புங்குடுதீவு வித்தியா கொலை வழக்கின் சந்தேக நபர்களான மகாலிங்கம் சசிகுமார், மகாலிங்கம் சசீந்திரன் ஆகியோர் நேற்று அவரது தாயாரின் இறுதிக் கிரியைகளில் கலந்து கொண்டனர்.

இறுதிக் கிரியைகளில் கலந்து கொள்வதற்கு ஏதுவாக மூன்றடுக்கு பலத்த பாதுகாப்பு போடப்பட்டிருந்தது.

மேற்படி இரு சந்தேக நபர்களும் நேற்றுக் காலை 8.30 மணி அளவில் சிறையிலிருந்து அவர்களது தாயாரின் பூதவுடல் வைக்கப்பட்டிருந்த ஓட்டுமடத்திலுள்ள மலர்சாலை ஒன்றுக்கு அழைத்துவரப்பட்டிருந்தனர்.

கடந்த ஜுன் மாதம் 17ம் திகதி சிறைச்சாலை அனுமதியுடன் யாழ் போதனா வைத்தியசாலையில் சிகிச்சை பெற்று வந்த மகாலிங்கம் சசிகுமாரது (சுவிஸ் குமார்) தாயார் மரணமானார்.

மரணமான மகாலிங்கம் தவநிதி என்ற குறித்த பெண்மணி மேற்படி வழக்கில் நீதிமன்ற தவணைக்காக வந்திருந்த படுகொலை செய்யப்பட்ட மாணவியின் தாயாரான சரஸ்வதி என்பவரை நீதிமன்ற வளாகத்தில் வைத்து அச்சுறுத்தியதாக குற்றம் சுமத்தப்பட்டு சாட்சிகளை பாதுகாப்பதற்கான கட்டளை சட்டத்தின் பிரகாரம் கைது செய்யப்பட்டு சிறையில் அடைக்கப்பட்டிருந்தார்.

இவ்வாறு சிறையில் அடைக்கப்பட்ட அப்பெண்ணுடன் அவரது சம்பந்தியான சிவதேவன் செல்வராணி என்பவரும் குறித்த சாட்சியை அச்சுறுத்தியதாக குற்றம் சுமத்தப்பட்டு சிறையில் அடைக்கப்பட்டிருந்தார்.

இந்நிலையில் கடந்த வழக்கு தவணையின் போது ஜுன் 21ம் திகதி இறுதிக் கிரியைகள் நடத்த வேண்டி இருந்த காரணத்தினால் சட்டத்தரணி ஒருவர் ஊடாக விண்ணப்பம் ஒன்று செய்யப்பட்டிருந்தது.

இதனடிப்படையில் குறித்த வழக்கில் 4 வது சந்தேக நபரான மகாலிங்கம் சசிதரன், 9ம் சந்தேக நபரான மகாலிங்கம் சசிகுமார் (சுவிஸ்குமார்) ஆகியோருக்கு இறந்த பெண்மணியுடன் சாட்சியை அச்சுறுத்தியதாக கைது செய்யப்பட்ட சிவதேவன் செல்வராணி ஆகியோருக்கும் நீதிமன்றம் இறுதிக் கிரியைகளில் கலந்து கொள்ள அனுமதி வழங்கி இருந்தது.

இவ்வனுமதி வழங்கும் போது ஊர்காவற்றுறை பதில் நீதவான் இ. சபேசன் சந்தேக நபர்கள் இறுதிக் கிரியைகளில் கலந்து கொள்ளும் போது சிறைச்சாலை அதிகாரிகள், பொலிஸ் தரப்புக்கு உரிய பாதுகாப்பு வழங்குமாறு உத்தரவிட்டடுள்ளது.

சடலம் யாழ்ப்பாணம் ஒட்டுமடம் பகுதியில் அமைந்துள்ள கோம்பையன் மணல் இன்பம் மலர்சாலை சூழலில் கடும் பாதுகாப்புக்கு மத்தியில் வைக்கப்பட்டிருந்த்து.

இறுதி கிரியைக்கு இறந்த பெண்மணியின் மகன்களாக மகாலிங்கம் சசிதரன், மகாலிங்கம் சசிகுமார் ஆகியோர் கடும் பாதுகாப்பிற்கு மத்தியில் கைவிலங்கு இடப்பட்டு அழைத்து வரப்பட்டனர்.

ஆனால் இறந்த பெண்மணியுடன் சாட்சியை அச்சுறுத்தியதாக கைது செய்யப்பட்ட சிவதேவன் செல்வராணி அழைத்து வரப்படவில்லை.

அத்துடன் 20 நிமிடம் வரை தாயாரின் இறுதிக் கிரியைகளை மேற்குறித்த இரு சந்தேக நபர்களும் கைவிலங்குடன் நிறைவேற்றினர்.

இறுதியாக தங்கள் சொந்த பந்தங்களுடன் இணைந்து அனுதாபங்களை பகிர்ந்ததுடன் சிறைச்சாலை அதிகாரிகள் இவர்களை மீண்டும் சிறைச்சாலைக்கு கடும் பாதுகாப்புடன் ஏற்றிச் சென்றனர்.

எரிபொருள் விலை உயர்த்தப்பட மாட்டாது என அரசாங்கம் அறிவித்துள்ளது.

அரசாங்கத்தின் வருமானத்தை அதிகரித்துக்கொள்ள எரிபொருள் விலை உயர்த்தப்பட உள்ளதாக செய்யப்படும் பிரச்சாரங்களில் உண்மையில்லை என அரசாங்கம் தெரிவித்துள்ளது.

வற் வரி உயர்விற்கு எதிராக விதிக்கப்பட்டுள்ள நீதிமன்ற இடைக்கால தடை காரணமாக அரசாங்கம் எரிபொருள் விலையை உயர்த்த உள்ளதாக சில தரப்பினர் தெரிவித்திருந்தனர்.

எனினும் அரசாங்கம் வேறும் வழிகளில் வருமானத்தை ஈட்டிக்கொள்ளும் எனவும், எரிபொருள் விலையை உயர்த்தாது எனவும் அரசாங்கத் தகவல்கள் தெரிவிப்பதாக கொழும்பு ஊடகமொன்று செய்தி வெளியிட்டுள்ளது.

கல்கிஸை பிரதேசத்தில் நேற்று இரவு இடம் பெற்ற துப்பாக்கிப் பிரயோகத்தில் ஒருவர் சுட்டு கொலை செய்யப்பட்டுள்ளார்.

இத் தாக்குதலை நடத்தியவர்கள் பாதாள குழுவினை சேர்ந்தவர்கள் என தெரிவிக்கப்பட்டுள்ளதுடன், மேலதிக விசாரணைகளை பொலிஸார் முன்னெடுத்துள்ளனர்.

உயிரிழந்தவரின் சடலம் களுபோவில மருத்துவமனையில் வைக்கப்பட்டுள்ளதுடன், பிரேத பரிசோதனை இன்று இடம்பெறவுள்ளதாகவும் தெரிவிக்கப்படுகின்றது.

யாழ்.பல்கலைக்கழகத்தில் ஏற்பட்ட மோதல் சம்பவம் தொடர்பில் விசாரணைக்காக நியமிக்கப்பட்டுள்ள குழுவின் அறிக்கை கிடைத்ததும் அடுத்தகட்ட நடவடிக்கைகள் எடுக்கப்படும் என்று பிரதமர் ரணில் விக்கிரமசிங்க தெரிவித்தார்.

நாடாளுமன்றத்தில் நேற்று யாழ். பல்கலைக்கழக தாக்குதல் சம்பவம் தொடர்பில் ஆளும், எதிரணி உறுப்பினர்கள் கருத்துகளை வெளியிட்டனர்.

இதன்போதே பிரதமரும் மேற்கண்டவாறு குறிப்பிட்டார். சம்பவம் இடம்பெற்ற பின்னர் பாராளுமன்ற உறுப்பினர் அநுரகுமார திஸாநாயக்க என்னோடு கதைத்தார்.

இதையடுத்து இது பற்றி நான் பாராளுமன்ற உறுப்பினர் மாவை சேனாதிராஜா சம்பவம் தொடர்பில் கேட்டறிந்தேன்.

சட்டமும் ஒழுங்கும் அமைச்சு இதுவிடயத்தில் துரிதமாக செயற்பட்டது. அமைச்சர் சுவாமிநாதனையும் அனுப்பிவைத்திருந்தோம்.

குறிப்பாக இந்தச் சம்பவத்தை இனவாதமாக்குவதற்கு பெரும்பாலானோர் முயற்சிக்கவில்லை. சுமுக நிலைமையை ஏற்படுத்த ஒத்துழைத்த அனைவருக்கும் நன்றி. எனினும், ஒருவர் மாத்திரம் சிலரை தூண்டிவிட்டு இனவாதம் பேசுகிறனர் என அவர் மேலும் தெரிவித்துள்ளார்.

இதேவேளை, மேற்படி சம்பவம் தொடர்பில் பாராளுமன்ற உறுப்பினர் அநுரகுமார திஸாநாயக்க எழுப்பிய கேள்விகளுக்கு பதிலளித்த உயர் கல்வி அமைச்சர் இவ்வாறு கூறியுள்ளார்.

இந்தச் சம்பவம் தொடர்பான விசாரணையானது அந்தப் பிரதேசத்துக்குப் பொறுப்பான கோப்பாய் பொலிஸாரரினாலும் யாழ். பல்கலைக்கழகத்தின் அதிகாரிகளினாலும் மேற்கொள்ளப்பட்டு வருகின்றது.

சம்பவம் தொடர்பில் செயற்பட்ட மாணவர்கள் தனித்தனியாக அடையாளம் காணப்பட்டுள்ளதுடன், அவர்கள் தொடர்பில் ஒழுக்காற்று நடவடிக்கை எடுப்பதற்கு யாழ். பல்கலைக்கழகத்தினால் நடவடிக்கை எடுக்கப்பட்டுள்ளது.

சம்பவம் தொர்பில் சந்தேகிக்கப்படுவதாக பொலிஸாரின் விசாரணையின் மூலம் வெளிப்பட்டுள்ள த.சிசிதரன் என்ற மாணவன் கோப்பாய் பொலிஸாரினால் கைதுசெய்ய நடவடிக்கை எடுக்கப்பட்டிருந்த நிலையில் அவர் சட்டத்தரணி ஒருவர் ஊடாக நீதிமன்றத்தில் ஆஜராகி நீதிமன்றத்தால் பிணையில் விடுதலை செய்யப்பட்டுள்ளார்.

மேற்படி சம்பவம் தொடர்பில் விசாரணை நடத்தும் மூவரடங்கிய குழுவினால் முன்வைக்கப்படும் பரிந்துரைகளுக்கு அமைய அடுத்தகட்ட நடவடிக்கைகளின் நிமித்தமான உரிய முன்னெடுப்புகள் மேற்கொள்ளப்படும்.

பல்கலைக்கழக மானியங்கள் ஆணைக்குழுவின் தலைவர், உப தலைவர் மற்றும் செயலாளர் ஆகியோர் நாளை வெள்ளிக்கிழமை யாழ். பல்கலைக்கழக வளாகத்திற்கு செல்லவுள்ளனர்.

இதன்போது கல்வி மற்றும் கல்விசாரா ஊழியர்களையும் அதேபோல், மாணவர்கள் உள்ளிட்ட அனைத்து மாணவர் அமைப்புகளுடனும் பேச்சுக்களை நடத்தி தற்போதைய நிலைமைகள் பற்றி எனக்கு அறிக்கை சமர்ப்பிக்குமாறு ஆலோசனை வழங்கப்பட்டுள்ளது.

அதேபோல், மாணவர்களால் ஏற்பாடு செய்யப்படும் சகல நடவடிக்கைகளுக்கும் பல்கலைக்கழகத்தின் அனைத்து மாணவர்களினதும் பல்கலைக்கழக நிர்வாகத்தினதும் இணக்கப்பாட்டுடன் மேற்கொள்ளப்படுவதற்கும் பல்கலைக்கழக மானியங்கள் ஆணைக்குழுவினால் உரிய ஆலோசனைகள் வழங்கப்படவுள்ளதாக அவர் மேலும் தெரிவித்துள்ளார்.

இலங்கை யாழ்ப்பாணத்தில் 400 மில்லியன் செலவில் சர்வதேச தரத்திலான கிரிக்கெட் மைதானம் கட்ட திட்டமிட்டிருப்பதாக இலங்கை கிரிக்கெட் சபைத் தலைவர் திலங்க சுமதிபால தெரிவித்துள்ளார்.

இது தொடர்பாக பிரபல பத்திரிக்கை ஒன்றிற்கு அவர் அளித்துள்ள பேட்டியில், சர்வதேச தரத்திலான கிரிக்கெட் மைதானத்தை யாழ்ப்பாணத்தில் கட்ட திட்டமிட்டுள்ளோம்

சுமார் 50 ஏக்கர் நிலப்பரப்பில் கட்டப்படும் இந்த சர்வதேச கிரிக்கெட் மைதானத்தின் கட்டுமான பணிகள் நவம்பர் மாதம் தொடங்கும். 3 ஆண்டுகளில் இந்த பணிகள் முழுவதுமாக முடிந்துவிடும். இருப்பினும் இது கட்டப்படும் இடம் இன்னும் தெளிவாக முடிவு செய்யப்படவில்லை. இதற்கான மொத்த செலவையும் கிரிக்கெட் சபை ஏற்கவுள்ளதாக அவர் தெரிவித்துள்ளார்.