கேப்பாபுலவு மக்களின் காணிகள் அவர்களுக்கே வழங்கப்பட வேண்டும் என்பதில் எந்த மாற்றுக்கருத்துக்கும் இடமில்லை என வன்னி மாவட்ட பாராளுமன்ற உறுப்பினரும் மாவட்ட அபிவிருத்திக்குழு இணைத்தலைவருமான கே.காதர் மஸ்தான் தெரிவித்தார்.

நேற்று முன்தினம் முல்லைத்தீவு மாவட்ட செயலகத்தில் இடம்பெற்ற முப்படையினருடான சந்திப்பின் பின்னர் படையினர் வசமுள்ள கேப்பாபுலவு மக்களின் காணிகளை நேரில் சென்று பார்வையிட்டதுடன், பின்னர் ஊடகங்களுக்கு கருத்து தெரிவிக்கும்போதே அவர் இவ்வாறு தெரிவித்தார்.

குறித்த பகுதிகளில் மக்கள் விவசாயம் செய்ததற்கான அனைத்து விதமான ஆதாரங்களும் காணப்படுகின்றன பலவருடங்களுக்கு முன்னர் கட்டப்பட்ட சில கட்டடங்கள் காணப்படுகின்றன. தென்னந்தோப்புகள் காணபடுகின்றன. எனவே இவ்வாறு எல்லா வளமும் நிறைந்த ஒரு பகுதியை விட்டுக்கொடுப்பதற்கு மக்களால் தெரிவுசெய்யப்பட்டவன் என்ற வகையில் நானும் இடம்கொடுக்கப்போவதில்லை.

நல்லாட்சியில் மக்களது காணிகள் படிப்படியாக விடுவிக்கப்பட்டாலும் அவை ஆமை வேகத்திலேதான் நகர்ந்துகொண்டிருக்கின்றன. இந்த நிலை மாற்றமடைந்து மக்களுக்கு உரித்தான காணிகள் மக்களுக்கு வழங்கப்பட்டு அவர்களை நிம்மதியாக வாழ வழிசமைக்க வேண்டும் என்று சம்பந்தப்பட்டவர்களை கேட்டுக்கொள்கிறேன் என அவர் மேலும் தெரிவித்தார்.

சக தோழிகளுடன் கடற்கரையில் நின்று செல்பி எடுத்­துக்­கொண்­டி­ருந்­த போது கடலலை இழுத்துச் சென்றதில், நீரில் மூழ்கி 11 வயது மாணவி ஒருவர் உயிரிழந்துள்ளார். இந்த சம்பவமானது மாத்­த­றை­ பகுதியில் இடம்பெற்றுள்ளதாக பொலிஸார் தெரிவித்துள்ளனர்.

இதன் போது உயிரிழந்தவர் நுகே­கொட, கங்­கொ­ட­வில பிர­தே­சத்­தைச் சேர்ந்த ருஸ்தி தரு­மினி ஜய­சிங்க என்ற 11 வயது மாணவி என தெரிவிக்கப்பட்டுள்ளது.

உறவினர்கள் வீட்டிற்கு சென்ற குறித்த மாணவி, அங்குள்ள தனது 6 சக நண்பிகளுடன் கடற்கரைக்கு சென்றுள்ளார்.

அங்கு கடற்கரையில் உள்ள கடற்­பா­றை­யின் மீது நின்று செல்பி எடுத்­துள்­ள­னர். இதன் போது அங்கு திடீ­ரென வந்த பெரிய அலை இவர்களை இழுத்து சென்றுள்ளது.

இதன் போது அவருடன் சென்ற சக தோழிகள் 6 பேர் சிறு­கா­யங்­க­ளு­டன் தப்­பிக் கரை­சேர்ந்­த­போ­தும் குறித்த மாணவி நீரில் மூழ்கி உயி­ரி­ழந்­தார்.

மேலும், சம்பவம் இடம்பெற்ற அன்றைய தினம் உயிரிழந்த மாணவியின் பிறந்த தினம் என அவர்களது உறவினர்கள் தெரிவித்துள்ளனர்.

நிந்தவூர் பகுதியில் பேக்கரி உணவு பொருட்களை விற்பனை செய்து வரும் வாகனம் ஒன்றில் மோதுண்டு ஒன்றரை வயது குழந்தை உயிரிழந்துள்ளமை அந்தப்பகுதி மக்களை பெரும் துயரில் ஆழ்த்தியுள்ளது.

குறித்த சம்பவம் நேற்று (20.04) மாலை இடம்பெற்றுள்ளதுடன் விபத்திற்குள்ளான ஆண் குழந்தையை நிந்தவூர் ஆதார வைத்தியசாலைக்கு எடுத்துச் செல்லும் வழியில் உயிரிழந்துள்ளதாக தெரிவிக்கப்பட்டுள்ளது.

குழந்தையின் தாய் பேக்கரி வண்டியில் பொருட்கள் வாங்கிக்கொண்டிருந்த போது குழந்தை வண்டிக்கு முன் நின்று கொண்டிருந்ததை சாரதி அவதானிக்கவில்லை.

சாரதி வாகனத்தை செலுத்திய போதே குழந்தை விபத்துக்குள்ளாகியுள்ளது. இதேவேளை, சம்பவம் தொடர்பாக பொலிஸார் மேலதிக விசாரணைகளை மேற்கொண்டு வருகின்றனர்.

இலங்கையில் உள்ள குப்பைகளை கொண்டு மின்சாரம் தயாரிக்கும் திட்டம் ஒன்று ஆரம்பிக்கப்படவுள்ளதாக தெரிவிக்கப்படுகின்றது.

எதிர்வரும் 3 வருடங்களில் இந்த திட்டம் ஆரம்பிக்கப்படவுள்ளதாக மேல் மாகாணசபை முதலமைச்சர் இருசு தேவபிரிய தெரிவித்துள்ளார்.

ஸ்ரீலங்கா சுதந்திர கட்சி தலைமையகத்தில் நேற்று இடம்பெற்ற ஊடகவியலாளர் சந்திப்பில் கலந்துக் கொண்டு கருத்து வெளியிடும் போதே அவர் இவ்வாறு குறிப்பிட்டுள்ளார்.

கரதியான மற்றும் தொம்பே பிரதேசங்களில் தற்காலிகமாகவே குப்பை கொட்டப்படுவதாக அவர் மேலும் தெரிவித்துள்ளார்.

உலகளாவிய ரீதியில் மின்சார நெருக்கடி ஏற்பட்டு வரும் நிலையில், இவ்வாறான மாற்று வழிகள் நாட்டு மக்களுக்கு நன்மையாக அமையும்.

சுவிஸ்லாந்து நாட்டில் குடியேறிய இலங்கை பெற்றோருக்கு பிறந்த தமிழ் பெண் ஒருவர் இரு நாடுகளின் கலாச்சாரங்களை வீடியோவாக வெளியிட்டு பரபரப்பை ஏற்படுத்தி வருகிறார்.

இலங்கையை சேர்ந்த பெற்றோர் இருவர் சுவிஸில் குடியேறி புகலிடம் பெற்றுள்ளனர். பேர்ன் மாகாணத்தில் உள்ள Langenthal நகரில் குடியேறிய இவர்களுக்கு கடந்த 1988-ம் ஆண்டு Tama Vakeesan என்ற பெண் குழந்தை பிறந்துள்ளது. சுவிஸில் வங்கி ஒன்றில் பணிபுரியும் இவருக்கு தற்போது வயது 28.

சுவிஸில் பிறந்திருந்தாலும் தமிழ் கலாச்சாரத்தை மறக்காத இவர் அதன் பெருமைகளை வீடியோவாக வெளியிட்டு அனைவரையும் வியப்பில் ஆழ்த்தி வருகிறார்.

சமீபத்தில் இவர் வெளியிட்ட வீடியோ ஒன்றில் இலங்கை மற்றும் சுவிட்சர்லாந்து ஆகிய இரு நாடுகளை பற்றி வெளிப்படையாக பேசியுள்ளார்.

‘இரண்டு நாடுகளின் கலாச்சாரங்களை அறிந்துள்ளதால் என்னிடம் தன்னம்பிக்கை அதிகமாகவே உள்ளது. தமிழர்கள் மற்றும் சுவிஸ் குடிமக்களை பற்றி விரிவாகவே அனைவரிடம் பேசிவருகிறேன்.

சில நேரங்களில் நான் எந்த நாட்டிற்கு சொந்தமானவர் என்ற சந்தேகம் அடிக்கடி எழுந்து குழப்பத்தை ஏற்படுத்துகிறது.

என்னால் தமிழ், ஜேர்மன் மற்றும் ஆங்கிலம் ஆகிய மொழிகளை சரளமாக பேச முடியும். இப்படி பேசுவதால் இங்குள்ள சுவிஸ் குடிமக்கள் என்னை வியப்பாக பார்க்கின்றனர்.

சுவிஸ் குடிமக்கள் அன்பானவர்கள். ஆனால், தமிழர்களை போல் எளிதில் நட்பு ஏற்படுத்திக்கொள்ள முடியாது. சுவிஸில் உள்ள தமிழர்கள் வீட்டிற்கு எந்த நேரத்திலும் செல்லலாம். வீட்டில் அமர்ந்து உணவு அருந்தலாம்.

ஆனால், சுவிஸ் குடிமகன் வீட்டிற்கு செல்ல வேண்டுமானால் அவரை செல்போனில் தொடர்புக்கொண்டு ‘இன்றைக்கு வீட்டிற்கு வரலாமா?’ என அனுமதி வாங்கிய பிறகு தான் செல்ல முடியும்.

இரண்டு நாடுகளின் கலாச்சாரத்தை வெளிப்படுத்தி சுவிஸ் மற்றும் ஜேர்மன் மொழிகளில் சரளமாக பேசுவதால் எனக்கு சுவிஸில் எண்ணற்ற நண்பர்கள் சேர்ந்துள்ளனர்.

இந்த அனுபவங்களை வீடியோக்களாக வெளியிட்டு வருவதால் அனைவருக்கும் என்னை நன்றாக தெரிந்துள்ளது பெருமையாக உள்ளது.

ஆனால், ‘28 வயதான உங்களுக்கு ஏன் இன்னும் திருமணம் நடைபெறவில்லை’ என பலர் கேள்வி எழுப்புவது தான் எரிச்சலை ஏற்படுத்துகிறது.

’சாதிக்க எண்ணற்ற விடயங்கள் இருக்கும்போது திருமணத்திற்கு இப்போது என்ன அவசரம்?’ என Tama Vakeesan உற்சாக குரலில் பதிலளித்துள்ளார்.

பிரித்தானியாவில் இலங்கையை சேர்ந்த பெண் கடைக்காரர் ஒருவரின் முகத்தில் வாடிக்கையாளர் துப்பிய சம்பவம் ஒன்று பதிவாகியுள்ளது.

வாடிக்கையாளர் கேட்ட தரத்திலான சிகரெட் இல்லாமையினால் குறித்த நபர், கடைக்கார பெண் மீது துப்பி சென்றுள்ளதாக தெரிவிக்கப்படுகின்றது. இனவாதத்தை தூண்டும் வகையில் இவ்வாறு செயற்பட்டதாக தெரிய வருகிறது.

30 வயதான Christopher James Callaghan என்ற குறித்த நபர் கடையில் தவறாக நடந்துக் கொண்டுள்ளதுடன், கவுண்டரில் உள்ள பெண் முகத்தில் துப்பி செல்லும் காட்சி அங்கிருந்த சி.சி.டிவி கமராவில் பதிவாகியுள்ளது.

Callaghan என்பவர் கடை ஊழியர்களிடம் கேட்ட தரத்திலான சிகரெட் அங்கில்லாமையினால் கடும் கோபமடைந்துள்ளார்.

இதனால் கடையின் ஊழியரான நிலானி நிழல்ராஜா என்ற இலங்கை பெண் குறித்த சிகரெட் இல்லை என்பதனை நிரூபிப்பதற்காக சிகரெட் வைக்கும் இடத்தை காட்டியுள்ளார். எனினும் குறித்த நபர் முகத்தில் துப்பியுள்ளார்.

சம்பவத்தில் ஆத்திரமடைந்த நிழல்ராஜா பொலிஸாரிடம் அறிவிப்பதற்கு முன்னர் கடையில் இருந்த பொருள் ஒன்றை எடுத்து எறிந்துள்ளார்.

கடந்த ஆண்டு ஒக்டோபர் 10 ம் திகதி இடம்பெற்ற இந்த சம்பவம் தொடர்பில் குற்றம் சுமத்தப்பட்ட Callaghan நேற்றைய தினம் செப்டன் நீதிமன்றத்தில் ஆஜர்படுத்தப்பட்டுள்ளார்.

இதன்போது தன்மீது சுமத்தப்பட்டுள்ள குற்றச்சாட்டினை Callaghan ஏற்றுக் கொண்டுள்ளார்.

சம்பவம் தொடர்பில் நீதிமன்றம் நிழல்ராஜாவிடம் வினவிய போது, அவரது நடத்தைகளை தான் வெறுப்பதாகவும், அவர் மீண்டும் அங்கு வரக்கூடாதென நீதிமன்றத்தில் குறிப்பிட்டுள்ளார்.

இந்த நிலையில் சம்பவம் தொடர்பில் குற்றம் சுமத்தப்பட்ட Callaghan 16 வாரங்கள் சிறையில் அடைக்குமாறு உத்தரவிடப்பட்டுள்ளதுடன் இரண்டு ஆண்டுகளுக்கு பணி இடைநீக்கம் செய்யப்பட்டுள்ளார்.

மேலும் அவரை 35 நாட்களுக்கு சேவையை மேற்பார்வையிடுமாறும், பாதிக்கப்பட்ட பெண்ணுக்கு 250 பவுண்ட் செலுத்துமாறு மாவட்ட நீதிபதி மிரியம் ஷெல்வே உத்தரவிட்டுள்ளார்.