இலங்கையின் வரலாற்றில் முதல் தடவையாக அமெரிக்க டொலர் ஒன்றின் பெறுமதி 152 ரூபா 12 சதமாக அதிகரித்துள்ளது.மத்திய வங்கிய நேற்று வெளியிட்டுள்ள நாணய மாற்று வீதத்திற்கமைய இந்த தகவல் வெளியாகயுள்ளது.

கடந்த காலங்களில் டொலரின் விலை அதிகரிக்கும் போதெல்லாம் ரூபாயின் பெறுமதி வீழ்ச்சியடைந்து வந்துள்ளதைக் காட்டுவதாக சுட்டிக்காட்டப்பட்டுள்ளது.

வங்கிகளில் அமெரிக்க டொலர் பற்றாக்குறை நிலவுவதாக வங்கி தகவல் வட்டாரங்கள் தெரிவித்துள்ளன.

இருப்பினும், நிதி அமைச்சர் ரவி கருணாநாயக்க, வங்கிகளில் டொலர் பற்றாக்குறை இல்லையென தெரிவித்திருந்தார்.

எப்படியிருப்பினும் ரூபாயின் வீழ்ச்சியை கட்டுப்படுத்துவதற்காக விசேட தலையீட்டு நடவடிக்கைகள் ஒன்று மேற்கொள்ளப்படாதென அண்மையில் அறிவிக்கப்பட்டுள்ளது.

கோரப்பட்டுள்ள அரிசிக்கான விலைகள் இன்று கிடைக்கவுள்ளதாக கைத்தொழில் மற்றும் வர்த்தக விவகாரங்களுக்கான அமைச்சு தெரிவித்துள்ளது.

புதுடில்லியிலுள்ள இலங்கை உயர்ஸ்தானிகராலயம் ஊடாக இந்தியாவிலிருந்து அரிசி விலைகளை கோரியுள்ளதாக அமைச்சின் செயலாளர் கே.பி. தென்னக்கோன் குறிப்பிட்டார்.

அரிசி விலைகள் கிடைத்தவுடன் முதற்கட்டமாக பத்தாயிரம் மெற்றிக்தொன் அரிசியை இறக்குமதி செய்வதற்கு திட்டமிட்டுள்ளதாக அவர் சுட்டிக்காட்டினார்.

சுமார் ஒரு வாரத்திற்குள் அரிசி தொகையை இறக்குமதி செய்ய எதிர்ப்பார்ப்பதாகவும் அமைச்சின் செயலாளர் கூறினார்.

பாகிஸ்தான், பங்களாதேஷ் போன்ற நாடுகளிடம் இருந்தும் முன்னர் அரிசி இறக்குமதி செய்யப்பட்டுள்ளதால், அந்த நாடுகளிலும் அரிசியின் விலைகள் குறித்து கவனம் செலுத்தியுள்ளதாக அவர் தெரிவித்தார்.

பண்டிகைக்காலத்தை முன்னிட்டு நெற் சந்தைப்படுத்தல் சபையின் களஞ்சியசாலைகளில் கையிருப்பிலுள்ள அரிசி தொகையும் சந்தைக்கு விநியோகிக்கப்படும் என்றும் அவர் குறிப்பிட்டார்.

எதிர்காலத்தில் பருப்பு, சீனி போன்ற அத்தியாவசிய உணவுப் பொருட்களையும் இறக்குமதி செய்து மக்களுக்கு நிவாரண விலையில் விற்பனை செய்வதற்கு அமைச்சு திட்டமிட்டுள்ளது.

அத்தியாவசிய உணவுப் பொருட்களை சதொச நிறுவனத்தின் ஊடாக மக்களுக்கு விநியோகிக்கவுள்ளதாக கைத்தொழில் மற்றும் வர்த்தக விவகார அமைச்சின் செயலாளர் தெரிவித்தார்.

இதேவேளை, எதிர்காலத்தில் 25 வகையான அத்தியாவசிய உணவுப் பொருட்களை மக்கள் இலகுவாக பெற்றுக் கொள்ளக்கூடிய வகையில் நாடளாவிய ரீதியில் எண்ணாயிரம் விற்பனை அலகுகளை அமைப்பதற்கும் உத்தேசிக்கப்பட்டுள்ளது.

இந்த விற்பனை அலகுகளை அமைப்பதற்கான பூர்வாங்க நடவடிக்கைகள் முன்னெடுக்கப்பட்டுள்ளதாக கைத்தொழில் மற்றும் வர்த்தக விவகார அமைச்சின் செயலாளர் மேலும் குறிப்பிட்டார்.

நியூஸிலாந்தில் இடம்பெற்ற தீ விபத்து காரணமாக இலங்கையைச் சேர்ந்த குடும்பம் ஒன்று உயிரிழந்துள்ளது.

தென் ஒக்லாந்து பகுதியில் இன்று இடம்பெற்ற பாரிய தீ விபத்தில் ஒரு முக்கிய குடும்பத்தின் மூன்று தலைமுறைகளை நியூஸிலாந்து அகதி வழக்கறிஞர் இழந்துள்ளதாக நியூஸிலாந்து ஊடகம் தெரிவித்துள்ளது.

குறித்த தீ விபத்தில் இலங்கையைச் சேர்ந்த கைலாஷ் தனபாலசிங்கம் என்பவரின் ஐந்து வயது மகன், மனைவி மற்றும் மாமியார் ஆகியோர் உயிரிழந்துள்ளனர். வைத்தியசாலையில் அனுமதிக்கப்பட்ட கைலாஷை காப்பாற்ற வைத்தியர்கள் போராடி வருகின்றனர்.

இந்த சம்பவத்தில் மூன்று தலைமுறையினர் உயிரிழந்துள்ளதாக கைலாஷின் குடும்ப நண்பர் சிவராம் ஆனந்தசிவம் தெரிவித்துள்ளார்.

தீக்காயங்களுக்கு உள்ளான கைலாஷ் தனபாலசிங்கம் தற்போதுவரையில் வைத்தியசாலையில் சிகிச்சை பெற்று வருவதாக அவரது நண்பர் குறிப்பிட்டுள்ளார்.

தனபாலசிங்கம் தற்போது நியூஸிலாந்து அகதிகள் சபையின் ஒரு நிர்வாக அதிகாரியாக செயற்படுகின்றார். இந்த நிலையில் அவர் அந்த நாட்டில் மிகவும் பாதிக்கப்பட்டுள்ள குடிமக்களுக்கு உதவி செய்வதற்காக தனது வாழ்க்கையை அர்ப்பனித்துள்ளார்.

பாடசாலை மாணவரும் 39 மற்றும் 66 வயதுடைய இரண்டு பெண்களும் Flat Bush பகுதியில் இடம்பெற்ற தீ விபத்தில் உயிரிழந்துள்ளதாக இன்று பிற்பகல் பொலிஸார் தெரிவித்துள்ளனர்.

உயிரிழந்த குறித்த பாடசாலை மாணவின் சகோதரியும் 69 வயதுடைய தாத்தாவும் சம்பவத்தில் தீக்காயங்களுக்குள்ளான நிலையில் வைத்தியசாலையில் சிகிச்சை பெற்று வருகின்றனர்.

47 வயதுடைய தந்தை இன்னமும் ஆபத்தான கட்டத்திலேயே உள்ளார்.

ஹப்புதளை பொலிஸ் பிரிவிற்குட்பட்ட ஒஹிய உடவேரியா தோட்டத்தை சேர்ந்த தோட்ட தொழிலாளி ஒருவர் மின்சாரம் தாக்கியதில் சம்பவ இடத்திலேயே நேற்று (21.12) மாலை பரிதாபமாக உயிரிழந்துள்ளார்.

உடவேரியா தோட்டத்தை சேர்ந்த ஆறுமுகம் சுப்ரமணியம் எனும் 32 வயது மதிக்கத்தக்க 04 பிள்ளைகளின் தந்தை ஒருவரே இவ்வாறு பலியாகியுள்ளார்.

விறகு சேகரிப்பதற்கென சென்றவர் அங்கு மரத்தின் கிளையொன்றினை வெட்டி இழுக்க முயற்சித்த போது அவ் மரக்கிளையானது மின்சாரக்கம்பியில் பட்டதால் உடலில் அதி சக்தி வாய்ந்த மின்சாரம் தாக்கியதால் குறித்த நபர் உயிரிழந்துள்ளதாக பொலிஸாரின் ஆரம்பகட்ட விசாரணைகள் மூலம் தெரியவந்துள்ளது.

உயிரிழந்த தொழிலாளியின் சடலம் பிரேத பிரசோதனைக்காக பொரலாந்தை வைத்தியசாலையில் வைக்கப்பட்டுள்ளது.

சம்பவம் குறித்த மேலதிக விசாரணைகளை ஹப்புதளை பொலிஸார் தொடர்ந்தும் முன்னெடுத்து வருகின்றனர்.

கல்விப் பொதுத்தராதர சாதாரணதரப் பரீட்சை விடைத்தாள் திருத்தும் பணிகள் இரண்டு கட்டங்களாக இடம்பெறும் என, பரீட்சைகள் திணைக்களம் தெரிவித்துள்ளது.

இவற்றில் முதற்கட்டப் பணிகளில் 2017.01.02 தொடக்கம் 2017.01.13ம் திகதி வரை நடைபெறவுள்ளதோடு, 87 பாடசாலைகள் இதற்காக பயன்படுத்தப்படவுள்ளன.

குறிப்பாக இவற்றில் 68 பாடசாலைகள் முழுமையாக பயன்படுத்தப்படுவதால் இவை அடுத்த வருடம் முதலாம் தவணைக்காக ஜனவரி 16ம் திகதி திறக்கப்படவுள்ளன.

பகுதியளவில் பயன்படுத்தப்படும் 19 பாடசாலைகள் உள்ளிட்ட ஏனைய பாடசாலைகள் அனைத்தும் எதிர்வரும் 2ம் திகதி முதலாம் தவணைக்காக திறக்கப்படவுள்ளதாக, பரீட்சைகள் திணைக்களம் வௌியிட்டுள்ள அறிக்கையில் கூறப்பட்டுள்ளது.

மேலும், 150 இலட்சம் வரையான விடைத்தாள்கள் இம்முறை கிடைக்கப் பெற்றுள்ளதாக பரீட்சைகள் திணைக்களம் சுட்டிக்காட்டியுள்ளது.

இதேவேளை, விடைத்தாள் திருத்தப் பணிகளுக்காக, ஹட்டன் ஷாந்த ஜோன் பொஸ்கோ மகா வித்தியாலயம், ஹட்டன் ஹய்லண்ட் வித்தியாலயம், திருகோணமலை ஒரிசில் விவேகானந்தா வித்தியாலயம், மட்டக்களப்பு மைக்கல்ஸ் கல்லூரி, மட்டக்களப்பு வின்சன் மகளிர் உயர்தரப் பாடசாலை, வவுனியா தமிழ் மகா வித்தியாலயம், கிளிநொச்சி மகா வித்தியாலயம், யாழ்ப்பாணம் இந்துக் கல்லூரி, யாழ்ப்பாணம் இந்துப் பெண்கள் பாடசாலை மற்றும் நெல்லியடி மத்திய மகா வித்தியாலயம் உள்ளிட்ட 68 பாடசாலைகளே முழுமையாக பயன்படுத்தப்படவுள்ளன.