வவுனியா மன்னார் வீதி குருமன்காட்டு சந்திக்கு அருகாமையில் இன்று (04​.05.2017​) மாலை 6​​ மணியளவில் வவுனியாவிலிருந்து செட்டிகுளம் நோக்கி பயணித்த அரச பேருந்து ஒன்றும் வவுனியாவிலிருந்து பாவற்குளம் நோக்கி பயணித்த தனியார் பேருந்து ஒன்றும் சிறிய அளவில் விபத்துக்குள்ளானதுடன் இரு தரப்பினருக்கும் ஏற்பட்ட வாக்குவாதத்தில் அப்பகுதியில் சிறு பதற்றம் நிலவியது.

அரச பேருந்தை தனியார் பேருந்து முந்திச் செல்ல முற்பட்ட வேளையிலேயே இவ்விபத்துச் சம்பவம் இடம்பெற்றிருப்பதாக இச் சம்பவத்தை நேரில் கண்டவர்கள் தெரிவித்தனர். எனினும் பாரிய சேதம் ஏதும் ஏற்படவில்லை.

விபத்து ஏற்பட்ட பகுதியானது மாலை வேளைகளில் சன நெரிசல் மிகுந்த பகுதி என்பதுடன் தனியார் கல்வி நிலையங்கள் அதிகம் காணப்படும் இடமாகும்.

இவ்விபத்தில் பாரிய சேதங்கள் எவையும் ஏற்படவில்லை இருப்பினும் இதை மனதில் நிறுத்தாது இவ்வாறு கண்மூடிதனமாக செயற்படும் சாரதிகளுக்கு எதிராக தனியார் பேருந்து சங்கமாகட்டும் அரச பேரூந்தாகட்டும் தகுந்த நடவடிக்கைகளை மேற்கொள்ள வேண்டும் என சம்பவ இடத்தில் நின்ற சமூக ஆர்வலர்கள், பெற்றோர்கள் விசனம் தெரிவித்ததை காணக்கூடியதாக இருந்தது.

சம்பவ இடத்திற்கு விரைந்த போக்குவரத்துப் பொலிஸார் பதற்றத்தை தணித்து விசாரணைகளை மேற்கொண்டு வருகின்றனர்.

மன்னார் சாலைக்கு சொந்தமான இ.போ.ச சபையின் பேரூந்து சாரதி மற்றும் நடத்துனர்களின் அசமந்தப்போக்கினால் இன்று (04.05.2017) பயணிகள் பாரிய அசௌகரியங்களுக்கு முகங்கொடுத்தனர். இச் சம்பவம் தொடர்பாக மேலும் தெரியவருகையில்,

வவுனியாவிலிருந்து முருங்கன் ஊடாக முத்தரிப்பு பிரதேசத்திற்கான சேவை யுத்த காலத்திலும் இடம்பெற்று வந்தது. அதன் பின்னர் விடுதலைப்புலிகளின் கட்டுப்பாட்டில் இருந்த இப் பிரதேசம் இரானுவத்தினரின் கட்டுப்பாட்டுக்குள் வந்த சமயத்தில் வவுனியா – முத்தரிப்பு சேவை தற்காலிகமாக இடைநிறுத்தப்பட்டது.

நேற்றைய தினம் ( 03.05.2017) மீண்டும் வவுனியா – முத்தரிப்பு சேவை ஆரம்பமானது. இன்று (04.05.2017) மன்னாரிலிருந்து வவுனியா நோக்கி பயணித்த மன்னார் சாலைக்கு சொந்தமான இ.போ.ச பேரூந்து மாலை 5 மணியளவில் வவுனியா மத்திய பேரூந்து நிலையத்தினை வந்தடைந்தது. மாலை 5.30 மணிக்கு மன்னார் நோக்கி புறப்பட வேண்டிய பேரூந்து பயணிகள் எவரையும் ஏற்றாது மன்னார் நோக்கி பயணித்தது.

இதனால் வேலைக்கு சென்று வீடு திரும்ப முடியாது பேரூந்து நிலையத்தில் மக்கள் காத்திருப்பதை அவதானிக்க முடிந்தது. இவ்விடயம் தொடர்பாக வவுனியா பேரூந்து நிலையத்தின் நேரக்கணிப்பாளரிடம் தொடர்பு கொண்ட போது,

ஊடகங்களுக்கு கருத்து தெரிவிக்க எனக்கு அனுமதி இல்லை எனவும் இன்று மாலை 5.30 மணிக்கு வவுனியாவிலிருந்து மன்னார் நோக்கி பேரூந்து செல்லாது எனவும் தெரிவித்தார்.​

மன்னார் சாலை முகாமையாளரே இது உங்களின் கவனத்திற்கு.

வவுனியா கோவில்குளம் ரொக்கட் விளையாட்டுக் கழகத்தின் 41ஆவது வருடாந்த விளையாட்டு விழா இந்துக் கல்லூரி மைதானத்தில் கடந்த 01.05.2017 அன்று நடைபெற்றது.

இன் நிகழ்வின் பிரதம அதிதியாக கலந்து கொண்ட வட மாகாண சபை உறுப்பினர் GT லிங்கநாதன் தனது உரையில், வடமாகாண சபையில் கூட்டமைப்பின் பங்காளி கட்சிகளுக்கு பகிரப்பட்ட மேலதிக ஆசனங்களில் ஒன்றை 5 வருடங்களுக்கு பகிரப்பட்டதை யாவரும் அறிவோம்.

முதல் வருடத்திற்கான பங்கீடு தமிழர் விடுதலைக் கூட்டணிக்கு வழங்கப்பட்டு மேரி கமலா குணசீலன் பதவியேற்றிருந்தார். எனினும் தமிழர் விடுதலைக் கூட்டணி கூட்டமைப்பில் இருந்து 2013 வெளியேறியதையடுத்து மேரி கமலா தமிழரசு கட்சியின் முல்லை மாவட்ட செயலாளராக பதவியேற்று ஒரு வருடங்களும் ஆறு மாதங்களும் மாகாண சபையில் உறுப்பினராக பதவி வகித்ததன் பின்னர் ஈ.பி.ஆர்.எல்.எப் க்கான சுழற்சி முறை ஆசனத்தை வவுனியாவை சேர்ந்த எம்.பி.நடராஜாவிற்கு வழங்கியது. இவர் ஒரு வருடமும் இரண்டு மாதங்களும் பதவியில் இருந்தார்.

அதனைத் தொடர்ந்து ரெலோ அமைப்பிற்கு கடந்த யூலை மாதம் மயூரன் அவர்களுக்கு வழங்கியிருந்தது. மயூரன் இளம் வேட்பாளராக களம் இறங்கியவர் கூட்டமைப்பின் ஒற்றுமைக்கும் அவரின் நியாயமான அரசியல் பயணம் சிறப்புற அமைய மயூரன் ஒரு வருடகாலமான இவ் வருட யூலை மாதம் பதவி விலகுவதுடன் கூட்டமைப்பு அவ் ஆசனத்தை எமது கட்சிக்கு வழங்க வேண்டும் எனக் குறிப்பிட்டிருந்தார்.

அந்த வகையில் எமது கட்சியின் தீவிர ஆதரவாளர்களான உங்களால் இதனை இன்னும் தெளிவாக சமூகத்திற்கு கொண்டு செல்வதுடன் எமது கட்சியின் துடிப்புமிக்க உங்கள் கிராமத்தின் எனது நண்பன் சந்திரகுலசிங்கம் மோகனுக்கு எமது கட்சி வழங்கும். அதன் பின்னர் உங்கள் பிரதேசத்தின் அபிவிருத்திகள் இன்னும் வலுவுள்ளதாக மாறும் எனவும் தெரிவித்தார்.

 
வவுனியாவில் காணாமற்போன உறவுகளினால் மேற்கொள்ளப்பட்டு வரும் உணவு தவிர்ப்புப் போராட்டம் இன்று 70வது நாளை எட்டியுள்ளது. இதையடுத்து இன்று​ (04.05.2017)​ மதியம் 12.15 மணியளவில் கந்தசாமி ஆலயத்திற்குச் சென்று தேங்காய் உடைத்து வழிபாடுகளை மேற்கொண்டனர் .

கடந்த 70 நாட்களாக வவுனியாவில் சுழற்சி முறையில் போராட்டம் மேற்கொண்டு வரும் காணாமற்போன உறவுகள் தமது உறவகளின் வெளிப்படுத்தலை வலியுறுத்தியும், அரசியல் கைதிகளை விடுதலை செய், அவசரகாலச்சட்டத்தினை இரத்து செய் போன்ற கோரிககைகளை முன்வைத்து போராட்டத்தினை மேற்கொண்டு வருகின்றமை குறிப்பிடத்தக்கது.

 
வவுனியா ஈச்சங்குளம் பொலிஸாரால் பார ஊர்தியில் மறைத்து கடத்தப்பட்ட முதிரை மரக்குற்றிகள் இன்று (04.05.2017) காலை 7.30 மணியளவில் மீட்கப்பட்டுள்ளது. இச் சம்பவம் தொடர்பாக மேலும் தெரியவருகையில்,

மடு காட்டுப்பகுதியில் இருந்து யாழ்ப்பாணத்திற்கு கடத்திச்செல்லப்பட இருந்த நிலையில் ஈச்சங்குள பொலிசாருக்கு கிடைத்த ரகசிய தகவலையடுத்து பொலிஸ் பரிசோதகர் சுபாஷ் ஆரியரட்ன தலைமையில் உதவி பொலிஸ் பரிசோதகர் விஜயரத்ன , பொலிஸ் சாஜன் அமரசிங்க சமந்த,பொலிஸ் கான்டபில்களான நிர்பான், விதான, சந்திரவம்ச, நிஷால், பிரதீப், கருணாரட்ன, கண்ணங்கர, பாரதிராஜா, பீரிஸ், மதுர, அஜந்தன் ஆகியோர் புதுக்குளம் பகுதியில் வைத்து பாரஊர்தியை வழி மறித்து சோதனை இட்ட போது சுமார் 10 லட்சம் பெறுமதி வாய்ந்த 29 முதிரை மரக்குற்றிகள் எருவிற்குள் மறைத்து கொண்டு செல்ல இருந்ததை கண்டறிந்துகொண்டனர்.

இதனையடுத்து பாரஊர்தியில் இருந்த ஜோன்ஜெராட் (வயது 37) , ராசரட்ணம் (வயது 48) சாரதி உட்பட இருவரை கைது செய்துள்ள ஈச்சங்குளம் பொலிஸார் நீதிமன்றத்தில் ஆஜர்ப்படுத்த நடவடிக்கை எடுத்து வருகின்றனர்.

 
வவுனியா பிராந்திய சுகாதார வைத்திய அதிகாரி பணிமனையில் கடந்த 1994ம் ஆண்டிலிருந்து கடமையாற்றி வந்த 51 சுகாதார தொண்டர்கள் இன்று (04.05.2017) பிற்பகல் 1 மணியிலிருந்து பிராந்திய வைத்திய அதிகாரியின் அலுவலகத்திற்கு முன்பாக தொடர் போராட்டத்தினை மேற்கொண்டுள்ளனர்.

இப் போராட்டம் தொடர்பாக ஊடகங்களுக்கு கருத்து தெரிவித்த அவர்கள்..

கடந்த 1994ம் ஆண்டிலிருந்து குடும்பநல உத்தியோகத்தர்களின் உதவியாளர்களாகவும், சுகாதார பரிசோதகர்களுக்கு உதவியாளர்களாகவும் நாங்கள் தொடர்ச்சியாக பணியாற்றி வருகின்றோம் இன்று வரை எமக்கு நிரந்த நியமனம் வழங்கப்படவில்லை

எனவே நிரந்தர நியமனம் வழங்குமாறு கோரி இன்று முதல் தொடர் போராட்டத்தினை மேற்கொள்வதாகவும் நிரந்தர நியமனம் கிடைக்கும் வரை போராட்டத்தினை தொடரவுள்ளதாகவும் தெரிவித்தனர்.

வவுனியா, புளியங்குளம், பழையவாடி கிராமத்தில் சீவல் தொழிலுக்குச் சென்ற ஒருவர் மீது மேற்கொள்ளப்பட்ட கத்திக் குத்தில் ஒருவர் காயமடைந்து வவுனியா வைத்தியசாலையில் அனுமதிக்கப்பட்டுள்ளார். குறித்த சம்பவம் நேற்று மாலை 7 மணியளவில் இடம்பெற்றுள்ளது.

புளியங்குளம், பழையவாடி கிராமத்தில் சீவல் தொழிலுக்காகச் சென்ற கல்மடுவைச் சேர்ந்த அ.ஞானசீலன் (வயது 48) என்ற குடும்பஸ்தரை பின்தொடர்ந்த சிலர் அவருடன் முரண்பட்டு அவர் வைத்திருந்த கத்தியைப் பறித்து அவர் மீது தாக்குதல் நடாத்தியுள்ளனர்.

இந்த சம்பவத்தில் காயமடைந்த குடும்பஸ்தர் புளியங்குளம் வைத்தியசாலையில் அனுமதிக்கப்பட்டு மேலதிக சிகிச்சைக்காக வவுனியா வைத்தியசாலையில் அனுமதிக்கப்பட்டுள்ளார்.

சம்பவம் தொடர்பில் மேலதிக விசாரணைகளை புளியங்குளம் பொலிஸார் மேற்கொண்டு வருகின்றனர்.

 
வவுனியா செட்டிக்குளம் படசாலையின் அதிபரை இடமாற்றம் செய்யுமாறு கோரி பாடசாலையின் மாணவர்கள் மற்றும் பெற்றோர்கள், பழைய மாணவர்கள் போன்றோர் இணைந்து கடந்த மூன்று நாட்களாக போராட்டத்தை முன்னெடுத்து வந்திருந்தனர்.

இந்நிலையில் நான்காவது நாளாக நேற்று(03.05) உணவு தவிர்ப்பு போராட்டம் காலை 8 மணியளவில் 6 பேர் கொண்ட குழுவினரால் மேற்கொள்ளப்பட்டது.

இதனைத் தொடர்ந்து போராட்ட இடத்திற்கு வருகைத் தந்த மேலதிக கல்விப்பணிப்பாளர், மாகாணக் கல்விப்பணிப்பாளர் மற்றும் மனித உரிமைகள் ஆணைக்குழுவின் பிரதிநிதிகள் என அனைவரும் பாடசாலையின் நிலைமைகளை ஆராய்ந்ததுடன் பெற்றோருடனும் பேச்சு வார்த்தைகளை நடத்தியிருந்தனர்.

இதே வேளை குறித்த அதிபரை தற்காலிகமாக வவுனியா தெற்கு வலயத்திற்கு இடம்மாற்றம் செய்து அவர் குற்றமற்றவர் என விசாரணைகளிலிருந்து அவரை விடுவித்து அதன் பின்னர் எமது பாடசாலைக்கு மாற்றுமாறு தெரிவித்திருந்தனர்.

மேலும் அதுவரையில் எமது பாடசாலையினை உப அதிபரின் தலைமையில் இயங்க உரிய நடவடிக்கைகளை மேற்கொள்ளுமாறும் போராட்டத்தில் ஈடுபட்டிருந்தவர்கள் தெரிவித்திருந்தனர்.

இதனை அடுத்து சாதகமான முடிவிற்கு வந்த அதிகாரிகள் பாடசாலையினை தற்காலிகமாக உப அதிபரின் தலைமையில் இயங்க அனுமதித்தனர். அத்தோடு உண்ணாவிரதத்தில் ஈடுபட்டவர்கள் தமது போராட்டத்தினை இதன் பின்னர் கைவிட்டமை குறிப்பிடத்தக்கது.