வவுனியா தேக்கவத்தைப் பகுதியிலுள்ள மசாஜ் நிலையத்தினை அவ்விடத்திலிருந்து அகற்றுமாறு கோரி அப்பகுதி மக்கள் நேற்று (04.02.2017) காலை 10 மணியளவில் ஆர்ப்பாட்டம் ஒன்றினை முன்னெடுத்தனர்.

இதனையடுத்து வவுனியா நகரசபைச் செயலாளர் ஆர்.தயாபரன் உடனடியாக குறித்த மசாஜ் நிலையம் இயங்கிய இடத்திற்கு விரைந்து கட்டிடத்திற்கு எச்சரிக்கை கடிதம் ஒன்றை ஒட்டியுள்ளார்.

இக் கட்டடத்தில் நாடாத்திச் செல்லப்படும் மசாஜ் நிலையத்தினை உடனடியாக பூட்டுவதுடன் உரிய அனுமதி பெற்றிருப்பின் 06.02.2017ம் திகதி காலை 9 மணிக்கு நகரசபைக்கு சமர்ப்பிக்குமாறும் உத்தரவிட்டுள்ளார்.

தவறும் பட்சத்தில் தங்களுக்கு எதிராக 1987ம் ஆண்டு நகரசபை கட்டளைச்சட்டம் அத்தியாயம் 255க்கு அமைவாக தங்களுக்கு எதிராக நீதிமன்றத்தில் வழங்குத் தொடரப்படும் என கட்டிடத்தின் முன்னால் நகரசபை செயலாளரால் கடிதம் ஒட்டப்பட்டுள்ளது.

 
வவுனியா புதிய பேரூந்து நிலையத்தில் தனியார் பேரூந்து சேவைகளும் வவுனியா மத்திய பேரூந்து நிலையத்திலிருந்து இ.போ.சபை பேரூந்துகளும் இன்று (05.02.2017) முதல் சேவையில் ஈடுபட்டு வருகின்றனர்.

புதிய பேருந்து நிலையம் திறப்பதற்கு முன்னர் இடம்பெற்ற தனியார் பேரூந்து மற்றும் இ.போ.ச பேரூந்து எவ்வாறு சேவையில் ஈடுபட்டதோ அவ்வாறு சேவையில் ஈடுபடுவதுடன் இணைந்த நேர அட்டவணை தயாரித்து அதன் பின்னர் சேவை புதிய பேருந்து நிலையத்தில் சேவைகள் மேற்கொள்வது என்ற முடிவு நேற்றைய தினம் வவுனியா மாவட்ட செயலகத்தில் நீண்ட கலந்துரையாடலில் பின்னர் எடுக்கப்பட்டு இ.போ.ச. சாலை ஊழியர்கள் மேற்கொண்ட உணவுத் தவிர்ப்பு முடிவுக்குக் கொண்டுவரப்பட்டது.

எனினும் இன்று (05.02.2017) இ.போ.ச பேரூந்துக்கள் மத்திய பேரூந்து நிலையத்திலும் தனியார் பேரூந்துக்கள் புதிய பேரூந்து நிலையத்திலிலும் சேவையில் ஈடுபட்டுவருகின்றனர்.

 
யாழ்ப்பாணத்திலிருந்து வவுனியா நோக்கி பயணிகளுடன் பயணத்தை தொடர்ந்த தனியார் பேருந்து மீது கல்வீச்சுத் தாக்குதல் நடத்திய சம்பவம் ஒன்று இடம்பெற்றுள்ளது. இச் சம்பவம் பற்றி மேலும் தெரியவருவதாவது..

யாழ்ப்பாணத்தில் இருந்து வவுனியா நோக்கி வெள்ளிக்கிழமை (03.02.2017) மாலை 6.00 மணிக்கு 80க்கும் மேற்பட்ட பயணிகளுடன் பயணத்தை ஆரம்பித்த தனியார் பேருந்து கொடிகாமம் சந்தியை கடந்து செல்லும் போது பேரூந்தின் மீது கல்வீச்சு தாக்குதல் இடம்பெற்றுள்ளது.

இத் தாக்குதலில் பேரூந்தின் சாரதி புஸ்பராசா சிவானந்தன் (31 வயது) படுகாயமடைந்ததுடன் பேருந்தில் பயணம் செய்த இருவரும் காயமடைந்துள்ளனர்.

இச் சம்பவம் தொடர்பான மேலதிக விசாரணைகளை கொடிகாமம் பொலிஸார் மேற்கொண்டு வருகின்றனர்.

 
இணைந்த நேர அட்டவணை தயாரிக்கப்படும் வரையில் முன்னர் எவ்வாறு இருதரப்பு பேரூந்து சேவைகளும் இடம்பெற்றதோ அதேபோன்று சேவைகள் இடம்பெறும் என வர்த்தக கைத்தொழில் அமைச்சர் ரிசாட் பதியுதீன் தெரிவித்தார்.

இலங்கை போக்குவரத்து சபை ஊழியர்களின் பணிப் பகிஸ்கரிப்பு மற்றும் உணவுத் தவிர்ப்புப் போராட்டத்தில் ஈடுபட்டு வரும் நிலையில் பேரூந்து சேவையினை சீர் செய்வதற்காக வவுனியா மாவட்ட செயலகத்தில் இடம்பெற்ற கூட்டத்தின் பின்னர் கருத்து தெரிவிக்கும் போதே அவர் இவ்வாறு தெரிவித்தார். தொடர்ந்தும் கருத்து தெரிவித்த அவர்..

இலங்கை போக்குவரத்து சபையினருக்கும் தனியார் போக்குவரத்து துறையினருக்குமிடையில் கடந்த ஐந்து நாட்களாக கருத்து முரண்பாடுகள் காரணமாக இலங்கை போக்குவரத்து சபைத் தரப்பினர் பகிஸ்கரிப்பில் ஈடுபட்டு பஸ் சேவை இடம்பெறாமல் சிரமமான நிலை ஏற்பட்டு இருந்தது.

இந் நிலையில் வட மாகாண போக்குவரத்து அமைச்சர் டெனிஸ்வரன், வட மகாண சுகாதார அமைச்சர் ப.சத்தியலிங்கம், நான் மற்றும் வட மாகாணசபை உறுப்பினர்களான ஜயதிலக, மயூரன் உட்பட அரசாங்க அதிபர், பொலிஸ் தரப்பினர், மற்றும் இலங்கை போக்குவரத்து சபை, தனியார் போக்குவரத்து துறையை சேர்ந்த பொறுப்பானவர்கள் அதனுயை தொழிற்சங்கங்கள் என அனைத்தும் சேர்ந்து பல மணி நேர பேச்சுவார்த்தைக்குப் பின்னர் டெனிஸ்வரன் தலைமையில் அவருக்கு கீழ் உள்ள தலைவர் நிக்கிலஸ்பிள்ளை அவருடன் சேர்ந்து வட மாகாண போக்குவரத்து சபையின் சி.ஆர்.எம். நிறைவேற்றுப் பணிப்பாளர், வட மாகாண தனியார் பேரூந்து சபையின் தலைவர் செயலளார் உட்பட நான்கு உத்தியோகத்தர் வீதம் இணைந்து மிக விரைவில் இணைந்த நேர அட்டவனையினை தயாரிப்பதாகவும் அதனை மிக விரைவில் அமைச்சரிடம் கையளிப்பதாகவும் தெரிவிக்கப்பட்டுள்ளது.

அதன் அடிப்படையில் புதிதாக அமைக்கப்பட்டுள்ள பேரூந்து நிலையம் மாவட்டத்தில் இருந்து நீண்ட தூரத்திற்கான பேரூந்து நிலையமாக செயற்படுமெனவும் அதுவரை இரு தரப்பினரும் புதிய பேரூந்து நிலையம் அமைப்பதற்கு முன்னர் எவ்வாறு செயற்பட்டார்களோ அது போல் முரண்பாடுகள் இன்றி செயற்படுவதற்கும் முடிவெடுக்கப்பட்டதுடன் வவுனியா மாவட்டத்திற்குட்பட்ட உள்ளுர் சேவைகளை பழைய பேரூந்து நிலையத்தில் இரு தரப்பினரும் இணைந்து செயற்படும் வகையில் இணைந்த நேர அட்டவனை தயாரிக்கும் பணி ஆரம்பிக்கப்படவுள்ளது.

எனவே இதற்கு இரண்டு தரப்பினரும் உடன்பட்டுள்ளனர். அதனை மீறும் பட்சத்தில் சட்ட நடவடிக்கை எடுக்கவும் இரு தரப்பினரும் உடன்பட்டுள்ளனர்.

அங்கு கருத்து தெரிவித்த வடமாகாண போக்குவரத்து அமைச்சர் டெனிஸ்வரன், எமது பொதுமக்களுக்கு பாதுகாப்பான சேவையினை நடத்தவேண்டும் என்பதற்காகவே கடந்த காலங்களில் பல நடவடிக்கைகளை எடுத்து வந்துள்ளேன்.

இரண்டு தரப்பினருக்குமிடையில் உள்ள முரண்பாட்டை ஆராய்கின்றபோது இணைந்த அட்டவணை இல்லாமைதான முக்கிய காரணமாக இருக்கின்றது.

குறிப்பாக வெளி மாவட்டங்களுக்கான இணைந்த நேர அட்டவனை தயார் செய்யப்பட்டிருக்கின்றது. இன்றைய தினம் இலங்கை போக்குவரத்து சபையினரின் கோரிக்கையான மாவட்டங்களுக்கிடையிலான உள்ளுர் சேவைக்கான இணைந்த நேர அட்டவணையும் தயார் செய்து அதனை அமுல்படுத்தப்பத்தவும் தாயாராக இருப்பதாகவும் கூறியிருக்கின்றார்கள்.

ஆகவே தனியார் துறையினரிடமும் அது தொடர்பில் கேட்டிருக்கின்றேன். இணைந்த நேர அட்டவணை தயார் செய்யப்பட்வுடன் அதற்கான நடவடிக்கை எடுக்கப்படும். அந்த சந்தர்ப்பத்தில் யாரேனும் அதனை மீறுவார்களேயானால் ஒழுங்கு விதிகளின்படி உரிய நடவடிக்கைகள் எடுக்கப்படும்.

அதேபோல் பல லட்சம் ரூபா பெறுமதியில் புதிய பஸ் நிலையம் அமைக்கப்பட்டுள்ளது. அது தற்காலிகமாகவே மூடப்பட்டுள்ளது. இணைந்த நேர அட்டவணையை ஒரு வார காலத்தில் தயார் செய்து தருகின்றபோது மறுதினத்தில் இருந்தே புதிய பேரூந்து நிலையம் ஆரம்பிக்கப்படும் எனத் தெரிவித்தார்.

இதேவேளை கூட்டத்தில் கலந்துகொண்ட வர்த்தக கைத்தொழில் அமைச்சர் ரிசாட் பதியுதீன், வட மாகாண போக்குவரத்து அமைச்சர் டெனிஸ்வரன், சுகாதார அமைச்சர் ப.சத்தியலிங்கம், வட மாகாணசபை உறுப்பினர்களான செ.மயூரன், ஏ.ஜயதிலக உட்பட்ட பிரமுகர்கள் உணவு தவிர்ப்பு போராட்டத்தில் ஈடுபட்ட இடத்திற்கு சென்று அவர்களின் உணவு தவிர்ப்பு போராட்டத்தினை நிறைவு செய்து வைத்தனர்.

இன்று (04.02.2017) பிற்பகல் 11.30 மணியளவில் வவுனியா மாவட்ட செயலகத்தில் அரசாங்க அதிபர் தலைமையில் இடம்பெற்ற விஷேட கலந்துரையாடலில் புதிய பேரூந்து நிலையத்தினை முடுவதற்கான தீர்மானம் எடுக்கப்பட்டதாக வடமாகாண சபை உறுப்பினர் செந்தில்நாதன் மயூரன் தெரிவித்தார். அவர் மேலும் தெரிவிக்கையில்..

வவுனியா மத்திய பேரூந்து நிலையத்திலிருந்து இ.போ.ச பேரூந்துகளும் முதலாம் குருக்குத்தெரு மற்றும் இரண்டாம் குறுக்குத்தெரு வீதியிலிருந்து தனியார் பேரூந்துகளும் சேவையில் ஈடுபடுவதுடன் வவுனியா புதிய பேரூந்து நிலையத்தினை இன்று முதல் மார்ச் 31ம் திகதி வரை முடுவதற்கு தீர்மானம் எடுக்கப்பட்டதாக தெரிவித்தார்.

 
வவுனியா வாரிக்குட்டியூர் 4ம் யுனிட் பகுதியில் நேற்று(03.02.2017) இரவு 8.45 மணியளவில் மூன்று வீடுகளில் ஆயுதமுனையில் கொள்ளையிடப்பட்டுள்ளது. இச் சம்பவம் தொடர்பாக மேலும் தெரியவருகையில்..

நேற்று இரவும் 8.45 மணியளவில் வவுனியா வாரிக்குட்டியூர் 4ம் யுனிட் பகுதியில் உள்ள வீடு ஒன்றிற்கு சென்ற கொள்ளையர்கள் தம்மை சிஐடி எனத் தெரிவித்து வீட்டில் உள்ளவர்களின் அடையாள அட்டைகளை காட்டுமாறு தெரிவித்துள்ளனர்.

வீட்டின் குடும்பத்தலைவர் அடையாள அட்டையை எடுக்கச் சென்றவேளை அவரையும் வீட்டில் உள்ளவர்களையும் ஆயுதமுனையில் மிரட்டி 17 பவுண் தங்க நகைகள், 66 000 ரூபாய் பணம், கைத்தொலைபேசி ஒன்று உட்பட பெறுமதியான பொருட்களை கொள்ளையிட்டுச் சென்றுள்ளனர்.

கொள்ளையர்கள் தங்கள் முகங்களை கறுப்புத் துணியால் மறைத்திருந்ததாகவும் வாள், கத்தி உட்பட பயங்கர ஆயுதங்களை வைத்திருந்ததாகவும் பணம், நகைகளைத் தருமாறு தம்மைத் தாக்கியதாகவும் வீட்டின் உரிமையாளர் தெரிவித்தார்.

இதே நேரம் அப் பகுதியில் மூன்று வீடுகளில் கொள்ளயிடப் பட்டுள்ளதாக தெரிவிக்கப்படுகின்றது.

சம்பவ இடத்திற்குச் சென்ற தடயவியல் நிபுணர்கள் மோப்ப நாயின் உதவியுடன் விசாரணைகளை மேற்கொண்டுவரும் அதேவேளை பூவரசங்குளம் பொலிசார் மேலதிக விசாரணைகளை மேற்கொண்டு வருகின்றனர்.