வவுனியாவில் வர்த்தகர் ஒருவரை இனந்தெரியாதவர்கள் நேற்று இரவு கடத்திச் சென்றதற்கு எதிர்ப்பு தெரிவித்தும் இக்கடத்தல் சம்பவத்திற்கு எதிராக எதிர்வரும் வெள்ளிக்கிழமை (24.06.2016) வவுனியாவிலுள்ள வர்த்தக நிலையங்கள் அனைத்தையும் பூட்டி அமைதியான முறையில் கடை அடைப்பினை மேற்கொள்ளுமாறும்,

அன்றைய தினம் தினச்சந்தையில் காலை 9 மணிக்கு ஒன்றுகூடி வர்த்தகர்கள் வவுனியா மாவட்ட செயலகத்திற்கு போரணியாகச் சென்று வவுனியா மாவட்ட அரசாங்க அதிபரிடம் மகஜர் ஒன்றையும் கையளிக்கவுள்ளதாக இன்று இடம்பெற்ற வவுனியா மாவட்ட வர்த்தக சங்க மத்திய குழுக் கூட்டத்தில் முடிவு எடுக்கப்பட்டுள்ளதாக வவுனியா மாவட்ட வர்த்தக சங்கத் தலைவர் திரு. ரி.கே. இராஜலிங்கம் தெரிவித்துள்ளார்.

இனந்தெரியாதவர்களினால் கடத்திச் செல்லப்பட்ட வர்த்தகர் வவுனியா வர்த்தக சங்கத்தில் பொதுச்சபை உறுப்பினராக செயற்பட்டவர் என்பதுடன் வவுனியா மாவட்டத்தில் பிரபல்யமான வர்த்தகர் என்பதும் குறிப்பிடத்தக்கது.

வெள்ளிக்கிழமை இடம்பெறவுள்ள கடை அடைப்பிற்கு சகல வர்த்தக நிலையங்களின் உரிமையாளர்கள் பூரண உத்துழைப்பினை வங்குவதுடன் அமைதியான முறையில் கடை அடைப்பினை மேற்கொள்ளுமாறும் உணவகங்கள், மருந்தகங்கள் உட்பட அனைத்து வர்த்தக நிலையங்களையும் பூட்டி தமது பூரண உத்துழைப்பினை வழங்குமாறும் வர்த்தகர் சங்கத் தலைவர் மேலும் தெரிவித்துள்ளார்.

வவுனியா மாவட்டத்தில் வெளிநாட்டலுவல்கள் அமைச்சு தனது பிராந்திய தூதுவர் அலுவலகத்தை அமைக்க எண்ணியுள்ளது.

அதற்கான கட்டிடம் வவுனியா நகரில் தேவைப்படுவதாக வவுனியா பிரதேச செயலாளர் கா.உதயராஜா அறிவித்துள்ளார்.

இதன் மூலம் கொழும்பை மையமாகக் கொண்ட சேவைகள் பிராந்திய ரீதியாக பரவலாக்கப்பட்டு வழங்கப்படும் எனவும் எதிர்பார்க்கப்படுகின்றது.

மேற்படி அலுவலகத்தை ஆரம்பிப்பதற்கான ஆகக் குறைந்த தகமைகளைக் கொண்ட கட்டடங்கள் வாடகைக்கு அல்லது குத்தகைக்கு கோரப்படுகின்றன.

ஆர்வமுடைய உரிமையாளர்கள் எதிர்வரும் 30.06.2016 க்கு முன்னதாக வவுனியா பிரதேச செயலாளரிடம் தமது விண்ணப்பத்தினை சமர்ப்பிக்க முடியும் என்றும் மேலதிக தகவல்களை வவுனியா பிரதேச செயலகத்தில் பெறமுடியும் என்று மேலும் தெரிவிக்கப்படுகின்றது.

 
வவுனியா பேரூந்து தரிப்பிடத்தில் இன்று (22.06.2016) காலை சடலம் ஒன்று மீட்கப்பட்டுள்ளது.

வவுனியா பேரூந்து தரிப்பிடத்தில் பிச்சை எடுக்கும் பூவரசங்குளம் தட்டங்குளத்தினை சேர்ந்த சின்னையா காளிமுத்து (வயது 65) இன்று காலை வவுனியா பேரூந்து தரிப்பிடத்தில் அமைந்து புத்தக நிலையத்திற்கு அருகாமையில் சடலமாக மீட்கப்பட்டுள்ளார்.

சம்பவ இடத்திற்கு விரைந்த தீடீர் மரண விசாரணை அதிகாரி கிசோர் சடலத்தினை பார்வையிட்டதுடன் சடலம் வவுனியா மாவட்ட பொது வைத்தியசாலையில் வைக்கப்பட்டுள்ளது.

 
வவுனியா மாவட்ட இணைய ஊடக அமைப்பு நேற்று 21.06.2016 மாலை குடியிருப்பு சிறுவர் பூங்காவில் இணைய ஊடக உறுப்பினர்களால் அங்குரார்ப்பணம் செய்து வைக்கப்பட்டது.

வவுனியா மாவட்ட இணையங்களை ஒன்றினைத்து ஊடகவியலாளர்களை ஒழுக்க ரீதியிலும் அவர்களுக்கான பயிற்சி நெறிகளையும் பெற்று திறமையான ஊடகவியலார்களாக உருவாக்குவதற்கான முதற்படியே இணைய ஊடக அமைப்பு உருவாக்கப்பட்டது.

தலைவராக ந.ஜனகன், செயலாளராக ஜே.அருள், பொருளாலராக செல்வி க.தனுசினி, உப தலைவராக ப.கார்த்திக், உப செயலாளராக திருமதி சி. திவ்வியா, இணைய ஊடக உறுப்பினரால் தெரிவு செய்து வைக்கப்பட்தையடுத்து நிர்வாக சபை உறுப்பினர்கள் தெரிவு செய்து வைக்கப்பட்டனர்.

திரு.கதீசன், திரு.வினோத், திரு.லதீப், திரு.தர்சன் ஆகியோர் நிர்வாக சபை உறுப்பினர்களாக தெரிவு செய்யப்படதையடுத்து

ஆலோசனைக் குழு உறுப்பினர்களாக ப.கனேசியஸ், திரு.மாணிக்கம் ஜெகன், திரு.பிரகாஷ் ஆகியோர் தெரிவு செய்யப்பட்டனர்.

தொடர்ந்து தொழிநுட்ப உறுப்பினர்களாக
திரு.பிரதீப், திரு.நிதுஷன் ஆகியோர் இணைய ஊடகவியலாளர்களால் தெரிவு செய்யப்பட்டனர்.

இதனையடுத்து தலைவரால் ஒழுக்க விதிமுறைகள், யாப்பு விதி முறைகள் நடைமுறைப்படுத்துவது தொடர்பாகவும் இணைய ஊடக அமைப்பு உருவாக்கம் தொடர்பாகவும் எதிர்கால செயற்பாடுகள் தொடர்பாகவும் விளக்கமளிக்கப்பட்டது.

அடுத்த கூட்டத்தில் விடுபட்ட இணைய ஊடகவியலாளர்களையும் இணைத்து செயற்படுவதற்கு தீர்மானிக்கப்பட்டதுடன் இன்றைய இணைய ஊடக அமைப்பில் கலந்து கொண்டவர்களின் ஆலோசனைகளும் உள்வாங்கப்பட்டு நடவடிக்கைகள் மேற்கொள்ளப்படவுள்ளதாகவும் தலைவரின் உரையுடன் நிறைவு பெற்றது.

ஊடகப்பிரிவு
இணைய ஊடகவியலாளர் அமைப்பு
வவுனியா மாவட்டம்

 
வவுனியா நகரின் பிரபல வர்த்தகர் ஒருவர் இனந்தெரியாதவர்களினால் நேற்று செவ்வாய்க்கிழமை (21.06.2016) இரவு கடத்திச் செல்லப்பட்டுள்ளார்.

சண்முகம் செல்வராஜா என்ற 55 வயதுடைய வர்த்தகரே, தனது வர்த்தக நிலையத்தில் இருந்து இரவு சுமார் 7 மணியளவில் வீட்டிற்கு மோட்டார் சைக்கிளில் சென்ற போது வீட்டு வாசலில் வைத்து கடத்திச் செல்லப்பட்டுள்ளதாக உறவினர்கள் வவுனியா பொலிஸ் நிலையத்தில் முறையிட்டுள்ளனர்.

முறைப்பாட்டையடுத்து, வெளிக்குளம் இராணி மில் ஒழுங்கையில் உள்ள அவருடைய வீட்டிற்குச் சென்ற பொலிசார் கடத்தப்பட்டவருடைய மோட்டார் சைக்கிள், கைத்தொலைபேசி போன்றவற்றை வீட்டு வாசலில் இருந்து கண்டெடுத்துள்ளனர்.

இச் சம்பவத்தை பொலிசாரும் உறுதி செய்துள்ளனர். இச் சம்பவம் வவுனியா வர்த்தகர்கள் மத்தியில் பெரும் பரபரப்பை ஏற்படுத்தியுள்ளது.

இது குறித்து தமது கவனத்திற்குக் கொண்டு வரப்பட்டுள்ளதாகத் தெரிவித்த வவுனியா வர்த்தக சங்கத் தலைவர் ரீ.கே.இராஜலிங்கம் இக் கடத்தல் சம்பவம் தொடர்பில் எடுக்கப்பட வேண்டிய மேல் நடவடிக்கை குறித்து வர்த்தகர்கள் இன்று புதன்கிழமை கூடி ஆராயவுள்ளதாகத் தெரிவித்தார்.

சண்முகம் முதலாளி என அழைக்கப்பட்ட சண்முகம் ஸ்ரோர்ஸ் மற்றும் அரிசி ஆலைகளின் உரிமையாளராகிய பிரபல முன்னாள் வர்த்தகர் சண்முகம் அவர்களின் புதல்வரான செல்வராஜா எஸ்.எஸ்.ஆர் முதலாளி என நன்கு அறியப்பட்ட பிரபல வர்த்தகராவார்.

இவரை யார் என்ன நோக்கத்திற்காக கடத்தினார்கள் என்பது குறித்து பலரும் குழப்பமடைந்துள்ளனர். குறிப்பாக வர்த்தக சமூகம் பெரும் அதிர்ச்சிக்கும் அச்சத்திற்கும் உள்ளாகியிருக்கின்றது.

சம்பவம் பற்றி அறிந்ததும் வவுனியா மாவட்ட பொலிஸ் அத்தியட்சகர் வசந்த விக்கிரமசிங்க மற்றும் உயரதிகாரிகள் உள்ளிட்ட பொலிசார் உடனடியாக சம்பவ இடத்திற்குச் சென்று பார்வையிட்டு சோதனைகள் நடத்தியதுடன் விசாரணைகளை நடத்தியிருக்கின்றனர்.