யாழ். மாவட்டத்தில் தாவடி கிராமம் தனியாக முடக்கம்!!

தாவடி கிராமம்..

யாழ். மாவட்டத்தில் 1729 பேர் தனிமைப்படுத்தப்பட்டிருப்பதுடன் 192 பேர் அரியாலை தேவாலயத்தில் நடந்த ஆராதனையில் கலந்து கொண்டவர்கள் என யாழ். மாவட்டச் செயலாளர் க.மகேசன் தெரிவித்துள்ளார்.

 

இதனிடையே, 80 வீடுகள் தனிமைப்படுத்தப்பட்டு கடுமையாகக் கண்காணிக்கப்பட்டு வருவதாகவும், தாவடி கிராமத்தில் சுமார் 300 குடும்பங்களை உள்ளடக்கியதான ஒரு பகுதி முற்றாக முடக்கப்பட்டிருப்பதாகவும் அவர் தெரிவித்துள்ளார்.

யாழ். மாவட்டத்தில் தற்போது கொரோனா நிலைமை தொடா்பாக ஊடகங்களுக்கு இன்று மாலை கருத்துத் தெரிவிக்கும் போதே அவர் மேற்கண்டவாறு கூறியுள்ளார். இதன்போது அவர் மேலும் கூறுகையில், யாழ். மாவட்டத்தில் ஒருவர் கொரோனா தொற்றுடன் இனங்காணப்பட்டிருக்கின்றார்.

இதனடிப்படையில் 1,729 பேர் தனிமைப்படுத்தப்பட்டுள்ளனர். அரியாலை பகுதியில் மட்டும் 192 பேரும் 80 வீடுகளும் தனிமைப்படுத்தப்பட்டு தீவிரமாகக் கண்காணிக்கப்படுகின்றது.

அதேபோல், கொரோனா நோயாளி அடையாளம் காணப்பட்டிருக்கும் தாவடி கிராமத்தின் ஒரு பகுதி முற்றாக முடக்கப்பட்டிருக்கிறது. இதேவேளை, மேலும் ஊரடங்குச் சட்டம் நீடிக்கப்பட்டிருக்கிறது. மக்கள் விழிப்புணர்வுடன் செயற்படுவதால் நோய் பரவலை தடுக்கலாம்.

அதேபோல் ஊரடங்கு மேலும் 2 அல்லது 3 வாரங்களுக்கு நீடிக்கப்படலாம். எனவே மக்கள் அவதானமாக இருக்க வேண்டும். தமக்குத் தேவையான உதவிகளை மக்கள் தமது பிரதேச செயலர் ஊடாகத் தொடர்புகொண்டு பெற்றுக் கொள்ளலாம்.

வெதுப்பகப் பொருட்களை விநியோகம் செய்ய இன்று காலை நடவடிக்கை எடுத்தோம். அதனை மாலையிலும் செய்ய நடவடிக்கை எடுக்கப்பட்டுள்ளது.

எமது முயற்சி வெற்றியளித்துள்ளது. மேலும் மருந்துகளையும் விநியோகிக்க நடவடிக்கை எடுத்திருப்பதுடன் அத்தியவசிய உணவுப் பொருட்களையும் விநியோகம் செய்ய நடவடிக்கை எடுத்துள்ளோம்.

அதேபோல் பிரதேச செயலர்கள் ஊடாக 64 ஆயிரம் குடும்பங்களை இனங்கண்டிருக்கிறோம். அவர்களுக்கு உலர் உணவு விநியோகிக்க நடவடிக்கை எடுத்திருக்கிறோம். மேலும் அனர்த்த முகாமைத்துவப் பிரிவு ஊடாக ஒரு மில்லியன் ரூபாய் நிதியை வழங்க அந்த அமைச்சு இணங்கியுள்ளது.

மேலும் பிரதமர் ஊடாக மாவட்டத்திற்கு ஒரு மில்லியன் வழங்கவும் இணக்கம் காணப்பட்டிருக்கிறது. எனவே மக்களுக்கான உதவிகள் கிடைக்கும். மக்கள் விழிப்பாக இருப்பதுடன் நோய் பரவலை கட்டுப்படுத்த ஒத்துழைப்பு வழங்க வேண்டும் என குறிப்பிட்டுள்ளார்.

இலங்கையில் தீவிரமடையும் கொரோனா தொற்று : நோயாளர்களின் எண்ணிக்கை 91 ஆக அதிகரிப்பு!!

பிந்திய இணைப்பு : இலங்கையில் மேலும் 5 கொரோனா நோயாளர்கள் அடையாளம் காணப்பட்டுள்ளதாக சுகாதார பிரிவு அறிவித்துள்ளது.

இன்று காலை 5 நோயாளர்கள் அடையாளம் காணப்பட்டுள்ளதுடன், தற்போது மேலும் 5 நோயாளர்கள் அடையாளம் காணப்பட்டுள்ளனர்.

அதற்கமைய மொத்த எண்ணிக்கை 91 ஆக அதிகரித்துள்ளது. இன்றைய தினத்தில் மாத்திரம் 10 நோயாளர்கள் அடையாளம் காணப்பட்டுள்ளனர்.

மேலும், கொரோனா தொற்று சந்தேகத்தில் 15 வைத்தியசாலைகளில் 250க்கும் அதிகமானோர் தங்கியிருந்து சிகிச்சை பெற்றுவருவதாகவும் தொற்று நோய் தடுப்புப் பிரிவு தெரிவித்துள்ளது.

முதலாம் இணைப்பு : இலங்கையில் மேலும் 5 கொரோனா நோயாளர்கள் அடையாளம் காணப்பட்டுள்ளதாக சுகாதார பிரிவு அறிவித்துள்ளது.

இன்று காலை 5 நோயாளர்கள் அடையாளம் காணப்பட்டுள்ளதுடன், மொத்த எண்ணிக்கை 86 ஆக அதிகரித்துள்ளது.

மேலும், கொரோனா தொற்று சந்தேகத்தில் 15 வைத்தியசாலைகளில் 222 பேர் தங்கியிருந்து சிகிச்சை பெற்றுவருவதாகவும் தொற்று நோய் தடுப்புப் பிரிவு தெரிவித்துள்ளது.

இலங்கையில் முதலாவது கொரோனா நோயாளி குணமடைந்து இன்று வீடு திரும்பினார்!!

இலங்கையில் முதலாவதாக இனங்காணப்பட்ட கொரோனா நோயாளி பூரணமாக குணமடைந்து வீடு திரும்பியுள்ளார்.

கடந்த சில வாரங்களாக கொழும்பு அங்கொட IDH வைத்தியசாலையில் சிகிச்சை பெற்று வந்த நிலையில் இன்று வீடு திரும்பியுள்ளார்.

இத்தாலிய சுற்றுலா பயணிகளுக்கு வழிகாட்டியாக செயற்பட்டவருக்கு கொரோனா வைரஸ் தொற்று ஏற்பட்டமை உறுதி செய்யப்பட்ட நிலையில் வைத்தியசாலையில் அனுமதிக்கப்பட்டார்.

இதேவேளை இலங்கையில் கொரோனா வைரஸினால் பாதிக்கப்பட்ட மேலும் 86 நோயாளர்கள் தொடர்ந்தும் பல்வேறு வைத்தியசாலையில் சிகிச்சை பெற்று வருகின்றனர்.

பாதிக்கப்பட்ட நோயாளர்களில் மேலும் மூன்று நோயாளர்கள் பூரணமாக குணமடைந்த நிலையில், இருவர் ஆபத்தான நிலையில் உள்ளதாக சுகாதாரதுறை பணிப்பாளர் அனில் ஜாசிங்க தெரிவித்திருந்தமை குறிப்பிடத்தக்கது.

கொரோனா வைரஸ் தொற்று ஏற்பட்டவரின் குடும்பத்தினருக்கும் கொரோனா!!

கொரோனா வைரஸ் தொற்றுக்கு இலக்காகி கொழும்பு ஐ.டி.எச். வைத்தியசாலையில் அனுமதிக்கப்பட்டுள்ள நபரின் 88 வயதான தாய், 51 வயதான மனைவி மற்றும் 23 வயதான மகள் ஆகியோருக்கு கொரோனா தொற்று ஏற்பட்டுள்ளது உறுதிப்படுத்தப்பட்டுள்ளது.

இந்த விடயத்தை ஜாஎல பொது சுகாதார பரிசோதகர் அனுர அபேரத்ன தெரிவித்துள்ளார். இந்த நபர் கடந்த பெப்ரவரி மாதம் இத்தாலியில் இருந்து வந்துள்ளார்.

ஜாஎல கபாலகந்த பிரதேசத்தை சேர்ந்த 64 வயதான இந்த நபருக்கு கொரோனா தொற்று ஏற்பட்டு கொழும்பு ஐ.டி.எச். வைத்தியசாலையில் அனுமதிக்கப்பட்டுள்ளார்.

இந்த நபர் இத்தாலியில் இருந்து வந்தவர்களுடன் பழகியுள்ளதாகவும் தகவல்கள் கிடைத்துள்ளன.

கொரோனா வைரஸ் தொற்று ஏற்பட்டுள்ள அனைவரும் சிகிச்சைக்காக கொழும்பு ஐ.டி.எச். வைத்தியசாலையில் அனுமதிக்கப்பட்டுள்ளனர்.

இவர்களின் குடும்ப உறுப்பினர்கள் தினமும் பரிசோதனைக்கு உட்படுத்தப்பட்டு வருவதுடன் தனிமைப்படுத்தப்பட்டு உள்ளதாகவும் அனுர அபேரத்ன குறிப்பிட்டுள்ளார்.

A9 வீதியில் உள்ள மக்கள் அச்சப்படத் தேவையில்லை!!

ஊரடங்கு சட்டம் காரணமாக வவுனியா – ஓமந்தை காவலரண் மூடப்பட்டுள்ளதால், அந்த காவலரண் ஊடாக அவசர நோயாளிகளை அழைத்துச் செல்லுதல், அத்தியவசிய பொருட்களை கொண்டு செல்லுதல் உள்ளிட்ட நடவடிக்கைகள் நடைபெறும் என்பதால், ஏ 9 வீதியில் உள்ள மக்கள் அச்சப்பட தேவையில்லை என வவுனியா அரசாங்க அதிபர் எஸ்.எம்.பந்துசேன தெரிவித்துள்ளார்.

வவுனியா மாவட்ட செயலகத்தில் நேற்று செய்தியாளர்களிடம் கருத்து வெளியிடும் போதே அரசாங்க அதிபர் இதனை கூறியுள்ளார்.

ஊரடங்குச் சட்டம் தொடர்ந்தும் அமுல்படுத்தப்பட்டால், மக்களுக்கு தேவையான உணவுப் பொருட்கள் கூட்டுறவுச் சங்கங்கள் மற்றும் வர்த்தக சங்கங்கள் ஊடாக வழங்க நடவடிக்கை எடுக்கப்படும்.

ஏ 9 வீதிக்கு வெளியில் வசிப்போர், வவுனியாவில் வசிப்போர் அவசர நோயாளிகளை வைத்தியசாலைக்கு எடுத்துச் செல்ல தேவையான அனைத்து நடவடிக்கைகள் குறித்தும் பொலிஸாருக்கு அறிவித்து அதனை மேற்கொள்ள முடியும் எனவும் அரசாங்க அதிபர் கூறியுள்ளார்.

கொரோனா வைரஸ் தொற்று : ஏனைய நாடுகளை விட மேல் கோட்டில் இலங்கை!!

மார்ச் மாதம் 11ஆம் திகதி கொரோனா தொற்றுக்கு இலக்காகிய முதலாவது இலங்கையர் அடையாளம் காணப்பட்டு இன்றுடன் 12 தினங்கள் கடந்துள்ளதாக சிங்கள ஊடகமொன்று தெரிவித்துள்ளது.

இந்த நிலையில் நோயாளிகள் அடையாளம் காணப்படும் நாடுகள் வரிசையில் இலங்கை மோசமாக இருக்கும் பல நாடுகளை விட மேல் கோட்டில் இருப்பதாக தெரியவந்துள்ளது.

ஒப்பிட்டு பார்க்கும் போது முதல் தினத்தில் இலங்கை, அமெரிக்கா, இங்கிலாந்து, ஜேர்மனி, பிரான்ஸ், ஸ்பெயின், பெல்ஜியம், சுவீடன், அவுஸ்திரேலியா, கனடா, மலேசியா, பிலிப்பைன்ஸ் ஆகிய நாடுகளை விட மேலே உள்ளது.

இந்த நாடுகளில் கொரோனா தொற்றிய முதல் நோயாளி அடையாளம் காணப்பட்டு 19 நாட்களின் பின்னரே அந்த வைரஸ் தொற்றிய நோயளிகள் அடையாளம் காணப்படுவது துரிதமாக அதிகரித்தது.

இத்தாலியில் முதல் அதிகரித்த வேகத்தை விட இலங்கை கீழ் இருந்தாலும் வைரஸ் தொற்றியவர்கள் அடையாளம் காணப்பட்ட முதல் 12 நாட்களில் ஏனைய பல நாடுகளை விட இலங்கை மேல் கோட்டில் இருப்பது கவனத்தில் கொள்ள வேண்டிய விடயம் என சுட்டிக்காட்டப்பட்டுள்ளது.

இலங்கையில் கடந்த ஜனவரி மாதம் 27ஆம் திகதி கொரோனா தொற்றிய சீனப் பெண் அடையாளம் காணப்பட்டார்.

யாழில் கொரோனா தொற்றுக்குள்ளான சுவிஸ் போதகரின் ஆராதனையில் கலந்து பலர் தலைமறைவு!!

யாழ்ப்பாணம், அரியாலை தேவாலயத்தில் சுவிஸ் போதகரின் ஆராதனையில் கலந்து கொண்ட 11 குடும்பங்களை சேர்ந்த 49 பேர் வீடுகளில் தடுத்து வைக்கப்பட்டுள்ளனர்.

மன்னார் மாவட்டத்தை சேர்ந்தவர்களே இவ்வாறு தடுத்து வைக்கப்பட்டுள்ளனர். அவர்கள் மன்னார் சுகாதார அதிகாரிகள் அவர்களை தங்கள் வீடுகளிலேயே தடுத்து வைத்து தனிமைப்படுத்த நடவடிக்கை மேற்கொண்டுள்ளனர்.

இந்த குடும்பங்கள் மன்னார் மடு நானாட்டன் பகுதியை சேர்ந்தவர்கள் என தெரியவந்துள்ளது. இவர்கள் கடந்த 15ஆம் திகதி அரியாலையில் இடம்பெற்ற ஆராதனையில் கலந்து கொண்டுள்ளனர்.

குறித்த சுவிஸ் போதகருக்கு கொரோனா தொற்றியமை தொடர்பில் குறித்த 11 குடும்பத்தினரும் தாம் அந்த ஆராதனைகளில் கலந்து கொண்டதனை சுகாதார அதிகாரிகளுக்கு தெரியப்படுத்தியுள்ளனர்.

இந்த ஆராதனைக்காக 300 இற்கும் அதிகமானோர் கலந்து கொண்ட போதிலும் அங்கு அரைவாசிப் பேரை மாத்திரமே பொலிஸாரால் கண்டுபிடிக்க முடிந்துள்ளது. ஏனையவர்கள் தொடர்பில் தகவல் ஒன்றும் கிடைக்கவில்லை என கூறப்படுகின்றது.

வட மாகாணம், கொழும்பு உட்பட எட்டு மாவட்டங்களில் ஊரடங்குச் சட்டம் வெள்ளி வரை நீடிப்பு!!

வட மாகாணம், கொழும்பு உட்பட எட்டு மாவட்டங்களில் ஊரடங்குச் சட்டம் எதிர்வரும் வெள்ளிக்கிழமை வரை நீடிக்கப்பட்டுள்ளதாக ஜனாதிபதி செலயகம் அறிவித்துள்ளது.

எனினும் இந்தப் பகுதியில் நாளை காலை 6 மணிக்கு தளர்த்தப்படும் ஊரடங்குச் சட்டம் மீண்டும் நண்பகல் 12 மணிக்கு அமுல்படுத்தப்பட்டு, வெள்ளிக்கிழமை வரை நீடிக்கப்படும் என செயலகம் அறிவித்துள்ளது.

கொழும்பு, கம்பஹா, புத்தளம், யாழ்ப்பாணம், வவுனியா, மன்னார், கிளிநொச்சி, முல்லைத்தீவு ஆகிய மாவட்டங்களில் அமுல்படுத்த ஊரடங்குச் சட்டம் மேலும் நீடிக்கப்பட்டுள்ளது.

ஏனைய மாவட்டங்களுக்கு இன்று பிற்பகல் 2 மணிக்கு அமுல்படுத்தப்படும் ஊரடங்கு சட்டம் 26ஆம் திகதி காலை 6 மணிக்கு நீக்கப்படும். பின்னர் அன்றைய தினம் 12 மணிக்கு மீண்டும் அமுல்படுத்தப்படும்.

இந்த காலப்பகுதியில் நாட்டின் அனைத்து மாவட்டங்களுக்கும் இடையிலான பயணங்கள் முழுமையாக தடை செய்யப்பட்டுள்ளது.

அத்துடன் வெளிநாட்டு சுற்றுலா பயணிகளை இடங்களுக்கு இடம் கொண்டு செல்வது முழுமையாக தடை செய்யப்பட்டுள்ளது.

ஊரடங்கு சட்டம் அமுல்படுத்தப்பட்டுள்ள காலப்பகுதியில் எந்த மாவட்டமாக இருந்தாலும் விவசாயம் செய்வதற்கு அனுமதி வழங்கப்பட்டுள்ளது.

அரிசி உட்பட அத்தியாவசிய பொருட்கள் மற்றும் மரக்கறிகளை கொண்டு செல்வதற்கும் சந்தர்ப்பம் வழங்கப்பட்டுள்ளது.

ஊரடங்கு சட்டம் அமுலாக்கப்பட்டதன் பின்னர் கொழும்பில் குடும்ப வன்முறைகள் அதிகரிப்பு!!

கொரோனா வைரஸ் தொற்று காரணமாக ஊரடங்கு சட்டம் அமுலாக்கப்பட்டதன் பின்னர் கொழும்பில் குடும்ப வன்முறைகள் அதிகரித்துள்ளதாக தெரிவிக்கப்பட்டுள்ளது. இந்த விடயத்தை தேசிய வைத்தியசாலை அறிவித்துள்ளது.

வழமையாக தேசிய வைத்தியசாலைக்கு வரும் விபத்துக்கள் தொடர்பானவர்களின் எண்ணிக்கை சராசரியாக குறைந்துள்ளது.

எனினும் குடும்ப பிரச்சினைகள் காரணமாக காயமடைந்த பெண்களின் தொகை அதிகமாக உள்ளதாக தேசிய வைத்தியசாலையின் இணைப்பாளர் புஸ்பா ரமணி டி சொய்ஸா தெரிவித்துள்ளார்.

நாளொன்றுக்கு சராசரியாக விபத்து தொடர்பில் 250 சம்பவங்களுடன் தொடர்புடையவர்களாவது தேசிய வைத்தியசாலைக்கு கொண்டு வரப்படுவார்கள்.

எனினும் நேற்று 60 சம்பவங்கள் மாத்திரமே பதிவானதாக புஸ்பா குறிப்பிட்டுள்ளார்.

இலங்கையில் தீவிரம் அடையும் கொரோனா : ஒரு நோயாளியால் 406 பேருக்கு பரவும் வைரஸ்!!

இலங்கையில் கொரோனா வைரஸ் ஆபத்து நாளுக்கு நாள் அதிகரித்து வருவதாக அரச வைத்திய அதிகாரிகள் சங்கம் தெரிவித்துள்ளது.

அரசாங்கத்தினால் வழங்கப்படுகின்ற ஆலோசனைகளை உரிய முறையில் பின்பற்ற வேண்டும் என சங்கத்தின் தலைவர் வைத்தியர் அனுருந்த பாதெனியா குறிப்பிட்டுள்ளார்.

கொவிட்-19 எனும் கொரோனா தடுப்பு பிரிவில் இடம்பெற்ற ஊடகவியலாளர் சந்திப்பில் கலந்து கொண்டு கருத்து வெளியிடும் போதே அவர் இவ்வாறு கூறியுள்ளார்.

தற்போது மேற்கொள்ளப்படும் சோதனைகளுக்கமைய இந்த வைரஸ் தொற்று மிக வேகமாக பரவ கூடும். ஒரு நோயாளியினால் ஒரு மாதத்திற்குள் 406 பேருக்கு பரவ கூடும் என பாதெனியா குறிப்பிட்டுள்ளார்.

ஊரடங்கு சட்டத்தை நீக்கினாலும் முடிந்தளவு வீட்டில் இருப்பதற்கு நடவடிக்கை மேற்கொள்ளுமாறும், அவசியமான பணிகளை தவிர்த்து வீட்டை விட்டு வெளியே செல்ல வேண்டாம் என பாதெனியா மேலும் தெரிவித்துள்ளார்.

இலங்கையில் கொரோனாவினால் ஏற்பட்ட பாதிப்பு : மக்கள் மத்தியில் ஏற்பட்ட மாற்றம்!!

மக்கள் மத்தியில் ஏற்பட்ட மாற்றம்

இலங்கையில் கொரோனா வைரஸை முழுமையாக கட்டுப்படுத்துவதற்கான நாடு பூராகவும் அமுல்படுத்தப்பட்டிருந்த ஊரடங்குச் சட்டம் இன்று காலை ஆறு மணி முதல் தளர்த்தப்பட்டுள்ளது. கொழும்பு, யாழ்ப்பாணம் உட்பட 8 மாவட்டங்களில் தொடர்ந்தும் ஊரங்குச் சட்டம் அமுலில் உள்ளது.

இந்நிலையில் ஊரடங்குச் சட்டம் தளர்த்தப்பட்ட பகுதிகளில் பொருட்களை கொள்வனவு செய்வதில் மக்கள் ஈடுபட்டு வருகின்றனர். எனினும் அரசாங்கத்தின் அறிவுறுத்தல்களை மக்கள் கடைப்பிடிக்கும் புகைப்படங்கள் சமூக வலைத்தளங்களில் வெளியாகி உள்ளன.

பொருட்களை வாங்க நீண்ட வரிசையில் காத்திருக்கும் மக்கள் ஒரு மீற்றர் இடைவெளியில் காத்திருந்ததுடன், முகத்திற்கு மாக்ஸ் அணிந்திருந்தமை குறிப்பிடத்தக்கது.

வங்கி ஊழியர்களுக்கு பொலிஸார் விடுத்துள்ள முக்கிய அறிவிப்பு!!

நாட்டில் ஊரடங்குச் சட்டம் அமுல்படுத்தப்பட்டுள்ள நிலையில் வங்கி ஊழியர்கள் தமது நிறுவன அடையாள அட்டை காண்பித்து பயணிக்கலாம் என அறிவிக்கப்பட்டுள்ளது.

அத்தியாவசிய தேவைகளுக்கு மாத்திரம் இதனை பயன்படுத்திக் கொள்ளுமாறு பதில் பொலிஸ் மா அதிபர் வங்கி ஊழியர்களை கேட்டுள்ளார்.

ஏற்கனவே ஊடகவியலாளர்கள் மற்றும் அத்தியாவசிய சில திணைங்களின் ஊழியர்கள், ஊரடங்குச் சட்ட காலப்பகுதியில் பயணிக்க அனுமதி வழங்கப்பட்டிருந்தது.

இதேவேளை பொலிஸ் ஊரடங்குச் சட்டம் தளர்த்தப்பட்டுள்ள பகுதிகளில் உள்ள அனுமதி பெற்ற வணிக வங்கிகள் மற்றும் விசேட வங்கி கிளைகளை இன்று குறைந்தது இரண்டு மணித்தியாலங்கள் வரை திறக்குமாறு இலங்கை மத்திய வங்கி கேட்டுள்ளது.

எனினும் கொடுக்கல் வாங்களை மேற்கொள்ள முடியுமானவரை ATM இயந்திரங்களையும் ஏனைய தொழினுட்பவசதிகளை பயன்படுத்துமாறு மத்திய வங்கி வாடிக்கையாளர்களை கேட்டுள்ளது.

மேலும் கொடுக்கல் வாங்களை மேற்கொள்ளும் போது முடியுமானவரை அத்தியாவசிய சுகாதார நடைமுறைகளை பின்பற்றுமாறு வாடிக்கையாளர்களையும், வங்கி ஊழியர்களையும் மத்திய வங்கி அறிக்கை ஒன்றை விடுத்து கேட்டுக்கொண்டுள்ளது.

வவுனியாவில் மூன்றாவது நாளாகவும் ஊரடங்கு தொடர்கிறது!!

ஊரடங்கு..

நாட்டில் ஏற்பட்டுள்ள கொரனா தொற்றையடுத்து மூன்றாவது நாளாகவும் வவுனியாவில் ஊரடங்கு சட்டம் அமுல்படுத்தப்பட்டுள்ளது.

நாட்டில் கொரனா தொற்று தீவிரம் அடைந்ததையடுத்து கடந்த வெள்ளிக்கிழமை மாலை 6 மணிக்கு நாடு பூராகவும் ஊடரங்கு சட்டம் நடைமுறைப்படுத்தப்பட்டது.

இந்நிலையில் நாட்டின் பல பகுதிகளிலும் இன்று காலை 6 மணிக்கு ஊரடங்கு சட்டம் தளர்த்தப்பட்டு மீண்டும் மாலை 2 மணிக்கு நடைமுறைக்கு வரவுள்ள போதும் வவுனியா உள்ளிட்ட வடமாகாணத்தில் ஊரடங்கு சட்டம் தொடர்ந்தும் அமுலில் உள்ளது.

குறிப்பாக வடமாகாணத்தின் யாழ்ப்பாணத்தில் கொரனா நோயாளி ஒருவர் இனங்காணப்பட்டதையடுத்து வவுனியாவில் ஊரடங்கு சட்டம் நாளை காலை 6 மணிவரை நீடிக்கப்பட்டுள்ளது. பொலிசார் கடமையில் ஈடுபடுத்தப்பட்டுள்ளதுடன் வவுனியாவில் இருந்து பிற மாவட்டங்களுக்கான போக்குவரத்தும் தடைப்பட்டுள்ளது.

வவுனியாவின் வீதிகள் அனைத்தும் சன நடமாட்டம் இன்றி வெறிச்சோடி காணப்படுவதுடன், பொலிசார் பாதுகாப்புக் கடமையில் உள்ளனர்.

இலங்கையில் கொரோனா வைரஸினால் அதிகம் பாதிக்கப்படுபவர்கள் யார்?

இலங்கையில் கொரோனா தொற்றினால் அதிகம் பாதிக்கப்படுபவர்கள் தொடர்பான தகவலை சுகாதாரதுறை அமைச்சு வெளியிட்டுள்ளது.

அதற்கமைய 41 – 50 வயதிற்குட்பவர்கள் அதிகளவில் பாதிக்கப்படுவதாக அமைச்சு குறிப்பிட்டுள்ளது.

இதுவரை அடையாளம் காணப்பட்ட நோயாளர்களின் எண்ணிக்கையுடன் ஒப்பிடும் போது 41 – 50 வயதிற்குட்பவர்கள் 32.1% வீதமாகும்.

நோயாளர்களின் 19.2% வீதமானோர் 31 – 40 வயதுயடைவர்கள். மேலும் 16.7% வீதமானோர் 51 – 60 வயதிற்குட்பட்டவர் என சுகாதார பிரிவு குறிப்பிட்டுள்ளது.

இலங்கையில் இதுவரை கொரோனா வைரஸ் தொற்றினால் 82 பேர் பாதிக்கப்பட்டுள்ளதாக சுகாதாரதுறை அமைச்சு தெரிவித்துள்ளது.

இதேவேளை மூவாயிரத்திற்கும் மேற்பட்டவர்கள் தனிமைப்படுத்தும் நிலையங்களில் தங்க வைக்கப்பட்டு பரிசோதிக்கப்பட்டு வருகின்றனனர்.

இலங்கையில் கொரோனா தொற்று நோயாளிகளின் எண்ணிக்கை 86 ஆக அதிகரிப்பு!!

இலங்கையில் மேலும் 5 கொரோனா நோயாளர்கள் அடையாளம் காணப்பட்டுள்ளதாக சுகாதார பிரிவு அறிவித்துள்ளது.

இன்று காலை 5 நோயாளர்கள் அடையாளம் காணப்பட்டுள்ளதுடன், மொத்த எண்ணிக்கை 86 ஆக அதிகரித்துள்ளது.

மேலும், கொரோனா தொற்று சந்தேகத்தில் 15 வைத்தியசாலைகளில் 222 பேர் தங்கியிருந்து சிகிச்சை பெற்றுவருவதாகவும் தொற்று நோய் தடுப்புப் பிரிவு தெரிவித்துள்ளது.

A9 வீதி தற்காலிகமாக மூடப்பட்டது!!

யாழில் கொரோனோ வைரஸ் தொற்றுள்ள ஒருவர் அடையாளம் காணப்பட்டுள்ள நிலையில் வடமாகாணத்திற்கான ஊரடங்கு சட்டம் எதிர்வரும் செவ்வாய் கிழமை வரை நீடிக்கப்பட்டுள்ளது.

இந்நிலையில் வவுனியா மாவட்டம் தழுவிய ரீதியில் பொலிஸார் கடமையில் ஈடுபடுத்தப்பட்டுள்ளதுடன், அத்தியாவசிய தேவைகள் நிமித்தம் வெளியில் செல்வோரை தவிர ஏனையவர்கள் பொலிஸாரால் திருப்பி அனுப்பப்பட்டிருந்தனர்.

இந்நிலையில் இன்று மாலை 6 மணிக்கு பின்னர் ஓமந்தை, மற்றும் கனகராயன்குளம் பகுதியில் இராணுவ சோதனை சாவடிகள் அமைக்கப்பட்டுள்ளதுடன், ஏ9 வீதி மூடப்பட்டுள்ளது.

பொலிஸாரின் தற்காலிக அனுமதி பத்திரம் வைத்திருப்பவர்கள் மாத்திரம் குறித்த வீதியால் பயணம் செய்ய அனுமதிக்கப்படுவதுடன் சோதனை நடவடிக்கைகளும் முன்னெடுக்கப்பட்டு வருகின்றது.