சரிந்து வீழ்ந்த வெள்ளவத்தை கட்டிடத்தின் இடிபாடுகளுக்குள் இருந்து பெண்ணொருவரின் சடலம் நேற்று (21) மாலை மீட்கப்பட்டது. குறித்த பெண் மொரட்டுவ பிரதேசத்தைச் சேர்ந்த 60 வயதான பெண் என தெரிவிக்கப்பட்டுள்ளது.

இந்தநிலையில் சம்பவத்தில் பலியானவர்களின் 3 ஆக அதிகரித்துள்ளது.

கடந்த 18 திகதி இடம்பெற்ற இந்த சம்பவத்தில் மேலும் 23 பேர் வரை காயமடைந்தனர். இதையடுத்து இடிபாடுகளுக்கு மத்தியில் தேடுதல் நடவடிக்கைகள் நிறுத்தப்பட்டுள்ளன.

 
காட்டில் தனிமையாக வாழும் தாய் ஒருவர் தொடர்பான தகவல் வெளியாகி உள்ளது. மூன்று பிள்ளைகளின் தாயான 64 வயதான பெண்ணொருவரே இவ்வாறு காட்டில் தனிமையாக வாழ்ந்து வருகிறார்.

தம்புள்ளை, வேகொடபொல, பலகொல்லயாய பிரதேசத்தின் காட்டுப்பகுதியில் குடில் அமைத்து அவர் வாழ்ந்து வருகின்றார்.

மூன்று மகள்களை பெற்ற அம்மையாரின் கணவர் இளம் வயதிலேயே அவரை கைவிட்டு சென்றுள்ளார். பல போராட்டமான துன்பங்களை அனுபவித்து பிள்ளைகளை படிக்க வைத்து சமூகத்தில் ஒரு சிறந்த இடத்திற்கு முன்னேற்றியுள்ளார்.

அவரது ஒரு மகள் பொறியியலாளர் ஒருவரை திருமணம் செய்துள்ளார். பிள்ளைகளின் வாழ்வில் தடை ஏற்படுத்த விரும்பாமையினால் ஏரி, குளங்களில் கிடைப்பதனை உணவாக உட்கொண்டு உயிர் வாழ்வதாக குறித்த தாய் தெரிவித்துள்ளார்.

அமெரிக்காவில் நடைபெற்ற உடற்கட்டுமான (Body Building) போட்டிகளில் மூன்று வெவ்வேறு சம்பியன் பட்டங்களை இலங்கை பெண் ஒருவர் பெற்றுள்ளார். தில்ருக்ஷி சொலமன் ஆரச்சி என்ற இலங்கை பெண்ணே இந்த சாதனையை படைத்துள்ளார்.

அவர் 2003ஆம் ஆண்டு தனது சகோதரியுடன் மேலதிக கல்வி நடவடிக்கைகளுக்காக அமெரிக்கா சென்றார். அங்கு அவர் பொழுது போக்காக உடற்கட்டுமான பயிற்சியில் ஈடுபட்டார். அவருக்கு கிடைத்த உதவிக்கமைய அவர் பெண்கள் உடற்கட்டுமான பிரிவு போட்டியில் கலந்து கொள்வதற்காக நடவடிக்கை மேற்கொண்டுள்ளார். இந்த வெற்றி தொடர்பில் கருத்து வெளியிட்டவர்,

நான் கிரிபத்கொட பிரதேசத்தை சேர்ந்தவர். எனது குடும்பத்தில் 6 பேர் உள்ளனர். நான் உயர் கல்வியை கம்பஹா சித்தார்த மஹா வித்தியாலயத்தில் கற்றேன். எனினும் அங்கு விளையாட்டு பிரிவில் அந்த அளவில் திறமையை வெளிப்படுத்தவில்லை.

எனது சகோதரர் உடற்கட்டுமான பயிற்சி நிறுவனம் ஒன்றை சொந்தமாக வைத்துள்ளார். அதில் பெற்ற பயிற்சியை நான் அமெரிக்காவில் தொடர்ந்தேன். கடந்த வருடம் இடம்பெற்ற போட்டியில் கலந்து கொண்டு 3 பதக்கங்களை வென்றுள்ளேன். இந்த போட்டியில் கிட்டத்தட்ட 150 பேர் கலந்து கொண்டனர் என அவர் குறிப்பிட்டுள்ளார்.

தில்ருக்ஷி NPC Lee banks Natural Championships 2017(Bikini) போட்டியில் வெற்றி பெற்றதோடு, Class A பிரிவில் முதலாம் இடத்தை வென்றுள்ளார். Masters over 35 பிரிவிலும் அவர் முதலாம் இடத்தை வென்றுள்ளார்.

National Body Building Championship போட்டியில் கலந்து கொண்ட தில்ருக்ஷி முதலாம் இடத்தை வென்றுள்ளார்.

எனது புகைப்படத்தை பேஸ்புக்கில் முதல் முறையாக நான் பதிவு செய்த போது, நான் ஆண் ஆகுவதற்கு முயற்சிப்பதாக கருத்து வெளியிடப்பட்டிருந்தது.

எனினும் அவற்றிலிருந்து பின் வாங்கவில்லை. எனது கல்வி நடவடிக்கைகளை தொடர்ந்து முன்னெடுத்து பொறியியலாளராக நான் தொழில் செய்கிறேன்.

அதேபோல் எனது குடும்ப வாழ்க்கையும் வெற்றிகரமாக முன்னெடுத்துள்ளேன். எனக்கு மூன்று வயதில் ஒரு குழந்தை உள்ளது. நான் ஒரு இலங்கை பெண், எந்தவொரு விருப்பமான விடயம் செய்யும் போதும் மற்றவர்களுக்காக அதனை மாற்றிக் கொள்ள வேண்டாம் என நான் இலங்கை பெண்களிடம் கேட்டுக் கொள்கிறேன் என அவர் மேலும் தெரிவித்துள்ளார்.

 
இந்தியாவில் பிரபல தனியார் வாகன நிறுவனத்தில் பணியாற்றும் 18 இலங்கை தொழிலாளர்களுக்கு ஆயுள் தண்டனை வழங்கியிருக்கும் நிலையில், அவர்களை விடுதலை செய்யக் கோரி ஆர்ப்பாட்டம் ஒன்று முன்னெடுக்கப்பட்டுள்ளது.

குறித்த ஆர்ப்பாட்டம் சோசலிச சமத்துவக் கட்சியினால் ஹட்டன் பஸ் தரிப்பிடத்திற்கு அருகில் இன்று முன்னெடுக்கப்பட்டுள்ளதாக தெரிவிக்கப்படுகின்றது.

இதன்போது இந்தியாவின் பிரபல தனியார் வாகன நிறுவனத்தில் (மாருதி சுசூகி) பணியாற்றிய 18 ஊழியர்களுக்கு கொடுத்திருக்கும் ஆயுள் தண்டனையிலிருந்து விடுதலை செய்ய அழுத்தம் கொடுக்கும் வகையில் வாசகங்கள் எழுதப்பட்ட பதாதைகளை ஏந்திய வண்ணம் போராட்டத்தில் ஈடுபட்டிருந்தமை குறிப்பிடத்தக்கது.

 
புகையிரத மிதிபலகையில் பயணித்த பாடசாலை மாணவர் ஒருவர், பாதை ஓரமிருந்த தூணில் மோதுண்டு காயமடைந்துள்ளார்.

நாவலப்பிட்டியிலிருந்து கொட்டகலை நோக்கிச் சென்ற புகையிரதத்தில் பயணித்த பாடசாலை மாணவரே இந்த விபத்தில் காயமடைந்துள்ளார். காயமடைந்த மாணவர் ,சிகிச்சைகளுக்காக நாவலப்பிட்டி வைத்தியசாலையில் அனுமதிக்கப்பட்டுள்ளார்.

வட்டவளை புகையிரத நிலையத்திற்கும் கலபட புகையிரத நிலையத்திற்கும் இடைப்பட்ட 99ஆவது மைல்கல் பகுதியிலே இன்று மதியம் இந்த சம்பவம் இடம்பெற்றுள்ளது. சம்பவம் தொடர்பில் மேலும் தெரியவருவதாவது,

க.பொ.த சாதாரண தர மாணவ,மாணவிகள் சிலர் நாவலப்பிட்டி வைத்தியசாலையில் சிகிச்சை பெற்றுவரும் நோயாளர் ஒருவரை பார்த்து விட்டு, புகையிரதத்தில் வீடு திரும்பிக் கொண்டிருந்த போதே இந்த விபத்து ஏற்பட்டுள்ளதாக தெரியவந்துள்ளது.

இதில் எஸ்.சதீஸ் என்ற 16 வயதுடைய மாணவனே காயமடைந்துள்ளார். சம்பவம் தொடர்பில் வட்டவளை பொலிஸார் மேலதிக விசாரணைகளை முன்னெடுத்து வருகின்றனர்.

தலவாக்கலை பொலிஸ் பிரிவிற்கு உட்பட்ட வட்டகொடை, சவூத் மடக்கும்புர தோட்டத்தில் பிறந்து 15 நாட்களேயான பெண் குழந்தையொன்று பரிதாபமாக உயிரிழந்துள்ளதாக பொலிஸார் தெரிவித்துள்ளனர். குறித்த சம்பவம் நேற்று மாலை இடம்பெற்றுள்ளதாக தலவாக்கலை பொலிஸார் குறிப்பிட்டுள்ளனர்.

20 வயதான இளம் தாய் ஒருவர், பிரசவித்து 15 நாட்களேயான தனது குழந்தைக்கு தாய்ப்பால் கொடுத்துவிட்டு உறங்க வைத்து சென்றதாகவும், சில நிமிடங்களுக்குப் பின் குழந்தையை பார்த்த பொழுது குழந்தை உயிரிழந்திருந்ததாக தலவாக்கலை பொலிஸாருக்கு கொடுத்த வாக்குமூலத்தின் மூலம் தெரியவந்துள்ளது.

இதனையடுத்து இன்று நுவரெலியா மாவட்ட நீதவான் சம்பவம் தொடர்பில் விசாரணை செய்த பின் குறித்த குழந்தையின் சடலத்தை பிரேதபரிசோதனை செய்வதற்காக நுவரெலியா மாவட்ட வைத்தியசாலைக்கு அனுப்பி வைக்கப்படும் என தலவாக்கலை பொலிஸார் தெரிவித்துள்ளனர்.

இந்த சம்பவம் குறித்து மேலதிக விசாரணைகளை தலவாக்கலை பொலிஸார் மேற்கொண்டு வருகின்றனர்.

கந்தப்பளை தேயிலை மலை தோட்டத்தில் கடந்த 12.05.2017 அன்று 16 வயதான சிறுமியை நால்வர் வல்லுறவுக்குட்படுத்திய சம்பவத்தினைக் கண்டித்து இன்று ஆர்ப்பாட்டமொன்று முன்னெடுக்கப்பட்டது.

வல்லுறவுக்குட்படுத்திய பின்னர், குறித்த சிறுமி மயக்கமான நிலையில் வாழை இலையால் மூடி சந்தேக நபர்கள் தப்பிச் சென்றுள்ளனர்.

இச்சம்பவத்திற்கு கண்டனம் தெரிவித்து மலையக ஆய்வாளர் அமைப்புடன் இணைந்த மீனாட்சி பெண்கள் பாதுகாப்பு அமைப்பு கண்டன ஆர்ப்பட்டம் ஒன்றினை இன்று காலை கந்தப்பளை நகரில் நடத்தியது.

சந்தேக நபர்கள் கைது செய்யப்பட்ட போதிலும் குறித்த நபர்களுக்கு அதிகபட்ச தண்டனை வழங்க வேண்டும் என இவ் ஆர்ப்பாட்டத்தை முன்னெடுத்தனர்.

இவ் ஆர்ப்பாட்டம் தேயிலை மலை தோட்ட வைத்தியசாலைக்கு முன்பாக ஆரம்பிக்கப்பட்டு பேரணியாக கந்தப்பளை நகரத்திற்கு வந்தது.

கந்தப்பளை பொலிஸார் போராட்டத்தை முன்னெடுக்க தடைசெய்த போதும் போராட்டம் முன்னெடுக்கப்பட்டமை குறிப்பிடத்தக்கது.

பல்வேறு வாசகங்களை எழுதிய பதாதைகளை ஏந்திய வண்ணம் மக்கள் ஆர்ப்பாட்டத்தில் கலந்து கொண்டனர்.

இதில் சட்டவிரோத சாராய தவறணைகளை மூடு, மது அருந்தும் காமுகனிடமிருந்து எமது பிள்ளைகளை காப்பாற்று, மலையக மக்களை போதைக்கு அடிமையாக்காதே, வல்லுறவில் ஈடுபட்டவர்களுக்கு மரண தண்டனை வழங்கு என்ற வாசகங்கள் தாங்கிய வண்ணம் கோசங்களை ஆர்ப்பட்டக்காரர்கள் எழுப்பினர்.

வெள்ளவத்தையில் இடிந்து விழுந்த ஐந்து மாடிக் கட்டடத்தின் உரிமையாளரை இந்த மாதம் 26ஆம் திகதி வரையில் விளக்கமறியலில் வைக்குமாறு கல்கிஸ்ஸ நீதவான் நீதிமன்றம் உத்தரவிட்டுள்ளது.

கைது செய்யப்பட்ட கட்டட உரிமையாளரை,இன்றைய தினம் கல்கிஸ்ஸ நீதவான் நீதிமன்றத்தில் முன்னிலைப்படுத்திய போதே இந்த உத்தரவு பிறப்பிக்கப்பட்டுள்ளது.

வெள்ளவத்தை சவோய் திரையரங்கிற்கு அருகிலுள்ள ஐந்து மாடி கட்டடம் இடிந்து விழுந்ததில் பெரும் பாதிப்பு ஏற்பட்டது.

இந்த அனர்த்தம் காரணமாக இருவர் உயிரிழந்ததுடன் 21 பேர் காயமடைந்திருந்தனர். மேலும் ஒருவரை தேடும் பணிகள் முன்னெடுக்கப்பட்டு வருகின்றன.

பொலிஸில் சரணடைந்த நிலையில் கட்டட உரிமையாளர் நேற்றிரவு கைது செய்யப்பட்டமை குறிப்பிடத்தக்கது.