புதிய அரசியல் யாப்பு தொடர்பான கலந்துரையாடலொன்று அன்புக்கும் நட்புக்குமான வலயமைப்பினரின் ஏற்பாட்டில் சர்வதேச மனித உரிமைகள் தினத்தை முன்னிட்டு இன்று (10.12.2017) வவுனியாவில் தனியார் விருந்தினர் விடுதியொன்றில் நடைபெற்றது.

நிகழ்வில் தமிழ் தேசிய கூட்டமைப்பின் பாராளுமன்ற உறுப்பினர் எம்.ஏ.சுமந்திரன் பிரதம விருந்தினராக கலந்துகொண்டு உரையாற்றுகையிலேயே மேற்கண்டவாறு தெரிவித்திருந்தார். தொடர்ந்து கருத்து தெரிவித்த அவர்..

அரசியலமைப்பு சட்டத்தின் பிரகாரம் நிரந்தரப் பெரும்பான்மையும், நிரந்தரமாக எண்ணிக்கையில் சிறுபான்மையிரும் இருக்கிற போது எண்ணிக்கையிலே சிறுபான்மையிராக நாடு பூராவும் இருப்பவர்கள் ஏதாவது ஒரு இடத்திலே பெரும்பான்மையிராக வாழ்ந்தால் பிராந்தியங்களுக்கு அரச அதிகாரங்களை பகிர்ந்து கொடுக்கும்போது சிறுபான்மையினரும் அதிகாரங்களை கையாளக்கூடியதாக இருக்கும்.

நாடு முளுவதும் சிறுபான்மையிராக இருப்பவர்கள் பெரும்பான்மையிராக வாழ்வது வடக்கு கிழக்கிலேதான் அதனாலேதான் அதிகாரங்களை பிராந்தியங்களாக பகிருகின்றபோது ஒரு வழியிலே பிரச்சனைக்கு தீர்வு காணப்படக்கூடியதாக இருக்கின்றது.

ஆனால் நாட்டிலே மற்றைய பகுதிகளில் வாழ்கின்ற மலையக, முஸ்லிம் மற்றும் தமிழ் மக்களுக்கு சமூதாய அவைகளை உருவாக்குவதன் ஊடாக அவர்களின் பிரச்சனையை தீர்க்க கூடியதாக இருக்கும்.

தமிழ் மக்களுக்காக மட்டுமல்ல மலையக மக்கள், சிங்கள மற்றும் முஸ்லிம் மக்களின் நியாயமான கோரிக்கைகளுக்கும் நாங்கள் ஆதரவாகவே செயற்படுவோம். ஆனால் அவர்களுடைய பிரதிநிதிகளாக பேசுகிற உரித்து எங்களுக்கு கொடுக்கப்படவில்லை. இந்நிலமைக்கு மக்கள் எங்களை தங்கள் பிரநிதியாக தெரிவு செய்யாமையே காரணம்.

ஒரு குறித்த மதத்திற்கு முன்னுரிமை வழங்குவதற்கு நான் எதிரானவன். ஒரு நாட்டினுடைய அரசியலமைப்பு சட்டம் மக்கள் அனைவரையும் சமமாக நடத்துவதாக இருந்தால் ஒரு குறித்த மதத்திற்கு மாத்திரம் முதன்மை ஸ்தானம் வழங்குவது தவறானது.

இடைக்கால அறிக்கையிலும் கையெழுத்திட்டு அதை கூறியிருக்கிறேன். அத்துடன் பாராளுமன்றத்திலும், அரசியலமைப்பு பேரவையிலும் நான் அதை சொல்லியிருக்கிறேன். ஒரு குறித்த சமயம் நடைமுறையில் இருப்பதற்கு அரச பாதுகாப்புதான் அவசியம் என்று கேட்டால் அதற்கு ஏன் மறுப்பு தெரிவிக்க வேண்டும்.

என்னுடைய சிந்தனையின்படி சமயங்கள் மேலானவைகள். ஒரு அரசாங்கத்தின் பாதுகாப்பிலேதான் ஒரு சமயம் தப்பி பிழைக்குமாக இருந்தால் அது உருப்படியான சமயமாக இருக்க முடியாது.

ஒரு அரசியலமைப்பு சட்டமானது நூற்றுக்கு நூறு எல்லா மக்களும் ஏற்றுக்கொள்ளக்கூடியதாக இருக்க முடியாது. பாகுபாடற்ற ஒரு காப்புவாசகம் புதிய அரசியலமைப்பில் எழதப்படுமாக இருந்தால் அதை ஏற்றுக்கொள்ளலாம். இது குறித்த பல பௌத்த உயர்பீடங்களுடன் பேச்சுவார்த்தை நடத்தியிருக்கிறோம். அதற்கு அவர்கள் இணங்கியிருக்கிறார்கள். மக்கள் அனைவரும் சமமாக நடத்தப்பட வேண்டும் என்பது ஒரு பௌத்த கோட்பாடு. எனவே பெயரளவில் முதன்மை ஸ்தானத்தை பௌத்தத்திற்கு வழங்குங்கள் மற்ற மதங்களையும் பாகுபாடற்ற முறையில்பாதுகாப்பதற்கு இணங்குகிறோம் என தெரிவித்துள்ளார்கள்.

ஒரே நட்டுக்குள் நாடு பிரிபடாமல் இருக்க வேண்டும் என நாங்கள் சொல்வதற்கான காரணம் எங்களுடைய மக்கள் எங்களுக்கு அந்த ஆணையை வழங்கியுள்ளனர்.1977 ஆம் ஆண்டு மக்கள் ஒரு ஆணையை கொடுத்தார்கள். நாட்டை தனியாக பிரியுங்கள் என்று. அதற்கு முன் 1970ம் அண்டு மக்கள் ஆணையை கொடுத்தார்கள் நாட்டை பிரிக்க வேண்டாம் என்று. இலங்கை தமிழரசுக்கட்சியின் தேர்தல் விஞ்ஞாபனம் 1970 ஆம் ஆண்டிலே தெட்டத்தெளிவாக சொல்லப்பட்டிருந்தது தனிநாடு கேட்பவர்களுக்கு எதிராக வாக்களிக்க வேண்டும் என சொல்லியிருந்தது. அதன்படிதான் மக்கள் வாக்களித்திருந்தனர்.

அன்று தனிநாடு கோரிய வி.நவரட்ணம் மற்றும் சி.சுந்தரலிங்கம் ஆகியோர் கட்டுக்காசை இழந்திருந்தனர். ஆனால் ஏழு வருட காலத்திற்குள் எங்கள் மக்களுடைய நிலைமை மாறியிருந்தது.

எமது மக்கள் தனி நாடு கோரியிருந்தனர். இப்போது நிலைமை மாறி ஒரே நாட்டுக்குள் தீர்வை பெற்றுத்தாருங்கள் என்ற ஆணையை மக்கள் எமக்கு வழங்கியிருக்கிறார்கள். சமூக ஒப்பந்தங்களுக்கு ஒரு இணக்கப்பாடு ஏற்படுத்தப்படவேண்டும்.

சமஸ்டியைப் பற்றி கூறுவதானால் இடைக்கால அறிக்கையில் முதல் இரண்டு பக்கங்களில் ஒற்றையாட்சிக்கு மாற்றீடாக ஒரு மும்மொழிவு கொடுக்கப்பட்டிருக்கிறது.

அதிலே இலங்கைக்கு ஒற்றையாட்சி பொருத்தமற்றது என தெளிவாக சொல்லப்பட்டிருக்கிறது. உறுப்புரை இரண்டில் மாற்றீடாக நாடு ஒன்றாக இருக்கிறது என்பதை குறிக்கிறது.

சமஸ்டிக்கான குணாதியசங்கள் கொடுக்கப்படுகின்ற அதிகாரங்கள் தெளிவானதும் கொடுத்ததை திரும்ப பெற முடியாததாகவும், குறைக்கப்பட முடியாததாகவும், அதிகாரம் சம்பந்தமாக மத்திய அரசு தலையிட முடியாததாகவும் இருக்க வேண்டும். அவை இரண்டும் இந்த இடைக்கால அறிக்கையிலே உள்ளது. அத்துடன் அறுபது வருடங்களுக்கு முன்னைய சமஸ்டி ஒற்றையாட்சி என்கிற பதங்கள் இன்று மாறியுள்ளது.

ஒற்றையாட்சி என்கிற பதம் உருவானது பிரித்தானியாவில் ஒரு பாராளுமன்றத்திலிருந்ததான். அனால் இன்று பிரித்தானியாவில் பல பாராளுமன்றங்கள் உள்ளன. அத்துடன் பிரிந்து போவதற்கதான உரிமையும் உள்ளது. அதே போலதான் சமஸ்டியின் விளக்கமும் மாறியுள்ளது. உதாரணத்திற்கு இந்தியாவை எடுத்துக்கொள்ளலாம்.

இடைக்கால அறிக்கையின் சுபாவம் சமஸ்டிக்கு ஒத்ததாக இருக்கிறது. அண்மையிலே இலங்கை உயர்நீதிமன்றம் தீர்ப்பு ஒன்றை வழங்கியுள்ளது. இலங்கை தமிழரசுக்கட்சிக்கு எதிராக தொடுக்கப்பட்ட வழக்கிலே ஒற்றையாட்சி உள்ள பல நாடுகள் சமஸ்டியாக இருக்கிறது.

சமஸ்டியாக இருக்கிற பல நாடுகள் ஒற்றையாட்சி முறைமையை கொண்டுள்ளன. ஆகவே இந்த சொற்பதங்களில் எந்தவிதமான அர்த்தங்களும் இல்லை என சொல்லியுள்ளது.

இலங்கை தமிழரசுக்கட்சி சமஸ்டி அடிப்படையிலான ஒரு தீர்வை கேட்பது அவர்களுடைய உரித்து என இலங்கை உயர் நீதிமன்றம் தெரிவித்துள்ளது. ஆகவே பெயர் முக்கியமில்லை அறிக்கையின் உள்ளடக்கம்தான் முக்கியம் என்று தெரிவித்தார்.

பனாகொடை இராணுவ முகாமில் கடமையாற்றும் ஒருவர் மின்சாரம் தாக்கி உயிரிழந்துள்ளார்.

முகாமில் இருக்கும் தடாகத்தில் மின் கோளாரை சரிசெய்து கொண்டிருந்த போதே அவர் இவ்வாறு மின்சாரத் தாக்குதலுக்கு இலக்காகியுள்ளதாக பொலிஸார் குறிப்பிட்டுள்ளனர்.

மேலும், இவர் பன்னிப்பிடிய – பெலன்வத்தை பகுதியைச் சேர்ந்த 28 வயதான இராணுவச் சிப்பாய் ஆகும்.

சடலம் ஹோமாகம வைத்தியசாலையில் வைக்கப்பட்டுள்ளது. இது தொடர்பான மேலதிக விசாரணைகள் மேற்கொள்ளப்பட்டு வருகின்றன.

வேலை பெற்றுத் தருவதாக கூறி கரூரிலுள்ள இலங்கை அகதிச் சிறுமியொருவரை பாலியல் தொழிலில் ஈடுபடுத்த முயன்ற ஏழு பேர் கைது செய்யப்பட்டுள்ளதாக தெரிவிக்கப்படுகிறது.

சிறுமியின் தாயார் பொலிஸ் நிலையத்தில் மேற்கொண்ட முறைப்பாட்டின் அடிப்படையிலேயே குறித்த ஏழு பேரும் கைது செய்யப்பட்டுள்ளனர். சம்பவம் தொடர்பில் மேலும் தெரியவருவதாவது,

மூன்று தலைமுறைகளாக கரூரில் அகதி வாழ்க்கை வாழ்ந்து வரும் குடும்பத்தைச் சேர்ந்த குறித்த சிறுமி வறுமையின் காரணமாக பாடசாலை கல்வியை தொடர முடியாமல் வீட்டில் இருந்துள்ளார். இந்த சந்தர்ப்பத்தில் குறித்த சிறுமியின் தாய்க்கு அறிமுகமான சரண்யா எனும் 27 வயதான பெண்ணொருவர் வீட்டில் இருக்கும் சிறுமிக்கு வேலை பெற்றுத் தருவதாக தெரிவித்துள்ளார்.

இந்த நிலையில் திடீரென்று அவர் சிறுமியை திருப்பூருக்கு அழைத்துச் சென்று அங்கு மேலும் சிலருடன் இணைந்து அவரை பலவந்தமாக பாலியல் தொழிலில் ஈடுபடுத்த முயன்றுள்ளார்.

இதனைத் தொடர்ந்து அங்கிருந்து தப்பி வந்த சிறுமியின் செயற்பாட்டில் ஏற்பட்டிருந்த மாற்றம் தொடர்பில் சந்தேகமடைந்த சிறுமியின் தாயார் இது தொடர்பில் பொலிஸ் நிலையத்தில் முறைப்பாடு செய்துள்ளார்.

முறைப்பாட்டின் அடிப்படையில் மேற்கொள்ளப்பட்ட விசாரணைகளில் இருந்து அனைத்து விடயங்களும் தெரியவந்துள்ள நிலையில் நான்கு பெண்கள் உட்பட ஏழு பேர் கைது செய்யப்பட்டுள்ளனர்.

அத்துடன், இந்த ஏழு பேர் மீதும் ஆட்கடத்தல், சிறுவர் துஷ்பிரயோகம், சட்டவிரோதமாகத் தடுத்து வைத்தல் ஆகிய பிரிவுகளில் பொலிஸார் வழக்கு பதிவு செய்துள்ளமை குறிப்பிடத்தக்கது.