வடமாகாண விளையாட்டுத் திணைக்களத்தின் ஏற்பாட்டில் புதுக்குடியிருப்பு பிரதேச செயலகமும் இணைந்து நடாத்திய ஆண், பெண் இருபாலருக்குமான மரதன் ஓட்டப்போட்டி, வேகநடை என்பன நேற்று முன்தினம் (12.06.2016) காலை புதுக்குடியிருப்பு பிரதேச செயலக முன்றலில் இருந்து ஆரம்பமாகியது.

வடமாகாண விளையாட்டுத்துறை செயலாளர் திரு.குருபரன் அவர்கள் தலைமையில் நடைபெற்ற விளையாட்டு நிகழ்வில் பிரதம விருந்தினராக வன்னி மாவட்ட பாராளுமன்ற உறுப்பினர் வைத்திய கலாநிதி சி.சிவமோகன் கலந்து கொண்டு போட்டி நிகழ்வினை ஆரம்பித்து வைத்தார்.

இந்நிகழ்வில் புதுக்குடியிருப்பு பிரதேச செயலாளர் திரு.பிரணவநாதன், மற்றும் உத்தியோகத்தர்கள் விளையாட்டுக் கழக உறுப்பினர்கள் எனப் பலரும் கலந்து சிறப்பித்தனர்.

இருவேறு பகுதிகளில் இடம்பெற்ற வாகன விபத்தில் எட்டு மாதக் குழந்தை உட்பட இருவர் உயிரிழந்துள்ளனர். களுத்துறை – மதுகம வீதியின் ரேன்தபொல பகுதியில் இடம்பெற்ற வாகன விபத்தில் சிறு குழந்தை ஒன்று மரணமடைந்துள்ளது. முச்சக்கர வண்டி ஒன்று வீதியை விட்டு விலகி இவ்வாறு விபத்துக்குள்ளாகியுள்ளதாக பொலிஸார் குறிப்பிட்டுள்ளனர்.

இதன்போது, காயமடைந்த, நால்வர் நாகொடை வைத்தியசாலையில் அனுமதிக்கப்பட்ட வேளை, அதில் 8 மாத குழந்தை ஒன்று பலியாகியுள்ளது. சம்பவம் குறித்த மேலதிக விசாரணைகளை தொடன்கொட பொலிஸார் மேற்கொண்டு வருகின்றனர்.

இதேவேளை, பதியத்தலாவ – மஹவெவ வீதியின் புளுன்கஸ்முல்ல பகுதியில் இடம்பெற்ற விபத்தில் இளைஞர் ஒருவர் உயிரிழந்துள்ளார். மோட்டார் சைக்கிள் ஒன்று தனது கட்டுப்பாட்டை மீறி, வீதியைவிட்டு விலகி இவ்வாறு விபத்துக்குள்ளாகியுள்ளதாக, தெரியவந்துள்ளது.

இதன்போது, படுகாயமடைந்த, மஹஓய – இத்தபொல பகுதியைச் சேர்ந்த 23 வயதான இளைஞர் (மோட்டார் சைக்கிள் சாரதி) பதியதலாவ வைத்தியசாலையில் அனுமதிக்கப்பட்ட பின்னர் பலியாகியுள்ளார்.

வட்டவளை பொலிஸ் பிரிவிற்குட்டபட்ட மயிலாடி தோட்ட குடியிருப்பில் நேற்றிரவு ஏற்பட்ட திடீர் தீ விபத்தில் ஒரு வீட்டிலிருந்த உபகரணங்கள் மற்றும் பல பொருட்கள் முற்றாக எரிந்து நாசமாகியுள்ளது.வீட்டில் பரவிய தீயினால் உபகரணங்கள் அனைத்தும் எரிந்து நாசமாகியுள்ள நிலையில் அயலில் உள்ளவர்களால் தீ பரவாமல் கட்டுப்பாட்டுக்குள் கொண்டு வரப்பட்டுள்ளது.

இதேவேளை இது தொடர்பாக வட்டவளை பொலிஸ் நிலையத்திற்கு பிரதேசவாசிகளால் தகவல் அளிக்கப்பட்டுள்ளது.அதன்பின் சம்பவ இடத்திற்கு விரைந்த பொலிஸார் தீ பரவலுக்கான காரணங்களை கண்டறிய மேலதிக விசாரணகளை மேற்கொண்டு வருகின்றனர்.

போக்குவரத்து சேவையில் ஈடுபடும் பஸ் சாரதிகளுக்கு விசேட அனுமதிப்பத்திரம் அடுத்த மாதம் முதல் வழங்குவதற்கு தீர்மானித்துள்ளதாக போக்குவரத்துப் பிரிவின் பிரதி பொலிஸ்மா அதிபர் அமரசிரி சேனாரத்ன தெரிவித்துள்ளார்.குறித்த அனுமதி பத்திரங்கள் இல்லாமல் போக்குவரத்து சேவையில் ஈடுபடும் சாரதிகளுக்கு எதிராக வழக்குத் தாக்கல் செய்யப்படும் எனவும் அவர் குறிப்பிட்டுள்ளார்.

கொழும்பில் இன்று காலை இடம்பெற்ற ஊடக சந்திப்பிலேயே அவர் இதனைத் தெரிவித்துள்ளார்.போக்குவரத்து சேவையில் ஈடுபடும் அனைத்து பஸ் வண்டி சாரதிகளும் இந்த அனுமதிப்பத்திரத்தை பெறுவது கட்டாயமானது எனவும் அவர் குறிப்பிட்டுள்ளார்.இதேவேளை மோட்டார் சைக்கிளினால் ஏற்படும் விபத்துக்கள் நாளுக்கு நாள் அதிகரித்துள்ளதாகவும் அவர் இதன்போது சுட்டிக்காட்டியுள்ளார்.

கொடுப்பனவு பிரச்சினையை மையப்படுத்தி ஆயுர்வேத வைத்தியசாலை பணியாளர்கள் வேலை நிறுத்தப் போராட்டத்தில் இன்று ஈடுபட்டுள்ளதாக தெரிவிக்கப்பட்டுள்ளது.மேலும் தமது மாதாந்த கொடுப்பனவில் சேர்க்கப்படும் 1000 ரூபாய் 13 மாதங்களாக தமது கணக்கில் சேர்க்கப்படவில்லை என்றும் அதற்கு எதிராகவே இந்த வேலை நிறுத்தப் பேராட்டம் என்றும் அகில இலங்கை ஆயுர்வேத சுகாதார சங்கத்தினர் தெரிவித்துள்ளனர்.

அதற்கமைய பொரளை ஆயுர்வேத போதனா மருத்துவமனை, யக்கல, அம்பாறை, அம்பாந்தோட்டை சமல் ராஜபக்ச மருத்துவமனை, நாவின்ன உள்ளிட்ட இடங்களிலுள்ள ஆயுர்வேத வைத்திய பணியாளர்களே இவ்வாறு வேலை நிறுத்தப் போராட்டத்தில் இறங்கியுள்ளதாக அந்தச் சங்கம் மேலும் குறிப்பிட்டுள்ளது.

சிகிச்சைக்காக வைத்தியசாலைக்குச் சென்ற பெண் ஒருவரின் கையை முறித்த சம்பவம் ஒன்று அனுராதபுரம், நிலுபேவ வைத்தியசாலையில் இடம்பெற்றுள்ளதாக வட்டாரங்கள் தெரிவிக்கின்றன.குறித்த பெண் சுகயீனம் காரணமாக சிகிச்சை பெறுவதற்காக நிலுபேவ வைத்தியசாலைக்கு சென்றிருந்த போதே தாதி ஒருவர் இரத்த பரிசோதனை மேற்கொள்ளும் போது குறித்த பெண்ணின் கையை முறித்துள்ளதாக தெரிவிக்கப்பட்டுள்ளது.

வைத்தியசாலையில் இருந்த அந்த தாதி, பெண்ணின் வளைந்திருந்த (ஊனமுற்ற கை) கையை நீட்டுவதற்கு முயற்சி செய்த போதே இவரது கை முறிந்துள்ளதாக தெரிவிக்கப்பட்டுள்ளது.அனுராதபுரம் பிரதேசத்தை சேர்ந்த 3 பிள்ளைகளின் தாயே இவ்வாறு பாதிக்கப்பட்டுள்ளதாக தெரிவிக்கப்பட்டுள்ளது.

சம்பவத்தையடுத்து பெண் அனுராதபுரம் வைத்தியசாலையில் அனுமதிக்கப்பட்டுள்ளதாக கூறப்பட்டுள்ளது.பாதிக்கப்பட்ட பெண், எனது ஊனமுற்ற கையை தாதி நேராக நீட்டினார் என முறைப்பாடு செய்துள்ளார்.குறித்த பெண் 15 வருடங்களாக மூட்டுப் பிரச்சினை காரணமாக பாதிக்கப்பட்டுள்ளார் என்று பெண்ணின் உறவினர்கள் தெரிவித்துள்ளனர்.

பாதிக்கப்பட்ட பெண்ணின் உறவினர்கள், இது தொடர்பில் மாவட்ட சுகாதார அதிகாரிகளிடம் முறைப்பாடு செய்ய இருப்பதாகத் தெரிவித்துள்ளனர்.

ஜனாதிபதி மைத்திரிபால சிறிசேனவின் பெயரை பயன்படுத்தி பண மோசடியில் ஈடுபட்டஇளைஞர் ஒருவர் கைது செய்யப்பட்டுள்ளார்.குறித்த இளைஞர் தான் ஜனாதிபதி செயலகத்தில் பணிபுரிவதாக அடையாளப் படுத்திக்கொண்டு கந்தளாய் பிரதேச இளைஞர்,யுவதிகளிடம் தொழில் பெற்றுத் தருவதாக கூறி140,000 ரூபாய்களை மோசடி செய்துள்ளதாகவும் கந்தளாய் பொலிஸார் தெரிவித்துள்ளனர்.

கந்தளாய் குற்றப்புலனாய்வு பிரிவினரால் கைது செய்யப்பட்ட குறித்த இளைஞர்சாவதிஸ்ஸபுரயை வசிப்பிடமாகக் கொண்ட 26 வயதுடையவர் என்றும் குறிப்பிட்டுள்ளனர்.

கட்டுநாயக்க – கொழும்பு அதிவேக வீதியில் கடந்த 7ஆம் திகதி பெண் ஒருவர் குழுந்தையை பிரசவித்துள்ள சம்பவம் ஒன்று இடம்பெற்றுள்ளது.குறித்த பெண்ணும், அவரது கணவரும் கொழும்பில் உள்ள வைத்தியரை சந்திப்பதற்காக சிலாபத்திலிருந்து அதிவேகப் பாதையூடாக கொழும்பை நோக்கி வந்துக்கொண்டிருந்த வேளையில் பெண்ணுக்கு பிரசவ வலி எடுத்துள்ளது.

இதனால் இவரது கணவர் வாகனத்தை அதிவேகத்துடன் செலுத்தியதால் இவர்களது வாகனம் பழுதடைந்துள்ளது.இதன்போது குறித்த பெண்ணுக்கு பிரசவ வலி அதிகரித்ததை அடுத்து கணவர் வாகனத்திலிருந்து இறங்கி அதிவேகப் பாதையில் சென்ற ஏனைய வாகனங்களின் உதவியைக் கோரியுள்ளார்.

எனினும் யாரும் இவர்களுக்கு உதவிக்கு வராத சந்தர்ப்பத்தில் குறித்த இடத்திற்கு வந்த பொலிஸார் நிலைமையை புரிந்துக் கொண்டு வைத்தியசாலைக்கு கொண்டு செல்லும் நோக்குடன் தமது வாகனத்தில் குறித்த பெண்ணையும்,அவரது கணவரையும் ஏற்றியுள்ளனர்.பொலிஸாரின் வாகனத்தில் ஏறிய சொற்ப வினாடிகளுக்குள் அந்தப் பெண் குழுந்தையை பிரசவித்துள்ளதாக குறிப்பிடப்பட்டுள்ளது.

இதனையடுத்து குறித்த பொலிஸார் வாகனத்திலேயே குறித்த பெண்ணை கொழும்பில் உள்ள தனியார் வைத்தியசாலை ஒன்றில் அனுமதித்ததாக பொலிஸார் தெரிவித்துள்ளனர்.

தபால் திணைக்கள ஊழியர்கள் ஆரம்பித்த வேலை நிறுத்தப் போராட்டம் தொடர்ந்தும் மேற்கொள்ளப்பட்டு வருவதாக, ஒன்றிணைந்த தபால் தொழிற்சங்க முன்னணியின் இணை ஒருங்கிணைப்பாளர் சிந்தக்க பண்டார தெரிவித்துள்ளார்.

காலை முதல் ஆரம்பமான இந்த தொழிற்சங்க நடவடிக்கை மிகவும் வெற்றிகரமாக தற்போது வரை முன்னெடுக்கப்பட்டு வருவதாக அவர் கூறியுள்ளார்.

தனது பிரச்சினைகளுக்கு அதிகாரிகள் உரிய நடவடிக்கை எடுக்காவிடில், தொடர்ந்தும் தொழிற்சங்க நடவடிக்கைகளை முன்னெடுக்கவுள்ளதாக, சிந்தக்க பண்டார மேலும் குறிப்பிட்டுள்ளார்.