உயிரிழந்தவர்களின் எண்ணிக்கை 194 ஆக அதிகரித்துள்ளதாக அனர்த்த முகாமைத்துவ மத்திய நிலையம் இறுதியாக வெளியிட்டுள்ள அறிக்கையில் தெரிவிக்கப்பட்டுள்ளது. இது தொடர்பாக அனர்த்த முகாமைத்துவ மத்திய நிலையம் வெளியிட்டுள்ள அறிக்கையில்,

இலங்கையில் கடந்த வாரம் அடை மழையால் ஏற்பட்ட வெள்ளம் மற்றும் மண்சரிவால் பெருமளவான வாகனங்களும், உடமைகளும் அழிவடைந்துள்ளன. ஆயிரத்து 402 வீடுகள் முழுமையாகவும், 7 ஆயிரத்துக்கும் மேற்பட்ட வீடுகள் பகுதியளவும் சேதமடைந்துள்ளன.

இதேவேளை, உயிரிழந்தவர்களின் எண்ணிக்கை 194 ஆக அதிகரித்துள்ளது. 99 பேர் காணாமல்போயுள்ளனர். இடம்பெயர்ந்துள்ள 20 ஆயிரத்து 907 குடும்பங்களைச் சேர்ந்த 83 ஆயிரத்து 224 பேர் 376 முகாம்களில் தங்கவைக்கப்பட்டுள்ளனர். 63 பேர் காயமடைந்துள்ளனர்.

இலங்கையில் கடந்த 14 ஆண்டுகளில் ஏற்பட்டுள்ள மோசமான இந்த வெள்ளம் மற்றும் மண்சரிவால் 6 இலட்சத்து 4 ஆயிரத்துக்கு மேற்பட்டோர் பாதிக்கப்பட்டுள்ளனர். காலி, மாத்தறை ஆகிய மாவட்டங்களிலேயே அதிகளவான வீடுகள் சேதமடைந்துள்ளன.

கடந்த வியாழன், வெள்ளி ஆகிய தினங்களில் அடைமழை பெய்தபோதிலும் அதன்பின்னர் சற்று குறைவடைந்தது. இந்நிலையில், திங்கட்கிழமை முதல் மீண்டும் மழை ஆரம்பித்துள்ளது. இதனால், ஆறுகளின் நீர்மட்டம் அதிகரித்துள்ளது. வீதிகளில் தேங்கிய வெள்ளநீரும் வழிந்தோடாமல் இருக்கின்றது.

வெள்ள ஆபத்துள்ள பகுதிகளிலும், பலமிழந்து போயுள்ள அணைக்கட்டுகளை மண்மூடைகளைக் கொண்டு பலப்படுத்துவதிலும் இராணுவத்தினர் ஈடுபட்டுள்ளனர்.

குறிப்பாக, 15 மாவட்டங்களில் சீரற்ற காலநிலை நிலவினாலும் இரத்தினபுரி, களுத்துறை, காலி, அம்பாந்தோட்டை, கொழும்பு, கம்பஹா, கேகாலை ஆகிய மாவட்டங்களிலேயே அதிக பாதிப்புகள் ஏற்பட்டுள்ளன.

குறித்த மாவட்டங்களிலுள்ள பிரதான பல வீதிகள் நீரில் மூழ்கியுள்ளன. குளங்களில் கழிவுநீர் கலந்துள்ளது. இதனால், தொற்றுநோய் பரவும் அபாயமும் ஏற்பட்டுள்ளது.

இதற்கிடையில் படையினரின் உதவியுடன் அரசு மீட்புப் பணிகளையும் துரிதப்படுத்தியுள்ளது. தொண்டர் படைகளும், அரசியல் கட்சிகளின் நிவாரணப் பிரிவும் இந்த நடவடிக்கையில் ஈடுபட்டுள்ளன.

அதேவேளை, தொற்றுநோய் பரவும் அபாயமும் ஏற்பட்டுள்ளது. விழிப்பாக இருக்குமாறு பாதிக்கப்பட்ட பகுதிகளில் வாழும் மக்களிடம் சுகாதாரத்துறை அமைச்சு வேண்டுகோள் விடுத்துள்ளது.

இயற்கை அனர்த்தங்கள் காரணமாக தென்னிலங்கையில் எட்டு மாணவர்கள் உயிரிழந்துள்ளதுடன், மேலும் எட்டுப் பேர் காணாமல் போயுள்ளனர்.

அனர்த்தக் கல்வி தொடர்பான தென்மாகாண பிரதிப் பணிப்பாளர் பிரசஞ்சலி கமகே இந்தப் புள்ளிவிபரங்களைத் தெரிவித்துள்ளார்.

அவரது அறிக்கையில் தொடர்ந்தும் குறிப்பிடப்பட்டுள்ளதாவது, அனர்த்தங்கள் காரணமாக உயிரிழந்த எட்டு மாணவர்களில் ஆறு பேர் மாத்தறை மாவட்டத்தைச் சேர்ந்தவர்கள். ஏனைய இரண்டு பேரும் ஹம்பாந்தோட்டை மாவட்டத்தைச் சேர்ந்தவர்கள்.

அதேபோன்று காணாமல் போயுள்ள எட்டு மாணவர்களும் மாத்தறை மாவட்டத்தைச் சேர்ந்த மாணவர்களேயாகும். தெனியாய கல்வி வலயத்தைச் சேர்ந்த மாணவர்களே காணாமல் போயுள்ளனர்.

அங்குள்ள கொடபொல கனிஷ்ட பாடசாலை மண்சரிவுக்குள் அகப்பட்டபோது குறித்த மாணவர்கள் காணாமல் போயுள்ளனர்.

சடலங்களைத் தேடும் பணி தொடர்ந்தும் நடைபெற்றுக் கொண்டிருக்கின்றது என்றும் பிரசஞ்சலி கமகே தொடர்ந்தும் தெரிவித்துள்ளார்.

அண்மையில் ஏற்பட்ட பேரனர்த்தம் காரணமாக 200 பேர் வரையில் உயிரிழந்தும் நூற்றுக்கும் அதிகமானோர் காணாமல் போயுள்ளனர்.

இந்நிலையில் மண்சரிவில் காணாமல் போன மகளை காணாமையால் தந்தையொருவர் உயிரிழந்துள்ளார். காணாமல் மகள் மீண்டும் வருவார் என்ற நம்பிக்கையில் காத்திருந்த E.W. குணரத்ன என்பவரே இவ்வாறு உயிரிழந்துள்ளார்.

எஹேலியகொட பகுதியை சேர்ந்த இவர், மகள் காணாமல் காலப்பகுதியில் எந்தவித உணவும் உட்கொள்ளவில்லை என தெரிவிக்கப்படுகிறது.

உயிரிழந்தவரின் மகளான நிரோஷா சாமினி என்ற 22 வயது பெண் மண் சரிவில் சிக்கிய போதிலும் இதுவரையில் அவரது சடலத்தை கண்டுபிடிக்கவில்லை.

நோயினால் பாதிக்கப்பட்டிருந்த தந்தையிடம் இது தொடர்பிலான தகவல்கள் மறைக்கப்பட்டுள்ளன. எனினும் அவர் உண்மை அறிந்து கொண்டுள்ளார்.

இதனையடுத்து உணவு, நீர் இன்றி மகளுக்காக காத்திருந்த நிலையில் நேற்று காலை அவர் உயிரிழந்துள்ளார் என அறிவிக்கப்பட்டுள்ளது.

இரத்தினபுரி – களுத்துறைக்கு இடையில் அமைந்துள்ள கொலம்பெவ ஆயகம பகுதியில், சவப்பெட்டி வாங்க வசதியின்றி பொலித்தீனைக் கொண்டு சடலங்களை சுற்றி அடக்கம் செய்யப்பட்டுள்ளது.

அண்மையில் ஏற்பட்ட மண் சரிவின் போது மண்ணில் புதையுண்டு உயிரிழந்த ஐந்து பேரின் சடலங்கள் இவ்வாறு புதைக்கப்பட்டுள்ளன.

இறுதிக் கிரியைகள் எதுவும் நடத்தப்படாது பொலித்தீனால் சடலங்கைள சுற்றி குழி தோண்டி உறவினர்கள் புதைத்துள்ளனர்.

இறுதிக் கிரியை நடத்தவோ அல்லது சவப்பெட்டி கொள்வனவு செய்து அதில் சடலங்களை வைத்து நல்லடக்கம் செய்யவோ தங்களிடம் பண வசதி கிடையாது என உயிரிழந்தவர்களின் உறவினர்கள் தெரிவித்துள்ளனர்.

குறித்த பகுதியில் ஏற்பட்ட மண்சரிவில் எட்டு பேர் மண்ணில் புதையுண்டனர் எனத் தெரிவிக்கப்படுகிறது.

இதில் நான்கு சடலங்கள் முன்னதாக கண்டு மீட்டெக்கப்பட்டு சவப்பெட்டி இன்றி அடக்கம் செய்யப்பட்டுள்ளது.

பின்னர், 62 வயதான குணவதி என்பவரின் சடலம் மீட்கப்பட்டுள்ளது. அவரது சடலத்தையும் இறுதிக் கிரியைகளோ அல்லது சவப்பெட்டியோ இன்றி பொலித்தீனால் சுற்றி அடக்கம் செய்துள்ளனர்.

கனடாவில் கொலை குற்றம் சுமத்தப்பட்ட இலங்கையரான அமலன் தண்டபாணிதேசிகரின் வழக்கு விசாரணை நேற்று கனேடிய உச்சநீதிமன்றத்தில் நடைபெற்றது.

இதன்போது கொலை செய்யப்பட்டதாக கூறப்படும் ஜெயராசன் மாணிக்கராசாவின் மகளிடம், தண்டபாணிதேசிகர் உணர்ச்சிபூர்வமாக மன்னிப்பு கோரியுள்ளார்.

ஜெயராசன் மாணிக்கராசாவின் குடும்பத்தினர் முன்னிலையில், தண்டபாணிதேசிகர் கருத்து வெளியிட்டார்.

“உங்கள் தந்தையை கொலை செய்யும் எண்ணம் எனக்கு இல்லை, நீங்கள் என்னை அறிவீர்கள். நான் செய்த காரியத்திற்காக வருந்துகின்றேன். என்னை மன்னித்து விடுங்கள்” என கண்ணீருடன் தெரிவித்துள்ளார்.

கனேடிய உச்சநீதிமன்றத்தில் தனது தீர்ப்பின் அறிக்கையை வெளியிட்டபோது, அமலன் தாண்டபாணிதேசிகர் இவ்வாறு குறிப்பிட்டார்.

இதன்போது மாணிக்கராசாவின் மனைவியும் அவருடைய மகனும், மகளின் பக்கத்தில் அமர்ந்திருந்தார்கள் என தெரிவிக்கப்படுகின்றது.

தனது வழக்கறிஞரான எலிஸ் பின்ஸோனல்ட் அதை எதிர்த்து வாதாடிய போதிலும் தண்டபாணிதேசிகர், உணர்ச்சிபூர்வமாக நடந்து கொண்டுள்ளார்.

தண்டபாணிதேசிகர், மீதான குற்றச்சாட்டு ஆதாரபூர்வமாக நீதிமன்றில் நிரூபிக்கப்பட்டுள்ளது. இந்த நிலையில் அவருக்கு ஆயுள் தண்டனை விதிக்கப்படலாம் என அறிவிக்கப்பட்டுள்ளது.

எனினும் அவர் குறைந்தபட்சம் 17 வருட சிறை தண்டனை அனுபவிக்க வேண்டும் என கனேடிய அரசாங்க தரப்பு சட்டத்தரணிகள் நீதிமன்றத்தில் குறிப்பிட்டுள்ளார்.

எனினும் வழக்கு தொடர்பான தீர்மானம் எதிர்வரும் ஜுன் மாதம் 21ஆம் திகதி தீர்மானிக்கப்படும் என அறிவிக்கப்பட்டுள்ளதாக கனேடிய ஊடகங்கள் செய்தி வெளியிட்டுள்ளன.

2014ஆம் ஆண்டு ஜுன் மாதம் 23ஆம் திகதி 40 வயதான ஜெயராசன் மாணிக்கராசா கத்தியால் குத்தி கொலை செய்யப்பட்டார்.

இலங்கையில் ஒரே நகரத்திலிருந்து மாணிக்கராசாவும், அமலனும் கனடாவுக்கு அகதிகளாக சென்றுள்ளனர். மாணிக்கராசா 2000 ஆம் ஆண்டில் சென்றுள்ள நிலையில், அதற்கு அடுத்தாண்டில் அமலன் தண்டபாணிதேசிகர் கனடா சென்றுள்ளனர் என்பது குறிப்பிடத்தக்கது.

தமிழகத்தில் அகதிகள் முகாமில் வசித்து வந்த இலங்கையர் ஒருவர் தூக்கிட்டு தற்கொலை செய்து கொண்டுள்ளார்.

கரூர் ராயனூர் இலங்கை அகதிகள் முகாமை சேர்ந்தவர் அந்தோணிராஜ், இவரது மகன் ஜோன்சன்(வயது 21).
சுமை தூக்கும் தொழிலாளியான ஜோன்சனுக்கும், அதே முகாமை சேர்ந்த கிருத்திகா என்ற பெண்ணுக்கு கடந்த எட்டு மாதங்களுக்கு முன்னர் திருமணம் நடந்தது.

ஜான்சன் மதுப்பழக்கத்துக்கு அடிமையாக இருந்துள்ளார், மதுப்பழக்கத்தை கைவிடும்படி கிருத்திகா வற்புறுத்தியுள்ளார். இதனால் விரக்தியில் இருந்த ஜோன்சன் நேற்று முன்தினம் தூக்கிட்டு தற்கொலை செய்து கொண்டுள்ளார்.

இதுகுறித்து வழக்கு பதிவு செய்துள்ள பசுபதிபாளையம் பொலிசார் விசாரணை நடத்தி வருகின்றனர்.