்கு உள்ளானவர்களின் எண்ணிக்கை இன்று அதிகாலை வரையான காலப்பகுதியில் 99 ஆக பதிவாகியுள்ளது என தொற்று நோய் விஞ்ஞானப் பிரிவு தெரிவித்துள்ளது.

இந்த நோயாளர்களில் இருவர் ஏற்கனவே குணமடைந்து தமது வீடுகளுக்கு சென்றுள்ளதுடன் மேலும் 97 பேர் சிகிச்சை பெற்று வருகின்றனர்.

நேற்றைய தினத்தில் மாத்திரம் கொரோனா தொற்றுக்கு உள்ளான 10 பேர் அடையாளம் காணப்பட்டனர் எனவும் தொற்று நோய் விஞ்ஞானப் பிரிவு கூறியுள்ளது.

வவுனியாவில் 8 மணி நேரம் ஊரடங்கு தளர்வு : நகரில் குவிந்த மக்கள் வெள்ளம்!!

மக்கள் வெள்ளம்..

நாட்டில் ஏற்பட்டுள்ள கொரனா தொற்றையடுத்து அமுல்படுத்தப்பட்டிருந்த ஊரடங்கு சட்டம் வவுனியா உள்ளிட்ட வடமாகாணத்தில் 8 மணிநேரம் தளர்த்தப்பட்ட நிலையில் அத்தியாவசியப் பொருட்களை கொள்வனவு செய்வதற்காக வர்த்தக நிலையங்களின் முன் மக்கள் குவிந்துள்ளனர்.

நாட்டில் கொரனா தொற்று தீவிரம் அடைந்ததையடுத்து கடந்த வெள்ளிக்கிழமை மாலை 6 மணிக்கு நாடு பூராகவும் ஊடரங்கு சட்டம் நடைமுறைப்படுத்தப்பட்டது. இந்நிலையில் நாட்டின் பல பகுதிகளிலும் நேற்று காலை 6 மணிக்கு ஊரடங்கு சட்டம் தளர்த்தப்பட்டு மீண்டும் மாலை 2 மணிக்கு நடைமுறைக்கு வந்தபோதும், வவுனியா உள்ளிட்ட வடமாகாணத்தில் ஊரடங்கு சட்டம் இன்று (24.03.2020) காலை 6 மணிக்கு தளர்த்தப்பட்டு பிற்பகல் 2 மணிக்கு மீண்டும் அமுலுக்கு வருகிறது.

ஊரடங்கு சட்டம் தளர்த்தப்பட்டதும், தமக்கு தேவையான அத்தியாவசியப் பொருட்கள், மருத்துப் பொருட்கள், மரக்கறி வகைகள் என்பவற்றை பெற்றுக் கொள்வதற்கு மக்கள் வர்த்தக நிலையங்களின் முன்னால் நீண்ட வரிசையில் நின்றனர். அதேபோல் பணத்தினைப் பெற்றுக் கொள்வதற்கும் வங்கிகள் முன் மக்கள் வரிசையில் நின்றனர்.

நகருக்குள் குவிந்த மக்களை வர்த்தக நிலையங்களின் முன்னால் நின்று பொலிசார் ஒழுங்கு முறைப்படுத்தியதுடன், ஒவ்வொருவரையும் மாஸ் அணிந்து ஒரு மீற்றர் இடைவெளியில் நிற்குமாறும் பணித்தனர்.

வவுனியாவின் பல்வேறு பகுதிகளிலும் இருந்தும் நகரை நோக்கி மக்கள் குவிந்தமையால் நகரப்பகுதி சனநெரிசல் மிக்கதாகவும், வாகன நெரிசல் மிக்கதாகவும் காணப்பட்டதுடன், பொலிசார் பாதுகாப்பு கடமையில் ஈடுபட்டு வருகின்றனர்.

அத்துடன் வர்த்தக நிலையங்களின் முன்னால் கொரனா விழிப்புணர்வு பதாதைகளும் காட்சிப்படுத்தப்பட்டிருந்தன.

இதேவேளை, வவுனியாவில் இன்று பிற்பகல் 2 மணிக்கு மீண்டும் அமுலுக்கு வரும் ஊரடங்கு சட்டானது வெள்ளிக்கிழமை கால 6 மணிவரை நீடிக்கப்படவுள்ளமை குறிப்பிடத்தகது.

இலங்கை மக்களுக்கு அதிரடியாக பல நிவாரணங்களை அறிவித்துள்ள ஜனாதிபதி!!

கொரோனா வைரஸ் தொற்றுக்கு மத்தியில் பொதுமக்களுக்கு மேலும் பல நிவாரணங்களை ஜனாதிபதி கோட்டாபய ராஜபக்ச அறிவித்துள்ளார்.

ஏற்கனவே பருப்பு மற்றும் டின்மீன் என்பவற்றை குறைந்த விலையில் கொள்வனவு செய்யலாம் என்ற நிவாரண திட்டத்தை கோட்டாபய அறிவித்திருந்தார்.

இந்த நிலையில் இன்று முதல் அமுலாகும் வகையில் வெட் வரி மற்றும் வருமான வரி, சாரதி அனுமதிப்பத்திரம், புதுப்பித்தல் கட்டணங்கள், 15ஆயிரம் ரூபாவுக்கு குறைந்த மின்சார, நீர்க்கட்டணங்கள், 50ஆயிரத்துக்கும் உட்பட்ட கடன் அட்டை கொடுப்பனவுகளை செலுத்துவதற்கான கால எல்லை 2020 ஏப்ரல் 30 வரை நீடிக்கப்பட்டுள்ளது.

முச்சக்கர வண்டிகளுக்கான லீசிங் கொடுப்பனவுகளுக்கு 6 மாத அவகாச காலம் அறிவிக்கப்பட்டுள்ளது.

10 இலட்சத்துக்கும் குறைவான வங்கி மற்றும் நிதி நிறுவனக் கடன்களுக்கான மீள்கொடுப்பனவுகளுக்கு மூன்று மாத காலம் அவகாச காலம் அறிவிக்கப்பட்டுள்ளது.

பட்டதாரிகளுக்கான மார்ச் மாத 20 ஆயிரம் ரூபா கொடுப்பனவு வங்கியில் வைப்பிலிடப்படும் என தெரிவிக்கப்பட்டுள்ளது.

இந்த முடிவுகள் இன்று அமைச்சுகளின் செயலாளர்கள், வங்கிகளின் செயலாளர்கள், லீசிங் (குத்தகை நிறுவன) அதிகாரிகள் ஆகியோருடன் ஜனாதிபதி நடத்திய சந்திப்பின்போது எடுக்கப்பட்டுள்ளன.

வினையில் முடிந்த விளையாட்டு : இரு கால்களும் உடைந்த நிலையில் இளைஞர் வைத்தியசாலையில் அனுமதி!!

திருகோணமலை – கண்டி பிரதான வீதியின் ஐந்தாம் கட்டை பகுதியில் மோட்டார் சைக்கிளில் மோதி சிறுவனொருவர் இரு கால்களும் உடைந்த நிலையில் திருகோணமலை பொது வைத்தியசாலையில் அனுமதிக்கப்பட்டுள்ளார்.

இச்சம்பவம் நேற்று பிற்பகல் இடம்பெற்றுள்ளதாக தெரியவருகிறது.

ஊரடங்கு சட்டம் அமுல்படுத்தப்பட்டு கொண்டிருக்கின்ற நிலையில் அவரது மாமியாரின் வீட்டுக்கு சக நண்பர்களுடன் சென்று கொண்டிருந்த வேளை மற்றுமொரு நண்பர் மோட்டார் சைக்கிளில் வருகைதந்து விளையாட்டாக குறுக்கே மோட்டார் சைக்கிளை போட்டமையினாலேயே இவ் விபத்து இடம்பெற்றுள்ளதாகவும் தெரியவருகின்றது.

இவ்விபத்தில் திருகோணமலை ஐந்தாம் கட்டை, கெமுனு புற பகுதியைச் சேர்ந்த லால் அசின்த (15 வயது) என்பவரே படுகாயமடைந்துள்ளதாகவும் தெரிவிக்கப்படுகின்றது.

குறித்த மோட்டார் சைக்கிளை செலுத்திய சிறுவனுக்கு சாரதி அனுமதி பத்திரம் இல்லையெனவும், ஊரடங்கு சட்டத்தை மதிக்காமல் மோட்டார் சைக்கிளில் அப்பகுதியில் சுற்றி திரிந்தவர் எனவும் தெரியவருகின்றது.

இவ்விபத்து தொடர்பில் சீனக்குடா பொலிஸார் விசாரணைகளை மேற்கொண்டு வருகின்றனர்.

வவுனியாவில் ஊடரங்கு சட்டத்திலும் வர்த்தக சங்கம் அதிரடி நடவடிக்கை : 16 வாகனங்கள் தயார் நிலையில்!!

வடமாகாணத்தின் 5 மாவட்டங்களிலும் கொழும்பு , கம்பஹா மற்றும் புத்தளம் மாவட்டங்களிலும் நாளை (24.03.2020) காலை 6.00 மணிக்குத் தளர்த்தப்பட்டு ஊரடங்கு மீளவும் மதியம் 12.00 மணிக்கு நடைமுறைப்படுத்தப்படவுள்ளதுடன்,

நாளை (24.03) நண்பகல் 12.00 மணிக்கு நடைமுறைத்தப்படும் ஊரடங்குச் சட்டம் வரும் வெள்ளிக்கிழமை (27.03.2020) காலை 6.00 மணிவரை நடைமுறையில் இருக்கும் என்றும் ஜனாதிபதி செயலகம் அறிவித்துள்ள நிலையில் பொதுமக்களின் நிலமையினை கருத்தில் கொண்டு வவுனியா வர்த்தக சங்கத்தினர் அதிரடி நடவடிக்கையினை முன்னெடுத்துள்ளனர்.

பொதுமக்களின் நிலமையினை கருத்தில் கொண்டும் பொதுமக்களின் ஒன்றுகூடலினை தடுக்கும் முகமாக நடமாடும் வியாபாரத்தினை மேற்கொள்ளுமாறு வவுனியா மாவட்ட அரசாங்க அதிபர் எஸ்.எம்.சமன் பந்துலசேன வவுனியா வர்த்தக சங்கத்தினருக்கு விடுத்த வேண்டுகோளுக்கமைய,

வவுனியா பொலிஸ் நிலைய பொறுப்பதிகாரி பீ.ஆர்.மானவடுவின் விசேட அனுமதியுடன் (ஊரடங்கு நேர்த்தில் நடமாடும் வியாபாரத்தினை மேற்கொள்வதற்கு) 16 வாகனங்களில் வவுனியா முழுவதும் கிராமங்கள் தோரும் பொதுமக்களின் வீடு வீடாக சென்று வியாபார நடவடிக்கை முன்னெடுக்கப்படவுள்ளது.

குறிப்பாக அரிசி 5 கிலோ, கோதுமை மா 5 கிலோ, சீனி 1 கிலோ, பருப்பு 1 கிலோ, பூடு 250 கிராம், தேயிலை 200 கிராம், சோயா 500 கிராம், டின் மீன் 1பெரிது, சமபோசா பெரிது, உப்பு 1 கிலோ, கறிதூள் 250 கிராம் போன்ற பொருட்கள் அடங்கிய பொதி விற்பனை செய்யப்படவுள்ளது.

வவுனியா வர்த்தக சங்கத்தின் இச் செயற்பாட்டிற்கு பல தரப்பினரிடமிருந்து பலத்த வரவேற்பு வழங்கப்பட்டுள்ளது.

நாளைய தினம் ஊரடங்குச் சட்டம் தளர்த்தப்படும் நேரத்தில் பலசரக்கு விற்பனை நிலையங்கள், மரக்கறி விற்பனை நிலையங்கள், மருந்தகம், எரிபொருள் நிரப்பு நிலையம் என்பன மாத்திரம் திறக்குமாறு மேற்கொள்ளப்பட்ட தீர்மானத்தில் எவ்வித மாற்றமும் இல்லை எனவும் இவை நாளையதினம் நடைமுறையில் இருக்கும் என அரசாங்க அதிபர் தெரிவித்துள்ளமை குறிப்பிடத்தக்கது.

இலங்கையில் டெங்கு நோயாளிகளின் எண்ணிக்கை அதிகரிப்பு!!

இலங்கையில் டெங்கு நோயாளிகளின் எண்ணிக்கை அதிகரித்துள்ளதாக தெரிவிக்கப்பட்டுள்ளது.

கடந்த ஜனவரி முதல் இந்த மார்ச் மாதம் வரையிலான காலப்பகுதியில் டெங்கு தொற்றுடன் 17,868 பேர் கண்டறியப்பட்டுள்ளனர்.

இந்தநிலையில் டெங்கு தொற்று சுகாதாரத்துறைக்கு பாரிய பிரச்சனையை ஏற்படுத்தக்கூடும் என்று நிபுணர்கள் தெரிவித்துள்ளனர்.

கடந்த வருடம் இதே காலப்பகுதியுடன் ஒப்பிடுகையில் இது 35வீத அதிக எண்ணிக்கையாகும். கடந்த வருடத்தில் இதே காலப்பகுதியில் 13 ஆயிரத்து 148 பேர் டெங்கு தொற்றுடன்கண்டறியப்பட்டனர்.

பருவப்பெயர்ச்சி காலநிலை இந்த வருடத்தில் மாற்றமடைந்தமையே இந்த அதிகரிப்புக்கான காரணமாகும் என்று தேசிய டெங்கு கட்டுப்பாட்டு பணிப்பாளர் அநுர ஜெயசேகர தெரிவித்துள்ளார்.

உணவின்றி தவித்து வந்த கட்டாக்காலி நாய்களுக்கு உணவு வழங்கப்பட்டுள்ளது!!

கட்டாக்காலி நாய்களுக்கு..

ஹட்டன் நகரில் பட்டினியுடன் நடமாடும் தெரு நாய்களுக்கு உணவு மற்றும் குடிநீரை பெற்றுக்கொடுக்கும் வேலைத்திட்டம் ஒன்றை ஹட்டன் பொலிஸார் மற்றும் பிரதேச மக்கள் இணைந்து நேற்று மேற்கொண்டனர்.

கொரோனா வைரஸ் பரவி வருவது காரணமாக அமுல்படுத்தப்பட்டுள்ள ஊரடங்கு சட்டத்தால் ஹட்டன் நகரில் உள்ள உணவகங்கள் மற்றும் விற்பனை நிலையங்கள் மூடப்பட்டுள்ளன.

இதன் காரணமாக வர்த்தக நிலையங்களில் அப்புறப்படுத்தப்படும் உணவுகளை உண்டு வாழ்ந்த கட்டாகாலி நாய்கள் பல மணி நேரம் உணவின்றி தவித்து வந்துள்ளன. இந்த நாய்களுக்கு உணவு மற்றும் குடிநீரை பெற்றுக்கொடுக்க பிரதேசத்தில் உள்ள சிலர் முன்வந்திருந்தனர்.

ஊரடங்கு நேரத்தில் தனி நபரொருவரின் மனிதாபிமான செயல்!!

மனிதாபிமான செயல்..

இலங்கைக்கு சுனாமி பேரிடர், வெள்ளம், மண் சரிவு போன்ற இயற்கை அனர்த்தங்கள் ஏற்படும் போது நாட்டு மக்கள் அனைவரும் அனைத்து பேதங்களை ஒதுக்கி வைத்து விட்டு மனிதாபிமானத்திற்கு முதலிடம் கொடுத்து செயற்பட பழகியவர்கள்.

கொரோனா வைரஸ் தற்போது இலங்கையிலும் ஏற்பட்டுள்ளது. இந்த காலத்தில் நாட்டு மக்களின் மனிதாபிமானத்தின் உயர் குணாதியத்தை வெளிக்காட்டும் சம்பவங்கள் தொடர்பான பதிவுகள் சமூக வலைத்தளங்களில் பகிரப்பட்டு வருகின்றன.

அனுராதபுரத்தில் ஒருவர் செய்துள்ள உன்னதமான பணி தொடர்பாக ஒரு பதிவு சமூக வலைத்தளத்தில் பதிவு செய்யப்பட்டுள்ளது.

ஊரடங்குச் சட்டம் அமுல்படுத்தப்பட்டுள்ள நிலையில், அன்றாடம் கூலி தொழில் செய்து வாழ்க்கையை கொண்டு நடத்தும் அப்பாவி மக்கள் தமது வாழ்வாதாரத்தை பெற்றுக்கொள்ள முடியாத நிலைமை ஏற்பட்டுள்ளது.

எனினும் கொரோனா வைரஸ் பரவலை கட்டுப்படுத்த ஊரடங்குச் சட்டத்தை அமுல்படுத்த வேண்டிய கட்டாயம் காணப்படுகிறது. இவ்வாறான சந்தர்ப்பத்தில் கூலி தொழில் செய்து வாழும் அப்பாவி மக்களுக்காக நாட்டின் ஏனைய குடிமக்கள் செய்ய முடிந்த காரியத்தை தனி ஒருவர் செய்துள்ளார்.

அத்தியாவசிய உணவு பொருட்கள் மற்றும் ஏனையவற்றை மேசை மீது வைத்து, இதில் தேவையான ஏதேனும் இருந்தால், அதனை எடுத்துச் செல்லுமாறு சிறிய விளம்பரத்தை வைத்துள்ளார்.

ஊரடங்குச் சட்டம் அமுலில் உள்ள நேரத்தில் அன்றாடம் வேலை செய்ய முடியாதவர்கள், உங்களுக்கும், உங்கள் வீட்டுக்கும், குழந்தைகளுக்கும் தேவையான ஏதேனும் இந்த மேசையில் இருந்தால் எடுத்துச் செல்லுங்கள்.(இலவசம்) நன்றி தேவையில்லை என அந்த நபர் அதில் குறிபபிட்டுள்ளார்.

வவுனியாவில் ஊரடங்கு சட்டத்தினால் பாதிக்கப்பட்ட 18 குடும்பங்களுக்கு உதவிக்கரம் நீட்டிய இளைஞர்கள்!!

பாதிக்கப்பட்ட 18 குடும்பங்களுக்கு..

வவுனியாவில் மூன்று நாட்களாக அமுல்படுத்தப்பட்டுள்ள ஊரடங்கு சட்டம் காரணமாக பாதிக்கப்பட்ட வறுமைக்கோட்டிற்குட்பட்ட 18 குடும்பத்தினருக்கு பல நண்பர்கள் இணைந்து இன்று (23.03.2020) மதியம் 12.30 மணயளவில் உலர் உணவு பொதிகளை வழங்கி வைத்தனர்.

வவுனியா ஊடகவியலாளர் பாஸ்கரன் கதீஷனின் வேண்டுகோளிக்கிணங்க பல நண்பர்கள் இணைந்து ஓர் குடும்பத்தினருக்கு (அரிசி 5 கிலோ, கோதுமை மா 5 கிலோ, சீனி 1 கிலோ, பருப்பு 1 கிலோ, பூடு 250 கிராம், தேயிலை 200 கிராம், சோயா 500 கிராம், டின் மீன் 1பெரிது, சமபோசா பெரிது, உப்பு 1 கிலோ, கறிதூள் 250 கிராம்) போன்ற ரூபா 2000 பெறுமதியான உலர் உணவு பொருட்கள் வீதம் 18 குடும்பத்தினருக்கு 36,000 ரூபா பெறுமதியான உலர் உணவு பொருட்கள் வழங்கி வைக்கப்பட்டது.

குறிப்பாக வவுனியா விஸ்காடு, பாரதிபுரம், சாம்பல் தோட்டம் ஆகிய பகுதிகளில் தெரிவு செய்யப்பட்ட வறுமைக்கோட்டிற்குட்பட்ட (அன்றாடம் வாழ்வாதாரத்திற்கு கஸ்டப்படும்) 18 குடும்பத்திரை தெரிவு செய்து கனவுகள் அமைப்பு தர்சிகன் , வவுனியா பொறியியலாளர் தயா ஆகியவர்களின் நிதிப் பங்களிப்புடனும் நெளுக்குளம் நதீபன், மஞ்சு சாரதி பயிற்சி நிலைய உரிமையாளர் மஞ்சு, பீட்டா தனியார் நிறுவனத்தின்உரிமையாளர் விஜிதரன் , வீரபுரம் ஊடகவியலாளர் சஜீவன், வங்கி ஊழியர் மயூரன், நிதி நிறுவன உத்தியோகத்தர் சுஜேஸ் ஆகியோரின் நிதிப்பங்களிப்பிலும் இவ் உதவித்திட்டம் வழங்கி வைக்கப்பட்டது.

ஊரடங்குச் சட்டம் காரணமாக மூன்று தினங்களும் ஒர் நாளைக்கு ஒர் வேலை மாத்திரம் உணவு மாத்திரம் சாப்பிடும் இரண்டுக்கு மேற்பட்ட குடும்பத்தினரும் இவ் உதவித்திட்டத்தில் அடங்கியுள்ளமை குறிப்பிடத்தக்கது.

இலங்கையில் முதலாவது கொரோனா நோயாளி குணமடைந்து இன்று வீடு திரும்பினார்!!

முதலாவது கொரோனா நோயாளி..

இலங்கையில் முதலாவதாக இனங்காணப்பட்ட கொரோனா நோயாளி பூரணமாக குணமடைந்து வீடு திரும்பியுள்ளார். கடந்த சில வாரங்களாக கொழும்பு அங்கொட IDH வைத்தியசாலையில் சிகிச்சை பெற்று வந்த நிலையில் இன்று வீடு திரும்பியுள்ளார்.

இத்தாலிய சுற்றுலா பயணிகளுக்கு வழிகாட்டியாக செயற்பட்டவருக்கு கொரோனா வைரஸ் தொற்று ஏற்பட்டமை உறுதி செய்யப்பட்ட நிலையில் வைத்தியசாலையில் அனுமதிக்கப்பட்டார்.

இதேவேளை இலங்கையில் கொரோனா வைரஸினால் பாதிக்கப்பட்ட மேலும் 86 நோயாளர்கள் தொடர்ந்தும் பல்வேறு வைத்தியசாலையில் சிகிச்சை பெற்று வருகின்றனர்.

பாதிக்கப்பட்ட நோயாளர்களில் மேலும் மூன்று நோயாளர்கள் பூரணமாக குணமடைந்த நிலையில், இருவர் ஆபத்தான நிலையில் உள்ளதாக சுகாதாரதுறை பணிப்பாளர் அனில் ஜாசிங்க தெரிவித்திருந்தமை குறிப்பிடத்தக்கது.